ꓟꓬ ꓡꓴ ꓔꓯ ꓟꓬ ꓡꓴ ꓕꓲꓺ ꓗꓪ ꓗꓶ ꓔ ꓠꓯꓹ ꓟ

ꓟ-ꓘꓳ 4ꓽ21-25

ꓢꓲꓺ ꓒ ꓬꓰ-ꓢꓴ ꓡꓰ ꓕꓱ ꓡꓱ ꓐꓯ ꓡꓳ ꓟꓬ ꓡꓴꓻ ꓔꓯ ꓠꓬ ꓘꓹ ꓛꓽ ꓠꓯꓸꓼ ꓗꓪ ꓗꓶ ꓔ ꓟꓽ ꓓ꓾ ꓠꓳꓸ ꓘꓴꓽ ꓗꓪ ꓗꓷ ꓔ ꓟꓽ ꓓ= ꓟꓬ ꓡꓴ ꓕꓲꓺ ꓗꓪ ꓡꓰꓽ ꓗꓶ ꓠꓯꓹ ꓡꓳ꓾ ꓐꓰ ꓐꓯ ꓔ ꓡꓳ=

ꓐꓯ ꓘꓶꓽ ꓕꓱ ꓟ ꓠꓬ ꓬꓲ ꓟꓸ ꓟꓲꓽ ꓠꓬꓲꓽ ꓟ ꓔꓯ ꓐꓯ ꓟꓸ ꓖꓶ ꓔꓬ ꓟ ꓥ ꓡꓳ= 

ꓬꓲ ꓪꓴꓸ ꓕꓲ ꓟ ꓠꓬ ꓣꓳ ꓐꓴ ꓔꓯ ꓪꓴ-ꓢ ꓔꓯˍ ꓐꓰ ꓮ ꓡꓰ ꓫꓵꓽ ꓕꓲ ꓟ ꓔꓯ ꓥˍ ꓟꓲ ꓚꓵꓺ ꓔ ꓟꓽ ꓠ ꓟ꓾ ꓪꓴ-ꓢ ꓠꓬ ꓮ ꓫꓵꓽ ꓔꓯˍ ꓟꓲ ꓟꓳꓻ ꓐ ꓡˍ ꓟ ꓔꓯ ꓣꓳ ꓐꓴ ꓢꓷꓸ ꓠ ꓔ ꓟ ꓥ ꓡꓳ= ꓠꓬꓲꓽ ꓟ ꓕꓲ ꓟ ꓠꓬ ꓣꓳ ꓔꓯ ꓙꓳˍ ꓟ ꓣꓳ ꓬꓰ ꓐ ꓡˍ ꓟ꓾ ꓣꓳ ꓔꓯ ꓙꓳˍ ꓟ ꓣꓱꓽ ꓛꓰꓽ ꓔꓯ ꓢꓷꓸ ꓡꓰ ꓠ ꓧꓪꓺ ꓢꓲ ꓠꓬꓲ ꓣꓳ ꓬꓲꓼ ꓤ ꓠꓬꓲ ꓤ ꓐꓴ ꓔꓬ ꓗꓪ ꓣꓱꓽ ꓠꓹ ꓟ ꓥ ꓡꓳ= ꓚꓲꓸ ꓛꓬ ꓔꓯ ꓙꓳˍ ꓟ ꓪꓴ-ꓢ ꓡꓰ ꓖꓶ ꓔ ꓟ ꓶꓼ ꓤ ꓫꓱꓹ ꓤ ꓣꓱꓽ ꓛꓰꓽ ꓡꓯꓼ ꓫꓴ ꓐꓴ ꓠꓬ ꓪꓴ-ꓢ ꓗꓪ ꓐꓰ ꓡˍ ꓟ ꓣꓱꓽ ꓛꓰꓽ ꓡꓯꓼ ꓫꓴ ꓥ ꓟ ꓪꓴꓸ ꓠꓬꓲ ꓚꓵꓺ ꓔ ꓟꓽ ꓓ=

ꓢꓲꓺ ꓒ ꓬꓰ-ꓢꓴ ꓡꓰ ꓐꓯ ꓟꓸ ꓖꓶ ꓔ ꓟ “ ꓠꓴ ꓪ ꓡꓰ ꓢꓴ ꓔꓯ ꓮ ꓡꓰ ꓙꓳꓻ ꓖꓶˍ ꓠꓬ ꓠꓴ ꓪ ꓔꓯˍ ꓟꓲ ꓖꓳ ꓡꓱ ꓙꓳꓻ ꓖꓶ ꓡˍ ꓥꓳ= ꓕꓱ ꓟ ꓟꓽ ꓞꓲꓺ ꓟꓬꓽ ꓠꓬꓲ ꓖꓶ ꓡˍ ꓥꓳ” ꓐꓯ ꓟ ꓡꓰ ꓐꓰ ꓪꓴ-ꓢ ꓡꓰ ꓖꓶ ꓔ ꓟ ꓣꓱꓽ ꓛꓰꓽ ꓡꓯꓼ ꓫꓴ ꓐꓴ ꓔꓯ ꓪꓴ-ꓢ ꓐꓱ ꓶ ꓣꓳ ꓟꓬꓽ ꓠꓬꓲ ꓣꓱꓽˍ ꓠꓬ ꓣꓳ ꓔꓯ ꓙꓳˍ ꓟ ꓣꓱꓽ ꓛꓰꓽ ꓡꓯꓼ ꓫꓴ ꓥˍ ꓟꓲ ꓟꓬꓽ ꓠꓬꓲ ꓪꓴꓽ ꓟꓴ ꓡˍ ꓥꓳ= ꓖꓳ ꓟ ꓪꓴꓸ ꓠꓬꓲ ꓪꓴ-ꓢ ꓡꓰ ꓖꓶꓽ ꓡˍ ꓟ ꓣꓱꓽ ꓛꓰꓽ ꓡꓯꓼ ꓫꓴ ꓔꓯ ꓠꓶꓽ ꓛꓳꓽ ꓕꓲ ꓛꓳꓽ ꓐꓱ ꓶ ꓣꓱꓽ ꓓꓴ ꓬꓰ ꓡꓯ=