ꓶꓻ ꓟꓯꓻ ꓢꓴ ꓪꓴꓽ ꓧꓶꓽ ꓠ ꓟꓶ ꓠ, ꓟ (Sunday reflection0

ꓶꓻ ꓟꓯꓻ ꓢꓴ ꓪꓴꓽ ꓧꓶꓽ ꓠ ꓟꓶ ꓠ, ꓟ

ꓠꓬꓲ. ꓠꓬꓲ ꓗꓪ ꓵꓻ ꓠ, ꓟ ꓢꓲꓽ ꓫꓬ ꓕꓳ ꓶ ꓠꓬ ꓟ‐ꓕꓲ (11ꓽ25‐30) ꓝꓲ ꓥ ꓢꓲ ꓠꓬꓲ ꓢꓲꓽ ꓫꓬ ꓕꓳ ꓶ ꓗꓪ ꓢꓲꓺ ꓒ ꓬꓰ‐ꓢꓴ ꓡꓰ ꓢꓯꓼ ꓕꓵꓼ ꓪꓴꓽ ꓧꓶ ꓢꓲ ꓶꓻ ꓡꓲꓽ ꓓꓽ ꓟ ꓟꓯꓻ ꓢꓴ ꓐꓴꓳ꓾ ꓥꓪ ꓔꓯ ꓡꓯ꓿ ꓥꓪ ꓡꓰ ꓠꓴ ꓪ ꓔꓯ ꓪꓴꓽ ꓧꓶ ꓠꓽ ꓝꓲˍ ꓥꓳ ꓐꓯ ꓟ ꓢꓲꓽ ꓫꓬ ꓕꓳ ꓶ ꓝꓲ. ꓥ ꓡꓳ꓿ꓢꓲꓽ ꓫꓬ ꓕꓳ ꓶ ꓗꓪ ꓓꓽ ꓪꓴ. ꓕꓯ ꓢꓲꓺ ꓒ ꓬꓰ‐ꓢꓴ ꓠꓬ ꓟꓴ ꓗꓪ ꓟꓲ ꓠꓯ ꓢꓲ ꓒꓽꓳ ꓠꓴ ꓔꓯ ꓫ. ꓟꓳ ꓐꓰ ꓬꓲ. ꓐ, ꓐꓽ ꓔꓯ ꓓꓳꓻ ꓟꓴ ꓖꓶˍ ꓔꓯ ꓡꓳ. ꓟꓳ ꓪ ꓡꓳ꓿ ꓝꓮꓲ ꓢꓲꓺ ꓒ ꓬꓰ‐ꓢꓴ ꓠꓬ ꓙ ꓣꓳ ꓟ ꓠꓲ, ꓟ ꓣꓱ ꓢꓲ ꓠꓬꓲ ꓐ, ꓐ ꓪꓴ‐ꓢ ꓠꓯ ꓗꓪ ꓶꓽ ꓓꓰꓽ ꓠ, ꓟ ꓣꓳ ꓙꓲꓻ ꓟ ꓟꓬꓱ ꓮ ꓫꓵꓽ ꓬꓰ ꓥ ꓟꓲ ꓙꓻ ꓣꓳ ꓟ ꓠꓲ, ꓟ ꓐꓰ ꓠꓵꓻ ꓠꓲ, ꓙꓳˍ ꓠ, ꓟ ꓣꓳ ꓚꓵ. ꓟ ꓔꓯ ꓟ. ꓖꓶ ꓡ ꓡꓳ꓿

ꓢꓲꓺ ꓒ ꓬꓰ‐ꓢꓴ ꓡꓰ ꓙꓽ ꓗꓴ ꓠꓲ, ꓢꓷ. ꓠꓲ, ꓠꓬ ꓐ, ꓐꓽ ꓪꓴ‐ꓢ ꓡꓰ ꓖꓶ ꓡ ꓟ ꓥ ꓡꓳ ꓐꓰ ꓐꓯ ꓔ ꓡꓳ꓿ ꓪꓴ‐ꓢ ꓡꓰ ꓖꓶ ꓡ ꓟ ꓶꓼ ꓤ ꓫꓱ, ꓤ ꓐꓰ ꓔꓱ, ꓚꓵ ꓟ ꓔꓯ ꓢꓲꓽ‐ꓫꓬ‐ꓟ‐ꓦ ꓪꓴ‐ꓢ ꓗꓪ ꓐꓰ ꓖꓶ ꓡ ꓟ ꓙ ꓝꓲ ꓠꓲ, ꓗꓪ ꓐꓰ ꓢꓷ. ꓪ ꓓꓽ ꓟ ꓚꓱ, ꓔꓯ ꓟ. ꓖꓶ ꓡ ꓡꓳ꓿

ꓢꓲꓺ ꓒ ꓬꓰ‐ꓢꓴ ꓡꓰ ꓢꓯꓼ ꓕꓵꓼ ꓪꓴꓽ ꓧꓶ ꓢꓲ ꓶꓻ ꓡꓰꓽ ꓓꓽ ꓟ ꓟꓯꓻ ꓢꓴ ꓐꓴꓳ ꓥꓪ ꓔꓯ ꓡꓯ꓿ ꓥꓪ ꓡꓰ ꓠꓴ ꓪ ꓔꓯ ꓪꓴꓽ ꓧꓶ ꓠꓽ ꓝꓲ ꓥꓳ ꓠꓴ ꓥꓪ ꓔꓯ ꓘꓴˍ ꓔꓬ ꓟ ꓥ ꓡꓳ꓿ ꓢꓲꓺ ꓒ ꓬꓰ‐ꓢꓴ ꓠꓯ, ꓗꓪ ꓣꓳ ꓮ ꓙꓵꓽ ꓢꓴ ꓙ ꓣꓳ ꓟ ꓠꓲ, ꓟ ꓐꓰ ꓫꓱ, ꓤ ꓟ ꓠꓲ, ꓟ ꓗꓪ ꓐꓰ ꓙꓰ ꓠ, ꓟ ꓣꓳ ꓔꓯ ꓘꓴˍ ꓔꓬ ꓟ ꓥ ꓡꓳ꓿ ꓮ ꓫꓵꓽ ꓪꓴ .ꓠꓬꓲ ꓥ ꓐꓯ ꓠꓬ ꓢꓲꓺ ꓒ ꓬꓰ‐ꓢꓴ ꓠꓬ ꓙ ꓣꓳ ꓟ ꓠꓲ, ꓟ ꓐꓰ ꓫꓱ  ꓤ ꓟ ꓠꓲ, ꓟ ꓙꓳˍ ꓟ ꓪꓴ. ꓠꓬꓲ ꓥ ꓡꓳ꓿ ꓬꓲ ꓠꓯ, ꓗꓪ ꓡ ꓢꓴ ꓥ ꓔ ꓑꓳ ꓔꓯ ꓢꓲꓺ ꓒ ꓬꓰ‐ꓢꓴ ꓡꓰ ꓬꓰ ꓙ ꓔ ꓙ ꓢꓲ ꓠꓬꓲ ꓶ ꓥꓳꓽ ꓙꓱ ꓖꓶ ꓓꓴ ꓥꓳ ꓐꓰ ꓐꓯ ꓔ ꓟ ꓥ ꓡꓳ꓿ 

ꓢꓲꓺ ꓒ ꓬꓰ‐ꓢꓴ ꓡꓰ ꓬꓲ. ꓝꓲ ꓓꓴ ꓐꓴ ꓔꓯ ꓬꓲ. ꓠꓯ, ꓗꓪ ꓐꓰ ꓢꓳꓻ ꓣꓴ ꓠ, ꓟ ꓐꓯ ꓔ ꓡꓳ꓿ ꓟꓲ ꓠꓯ ꓮ ꓡꓰ ꓞꓳ ꓙꓳ ꓢꓯ. ꓔꓬ ꓠ, ꓟ ꓪꓴꓽ ꓟꓴ ꓡ ꓚꓱ, ꓗꓪ ꓮ ꓡꓰ ꓬꓰ ꓠꓯˍ ꓟ ꓐꓰ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓬꓰ ꓠ, ꓟ ꓟꓬꓱꓽ ꓔꓯ ꓮ ꓡꓰ ꓐꓰ ꓬꓰ ꓠ, ꓟ ꓢꓲꓺ ꓒ ꓬꓰ‐ꓢꓴ ꓔꓯ ꓢꓳꓻ ꓣꓴ ꓠ, ꓟ ꓘꓴ ꓔ ꓟ ꓥ ꓡꓳ꓿ ꓢꓲꓺ ꓒ ꓬꓰ‐ꓢꓴ ꓡꓰ ꓥꓪ ꓡꓽ ꓡꓰ ꓟꓯꓻ ꓢꓲ ꓥꓪ ꓔꓯ ꓢꓳ ꓡꓯ꓿ ꓥꓪ ꓠꓬ ꓠꓲ, ꓟ ꓠꓴꓽ ꓢꓲ ꓙ ꓣꓳꓽ ˍ ꓡꓳ꓿

ꓖꓳ ꓡꓱ ꓠꓬ ꓠꓴ ꓪ ꓶ ꓟꓬ ꓐꓱ ꓶ ꓪꓴꓽ ꓧꓶ ꓠꓽ ꓖꓴ ꓧꓪ ꓟꓶˍ ꓥꓳ꓿ ꓮ ꓡꓲꓳ ꓐꓯ ꓠꓬ ꓥꓪ ꓡꓽ ꓡꓰ ꓠꓽ ꓟꓯꓻ ꓢˍ ꓡꓳ꓿ ꓥꓪ ꓶꓻ ꓟꓲ ꓡꓳꓻˍ ꓡꓳ ꓐꓯ ꓔ ꓡꓳ꓿ ꓢꓲꓺ ꓒ ꓬꓰ‐ꓢꓴ ꓠꓬ ꓬꓲ. ꓗ, ꓠꓯ ꓢꓲ ꓗꓪ ꓛꓳ ꓠ, ꓟ ꓐꓰ ꓢꓲꓺ ꓒ ꓠꓯ ꓗꓪ ꓛꓳ ꓢꓴ ꓐꓴ ꓔꓯ ꓕꓲ ꓞꓲꓼ ꓕꓲ ꓑ ꓢꓯꓼ ꓟꓬ, ꓖꓶ ꓠ, ꓟ ꓐꓰ ꓡꓯ ꓫꓴ ꓮ ꓟꓬ, ꓖꓶ ꓠ, ꓟ ꓐꓯ ꓔ ꓡꓳ꓿ ꓢꓲꓺ ꓒ ꓬꓰ‐ꓢꓴ ꓠꓯ, ꓗꓪ ꓪꓴꓽ ꓧꓶ ꓠꓽ ꓓꓴ ꓬꓰ ꓡꓯ꓿ ꓢꓲꓺ ꓒ ꓔꓯ ꓧꓪ, ꓓꓴ ꓬꓰ ꓡꓯ꓿ ꓢꓲꓺ ꓒ ꓬꓰ‐ꓢꓴ ꓠꓯ, ꓗꓪ ꓪꓴꓽ ꓧꓶ ꓓꓴ ꓬꓰ ꓡꓯ꓿ ꓫ. ꓟꓳ ꓪ꓿