ꓟꓴꓽ ꓗꓪ ꓝꓲ ꓓꓴ ꓡꓰ ꓟ-ꓡꓲ ꓔꓯ ꓶꓼ ꓓꓳꓽ ꓫꓱꓹ ꓓꓳꓽ ꓐꓯ ꓖꓶˍ ꓟ

ꓡꓴ-ꓘ = 1ꓽ26-38

ꓦ ꓐ ꓛꓳꓼ ꓟ ꓗ ꓠꓯꓸ꓾ ꓪꓴ-ꓢ ꓠꓬ ꓟꓴ ꓗꓪ ꓝꓲ ꓓꓴ ꓚꓬ-ꓑꓷ-ꓡꓰ ꓔꓯ ꓖ-ꓡꓲ-ꓡꓲ ꓟꓵꓽ ꓠ-ꓢ-ꓡꓱ ꓟꓬꓱꓺ ꓔˍ ꓟ ꓡꓳ ꓒꓱ ꓕꓲ ꓟ ꓗꓪ  ꓝꓲ ꓩꓴ ꓗꓷˍ ꓡꓳ=

ꓟꓴ ꓗꓪ ꓝꓲ ꓓꓴ ꓔꓯ ꓠꓬ꓾ ꓓ-ꓪꓵ ꓞꓲꓼ ꓤ ꓡꓯ ꓤ ꓬꓳ-ꓢꓷ ꓟꓬꓱꓺ ꓔ ꓟˍ ꓡ ꓞꓳ ꓕꓲ ꓣꓳ ꓔꓯ ꓖꓶ  ꓔˍ ꓟ ꓤ ꓟꓶ ꓡꓯꓸ ꓕꓲ ꓣꓳ ꓔꓬ ꓗꓪ ꓝꓲ ꓩꓴ ꓗꓷˍ ꓡꓳ= ꓤ ꓟꓶ ꓡꓱꓸ ꓬꓲ ꓟꓬꓱꓺ ꓠꓬ ꓟ-ꓡꓲꓹ ꓥ ꓡꓳ=

ꓟꓴ ꓗꓪ ꓝꓲ ꓓꓴ ꓬꓲ ꓔꓬ ꓗꓪ ꓓꓵꓽ ꓡꓰ ꓢꓲ ꓬꓲ ꓔꓯ꓾ ꓣꓱ ꓛꓱ ꓟꓶ ꓢꓴꓳ꓾ ꓧꓪꓸ ꓧꓪꓸꓼ꓾ ꓢꓲꓺ ꓒ ꓠꓴˍ ꓐꓰ ꓕꓲ ꓪꓺꓼ ꓔꓬˍ ꓡꓳ꓾ ꓐꓯˍ ꓡꓳ=

ꓐꓯ ꓘꓶ ꓕꓱ ꓟ ꓗꓪ ꓐꓰ ꓟ-ꓡꓲꓹ ꓮ ꓘꓶ ꓓꓵ ꓙ ꓫꓸ ꓢꓲ꓾ ꓬꓲ ꓠꓲꓹ ꓟ ꓗꓪ꓾ ꓐꓯ ꓘꓶ ꓕꓱ ꓟ ꓮ ꓫꓵ ꓔꓯ ꓐꓯˍ ꓟꓽ ꓢꓷ꓾ ꓐꓰ ꓓꓵ ꓙ ꓔꓬˍ ꓡꓳ=

ꓟꓴ ꓗꓪ ꓝꓲ ꓓꓴ ꓡꓰ ꓬꓲ ꓔꓯ꓾ ꓟ-ꓡꓲꓹꓳ꓾ ꓠꓴ ꓕꓽ ꓙꓳꓺ= ꓮ ꓡꓲꓳ ꓐꓯ ꓠꓬ ꓠꓴ ꓠꓽ ꓪꓴ-ꓢ ꓟꓲꓽ ꓙꓬ ꓗꓪ ꓣꓱ ꓛꓰ ꓟꓶ ꓗꓷꓳ= ꓠꓬꓲ ꓠꓹ꓾ ꓠꓴ ꓤ ꓘꓶꓻ ꓗꓪ ꓤ ꓠꓱ ꓶꓻ ꓡꓰ ꓢꓲ꓾ ꓤꓽ ꓕꓲ ꓣꓳ ꓦꓵꓻ ꓡˍ ꓥꓳ= ꓬꓲ ꓟꓬꓱꓺ ꓠꓬ ꓬꓰ-ꓢꓴ ꓐꓯˍ ꓥꓳ=

ꓬꓲ ꓠꓬ ꓪꓴꓽˍ ꓟ ꓒꓬꓤꓼ ꓡˍ ꓥꓳ= ꓬꓲ ꓔꓯ ꓠꓬ ꓟꓴ-ꓡꓳꓹ-ꓬꓰ-ꓢꓴ ꓬꓲ ꓮ ꓐꓲ꓾ ꓘꓴˍ ꓥꓳ= ꓢꓲꓺ ꓒ ꓪꓴ-ꓢ ꓠꓬ ꓬꓲ ꓒꓴꓽ ꓒ ꓓ-ꓪꓵ ꓙꓵꓽ ꓠꓬꓲꓸ ꓕꓲ ꓬꓲ ꓔꓯ ꓖꓶˍ ꓥꓳ=

ꓬꓲ ꓠꓬ ꓕꓲ ꓞꓲꓼ ꓕꓲ ꓑ ꓬ-ꓗꓴ ꓕꓲ ꓦꓲ ꓢꓴ ꓪ ꓔꓲ ꓣꓱꓽ ꓡˍ ꓥꓳ= ꓬꓲ ꓗꓴꓷꓼ ꓠꓬ ꓮ ꓕꓯ ꓟꓲ ꓬꓲ ꓑꓶꓸ ꓟꓽ ꓞꓷꓹ ꓗꓷ꓾ ꓐꓯˍ ꓡꓳ=

ꓟ-ꓡꓲꓹ ꓡꓰ ꓟꓴ ꓗꓪ ꓝꓲ ꓓꓴ ꓔꓯ꓾ ꓥꓪ ꓞꓳ ꓑ ꓤˍ ꓐꓰ ꓟꓽ ꓬꓲꓼ ꓔ ꓠꓬꓲ ꓟ ꓗꓪ ꓐꓰ꓾ ꓕꓱ ꓟ ꓮ ꓡꓲ ꓗꓷ ꓡꓰ ꓗꓴꓸ ꓢꓰꓽ꓾ ꓐꓯˍ ꓡꓳ=

ꓟꓴ ꓗꓪ ꓝꓲ ꓓꓴ ꓗꓰ ꓬꓲ ꓔꓯ꓾ ꓢꓲ-ꓫꓬ-ꓟ-ꓦ ꓠꓴ ꓔꓯ ꓬꓯꓼ ꓡ ꓢꓲ꓾ ꓟꓴ-ꓡꓳꓹ-ꓬꓰ-ꓢꓴ ꓬꓲ ꓪꓽ ꓠꓬꓲˍ ꓟ ꓡꓰ ꓠꓴ ꓔꓯ ꓑꓲꓸ ꓡꓰˍ ꓥꓳ= ꓖꓳ ꓡꓱ ꓠꓬꓲ ꓠꓴ ꓦꓵꓻ ꓠꓹ ꓟ ꓢꓲ ꓫꓬˍ ꓟ ꓤ ꓠꓱ ꓖꓳ ꓟ ꓔꓯ ꓪꓴ-ꓢ ꓬꓲ ꓮ ꓐꓲ꓾ ꓐꓰ ꓐꓯˍ ꓥꓳ=

ꓠꓬꓲ ꓠꓹ꓾ ꓠꓴ ꓫꓵꓽ ꓠꓴ ꓧꓪ ꓬꓲ-ꓡꓲ-ꓫ-ꓑꓷ ꓬꓲ ꓞꓲꓼ ꓪꓴꓽˍ ꓟ ꓗꓪ꓾ ꓬꓲˍ ꓟꓲ ꓤꓽ ꓕꓲ ꓣꓳ ꓶꓻ ꓞˍ ꓡꓳ= ꓧꓶ ꓕꓯ ꓢꓴ ꓡꓰ ꓞꓳ ꓡꓱꓽ ꓟ ꓘꓴꓻˍ ꓟ ꓖꓳ ꓕꓲ ꓣꓳ ꓬꓲ ꓖꓳ ꓓꓱ ꓟꓽ ꓫꓬꓽ ꓟ ꓮ ꓟꓶ ꓦ ꓐ ꓛꓳꓼ ꓟ ꓙꓳˍ ꓡꓳ=

ꓮ ꓡꓲꓳ ꓐꓯ ꓠꓬ ꓪꓴ-ꓢ ꓐꓯ ꓔˍ ꓟ ꓐꓯ ꓘꓶ ꓠꓬ ꓪꓽ ꓟꓽ ꓠꓬꓲ ꓟ ꓕꓲ ꓘꓶˍ ꓟꓲ ꓟꓽ ꓙꓳ꓾ ꓐꓯˍ ꓡꓳ=

ꓟ-ꓡꓲꓹ ꓡꓰ꓾ ꓠꓬꓲ ꓠꓹ꓾ ꓥꓪ ꓠꓬ ꓢꓲꓺ ꓒ ꓚꓳ ꓟ ꓥ ꓡꓳ= ꓠꓴ ꓐꓯˍ ꓟˍ ꓡꓰ ꓐꓰ ꓥꓪ ꓖꓳ ꓓꓱ ꓗꓪ ꓒꓬꓱꓼ ꓡ ꓝꓲ꓾ ꓐꓯˍ ꓡꓳ= ꓖꓳ ꓡꓱ ꓠꓬ ꓟꓴ ꓗꓪ ꓝꓲ ꓓꓴ ꓬꓲ ꓔꓯ ꓐꓰ ꓙꓰˍ ꓡꓳ=

Add new comment

8 + 0 =