ꓪꓴ-ꓢ ꓠꓬ ꓮ-ꓐꓷ-ꓡ_ ꓐꓰ ꓘꓶꓽ ꓫꓵꓽ ꓬꓰ_ ꓟ

ꓠꓬꓲꓸ ꓠꓬꓲ ꓠꓬ ꓮ-ꓐꓷ-ꓡ ꓤꓶꓻ ꓗꓪ ꓐꓰ ꓣꓳ ꓢꓳ ꓙꓰ ꓓꓴ ꓠꓬꓲꓽ ꓚꓱꓹ ꓐꓰ ꓐꓯ ꓢꓲ꓾ ꓦ ꓢꓯꓼ ꓪ ꓖꓶ ꓩꓴ ꓠꓲꓹ ꓫꓵ_ ꓡꓳ= ꓢꓳ ꓙꓰ ꓓꓴ ꓬꓲꓸ ꓪꓴꓸ ꓕꓲ ꓚꓱꓹ ꓟ ꓠꓬ ꓬꓲ ꓚꓰ ꓬꓲ ꓪꓴꓸ ꓕꓳ ꓶ 15 ꓕꓱ ꓗꓪ ꓣꓳ ꓟꓳ_ ꓟ ꓮ-ꓐꓷ-ꓡ ꓔꓯ ꓪꓴ-ꓢ ꓡꓰ ꓘꓴ_ ꓕꓯ ꓮ-ꓐꓷ-ꓡ ꓠꓬ ꓪꓴ-ꓢ ꓡꓰ ꓬꓲ ꓔꓯ ꓮ ꓡꓰ ꓗꓪ ꓧꓳꓽ ꓔꓯꓹ ꓙꓰ_ ꓟ ꓔꓯ ꓬꓲꓸ ꓟꓽ ꓢꓷꓸ ꓖꓳ ꓡꓱ ꓐꓯ ꓥ ꓟꓲ ꓬꓲ ꓠꓬ ꓪꓴ-ꓢ ꓔꓯ ꓙꓵꓻ ꓢꓲ ꓠꓬꓲ ꓪꓴ-ꓢ ꓖꓶ ꓙ ꓟꓳ_ ꓟ ꓙꓻ ꓖꓴ ꓗꓪ ꓬꓲ ꓙꓰ_ ꓡꓳ= ꓮ ꓡꓰ ꓗꓪ ꓥ ꓟꓲ ꓬꓲꓸ ꓟꓽ ꓢꓷꓸ ꓬꓲ ꓟꓲ ꓕꓯ ꓢꓲ ꓗꓪ ꓮ ꓫꓵ ꓓꓳꓺ ꓡ ꓟ ꓬꓲꓸ ꓟꓽ ꓢꓷꓸ꓾ ꓬꓲꓸ ꓔꓬ ꓖꓴ ꓟꓵꓽ ꓗꓪ ꓐꓰ ꓓꓳꓺ ꓙꓰ ꓢꓲ ꓠꓬꓲ ꓜꓲꓼ ꓣꓴ ꓓꓴ ꓥ ꓟ꓾ ꓙꓳꓺ ꓓꓴ ꓧꓹ ꓟ꓾ ꓮ ꓡꓰ ꓗꓪ ꓙꓰ ꓔꓬ ꓟ ꓟꓽ ꓢꓷꓸ ꓥ ꓟꓲ ꓪꓴ-ꓢ ꓔꓯ ꓙꓵꓻ ꓟ ꓙꓵꓻ ꓠꓲꓹ ꓗꓪ ꓐꓰ ꓙꓰ ꓔꓬ ꓡꓳ= ꓖꓳ ꓡꓱ ꓠꓬꓲ ꓬꓲ ꓠꓬ ꓠꓲꓹ ꓫ ꓟꓬ ꓫ ꓓꓴ ꓝꓮꓲ ꓘꓶ ꓡꓶꓽ ꓗ ꓔ ꓓꓴ ꓮ ꓟꓬꓹ ꓔꓳꓹ ꓜꓳ ꓥ ꓟꓲ ꓪꓴ-ꓢ ꓔꓯ ꓙꓵꓻ ꓢꓲ ꓠꓬꓲ ꓪꓴ-ꓢ ꓖꓶ ꓙ ꓟꓳ_ ꓟ ꓗꓴꓷꓼ ꓗꓪ ꓟꓽ ꓛꓲ ꓕ ꓑꓳꓸ ꓬꓲꓸ ꓠꓬ ꓕꓱ ꓡꓱ ꓙꓰ ꓗꓳꓸ ꓙꓰ_ ꓡꓳ= ꓖꓳ ꓡꓱ ꓠꓬꓲ ꓕꓱ ꓟ ꓗꓪ ꓐꓰ ꓣꓳ ꓢꓳ ꓣꓴ ꓓꓴ ꓠꓬ ꓪꓴ-ꓢ ꓗꓸ ꓠꓯꓸ ꓖꓼ ꓛꓳ ꓙꓰ ꓕꓯ ꓪꓴ-ꓢ ꓐꓯ ꓘꓶꓽ ꓔꓯ ꓛꓳ ꓙꓰ_ ꓕꓯ ꓕꓲ ꓖ ꓕꓲ ꓧꓪꓹ ꓠꓬ ꓣꓳ ꓮ ꓡꓰ ꓗꓪ ꓙꓰ ꓔꓬ ꓥ ꓟꓲ ꓣꓳ ꓟꓽ ꓢꓷꓸ ꓢꓷꓸ ꓐꓰ ꓖꓼ ꓫꓵ ꓦꓬꓼ ꓠꓬꓲ ꓙꓳ ꓡ ꓡꓳ= ꓪꓴ-ꓢ ꓖꓶ ꓙ ꓟꓳ_ ꓟ ꓕꓲ ꓚꓱꓹ ꓐꓯ ꓠꓬ ꓢꓲ ꓫꓬ ꓕꓳ ꓶ ꓐꓯ ꓘꓶꓽ ꓔꓯ ꓣꓳ ꓛꓳ ꓙꓳ ꓕꓯ ꓣꓳ ꓠꓬ ꓙꓻ ꓖꓴ ꓥꓳꓽ ꓡꓰ ꓫꓵ ꓙ ꓖꓴ ꓮ ꓡꓰ ꓗꓪ ꓙꓰ ꓔꓬ ꓟ ꓟꓽ ꓢꓷꓸ ꓗꓷ ꓡꓰ ꓫꓵ ꓕꓱ ꓡꓱ ꓥꓳꓽ ꓡꓰ ꓫꓵ ꓦꓬꓼ ꓠꓬꓲ ꓥ ꓟꓲ ꓙꓳ ꓡꓰ ꓗꓴꓸ_ ꓡꓳ= ꓖꓳ ꓡꓱ ꓥ ꓟꓲ ꓮ-ꓐꓷ-ꓡ ꓔꓯ ꓣꓳ ꓢꓳ ꓙꓰ ꓓꓴ ꓠꓬ ꓣꓳ ꓔꓯ ꓧꓳꓽ ꓣꓱ ꓔꓬ ꓟ ꓣꓳ ꓔꓯ ꓡꓳꓸ ꓔꓬ ꓟ ꓠꓬ ꓠꓵ ꓠꓲꓹ ꓙꓳ_ ꓟ ꓞꓳ ꓤ ꓔꓯ ꓮ ꓘꓶꓸ ꓠꓲꓹ ꓠꓵ ꓗꓴꓸ_ ꓟ꓾ ꓙꓲ_ ꓟ ꓪꓴ-ꓢ ꓥ ꓡꓳ ꓐꓯ_ ꓟ ꓥ ꓡꓳ=

ꓮ ꓡꓰꓳ ꓐꓯ ꓠꓬ ꓣꓳ ꓟꓲ ꓠꓯ ꓕꓱ ꓟ ꓗꓪ ꓛꓳ ꓙꓳ ꓔꓬ ꓕꓯ ꓣꓳ ꓔꓯ ꓧꓳꓽ ꓣꓱ ꓔꓬ ꓟ ꓮꓽ ꓟ ꓥ꓾ ꓐꓯ_ ꓟ꓾ ꓢꓷꓸ ꓠꓹ ꓟ ꓣꓳꓸ ꓚꓵ_ ꓡꓳ= ꓔꓯ ꓥꓳꓽ ꓐꓯ ꓠꓬ ꓣꓳ ꓘꓴ ꓜꓲꓼ ꓞꓳ ꓗꓪ ꓕꓲ ꓚꓱꓹ ꓐꓯ ꓠꓬ ꓣꓳ ꓦꓲꓻ ꓘꓴꓽ ꓗꓪ ꓝꓮꓲ ꓣꓳ ꓐꓰ ꓙꓻ ꓡꓯꓼ ꓘꓳ ꓔꓬ ꓟ꓾ ꓣꓳ ꓟꓬꓱꓽ ꓬꓰ ꓔꓬ ꓟ ꓜꓴꓻ ꓗꓪ ꓧꓳꓽ ꓣꓱ ꓔꓬ ꓟ ꓕꓲ ꓖ ꓕꓲ ꓧꓪꓹ ꓠꓬ ꓬꓲ ꓪ ꓥ ꓟꓲ ꓣꓳ ꓔꓯ ꓙꓻ ꓖꓴ ꓧꓳꓽ ꓪꓴꓸ ꓟꓴ ꓗꓴꓸ ꓫꓵ ꓦꓬꓼ ꓠꓬꓲ ꓟꓲ ꓙꓳ_ ꓡꓳ= ꓬꓲ ꓪ ꓠꓬ ꓬꓲ ꓪ ꓠꓲꓹ ꓡꓶꓽ ꓙꓳ_ ꓟ ꓕꓲ ꓚꓱꓹ ꓐꓯ ꓠꓬ ꓣꓳ ꓙꓵꓻ ꓟꓽ ꓓ ꓫꓵ ꓣꓳ ꓥꓳ ꓡꓳꓸ ꓟꓽ ꓓ ꓫꓵ ꓮ ꓟꓬꓹ ꓙꓳ_ ꓡꓳ= ꓖꓳ ꓕꓯ ꓣꓳ ꓤꓶꓻ ꓐꓬ ꓡꓰ ꓗꓴꓸ_ ꓡꓳ= ꓖꓳ ꓡꓱ ꓐꓯ ꓥ ꓟꓲ ꓮ-ꓐꓷ-ꓡ ꓔꓯ ꓣꓳ ꓡꓳꓸ ꓠꓬꓲ ꓕꓯ ꓮ-ꓐꓷ-ꓡ ꓠꓬ ꓪꓴ-ꓢ ꓔꓯ ꓙꓵꓻ ꓢꓲ ꓠꓬꓲ ꓬꓲ ꓛꓳ ꓙꓳ ꓙꓰ_ ꓡꓳ= ꓬꓲ ꓔꓯ ꓧꓳꓽ ꓣꓱ ꓔꓬ ꓟ ꓠꓬ ꓪꓴ-ꓢ ꓥꓳ ꓐꓯ_ ꓟ ꓬꓲ ꓢꓷꓸ ꓡꓳ=

ꓖꓳ ꓡꓱ ꓠꓬꓲ ꓬꓲꓼ ꓤ ꓠꓬꓲ ꓤ ꓐꓴ꓾ꓳ ꓣꓳ ꓠꓬ ꓕꓱ ꓟ ꓗꓪ ꓛꓳ ꓙꓳ ꓔꓬ ꓕꓯ ꓣꓳ ꓔꓯ ꓧꓳꓽ ꓣꓱ ꓔꓬ ꓟ ꓠꓬ ꓪꓴ-ꓢ ꓥꓳ꓾ ꓕꓲ ꓚꓱꓹ ꓐꓯ ꓠꓬ ꓬꓲꓸ ꓠꓲꓹ ꓡꓶꓽ ꓣꓳ ꓛꓳ ꓔꓬ ꓕꓯ ꓬꓲ ꓐꓯ ꓘꓶꓽ ꓣꓳ ꓠ ꓠꓹ ꓔꓬ ꓠꓬ ꓣꓳ ꓮ ꓕꓯ ꓟꓲ ꓐꓬ ꓡꓰ ꓟꓽ ꓓ= ꓮ ꓡꓰ ꓫꓵ ꓫꓸ ꓙꓵ ꓟꓷꓼ ꓙꓵ ꓓꓴ ꓔꓳꓹ ꓜꓳ ꓡ ꓥ ꓟꓲ ꓪꓴ-ꓢ ꓔꓯ ꓙꓵꓻ ꓠꓹ ꓟ ꓪꓴ-ꓢ ꓠꓬ ꓬꓲ ꓙ ꓟꓳ ꓘꓶꓽ ꓖꓶ ꓔ ꓟ ꓖꓶ ꓡ ꓥꓳ ꓐꓰ ꓙꓵꓻ ꓠꓹ ꓟ ꓣꓳ ꓔꓯ ꓐꓯ ꓟꓳꓸ ꓖꓶ ꓔꓬ ꓡꓳ=

ꓠꓬꓲꓽ ꓫꓵ ꓕꓲ ꓫꓵ ꓠꓬ ꓮ-ꓐꓷ-ꓡ ꓔꓯ ꓪꓴ-ꓢ ꓡꓰ ꓘꓴ_ ꓕꓯ ꓬꓲ ꓠꓬ ꓟꓲ ꓕꓯ ꓢꓲ ꓗꓪ ꓮ ꓫꓵ ꓙꓳ ꓟ ꓟꓽ ꓢꓷꓸ ꓢꓷꓸ ꓐꓰ ꓙꓰ_ ꓟ ꓦꓬꓼ ꓠꓬꓲ ꓗꓪ ꓚꓵ ꓚꓵ ꓠꓲꓹ ꓫ ꓟꓬ ꓫ ꓓꓴ ꓮ ꓘꓶꓸ ꓔꓳꓹ ꓜꓳ ꓡ ꓡꓳ= ꓟꓽ ꓟꓶ ꓙ ꓟ ꓦꓬꓼ ꓠꓬꓲ꓾ ꓢꓴ ꓡꓰ ꓓꓶꓽ ꓡꓯ ꓘꓳ ꓔꓲꓸ ꓡꓯꓼ ꓘꓳ ꓟ ꓦꓬꓼ ꓠꓬꓲ ꓮ ꓘꓶꓸ ꓓꓳꓺ ꓡ ꓡꓳ= ꓖꓳ ꓡꓱ ꓐꓯ ꓥ ꓟꓲ ꓕꓱ ꓡꓱ ꓐꓰ ꓠꓲꓹ ꓫ ꓟꓬ ꓫ ꓓꓴ ꓠꓬ ꓪꓴ-ꓢ ꓔꓯ ꓟꓽ ꓙꓵꓻ ꓐꓰ ꓗꓷ ꓡꓰ ꓟꓽ ꓐ ꓡ= ꓠꓲꓹ ꓫ ꓟꓬ ꓫ ꓓꓴ ꓗꓪ ꓐꓰ ꓬꓲ ꓠꓬ ꓪ ꓙꓲ ꓙꓵꓻ ꓡ ꓡꓳ꓾ ꓪꓴ-ꓢ ꓔꓯ ꓪ ꓙꓲ ꓠꓲꓹ ꓠꓵ ꓡ ꓡꓳ=

ꓖꓳ ꓟ ꓡꓰ ꓐꓰ ꓣꓳ ꓤꓶꓻ ꓗꓪ ꓥ ꓟꓲ ꓣꓳ ꓪꓴ-ꓢ ꓔꓯ ꓙꓵꓻ ꓕꓯ ꓕꓲ ꓖ ꓕꓲ ꓧꓪꓹ ꓠꓬ ꓮ ꓘꓶꓸ ꓫꓸ ꓙꓵ ꓪ ꓫꓵ ꓠꓲꓹ ꓟ ꓪꓴ ꓧꓶ ꓪ ꓫꓵ ꓠꓲꓹ ꓥꓳ ꓪ ꓫꓵ ꓮ ꓟꓬꓹ ꓙꓳ_ ꓡꓳ= ꓖꓳ ꓡꓱ ꓐꓯ ꓥ ꓟꓲ ꓕꓱ ꓡꓱ ꓐꓰ ꓠꓲꓹ ꓫ ꓟꓬ ꓫ ꓓꓴ ꓠꓬ ꓪꓴ-ꓢ ꓬꓲ ꓠꓵ ꓠꓲꓹ ꓔꓯ ꓟꓽ ꓙꓵꓻ ꓟꓽ ꓗꓷ ꓡꓰ ꓠꓹ ꓟ ꓣꓳꓸ ꓚꓵ_ ꓡꓳ= ꓮ ꓡꓰꓳ ꓐꓯ ꓠꓬ ꓪꓴ-ꓢ ꓠꓬ ꓣꓳ ꓔꓯ ꓠꓲꓹ ꓠꓵ ꓔꓬ ꓟ ꓡꓰ ꓐꓰ ꓣꓳ ꓔꓯ ꓙ ꓖꓴ ꓧꓳꓽ ꓟꓳꓸ ꓖꓶ ꓡ ꓔꓬ ꓡꓳ= ꓕꓲ ꓖ ꓕꓲ ꓧꓪꓹ ꓠꓬ ꓟꓽ ꓗꓳꓸ ꓟꓽ ꓓ ꓗꓳꓸ ꓙꓰ ꓪ ꓟ ꓠꓲꓹ ꓫ ꓟꓬ ꓫ ꓓꓴ ꓓꓳꓺ ꓡ ꓗꓴꓸ_ ꓡꓳ= ꓕꓱ ꓟ ꓔꓯ ꓓꓵꓽ ꓙ ꓢꓲ ꓠꓬꓲ ꓠꓲꓹ ꓫ ꓟꓬ ꓫ ꓓꓴ ꓮ ꓙꓵ ꓔꓯ ꓪꓴ-ꓢ ꓡꓰ ꓖꓶ ꓙ ꓟꓳ_ ꓟ ꓐꓰ ꓕꓲ ꓚꓱꓹ ꓐꓯ ꓠꓬ ꓬꓲꓸ ꓗꓪ ꓐꓰ ꓣꓳ ꓙ ꓬꓰ ꓐ ꓡ ꓡꓳ ꓐꓰ ꓙꓵꓻ ꓠ ꓔ ꓟ ꓣꓳꓸ ꓚꓵ ꓓꓰ ꓡꓰ_ ꓟ ꓥ ꓡꓳ= ꓣꓳ ꓕꓲ ꓣꓳ ꓛꓳ ꓕꓲ ꓣꓳ ꓗꓪ ꓟꓲ ꓕꓯ ꓢꓲ ꓗꓪ ꓮ ꓫꓵ ꓓ_ ꓥ ꓟꓽ ꓢꓷꓸ ꓖꓳ ꓡꓱ ꓐꓯ ꓥ ꓟꓲ ꓪꓴ-ꓢ ꓔꓯ ꓙꓵꓻ ꓟ ꓙꓵꓻ ꓠꓲꓹ ꓡꓰ ꓙꓰ ꓥꓳ ꓐꓯ ꓠꓬ ꓣꓳ ꓛꓲ ꓕꓲ ꓡꓰ ꓟꓽ ꓓ ꓡꓱꓸ ꓙꓰ ꓟꓽ ꓓ ꓐꓰ ꓮ-ꓐꓷ-ꓡ ꓤꓶꓻ ꓔꓯ ꓣꓳ ꓡꓳꓸ ꓠꓬꓲ ꓕꓯ ꓢꓷꓸ ꓪ ꓡꓳ= ꓖꓳ ꓡꓱ ꓠꓬꓲ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓟꓲ ꓕꓯ ꓢꓲ ꓗꓪ ꓮ ꓫꓵ ꓙꓳ_ ꓟ ꓟꓽ ꓢꓷꓸ ꓟꓲ ꓕꓯ ꓢꓲ ꓗꓪ ꓮ ꓫꓵ ꓓ_ ꓥ ꓟꓽ ꓢꓷꓸ ꓖꓳ ꓡꓱ ꓐꓯ ꓥ ꓟꓲ ꓣꓳ ꓔꓯ ꓧꓳꓽ ꓣꓱ ꓔꓬ ꓟ ꓠꓬ ꓪꓴ-ꓢ ꓥꓳ ꓐꓯ ꓟ ꓢꓷꓸ ꓠꓹ ꓟ ꓐꓰ ꓣꓳ ꓙꓰ ꓔꓬ ꓟ ꓦꓬꓼ ꓠꓬꓲ ꓗꓪ ꓫ ꓙꓵ ꓟꓷꓼ ꓙꓵ ꓓꓴ ꓔꓳꓹ ꓜꓳ ꓡ ꓕꓯ ꓕꓲ ꓚꓱꓹ ꓐꓯ ꓠꓬ ꓣꓳ ꓔꓯ ꓠꓲꓹ ꓟ ꓪꓴ ꓧꓶ ꓡꓰ ꓝꓲ_ꓟ꓾ ꓣꓳ ꓔꓯ ꓠꓻ ꓡꓰ ꓝꓲ_ ꓟ꓾ ꓔꓳꓹ ꓜꓳ ꓡ ꓕꓯ ꓪꓴ-ꓢ ꓔꓯ ꓟꓽ ꓙꓵꓻ ꓟꓽ ꓬꓰ ꓬꓰ ꓐꓰ ꓥꓪ ꓔꓯ ꓡꓳꓸ ꓔꓬ ꓟ ꓐꓹ ꓐ ꓠꓬ ꓠꓵ ꓠꓲꓹ ꓙꓳ_ ꓡꓳ ꓙꓽ ꓗꓳ ꓠꓲꓹ ꓙꓳ_ ꓡꓳ ꓕꓱ ꓟ ꓔꓯ ꓓꓵꓽ ꓙ ꓠꓬꓲ ꓢꓲ ꓢꓯꓼ ꓕꓵꓼ ꓐꓯ ꓠꓬ ꓣꓳ ꓐꓱ ꓶ ꓙꓲ ꓖꓴ ꓙꓳ ꓢꓲ ꓠꓬꓲ ꓕꓲ ꓠꓬꓲ ꓙꓳ ꓠꓬ ꓟꓲ ꓠꓯ ꓕꓱ ꓟ ꓗ ꓗꓹ ꓛꓲ ꓛꓲ ꓡꓰ ꓙ ꓙꓰ ꓐ ꓡ ꓢꓲ꓾ ꓕꓲ ꓞꓲ ꓕꓲ ꓑ ꓢꓯꓼ ꓟꓬ ꓟꓶ ꓥꓳ ꓐꓰ ꓮ ꓙꓵ ꓢꓴ ꓔꓯ ꓢꓯꓼ ꓖꓶ ꓠꓲꓹ ꓫꓵ_ ꓡꓳ=