ꓙꓱ-ꓣꓴ-ꓢ-ꓡꓱ ꓐꓬ ꓡꓰ ꓠꓹ ꓟ (ꓡꓴ-ꓘ = 21ꓽ20-28)

ꓡꓳꓹ ꓬꓰˍ ꓟ ꓦꓬꓼ ꓠꓬꓲ ꓕꓯ ꓬꓰ-ꓢꓴ ꓠꓬ ꓐꓬꓱꓼ ꓡꓱꓼ ꓡꓱꓼ ꓡꓰ ꓝꓮꓲ ꓕꓲ ꓧꓪꓹ ꓬꓯꓼ ꓡˍ ꓥꓳ꓾ ꓕꓱ ꓟ ꓟꓽ ꓒꓬꓱꓼ ꓡ ꓢꓰꓽ ꓕꓯ꓾ ꓡꓳꓹ ꓬꓰˍ ꓟ ꓦꓬꓼ ꓠꓬꓲ ꓟꓽ ꓛꓲ ꓡ ꓢꓰꓽ ꓕꓯ ꓠꓻ ꓫꓵꓽ ꓠꓻ ꓙꓰꓽ ꓐꓴ꓾ ꓢꓰꓼ ꓡꓯ ꓘꓳꓹ ꓟ꓾ ꓦꓰꓼ ꓟꓷꓼ ꓡˍ ꓟ꓾ ꓟꓵꓽ ꓓꓵˍ ꓟ꓾ ꓟꓴꓽ ꓗꓪ ꓗꓪ ꓒꓬꓱꓼ ꓡˍ ꓟ ꓫꓵꓽ ꓪꓴ ꓔꓯ ꓧꓶꓸ ꓕꓯ ꓟꓳꓻ ꓪˍ ꓟ ꓔꓯ ꓠꓬꓲꓸ ꓠꓬꓲ ꓟ ꓢꓲꓽ ꓫꓬ ꓕꓳꓽ ꓶꓽ ꓗꓪ ꓑ ꓙꓽ ꓪˍ ꓟ ꓥ ꓡꓳ= ꓕꓱ ꓟ ꓠꓬ ꓐꓯ ꓟꓴ ꓘꓶꓽ ꓟ ꓦꓬꓼ ꓠꓬꓲ꓾ ꓝꓴꓲꓸ ꓪꓽ ꓒꓵꓽ ꓚꓱꓹˍ ꓟ ꓦꓬꓼ ꓠꓬꓲ ꓒꓬꓱꓼ ꓡˍ ꓥꓳ=

ꓖꓳ ꓡꓱ ꓥˍ ꓟꓲ ꓠꓬꓲꓸ ꓠꓬꓲ ꓢꓲꓽ ꓫꓬ ꓕꓳ ꓶꓽ ꓗꓪ “ꓕꓱ ꓟꓬ ꓫꓵꓽ ꓒꓬꓱꓼ ꓡ ꓪꓴꓸ ꓔꓴˍ ꓕꓯ꓾ ꓠꓴ ꓪ ꓠꓬ ꓠꓲꓹ ꓪꓴꓽ ꓪꓴꓽ ꓔꓬ= ꓮ ꓡꓲꓳ ꓐꓯ ꓠꓬ ꓠꓴ ꓪ ꓔꓯ ꓫꓴꓹ ꓣꓴˍ ꓟ ꓦꓬꓼ ꓠꓬꓲ ꓠꓶꓽ ꓡˍ ꓟ ꓥ ꓡꓳ꓾” ꓐꓰ ꓐꓳ ꓔ ꓡꓳ=

ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓣꓳ ꓐꓴ ꓠꓬ ꓐꓱ ꓓꓴꓽ ꓗꓪ ꓐꓱ ꓟꓶ ꓔ ꓢꓴ ꓐꓱ ꓓꓴꓽ ꓗꓪ ꓐꓰ ꓓꓳꓻ ꓙꓰ ꓪ ꓠꓹ ꓟ ꓚꓬꓴꓸ ꓙ ꓖꓶ ꓢꓴ ꓔꓯ ꓦꓴꓻ ꓠꓬꓹ ꓔꓬ ꓢꓴ ꓐꓴˍ ꓡꓰ ꓐꓰ ꓥꓳ= ꓝꓴꓲꓸ ꓐꓰ ꓫꓵˍ ꓟ ꓬꓲ ꓚꓳ ꓑꓸ ꓐꓴˍ ꓡꓰ ꓐꓰ ꓐꓱꓽ ꓓꓴꓽ ꓗꓪ ꓐꓱ ꓟꓶ ꓔ ꓢꓴ ꓐꓴ ꓥ ꓡꓳ= ꓣꓳ ꓐꓴ ꓠꓬ ꓙꓲˍ ꓟ ꓐꓰ ꓥꓶˍ ꓟ ꓐꓯ ꓟ ꓤꓶꓻ ꓦꓬꓼ ꓠꓬꓲ ꓗꓪ ꓞꓳ ꓙꓳ ꓢꓯꓸ ꓔꓬ ꓪˍ ꓡꓳ= ꓣꓳ ꓚꓲꓸ ꓛꓬ ꓐꓴ ꓥˍ ꓟꓲ ꓚꓬꓴꓸ ꓟꓶ ꓠꓹ ꓟ ꓐꓱ ꓶ ꓥꓳ ꓡꓳꓸ ꓔꓬ ꓖꓴˍ ꓡꓳ=

ꓖꓳ ꓟ ꓑꓶꓸ ꓓꓴ ꓬꓲ ꓘꓳꓼ ꓕꓲ ꓘꓳꓼ ꓡꓰ ꓕꓲ ꓘꓳꓼ ꓖꓴ ꓡꓰ ꓔꓬ ꓟˍ ꓡꓰ ꓐꓰ ꓣꓳ ꓐꓴ ꓠꓬ ꓙꓳꓺ ꓠꓯꓹ ꓟ ꓠꓻ ꓫꓵꓽ꓾ ꓟꓯꓼ ꓘꓶꓽ꓾ ꓟꓵꓽ ꓓꓵˍ ꓟ ꓾ ꓦꓰꓼ ꓟꓷꓼˍ ꓟ ꓕꓱ ꓟꓬ ꓙꓰꓽ ꓟ ꓫꓸ ꓙꓵ ꓓꓴ ꓐꓴ ꓔꓯ ꓡꓰꓽ ꓙꓳꓺ ꓔꓬ ꓠꓯꓹ ꓟ ꓟꓽ ꓥ= ꓕꓲ ꓠꓬꓲ ꓙꓳˍ ꓕꓯ ꓢꓲꓺ ꓒ ꓬꓰ-ꓢꓴ ꓐꓰ ꓫꓵꓻˍ ꓥ ꓟꓲ꓾ ꓟꓽ ꓥ ꓠꓬ꓾ ꓢꓲ ꓒ ꓬꓰ-ꓢꓴ ꓝꓮꓲ ꓕꓲ ꓧꓪꓹ ꓬꓯꓼ ꓡˍ ꓕꓯ ꓥ ꓟꓲ ꓣꓳ ꓐꓴ ꓟꓳꓻ ꓪ ꓾ꓔꓳꓹ ꓜꓳꓽ ꓪˍ ꓟ ꓥ ꓡꓳ=

ꓮ ꓡꓰ ꓕꓲ ꓙꓵꓹ ꓕꓯ ꓥ ꓟꓲ ꓣꓳ ꓐꓴ ꓔꓯ ꓝꓴꓲꓸ ꓐꓰ ꓫꓵꓻ ꓓꓴꓽ ꓗꓪ ꓐꓰ ꓚꓬꓴꓸ ꓙˍ ꓟ ꓟꓲ-ꓢ-ꓬ ꓢꓲ ꓒ ꓔꓯ ꓠꓲꓹ ꓒꓵꓽ ꓠꓲꓹ ꓡꓱ ꓘꓳ ꓣꓴ ꓢꓲ ꓬꓲꓸ ꓟꓴꓽ ꓗꓪ ꓗꓴꓷꓼ ꓗꓪ ꓣꓳ ꓐꓴ ꓗꓹ ꓛꓲꓽ ꓛꓲꓽ ꓡꓰ ꓓꓵꓽ ꓙꓰ ꓐ ꓡ ꓠꓹ ꓟ ꓬꓲ ꓔꓯ ꓘꓳꓹ ꓣꓴ ꓡꓯ= ꓮ ꓡꓲꓳ ꓐꓯ ꓠꓬ ꓠꓴ ꓪ ꓔꓯ ꓫꓴꓹ ꓣꓴˍ ꓟ ꓦꓬꓼ ꓠꓬꓲ ꓠꓶꓽ ꓡˍ ꓟ ꓥ ꓡꓳ=