ꓟꓴ ꓗꓪ ꓗꓴꓷꓼ ꓔꓯ ꓥꓳꓽ

ꓟꓴ ꓗꓪ ꓗꓴꓷꓼ ꓐꓯ_ ꓟ ꓠꓬ ꓦ ꓟꓲ ꓕꓲ ꓡꓯꓼ ꓗꓪ ꓚꓵ ꓞ, ꓟ ꓒꓵꓽ ꓶ ꓡꓰ ꓐꓰ ꓗ, ꓡꓳ꓾ ꓡ ꓞꓳ ꓕꓲ ꓣꓳ ꓡꓰ ꓒꓵꓽ ꓶꓽ ꓖꓳ ꓟ ꓧꓪ ꓟꓳꓻ ꓗꓷ ꓠꓬ ꓚꓵ ꓗꓷ ꓢꓲ ꓠꓬꓲ꓾ ꓗ, ꓛꓲ ꓠꓬꓲ ꓬꓲꓼ ꓙꓰ ꓢꓲ ꓬꓲ ꓙꓳ_ ꓟ ꓮ ꓙꓵꓽ ꓪꓴꓽ ꓗꓷ ꓢꓲ ꓠꓬꓲ꓾ ꓦ ꓟꓲ ꓖꓳ ꓕꓲ ꓡꓯꓼ ꓟ ꓪꓴꓻ_ ꓡꓳ꓾ ꓐꓰ ꓢꓲ ꓒ ꓬꓰ‐ꓢꓴ ꓣꓳ ꓔꓯ ꓔꓯ ꓟꓳ. ꓖꓶ ꓔꓬ ꓡꓳ꓿ ꓟ‐ꓕꓲ 13ꓽ44‐45 ꓠꓬꓲ. ꓠꓬꓲ ꓣꓳ ꓠ ꓠ, ꓪ_ ꓟ ꓢꓲ ꓫꓬ ꓕꓳ ꓶ ꓥ ꓡꓳ꓿

ꓝꓮꓲ ꓟꓴ ꓗꓪ ꓗꓴꓷꓼ ꓠꓬ ꓙꓲ_ ꓟ ꓡꓳ ꓒꓴ ꓡꓴ. ꓢꓶꓽ ꓧꓪ_ ꓟ ꓶ ꓡꓯꓼ ꓟꓯ ꓢꓴ ꓕꓲ ꓣꓳ ꓡꓰ ꓐꓰ ꓗ, ꓡꓳ꓿ ꓮ ꓘꓶ. ꓒꓵ_ ꓟ ꓡꓳ ꓒꓴ ꓡꓴ. ꓢꓶꓽ ꓕꓲ ꓢꓶꓽ ꓟꓳ ꓗꓷ ꓠꓬ ꓬꓲ ꓙꓳ_ ꓟ ꓮ ꓙꓵ ꓪꓴꓽ ꓗꓷ ꓢꓲ ꓡꓳ ꓒꓴ ꓡꓴ. ꓢꓶꓽ ꓖꓳ ꓕꓲ ꓟ ꓪꓴꓻ_ ꓡꓳ ꓐꓰ ꓐꓯ_ ꓡꓳ꓿ ꓟꓴ ꓗꓪ ꓗꓴꓷꓼ ꓔꓯ ꓥꓳꓽ ꓕꓱ ꓠꓬꓲ ꓟ ꓔꓯ ꓣꓳ ꓡꓳ. ꓠꓬꓲ ꓕꓯ ꓡꓳ ꓒꓴ ꓡꓴ. ꓢꓶꓽ ꓧꓪ ꓢꓴ ꓥ ꓟꓲ ꓬꓲ ꓧꓪ ꓔꓬ ꓡꓳ꓾ ꓙꓲ_ ꓟ ꓡꓳ ꓒꓴ ꓡꓴ. ꓢꓶꓽ ꓔꓯ ꓟꓳ ꓕꓯ ꓙꓳ_ ꓟ ꓮ ꓙꓵ ꓪꓴꓽ ꓗꓷ ꓢꓲ ꓠꓬꓲ ꓖꓳ ꓡꓳ ꓒꓴ ꓡꓴ. ꓢꓶꓽ ꓔꓯ ꓪꓴꓻ_ ꓡꓳ꓿ ꓡꓳ ꓒꓴ ꓡꓴ. ꓢꓶꓽ ꓐꓯ_ ꓟ ꓠꓬ ꓐꓲ_ ꓟ ꓙꓲ_ ꓟ ꓡꓰ ꓥꓳ꓿ ꓖꓳ ꓡꓱ ꓐꓯ ꓥ ꓟꓲ ꓕꓱ ꓟ ꓕꓯ ꓢꓲ ꓗꓪ ꓙꓲ_ ꓫꓵ꓾ ꓬꓲ ꓟꓳ ꓡꓰꓳ꓿ ꓮ ꓙꓵ ꓟ ꓕꓯ ꓢꓲ ꓙꓲ_ ꓫꓵ ꓬꓲ ꓟꓳ ꓡꓰꓳ꓿ ꓕꓱ ꓟ ꓡꓰ ꓐꓰ ꓦ ꓟꓲ ꓗꓪ ꓟꓲ ꓬꓰ ꓔꓬ ꓢꓴ ꓥ ꓟꓲ ꓒꓵ ꓶ ꓔꓯ ꓬꓲ ꓟꓳ_ ꓟ ꓑꓶ ꓓꓴ ꓬꓲ. ꓔꓯ ꓙꓳ_ ꓟ ꓮ ꓙꓵ ꓪꓴꓽ ꓗꓷ ꓢꓲ ꓠꓬꓲ ꓖꓳ ꓟ ꓔꓯ ꓪꓴꓻ ꓡꓳ꓾ ꓐꓰ ꓣꓳ ꓔꓯ ꓢꓷ. ꓡꓰ ꓝꓲ_ ꓡꓳ꓿ ꓖꓳ ꓡꓱ ꓠꓬꓲ ꓣꓳ ꓔꓯ ꓠꓬꓲꓽ ꓫꓵ ꓐꓯ ꓟꓳ. ꓖꓶ ꓔꓬ ꓡꓳ꓿ ꓬꓲ. ꓪꓴ. ꓕꓲ ꓟ ꓠꓬ ꓬꓲ. ꓪ ꓠꓬ ꓧꓪ ꓔꓬ ꓡꓳ꓾ ꓦ ꓟꓲ ꓗꓪ ꓟꓬꓱꓽ ꓬꓰ ꓒ ꓥ ꓟꓲ ꓟꓬꓱꓽ ꓬꓰ ꓔꓬ ꓢꓲ ꓠꓬꓲ ꓒꓵ ꓶ ꓖꓳ ꓟ ꓔꓯ ꓟꓳ ꓡꓰ_ ꓡꓳ꓿ ꓡꓳ ꓒꓴ ꓡꓴ. ꓢꓶꓽ ꓧꓪ ꓢꓴ ꓥ ꓟꓲ ꓬꓲ ꓕꓱ ꓡꓱ ꓧꓪ ꓢꓲ ꓙꓲ ꓓꓰ ꓡꓰ_ ꓟ ꓬꓲ. ꓧꓪ ꓟꓶ._ ꓡꓳ꓿ ꓖꓳ ꓡꓱ ꓠꓬꓲ ꓬꓲ ꓪꓴ. ꓕꓲ ꓟ ꓟꓴ ꓗꓪ ꓗꓴꓷꓼ ꓔꓯ ꓟꓳ ꓡꓰ ꓠ, ꓟ ꓠꓬ꓾ ꓣꓳ ꓧꓪ ꓠ, ꓟ ꓥ ꓡꓳ꓿ ꓣꓳ ꓠꓲ, ꓟ ꓠꓬ ꓪꓴ‐ꓢ ꓔꓯ ꓧꓪ ꓟꓽ ꓟꓳ ꓕ ꓑꓳ. ꓠꓲ, ꓟ ꓠꓬ ꓠꓽ ꓖꓴ ꓟꓽ ꓙꓳ ꓐꓰ ꓙꓲ ꓫꓬ ꓢꓴ ꓮꓴꓖꓴꓢꓔꓲꓠꓰ ꓡꓰ ꓐꓯ ꓔ ꓡꓳ꓿ ꓣꓳ ꓠꓲ, ꓟ ꓠꓬ ꓪꓴ‐ꓢ ꓔꓯ ꓪꓴ ꓧꓶ ꓟꓽ ꓠꓽ ꓡꓰ ꓕ ꓑꓳ. ꓣꓳ ꓠꓲ, ꓟ ꓠꓬ ꓮ ꓕꓯ ꓟꓲ ꓚꓬ,‐ꓟꓲ ꓠꓲ, ꓟ ꓡꓰ ꓐꓰ ꓗꓪ ꓔꓷ, ꓕꓱ ꓗꓪ ꓔꓷ, ꓕꓱ ꓡꓰ ꓐꓰ ꓓ_ ꓡꓳ꓿ ꓠꓽ ꓖꓴ ꓟꓽ ꓙꓳ꓿ ꓟꓽ ꓡꓴ. ꓟꓽ ꓔꓬ꓾ ꓖꓳ ꓡꓱ ꓥ ꓟꓲ ꓪꓴ‐ꓢ ꓔꓯ ꓣꓳ ꓧꓪ ꓟꓳ ꓡꓰ ꓕꓯ ꓣꓳ ꓠꓲ, ꓟ ꓠꓬ ꓪꓴꓽ ꓪꓴꓽ ꓡꓰ ꓐꓰ ꓗ, ꓡꓳ꓿ ꓪꓴ‐ꓢ ꓔꓯ ꓧꓪ ꓟꓽ ꓟꓳ ꓕ ꓑꓳ. ꓠꓬ ꓧꓪ ꓠ ꓗ, ꓡꓳ꓿ ꓡꓳ ꓒꓴ ꓡꓴ. ꓢꓶꓽ ꓧꓪ ꓢꓴ ꓡꓰ ꓐꓰ ꓕꓲ ꓢꓶꓽ ꓐꓰ ꓕꓲ ꓢꓶꓽ ꓕꓱ ꓡꓰ ꓧꓪ ꓢꓲ ꓠꓬꓲ ꓙꓲ_ ꓟ ꓐꓲ ꓓꓰ ꓡꓰ_ ꓟ ꓟꓽ ꓟꓳ ꓕ ꓑꓳ. ꓧꓪ ꓠ, ꓟ ꓣꓳ. ꓚꓵ_ ꓡꓳ꓿ ꓠꓬꓲ. ꓠꓬꓲ ꓠꓴ ꓥꓪ ꓪꓴ‐ꓢ ꓔꓯ ꓧꓪ ꓔꓬ ꓡ? ꓙꓲ ꓓꓰ ꓡꓰ_ ꓟ ꓒꓵ ꓓꓰ ꓡꓰ_ ꓟ ꓔꓯ ꓧꓪ ꓟꓳ ꓡ? ꓓꓵꓽ ꓙ ꓠꓬꓲ ꓡꓯ꓿

ꓠꓬꓲꓽ ꓫꓵ ꓕꓲ ꓫꓵ ꓟ ꓠꓬ ꓠꓴ ꓖꓳ ꓟ ꓔꓯ ꓧꓪ ꓟꓳ ꓡꓰꓳ ꓐꓯ ꓠꓬ ꓠꓴ ꓔꓯ ꓙꓳ_ ꓟ ꓮ ꓙꓵ ꓪꓴꓽ ꓗꓷ ꓢꓲ ꓠꓬꓲ ꓖꓳ ꓟ ꓔꓯ ꓪꓴꓻ ꓠ ꓡꓳ ꓐꓰ ꓣꓳ ꓔꓯ ꓐꓯ ꓟꓳ. ꓖꓶ ꓔꓬ ꓬꓰ ꓡꓳ꓿ ꓢꓲ ꓫꓬ ꓕꓳ ꓶ ꓖꓳ ꓗꓪ ꓓꓯ_ ꓟ ꓡꓰ ꓐꓰ ꓪꓴ‐ꓢ ꓗꓴꓷꓼ ꓔꓯ ꓣꓳ ꓧꓪ ꓟꓳ ꓡꓰ ꓕꓯ ꓢꓲ ꓒ ꓬꓰ‐ꓢꓴ ꓔꓯ ꓣꓳ ꓟꓶ ꓡꓰ ꓕꓯ ꓣꓳ ꓔꓯ ꓙꓳ_ ꓟ ꓮ ꓙꓵ ꓪꓴꓽ ꓗꓷ ꓢꓲ꓾ ꓖꓳ ꓟ ꓔꓯ ꓪꓴꓻ ꓠ, ꓟ ꓢꓯꓼ ꓪ ꓖꓶ ꓔꓬ ꓟ ꓥꓳ꓿ ꓮ ꓡꓰ ꓐꓰ ꓪꓴꓻ_ ꓡ? ꓣꓳ ꓕꓲ ꓠꓬꓲ ꓕꓲ ꓠꓬꓲ ꓛꓳ ꓙꓳ ꓔꓬ ꓟ ꓗꓪ ꓪꓴ‐ꓢ ꓐꓰ ꓗꓳ. ꓙꓰ ꓙꓳ ꓢꓲ ꓠꓬꓲ ꓠꓱ. ꓐꓯꓼ ꓮ ꓙꓵ ꓮ ꓫꓵ ꓥ ꓟꓲ ꓣꓳ. ꓚꓵ ꓫꓵ ꓟꓽ ꓙꓳ꓾ ꓪꓴ‐ꓢ ꓐꓯ ꓘꓶꓽ ꓕꓯ ꓢꓲ ꓪꓴ_ ꓟ ꓮ ꓫꓵ ꓟꓲ ꓟꓽ ꓙꓳ꓾

ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓠꓴ ꓔꓯ ꓙꓳ_ ꓟ ꓮ ꓙꓵ ꓪꓴꓽ ꓐꓯ_ ꓟ ꓠꓬ ꓠꓴ ꓓꓵꓽ ꓙ ꓚꓱ,꓾ ꓠꓴ ꓬꓰ ꓚꓱ, ꓮ ꓙꓵꓽ ꓠꓬ ꓪꓴ‐ꓢ ꓐꓯ ꓘꓶꓽ ꓐꓰ ꓟꓽ ꓪ ꓡꓯꓼ ꓘꓳ ꓕꓯ ꓮ ꓙꓵ ꓡꓳ ꓦ ꓠ, ꓟ ꓣꓳ ꓔꓯ ꓬꓲꓼ ꓠꓬꓲ. ꓖꓶ ꓡ ꓔꓬ ꓟ ꓥꓳ꓿ ꓪꓴ‐ꓢ ꓐꓯ ꓘꓶꓽ ꓡꓰ ꓠ ꓑ ꓕꓲꓽ ꓪꓴ‐ꓢ ꓗꓴꓷꓼ ꓡꓰ ꓮ ꓙꓵ ꓕꓯ ꓢꓲ ꓗꓷ ꓔ ꓢꓲ ꓠꓬꓲ ꓕꓱ ꓟ ꓔꓯ ꓪꓴꓻ ꓠ, ꓟ ꓣꓳ ꓔꓯ ꓢꓯꓼ ꓪ ꓖꓶ ꓔꓬ ꓟ ꓥ ꓡꓳ꓿ ꓠꓬꓲ. ꓠꓬꓲ ꓔꓯ ꓥꓳꓽ ꓗꓪ ꓐꓰ ꓪꓴ‐ꓢ ꓗꓴꓷꓼ ꓔꓯ ꓧꓪ ꓠ, ꓟ ꓐꓰ ꓧꓪ ꓟꓳ ꓡꓰ ꓗ. ꓠꓯ. ꓣꓳ ꓔꓯ ꓙꓳ_ ꓟ ꓮ ꓙꓵ ꓪꓴꓽ ꓗꓷ ꓢꓲ ꓠꓬꓲ ꓛꓳ ꓙꓳ ꓠ, ꓟ ꓣꓳ ꓔꓯ ꓐꓯ ꓟꓳ. ꓖꓶ ꓔꓬ ꓟ ꓥ ꓡꓳ꓿