ꓞꓳ ꓐꓳ ꓟꓴꓽ ꓗꓪ ꓗꓴꓷꓼ ꓗꓪ ꓓꓵꓽ ꓡꓰ ꓫꓸˍ ꓟ

ꓢꓲ ꓒ ꓬꓰ-ꓢꓴ ꓠꓬ ꓬꓲ ꓝꓲ ꓓꓴ ꓐꓴ ꓔꓯ ꓞꓳ ꓐꓳ ꓠꓬ ꓟꓴꓽ ꓗꓪ ꓗꓴꓷꓼ ꓗꓪ ꓓꓵꓽ ꓙꓰ ꓫꓸ ꓟ ꓔꓯ ꓐꓯ ꓟꓳꓸ ꓖꓶˍ ꓡꓳ= ꓞꓳ ꓐꓳ ꓕꓲ ꓣꓳ ꓟꓴꓽ ꓗꓪ ꓗꓴꓷꓼ ꓗꓪ ꓮ ꓡꓲ ꓟꓬ ꓛꓲ ꓓꓵꓽ ꓙꓰ ꓫꓸ ꓡ ꓐꓯ ꓟ ꓔꓯ ꓡꓳꓽ ꓕꓳ ꓕꓲ ꓟ ꓪꓳꓼ ꓠ ꓗ ꓗꓪ ꓓꓵꓽ ꓙꓰˍ ꓟ ꓢꓶꓸ ꓟꓽ ꓞꓲ ꓞꓳ ꓐꓳ ꓕꓲ ꓣꓳ ꓟꓴꓽ ꓗꓪ ꓗꓴꓷꓼ ꓗꓪ ꓓꓵꓽ ꓙꓰ ꓠꓹ ꓟ ꓪ ꓜꓲ ꓫꓸ ꓡꓳ ꓐꓰ ꓢꓲ ꓒ ꓬꓰ-ꓢꓴ ꓡꓰ ꓬꓲ ꓝꓲ ꓓꓴ ꓔꓯ ꓐꓯ ꓖꓶˍ ꓡꓳ= ꓖꓳ ꓕꓯ ꓬꓲ ꓝꓲ ꓓꓴ ꓐꓴ ꓠꓬ ꓓꓵꓽ ꓙꓽ ꓮ’ ꓡꓰ ꓢꓲ ꓠꓬꓲ ꓖꓳ ꓡꓱ ꓠꓬ ꓮ ꓟꓽ ꓠꓬ ꓚꓬꓴꓸ ꓟꓶ ꓓꓹ ꓡ ꓐꓰ ꓠꓺ ꓠꓬꓲˍ ꓡꓳ= ꓖꓳ ꓕꓯ ꓢꓲ ꓒ ꓬꓰ-ꓢꓴ ꓡꓰ ꓞꓳ ꓤ ꓠꓬ ꓟꓽ ꓐ ꓡ= ꓪꓴ-ꓢ ꓠꓽ ꓮ ꓫꓵꓽˍ ꓟꓲ ꓬꓰ ꓐ ꓡˍ ꓡꓳ꓾ ꓐꓰ ꓒꓳꓹ ꓖꓶˍ ꓡꓳ=

ꓖꓳ ꓡꓱ ꓠꓬꓲ ꓢꓲ ꓒ ꓬꓰ-ꓢꓴ ꓡꓰ ꓐꓯ ꓟ ꓞꓳ ꓐꓳ ꓠꓬ ꓟꓴꓽ ꓗꓪ ꓗꓴꓷꓼ ꓗꓪ ꓓꓵꓽ ꓙꓰ ꓫꓸˍ ꓡꓳ ꓐꓯ ꓟ ꓠꓬ ꓮ ꓫꓵꓽ ꓔꓯ ꓐꓯ ꓡ ꓐꓯ ꓟ ꓔꓯ ꓓꓵꓽ ꓙ ꓠꓬꓲ ꓡꓯ= ꓟꓴꓽ ꓗꓪ ꓗꓴꓷꓼ ꓐꓯ ꓟ ꓠꓬ ꓮ ꓫꓵꓽ ꓥ ꓡ= ꓢꓲ ꓒ ꓬꓰ-ꓢꓴ ꓡꓰ ꓣꓳ ꓔꓯ ꓮ ꓕꓯ ꓟꓲ ꓐꓯ ꓖꓶ ꓡ ꓔꓬ ꓟ ꓟꓴꓽ ꓗꓪ ꓗꓴꓷꓼ ꓠꓬ ꓣꓳ ꓠꓲꓹ ꓟ ꓠꓯꓸꓼ ꓗꓪ ꓓꓹ ꓡꓳ ꓐꓰ ꓣꓳ ꓔꓯ ꓐꓯ ꓖꓶ ꓡ ꓔꓬ ꓟ ꓥ ꓡꓳ=
ꓟꓲ ꓠꓯ ꓕꓱ ꓟ ꓗꓪ ꓔꓬ ꓕꓯ ꓡꓰ ꓪꓴ-ꓢ ꓔꓯ ꓙꓵꓻ ꓢꓲ ꓬꓲ ꓐꓯ ꓘꓶꓽ ꓔꓯ ꓒꓵꓽ ꓛꓳˍ ꓕꓯ ꓣꓳ ꓠꓬ ꓠꓲꓹ ꓟ ꓠꓯꓸꓼ ꓗꓪ ꓗꓹ ꓛꓲꓽ ꓛꓲꓽ꓾ ꓢꓲ ꓡꓲ ꓡꓲ ꓐꓰ ꓔꓬ ꓐ ꓡ ꓢꓲ ꓠꓬꓲ ꓮ ꓟꓶ ꓕꓯ ꓡꓰ ꓟꓴꓽ ꓗꓪ ꓗꓴꓷꓼ ꓬꓲ ꓗꓹ ꓛꓲꓽˍ ꓟ ꓔꓯ ꓣꓳ ꓑꓯꓹ ꓟꓶ ꓔꓬ ꓡꓳ꓾ ꓐꓰ ꓣꓳ ꓔꓯ ꓐꓯ ꓖꓶ ꓡˍ ꓡꓳ= ꓖꓳ ꓡꓱ ꓠꓬꓲ ꓢꓲ ꓒ ꓬꓰ-ꓢꓴ ꓡꓰ ꓠꓴ ꓒꓵꓽ ꓶ ꓓꓹ ꓗꓪ ꓠꓬ ꓠꓴ ꓠꓲꓹ ꓟ ꓓꓹ ꓡꓳ꓾ ꓐꓰ ꓣꓳ ꓔꓯ ꓐꓯ ꓖꓶ ꓡˍ ꓡꓳ=

ꓖꓳ ꓡꓱ ꓠꓬꓲ ꓞꓳ ꓐꓳ ꓕꓲ ꓣꓳ ꓔꓯ ꓡꓳꓸ ꓠꓬꓲꓸˍ ꓕꓯ꓾ ꓔꓯꓺ ꓥꓳꓽ꓾ ꓬꓲ ꓠꓬ ꓬꓲ ꓔꓯ ꓒꓴ ꓫꓵꓺ ꓙꓳˍ ꓟ ꓔꓯ ꓡꓰꓽ ꓬꓲ ꓠꓲꓹ ꓟ ꓠꓯꓸꓼ ꓗꓪ ꓗꓶ ꓔ ꓕꓯ꓾ ꓕꓲ ꓠꓬꓲ ꓕꓲ ꓠꓬꓲ ꓒꓴ ꓧꓪ ꓠꓹ ꓟ꓾ ꓟꓲꓽ ꓕꓯ ꓙꓲ ꓡ ꓢꓲ ꓟꓬꓺ ꓢꓶꓽ ꓒꓴ ꓡ ꓕꓯ ꓡꓰ ꓒꓴ ꓔꓯ ꓮ ꓡꓲ ꓐꓰ ꓧꓪ ꓠꓹ ꓟ꓾ ꓠꓱꓸ ꓐꓯ ꓢꓴ ꓕꓲ ꓣꓳ ꓔꓬ ꓗꓪ ꓐꓰ ꓒꓴ ꓮ ꓡꓲ ꓘꓳꓹ ꓜꓽ ꓠꓹ ꓟ ꓔꓯ ꓡꓰꓽ ꓓꓵꓽ ꓙ ꓔꓬ ꓠꓬ ꓟꓴꓽ ꓗꓪ ꓗꓴꓷꓼ ꓗꓪ ꓓꓵꓽ ꓙꓰ ꓟꓽ ꓐ ꓡ= 
ꓢꓲ ꓒ ꓬꓰ-ꓢꓴ ꓡꓰ ꓐꓯ ꓟ ꓞꓳ ꓐꓳ ꓟꓴꓽ ꓗꓪ ꓗꓴꓷꓼ ꓗꓪ ꓓꓵꓽ ꓙꓰ ꓟꓽ ꓓ ꓐꓯ ꓟ ꓠꓬ꓾ ꓞꓳ ꓐꓳ ꓖꓳ ꓟ ꓠꓬ ꓬꓲ ꓠꓲꓹ ꓟ ꓠꓬ ꓮ ꓡꓲ ꓫꓵꓽ ꓔꓯ ꓠꓲꓹ ꓥꓳꓺ ꓓꓹ ꓡ꓾ ꓐꓯ ꓟ ꓔꓯ ꓣꓳ ꓡꓳꓸ ꓠꓬꓲ ꓠ ꓗꓹ ꓡꓳ= ꓙꓲꓻˍ ꓟ ꓞꓳ ꓐꓳ ꓥ ꓟꓲ ꓮ ꓟꓬꓹ ꓙꓳˍ ꓡꓳ= ꓫꓸ ꓢꓴ ꓟꓷꓼ ꓢꓴ ꓔꓯ ꓬꓰ ꓙ꓾ ꓔꓱꓹ ꓜꓳꓽˍ ꓟ ꓟꓬꓱꓽ ꓬꓰ ꓔꓬ ꓟ ꓞꓳ ꓐꓳˍ ꓟꓲ ꓙꓳˍ ꓡꓳ= ꓖꓳ ꓟˍ ꓡꓰ ꓐꓰ ꓫꓸ ꓢꓴ ꓥ ꓕ ꓑꓳꓸꓼ ꓥ ꓟꓲ ꓟꓴꓽ ꓗꓪ ꓗꓴꓷꓼ ꓗꓪ ꓟꓽ ꓛꓲ ꓬꓰ= ꓫꓸ ꓔꓬ ꓟ ꓙꓵꓹ ꓗꓪ ꓬꓲ ꓠꓬ ꓪꓴ-ꓢ ꓔꓯ ꓙꓱꓽ ꓠꓬꓲ꓾ ꓬꓲ ꓔꓯ ꓒꓴ ꓟꓽ ꓙꓳ ꓟ꓾ ꓠꓱꓸ ꓐꓯ ꓬꓲ ꓔꓯ ꓟꓽ ꓙꓳ ꓟ ꓑꓶꓸ ꓓꓴ ꓠꓲꓹ ꓫ ꓟꓬ ꓫ ꓢꓲ ꓠꓬꓲ ꓪꓴ-ꓢ ꓔꓯ ꓟꓽ ꓦ ꓡꓱ꓾ ꓪꓴ-ꓢ ꓔꓯ ꓪꓽ ꓟꓽ ꓘꓴ ꓬꓰ ꓔꓬ ꓕꓯ ꓫꓸ ꓢꓴ ꓥˍ ꓟꓲ ꓟꓴꓽ ꓗꓪ ꓗꓴꓷꓼ ꓗꓪ ꓛꓲ ꓬꓰ ꓟꓽ ꓓ=

ꓖꓳ ꓡꓱ ꓠꓬꓲ ꓟꓴꓽ ꓗꓪ ꓗꓴꓷꓼ ꓗꓪ ꓛꓲ ꓬꓰ ꓐ ꓡ ꓢꓴ ꓠꓬ ꓮ ꓡꓲ ꓫꓵꓽ ꓥ ꓡ ꓐꓯ ꓕꓯ ꓤ ꓠꓱ ꓤ ꓕꓲ ꓣꓳˍ ꓡꓰ ꓐꓰ ꓬꓲ ꓠꓬ ꓪꓴ-ꓢ ꓔꓯ ꓕꓲ ꓠꓲꓹ ꓟ ꓡꓱꓸꓼ ꓕꓲ ꓙꓽ ꓠꓲꓹ ꓡꓱꓸꓼ ꓙꓵꓻ ꓢꓲ ꓠꓬꓲ ꓕꓲ ꓠꓬꓲ ꓕꓲ ꓠꓬꓲ ꓪꓴ-ꓢ ꓔꓯ ꓦ ꓡꓱ ꓢꓲ ꓞꓳ ꓙꓳ ꓙꓰ ꓢꓴ ꓠꓬ ꓟꓴꓽ ꓗꓪ ꓗꓴꓷꓼ ꓗꓪ ꓛꓲꓺ ꓬꓰ ꓐ ꓡ ꓢꓴ ꓥ ꓡꓳ=
ꓢꓲ ꓒ ꓬꓰ-ꓢꓴ ꓡꓰ ꓕꓱ ꓡꓱ ꓐꓯ ꓔ ꓡꓳ= ꓬꓲ ꓔꓯ ꓢꓲꓺ ꓒꓽꓳ ꓢꓲꓺ ꓒꓽꓳ ꓐꓰ ꓘꓴꓻ ꓢꓴ ꓥ ꓕ ꓑꓳꓸꓼ ꓟꓴꓽ ꓗꓪ ꓗꓴꓷꓼ ꓗꓪ ꓛꓲ ꓬꓰ ꓟꓽ ꓓ꓾ ꓐꓰ ꓐꓯ ꓔ ꓡꓳ=

ꓖꓳ ꓡꓱ ꓠꓬꓲ ꓞꓳ ꓐꓳ ꓣꓱꓽ ꓢꓴ ꓐꓴ ꓥ ꓟꓲ ꓟꓷꓽ ꓠꓷꓹ ꓘꓶꓽ ꓗꓪ ꓐꓰˍ ꓡꓰꓽ ꓪꓴ-ꓢ ꓔꓯ ꓦꓻ ꓡꓱˍ ꓔꓬ ꓕꓯ꓾ ꓬꓲ ꓔꓯ ꓙꓳˍ ꓟ ꓠꓱꓸ ꓐꓯ ꓢꓴ ꓔꓯ ꓟꓽ ꓐꓱ ꓖꓶ꓾ ꓕꓱ ꓡꓱ ꓬꓰˍ ꓕꓯ ꓬꓲ ꓠꓬ ꓟꓴꓽ ꓗꓪ ꓗꓴꓷꓼ ꓗꓪ ꓛꓲ ꓬꓰ ꓟꓽ ꓓ=

ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓢꓲ ꓒ ꓬꓰ-ꓢꓴ ꓐꓯ ꓘꓶꓽ ꓗꓪ ꓐꓰ ꓣꓳ ꓦꓻ ꓢꓯꓼ ꓪ ꓣꓴ ꓢꓲ ꓣꓳ ꓠꓲꓹ ꓟ ꓠꓬ ꓮ ꓡꓲ ꓗꓪ ꓓꓹ ꓡꓺꓽ ꓐꓯ ꓟ ꓓꓵꓽ ꓙ ꓠꓬꓲ ꓡꓯ= ꓣꓳ ꓒꓵꓽ ꓶ ꓓꓹ ꓗꓪ ꓠꓬ ꓣꓳ ꓠꓲꓹ ꓟ ꓓꓹ ꓡꓳ꓾ ꓐꓰ ꓢꓲ ꓒ ꓬꓰ-ꓢꓴ ꓡꓰ ꓐꓯ ꓔ ꓟˍ ꓡꓰ ꓐꓰ ꓣꓳ ꓒꓵꓽ ꓶ ꓠꓬ ꓟꓴꓽ ꓗꓪ ꓗꓴꓷꓼ ꓗꓪ ꓡꓰꓽ ꓓꓹˍ ꓠꓹ ꓟ ꓢꓯꓼ ꓕꓵꓼ ꓙꓰ ꓡꓯ ꓐꓰ ꓬꓲꓼ ꓠꓬꓲꓸ ꓖꓶ ꓠꓲꓹ ꓫꓵˍ ꓡꓳ=