ꓟ-ꓕ ꓐꓰ ꓟ-ꓡꓲ (ꓶꓼ ꓓꓳ ꓫꓱꓹ ꓓꓳ)

ꓠꓬꓲ. ꓠꓬꓲ ꓗꓪ ꓵ ꓠ ꓔ ꓟ ꓟ. ꓟꓲ: ꓠꓬ ꓬꓳ-ꓠ ꓕꓳ: ꓶ 3:1-10꓾ ꓶꓼ ꓓꓳ ꓫꓱꓹ ꓓꓳ ꓕꓳ ꓶ ꓗꓪ ꓡꓴ-ꓘ ꓕꓳ ꓶ 10:38-42 ꓥ ꓡꓳ= ꓟ. ꓟꓲ: ꓬꓲ ꓪꓴ. ꓕꓲ ꓔꓳ ꓗꓪ ꓪꓴ-ꓢ ꓡꓰ ꓬꓳ- ꓠ ꓔꓯ ꓠꓲ-ꓠꓲ-ꓪꓱ ꓡꓳ ꓒꓱ ꓗꓪ ꓙꓰ ꓢꓲ ꓟ. ꓟꓲ: ꓚꓺ ꓝꓲˍ ꓟ ꓥ ꓡꓳ=

ꓠꓲ-ꓠꓲ-ꓪꓱ ꓗꓪ ꓔꓬ ꓟ ꓞꓳ ꓤ ꓮ ꓙꓵ: ꓠꓬ ꓝꓴꓲ. ꓬꓰ ꓢꓲ ꓝꓴꓲ. ꓠꓯꓸꓼ ꓙꓪ ꓗꓹ ꓛꓲ: ꓢꓲ ꓠꓬꓲ ꓪꓴ-ꓢ ꓠꓬ ꓬꓲ ꓪ ꓡꓳ ꓒꓱ ꓔꓯ ꓐꓬ ꓡꓰ ꓝꓲ ꓠꓹ ꓟ ꓬꓰˍ ꓥꓳ꓾ ꓐꓰ ꓬꓳ-ꓠ ꓔꓯ ꓐꓰ ꓝꓲ ꓩꓴ ꓢꓲ ꓐꓯ ꓟ ꓥ ꓡꓳ=

ꓖꓳ ꓡꓱ ꓐꓯ ꓥ ꓟꓲ ꓠꓲ-ꓠꓲ-ꓪꓱ ꓡꓳ ꓒꓱ ꓗꓪ ꓟ ꓪ ꓔꓲ ꓗꓪ ꓐꓰ ꓪꓴ. ꓔꓴ ꓢꓲ ꓑ ꓫꓬ ꓮ ꓙꓵ:꓾ ꓙꓱ ꓤ ꓙꓱ ꓟꓲ ꓮ ꓙꓵ: ꓠꓬ ꓪꓴ-ꓢ ꓐꓯ ꓘꓶ: ꓠ ꓠꓹ ꓢꓲ ꓠꓲꓹ ꓟ ꓡꓶ.ˍ ꓡꓳ= ꓜ ꓓꓴ ꓚꓲˍ ꓡꓳ= ꓝꓴꓲ. ꓑꓶ. ꓓꓴ ꓠꓲꓹ ꓟ ꓫ ꓡꓳ= ꓖꓳ ꓡꓱ ꓬꓰˍ ꓕꓯ ꓪꓴ-ꓢ ꓡꓰ ꓬꓲ ꓪ ꓔꓯ ꓝꓴꓲ. ꓟ: ꓖꓶ: ꓟ ꓟ. ꓟꓲ: ꓥ ꓡꓳ=

ꓶꓼ ꓓꓳ ꓫꓱꓹ ꓓꓳ ꓕꓳ ꓶ ꓗꓪˍ ꓟꓲ ꓢꓲꓺ ꓒ ꓬꓰ-ꓢꓴ ꓔꓯ ꓟ-ꓕ ꓐꓰ ꓟꓬꓱꓺ ꓔ ꓟ ꓤ ꓟꓶ ꓤ ꓦꓲꓻ ꓗꓪ ꓘꓳ ꓣꓴˍ ꓡꓳ= ꓖꓳ ꓕꓯ ꓟ-ꓕ ꓠꓬ ꓬꓲ ꓦꓲ ꓗꓪ ꓬꓰ ꓠꓯꓹ ꓟ ꓟꓬꓱ: ꓔꓯ ꓡꓰ: ꓬꓰ ꓔꓬ ꓡꓳ= ꓬꓰ-ꓢꓴ ꓔꓯ ꓛꓳ ꓢꓴ ꓐꓴ ꓔꓯ ꓖꓶ ꓜ: ꓖꓶ ꓓꓳ ꓠꓹ ꓟ ꓫꓬꓹ ꓦꓲ. ꓔꓬ ꓡꓳ= 

ꓖꓳ ꓕꓯ ꓬꓲ ꓠꓬꓲꓺ ꓟ ꓟ-ꓡꓲ ꓠꓬ ꓢꓲꓺ ꓒ ꓬꓰ-ꓢꓴ ꓬꓲ ꓛꓲꓺ ꓔꓲꓺ ꓗꓪ ꓠꓬꓲ. ꓠ. ꓢꓲ ꓪꓴ-ꓢ ꓟ. ꓟꓲ: ꓠ ꓠꓹ ꓔꓬ ꓡꓳ= ꓖꓳ ꓡꓱ ꓠꓬꓲ ꓟ-ꓕ ꓡꓰ ꓢꓲꓺ ꓒ:ꓳ ꓟꓬꓱ: ꓕꓱ ꓟꓬ ꓟ ꓥꓼ ꓕꓲ ꓣꓳˍ ꓡꓰ: ꓬꓰ ꓠ ꓔ ꓡ꓾ ꓐꓰ ꓠ ꓠꓬꓲˍ ꓟ ꓟ. ꓟꓲ: ꓥ ꓡꓳ=

ꓢꓲꓺ ꓒ ꓬꓰ-ꓢꓴ ꓡꓰ ꓬꓲ ꓔꓯ ꓟ-ꓕꓺꓳ ꓟ-ꓕꓺꓳ ꓠꓴ ꓠꓬ ꓟꓲꓺ ꓠꓯ ꓐꓱ ꓶ ꓠꓲꓹ ꓟ ꓟꓬ:ˍ ꓡꓳ= ꓟꓲ ꓠꓯ ꓗꓪ ꓟ: ꓙꓳ ꓟ: ꓓ꓾ ꓟ: ꓬꓰ ꓟ: ꓓ ꓟ ꓟꓬꓱ: ꓕꓲ ꓟˍ ꓡꓰ: ꓙꓳˍ ꓡꓳ= ꓕꓱ ꓟ ꓔꓯ ꓟ-ꓡꓲ ꓡꓰ ꓢꓲꓺ ꓗꓷꓳ꓾ ꓐꓯ ꓡꓳ=

Add new comment

1 + 7 =