ꓞꓼ ꓐꓳ ꓐꓰ ꓠꓬꓲ ꓟꓳꓻ ꓓꓴ ꓔꓯ ꓥꓳꓽ (Sunday reflection)

ꓞꓼ ꓐꓳ ꓐꓰ ꓠꓬꓲ ꓟꓳꓻ ꓓꓴ ꓔꓯ ꓥꓳ꓿

ꓠꓴ ꓪ ꓠꓬ ꓟꓲ ꓠꓯ ꓗꓪ ꓔꓬ ꓢꓴ ꓐꓱ ꓶ ꓞꓼ ꓐꓳ ꓥ ꓡꓳ꓿ ꓖꓳ ꓡꓱ ꓥˍ ꓟꓲ ꓞꓼ ꓐꓳ ꓬꓲ ꓢꓯꓼ ꓒꓲꓼ ꓬꓰ ꓠꓬ ꓝꓮꓲ ꓛꓵ ꓡ ꓝꓲ ꓟꓽ ꓠ ꓠꓬꓲ ꓣꓱꓽ ꓬꓯꓼ ꓖꓴ ꓟꓽ ꓙꓳ꓿ ꓠꓱ. ꓫꓱ. ꓗꓪ ꓡꓳ ꓩꓴ ꓗꓸꓼ ꓢꓲ ꓞꓳ ꓞ ꓛꓲ ꓒꓯ, ꓕꓳꓼ ꓓꓴ ꓗꓷ ꓡꓰˍ ꓡꓳ꓿ 

ꓠꓴ ꓪ ꓠꓬ ꓠꓲ ꓠꓯ ꓞꓳ ꓤ ꓐꓱ ꓶ ꓠꓬꓲ ꓟꓳꓻ ꓓꓴ ꓥꓳ꓿  ꓪꓽ ꓚꓲ ꓗꓪ ꓔꓶ ꓔ ꓟ ꓡꓳ ꓒꓱ ꓔꓯ ꓠꓬ ꓚꓵ ꓔ ꓟꓽ ꓐ ꓡ꓿ ꓝꓮꓲ ꓠꓬ ꓟꓬ ꓡꓴ ꓟꓬ ꓢꓲ ꓐꓽ ꓕꓴꓽ ꓡꓰ ꓝꓴ. ꓔ ꓢꓴ ꓟꓽ ꓙꓳ꓿ ꓟꓬ ꓡꓴ ꓕꓲ ꓗꓪ ꓗꓶ ꓔ ꓢꓲ ꓦꓲ ꓗꓪ ꓔꓬ ꓢꓴ ꓮ ꓙꓵꓽ ꓔꓯ ꓣꓳꓺ ꓖꓶˍ ꓡꓳ꓿ ꓖꓳ ꓟˍ ꓡꓰ ꓐꓰ ꓠꓴ ꓪ ꓙꓲˍ ꓟ ꓬꓰˍ ꓟ ꓔꓯ ꓢꓴ ꓟꓳꓻ ꓢꓲ꓾ ꓟꓴ ꓗꓪ ꓗꓪ ꓔꓬ ꓟ ꓠꓴ ꓪ ꓐ, ꓐꓽ ꓔꓯ ꓟꓬꓱ ꓓꓳꓽ ꓖꓶ ꓝꓲ ꓠ, ꓟ꓾ ꓠꓴ ꓪ ꓠꓬꓲ ꓟꓳꓻ ꓓꓴ ꓡꓰ ꓬꓲ ꓪ ꓔꓯ ꓣꓳꓺ ꓖꓶ꓿

ꓠꓬꓲ. ꓠꓬꓲ ꓗꓪ ꓢꓲꓽ ꓫꓬ ꓕꓳꓽ ꓶ ꓗꓪ ꓡꓳ. ꓟꓳ ꓪ ꓠꓬ ꓣꓳ ꓙꓲ‐ꓢꓴ ꓢꓲꓺ ꓤ ꓐꓴ ꓔꓯ ꓟꓲ ꓠꓯ ꓞꓼ ꓐꓳ ꓐꓰ ꓠꓬꓲ ꓟꓳꓻ ꓓꓴ ꓬꓰ ꓠ, ꓟ ꓟ. ꓖꓶ ꓡ ꓟ ꓥ ꓡꓳ꓿ ꓢꓲꓺ ꓒ ꓬꓰ‐ꓢꓴ ꓡꓰ ꓟꓲ ꓠꓯ ꓗꓪ ꓔꓬ ꓟ ꓙꓵ, ꓗꓪ ꓙꓲꓻ ꓟ ꓟꓬꓱꓽ ꓔꓯ ꓬꓰ ꓠ, ꓟ ꓟ. ꓖꓶ ꓡ ꓟ ꓥ ꓡꓳ꓿ ꓧꓳꓽ ꓑꓬ ꓚ. ꓟ ꓙꓵ, ꓗꓪ ꓞꓼ ꓐꓳ ꓔꓯ ꓣꓱ ꓢꓲ ꓠꓬꓲ ꓮ ꓟꓬ, ꓜꓽ ꓙꓲꓻ ꓟ ꓧꓳ ꓑꓬ ꓔꓯ ꓚ. ꓜꓽ ꓥ ꓡꓳ꓿ 

ꓖꓳ ꓟ ꓡꓰ ꓐꓰ ꓣꓳ ꓟꓲ ꓠꓯ ꓗꓪ ꓢꓯ. ꓔꓬ ꓟ ꓙꓵ, ꓗꓪ ꓣꓳ ꓒ ꓕꓲ ꓗꓪ ꓔꓬ ꓢꓴ ꓐꓴ ꓐꓰ ꓣꓱ ꓞ ꓔꓬ ꓢꓴ ꓐꓴ ꓔꓯ ꓬꓰ ꓙ ꓔꓳ, ꓙ ꓠ, ꓟ ꓣꓳ ꓔꓯ ꓟ. ꓖꓶ ꓡ ꓡꓳ꓿ ꓢꓲꓺ ꓒ ꓬꓰ‐ꓢꓴ ꓡꓰ ꓟ. ꓖꓶ ꓡ ꓟ ꓡꓰ ꓐꓰ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓣꓳ ꓞꓳ ꓙꓳ ꓔꓬ ꓟ ꓙꓵ, ꓗꓪ ꓢꓯꓼ ꓕꓵꓼ ꓢꓲ ꓠꓬꓲ ꓣꓱ ꓞ ꓔꓬ ꓢꓴ ꓐꓴ ꓔꓯ ꓬꓰ ꓙ ꓔꓳ ꓙ ꓓꓴ ꓬꓰ ꓡꓯ꓿ ꓫ. ꓟꓳ ꓪ꓿