ꓟ-ꓡꓲ ꓪꓴ-ꓢ ꓔꓯ ꓫꓱꓸ ꓖꓶˍ ꓟ

ꓡꓴ-ꓘ 1ꓽ46-56

ꓒꓬꓱꓼ ꓡ ꓟꓽ ꓓꓻꓳ ꓡ?

ꓪꓴ-ꓢ ꓡꓰ ꓬꓰ ꓖꓶ ꓡˍ ꓟ ꓮ ꓙꓵꓽ ꓕꓯꓽ ꓢꓲ ꓗꓪ ꓟꓹ ꓟ ꓟ-ꓡꓲ-ꓬ ꓬꓲ ꓡꓰ ꓓꓽ ꓔꓳꓹ ꓖꓶˍ ꓟ ꓠꓬ ꓪꓴ-ꓢ ꓔꓯ ꓫꓱꓸ ꓖꓶˍ ꓟ ꓐꓰ ꓫꓸ ꓟꓳˍ ꓟ ꓥ ꓡꓳ= ꓫꓱꓸ ꓖꓶˍ ꓟ ꓫꓱꓸ ꓖꓶ ꓘꓶꓽ ꓐꓴ ꓠꓬ ꓪꓴ-ꓢ ꓬꓲꓸ ꓚꓳꓻ ꓑ ꓕꓲ ꓡꓰ ꓥ ꓟ ꓟ-ꓡꓲ-ꓬ ꓬꓲ ꓐꓯ ꓘꓶꓽ ꓥ ꓡꓳ= ꓞꓳ ꓤ ꓟꓳꓻˍ ꓟ ꓕꓲ ꓒꓳꓹ ꓗꓪ ꓐꓰ ꓪꓴꓽ ꓓꓰˍ ꓟ ꓒꓬꓱꓼ ꓡ ꓟꓽ ꓓ ꓟ ꓪꓴ-ꓢ ꓬꓲ ꓔꓶꓺ ꓙꓱꓼ ꓔꓯ ꓬꓲ ꓡꓰ ꓠꓲꓹ ꓒꓵꓽ ꓠꓲꓹ ꓡꓱ ꓘꓳꓹ ꓣꓴ ꓗꓷ ꓗꓸ ꓠꓯꓸ ꓬꓲ ꓟꓶꓽ ꓠꓷꓹ ꓘꓶꓽ ꓗꓪ ꓐꓰ ꓓꓳꓻ ꓡˍ ꓟ ꓐꓯ ꓘꓶꓽ ꓥ ꓡꓳ=

ꓞꓳ ꓤ ꓠꓲꓹ ꓟ ꓔꓯ ꓟꓳꓸ ꓢꓷꓸ ꓠꓲꓹ ꓙꓳ ꓢꓴ ꓐꓴ ꓡꓰ ꓕꓱ ꓡꓱ ꓐꓯ ꓔ ꓡꓳ= ꓞꓳ ꓤ ꓕꓲ ꓣꓳ ꓠꓬ “ꓒꓬꓱꓼ ꓡ ꓟꓽ ꓓ” ꓐꓯ ꓟ ꓔꓯ ꓬꓲ ꓠꓲꓹ ꓟ ꓗꓪ ꓚꓵꓹ ꓡꓰ ꓕꓯ ꓠꓽ꓾ ꓖꓳ ꓟ ꓠꓬ ꓬꓲ ꓪꓴꓸ ꓠꓷꓸ ꓗꓪ ꓛꓲ ꓬꓰˍ ꓡꓳ= ꓪꓴꓸ ꓠꓷꓸ ꓠꓬ ꓖꓳ ꓟ ꓔꓯ ꓚꓲꓸ ꓗꓷꓳ= ꓖꓳ ꓕꓲ ꓙꓵꓹ ꓗꓪ ꓐꓰ ꓪꓴꓸ ꓔꓴ ꓢꓲ ꓪꓴꓸ ꓠꓷꓸ ꓠꓬ ꓬꓲ ꓔꓯ ꓒꓬꓱꓼ ꓡ ꓟꓽ ꓓ ꓟ ꓚꓱꓹ ꓡꓰ ꓟꓳꓸ ꓖꓶ ꓡˍ ꓡꓳ= ꓒꓬꓱꓼ ꓡ ꓓꓹ ꓟ ꓚꓱꓹ ꓐꓴ ꓔꓯ ꓬꓲ ꓔꓯ ꓟꓽ ꓖꓶꓽꓳ= ꓖꓳ ꓡꓱ ꓠꓬꓲ ꓟꓬꓱꓽ ꓕꓲ ꓙꓰꓽ ꓬꓰ ꓪꓴꓸ ꓔꓴˍ ꓕꓯ ꓒꓬꓱꓼ ꓡ ꓟꓽ ꓓ ꓐꓯ ꓟ ꓔꓯ ꓡꓰꓽ ꓬꓲ ꓪꓴꓸ ꓓꓵ ꓗꓪ ꓓꓳꓻ ꓡˍ ꓥꓳ= ꓖꓳ ꓕꓯ ꓮ ꓫꓵꓽ ꓟꓬꓱꓽ ꓥˍ ꓟꓲ ꓬꓲ ꓠꓬ “ꓒꓬꓱꓼ ꓡ ꓟꓽ ꓓ꓾ ꓟꓽ ꓐ ꓡ” ꓐꓰ ꓮ ꓕꓯˍ ꓟꓲ ꓓꓵꓽ ꓙ ꓔꓬ ꓢꓴ ꓕꓲ ꓣꓳ ꓒꓬꓱꓼ ꓡˍ ꓥꓳ= ꓖꓳ ꓗꓪ ꓡꓰꓽ ꓧꓪꓸ ꓡꓰˍ ꓟ ꓠꓬ ꓬꓲ ꓔꓯ ꓐꓰ ꓶꓽ ꓡꓰˍ ꓡꓳ=

ꓕꓲ ꓙꓰꓽ ꓙꓰꓽ ꓔꓯ ꓬꓰ ꓧꓪꓸ ꓡꓰ ꓢꓴ ꓐꓴ ꓠꓬ “ꓒꓬꓱꓼ ꓡ ꓟꓽ ꓓ” ꓐꓯ ꓟ ꓐꓯ ꓘꓶꓽ ꓟꓽ ꓐꓯ꓾ ꓥꓪ ꓒꓬꓱꓼ ꓡ ꓓꓹ ꓥ꓾ ꓐꓯ ꓘꓶꓽ ꓔꓯ ꓡꓰꓽ ꓣꓱꓽˍ ꓡꓳ= ꓒꓬꓱꓼ ꓡ ꓓꓹ ꓥ꓾ ꓬꓰ ꓐ ꓡˍ ꓥ꓾ ꓐꓯ ꓟ ꓐꓯ ꓘꓶꓽ ꓔꓯ ꓣꓱꓽ ꓔꓬ ꓕ ꓑꓳꓸ꓾ ꓪꓴꓸ ꓠꓷꓸ ꓗꓪ ꓐꓰ ꓒꓬꓱꓼ ꓡ ꓓꓹ ꓟ ꓚꓱꓹ ꓔꓯ ꓡꓰꓽ ꓣꓴ ꓓꓳ ꓖꓶ ꓡˍ ꓥꓳ= ꓓꓵꓽ ꓙ ꓚꓱꓹ ꓬꓲ ꓫꓵꓼˍ ꓟꓲ ꓓꓳ ꓡˍ ꓥꓳ=

ꓠꓲꓹ ꓠꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓣꓳ ꓤꓶꓻ ꓗꓪ ꓒꓲꓼ ꓡꓰ ꓝꓲ꓾ ꓟꓶꓽ ꓡꓰ ꓝꓲ ꓠꓯꓹ ꓟ ꓠꓬ “ꓒꓬꓱꓼ ꓡ ꓟꓽ ꓓ” ꓐꓯ ꓟ ꓐꓯ ꓘꓶꓽ ꓡꓰꓽ ꓥꓳ= ꓢꓲꓽ ꓫꓬ ꓕꓳꓽ ꓶ ꓗꓪ ꓪꓴ-ꓢ ꓬꓲ ꓡ ꓞꓳ ꓐꓴ ꓠꓬ ꓞꓳ ꓤ ꓓꓵꓽ ꓙ ꓟꓽ ꓑꓰ ꓟ꓾ ꓞꓳ ꓤ ꓐꓴ ꓡꓰ ꓬꓰ ꓟꓽ ꓐ ꓡ ꓟ ꓟꓬꓱꓽ ꓐꓴ ꓔꓯ ꓡꓳꓹ ꓬꓰˍ ꓗꓪ ꓛꓲꓺ ꓬꓰ ꓐ ꓡ ꓗꓷꓳ=

ꓒꓲ-ꓕꓱ ꓠꓬ ꓬꓲ ꓤꓶꓻ ꓗꓪ ꓒꓬꓱꓼ ꓡ ꓟꓽ ꓓ ꓟ ꓔꓯ ꓬꓰ ꓠꓹ ꓟ ꓐꓱ ꓶ ꓢꓲꓺ ꓒ ꓬꓰ-ꓢꓴ ꓔꓯ ꓙꓵꓻ ꓗꓷꓳ= ꓡꓲꓺ ꓗꓪ ꓐꓰ ꓬꓯꓼ ꓡ ꓢꓲ ꓬꓲꓻ ꓙꓬ ꓕꓯꓽ ꓢꓲ ꓗꓪ ꓙ ꓖꓴ ꓫꓱꓽ ꓗꓷꓳ= ꓬꓲꓻ ꓙꓬ ꓕꓯꓽ ꓢꓲ ꓙ ꓖꓴ ꓫꓱꓼˍ ꓟ ꓠꓽ ꓒꓬꓱꓼ ꓡ ꓟꓽ ꓓ ꓟ ꓥ ꓡꓳ= ꓖꓳ ꓡꓱ ꓥˍ ꓟꓲ ꓒꓲ-ꓕꓱ ꓬꓰ-ꓢꓴ ꓔꓯ ꓙꓵꓻ ꓗꓷ ꓟ ꓑꓶꓸ ꓓꓴ ꓬꓲ ꓠꓬ ꓬꓲꓻ ꓙꓬ ꓕꓯꓽ ꓢꓲ ꓗꓪ ꓫꓱꓽ ꓐ ꓡ ꓗꓷꓳ=

ꓓꓰꓽˍ ꓠꓬ ꓟꓶˍ ꓥꓳ= ꓧꓪꓸˍ ꓠꓬ ꓟꓳꓻˍ ꓥꓳ= ꓗꓹ ꓗꓶꓽ ꓲ' ꓠꓬ ꓒꓴ ꓖꓶꓽ ꓡˍ ꓥꓳ= ꓐꓯ ꓘꓶꓽ ꓕꓱ ꓟ ꓡꓰꓽ ꓢꓲꓽ ꓫꓬ ꓕꓳꓽ ꓶ ꓗꓪ ꓓꓹ ꓟ ꓥ ꓡꓳ= ꓒꓬꓱꓼ ꓡ ꓟꓽ ꓓꓻꓳ꓾ ꓠꓲꓹ ꓟ ꓫꓸ ꓪˍ ꓥꓳ꓾ ꓫꓸ ꓙꓵꓻ ꓪˍ ꓥꓳ꓾ ꓐꓯ ꓟ ꓐꓯ ꓘꓶꓽ ꓐꓴ ꓠꓬ ꓢꓲꓽ ꓫꓬ ꓕꓳꓽ ꓶ ꓗꓪ ꓟꓽ ꓓꓹ=

ꓖꓳ ꓡꓱ ꓠꓬꓲ ꓒꓬꓱꓼ ꓡ ꓟꓽ ꓓ ꓟ ꓮ ꓙꓵꓽ ꓐꓱ ꓶ ꓪꓴ-ꓢ ꓔꓯ ꓡꓰꓽ ꓙꓵꓻ꓾ ꓢꓲꓺ ꓒ ꓬꓰ-ꓢꓴ ꓣꓳꓽ ꓪꓴ-ꓢ ꓠꓬ ꓣꓳꓽ ꓒ ꓕꓲꓺ ꓗꓪ ꓡꓰꓽ ꓔꓬ ꓡꓳ=