ꓠꓬꓲꓸ ꓠꓬꓲ ꓟ ꓢꓲ ꓫꓬ ꓕꓳ ꓶ ꓝꓲꓸ

ꓒꓲ-ꓡꓲ ꓠꓬ ꓠ-ꓕ-ꓠꓰ ꓔꓯ ꓧꓪ ꓟꓶ ꓢꓲ꓾ ꓟꓳ-ꓫꓲ ꓡꓰ ꓙꓵꓽ ꓗ ꓕꓳ ꓶ ꓗꓪ ꓐꓳ ꓔ ꓟ ꓐꓰ꓾ ꓟꓷꓽ ꓠꓷꓹ ꓝ ꓢꓴ ꓕꓳ ꓶ ꓗꓪ ꓐꓳ ꓔ ꓟ꓾ ꓬꓳ-ꓢꓷ ꓬꓲ ꓮ ꓐꓲ꓾ ꓠ-ꓢ-ꓡꓱ ꓢꓴ ꓬꓰ-ꓢꓴ ꓔꓯ ꓥꓪ ꓠꓴꓽ ꓧꓪ ꓟꓶ ꓡꓰꓳ꓾ ꓐꓯˍ ꓡꓳ꓿ ꓠ-ꓕ-ꓠꓰ ꓡꓰ ꓬꓲ ꓔꓯ꓾ ꓠ-ꓢ-ꓡꓱ ꓗꓪ ꓐꓰ ꓙꓲꓻˍ ꓟ ꓮꓸ ꓫꓵ ꓓꓳ ꓡ ꓐ ꓡ ꓢꓰꓽ꓾ ꓐꓯˍ ꓡꓳ꓿ ꓖꓳ ꓕꓯ ꓒꓲ-ꓡꓲ ꓡꓰ ꓬꓲ ꓔꓯ꓾ ꓡꓳꓸ ꓠꓬꓲ ꓡꓯ ꓟꓴ꓾ ꓐꓯ ꓖꓶˍ ꓡꓳ꓿ꓠ-ꓕ-ꓠꓰ ꓬꓲ ꓔꓯ ꓡꓻˍ ꓟ ꓔꓯ ꓬꓰ-ꓢꓴ ꓟꓳ ꓗꓷ ꓠꓬ ꓬꓲ ꓔꓯ ꓖꓴ ꓢꓲ꓾ ꓠꓬꓲ ꓠꓹ꓾ ꓖꓳꓼ ꓠꓲꓹ ꓟꓽ ꓙꓳ ꓟ ꓬꓲ-ꓢꓷ-ꓡꓰ ꓡ ꓞꓳ ꓚꓵꓺ ꓕꓲ ꓣꓳ꓾ ꓐꓯˍ ꓡꓳ꓿ꓠ-ꓕ-ꓠꓰ ꓡꓰ ꓬꓲ ꓔꓯ꓾ ꓠꓴ ꓮ ꓡꓲ ꓐꓰ ꓥꓪ ꓔꓯ ꓢꓷˍ ꓡ? ꓐꓰ ꓠ ꓠꓬꓲˍ ꓕꓯ꓾ ꓬꓰ-ꓢꓴ ꓬꓲ ꓔꓯ ꓒꓳꓹ ꓖꓶ ꓢꓲ꓾ ꓒꓲ-ꓡꓲ ꓠꓴ ꓔꓯ ꓟꓽ ꓘꓴ ꓢꓰꓽ ꓕꓯ꓾ ꓠꓴ ꓠꓬ ꓘꓶꓽ ꓢꓶꓽ ꓜꓲ ꓠꓯꓸ ꓘꓪ ꓔꓬ ꓕꓯˍ ꓡꓰ ꓠꓴ ꓔꓯ ꓥꓪ ꓟꓳꓻ ꓗꓷꓳ꓾ ꓐꓯ ꓖꓶˍ ꓡꓳ꓿  ꓠ-ꓕ-ꓠꓰ ꓡꓰ ꓟꓸ ꓒꓽꓳ꓾ ꓠꓴ ꓠꓽ ꓪꓴ-ꓢ ꓮ ꓐꓲ꓾ ꓬꓲ-ꓢꓷ-ꓡꓰ ꓪ ꓔꓲ ꓥ ꓡꓳ꓾ ꓐꓯˍ ꓡꓳ꓿ ꓬꓰ-ꓢꓴ ꓬꓲ ꓔꓯ꓾ ꓘꓶꓽ ꓢꓶ ꓜꓲ ꓠꓯꓸ ꓘꓪ ꓔꓬ ꓕꓯˍ ꓡꓰ ꓠꓴ ꓔꓯ ꓥꓪ ꓟꓳꓻ ꓗꓷꓳ꓾ ꓐꓯˍ ꓟ ꓗꓪ ꓐꓰ ꓠꓴ ꓙꓵꓻˍ ꓡ? ꓕꓱ ꓟ ꓕꓯꓽ ꓢꓲ ꓪꓴꓽˍ ꓡꓳ ꓫꓵ ꓠꓴ ꓟꓳˍ ꓢꓰꓽ ꓥꓳ꓾ ꓐꓯ ꓖꓶˍ ꓡꓳ꓿ ꓝꓮꓲ ꓬꓰ-ꓢꓴ ꓡꓰ꓾ ꓥꓪ ꓔꓱ ꓔꓱꓹꓼ ꓠꓴ ꓪꓽ ꓔꓯ ꓐꓯ ꓖꓶˍ ꓠꓬꓲ꓾ ꓟꓴꓽ ꓗꓪ ꓒꓴ ꓡ ꓟ ꓐꓰ ꓪꓴ-ꓢ ꓬꓲ ꓝꓲ ꓓꓴ ꓐꓴ ꓠꓬ꓾ ꓡ-ꓞꓳ-ꓮ-ꓐꓲ ꓕꓯꓽ ꓢꓲ ꓗꓪ ꓓꓯ ꓓꓯ ꓬꓯꓼ ꓬꓯꓼ ꓬꓰ ꓔꓬ ꓟ ꓔꓯ ꓠꓴ ꓪꓽ ꓟꓳˍ ꓥꓳ꓾ ꓐꓯˍ ꓡꓳ꓿ ꓬꓳ-ꓦ 1ꓽ45-51