ꓢꓴ ꓔꓯ ꓖꓶ_ ꓟ ꓗꓪ ꓐꓰ ꓶꓼ ꓤ ꓫꓱꓹ ꓤ ꓟꓶ_ ꓟ

ꓠꓬꓲ ꓠꓬꓲ ꓪꓴ-ꓢ ꓢꓲ ꓫꓬ ꓕꓳ ꓶ ꓠꓬ (2 ꓘꓳ-ꓡꓱ-ꓕꓴ 9: 6-11) ꓥ ꓡꓳ꓾ ꓟꓸ ꓟꓲ ꓖꓳ ꓗꓪ ꓠꓬ ꓮ ꓟꓬꓹ ꓫꓵꓸ ꓔ ꓢꓴ ꓠꓬ ꓮ ꓟꓬꓹ ꓫ ꓟꓶ_ ꓥꓳ꓾ ꓮ ꓔꓲꓸ ꓤ ꓫꓵꓸ ꓢꓴ ꓠꓬ ꓮ ꓔꓲꓸ ꓤ ꓡꓰ ꓫ ꓟꓶ_ ꓥꓳ꓾ ꓐꓰ ꓥ ꓡꓳ=

ꓪꓴ-ꓢ ꓠꓬ ꓗꓹ ꓛꓲ ꓛꓲ ꓡꓰ ꓠꓲꓹ ꓪꓴ ꓪꓴ ꓡꓰ ꓖꓶ ꓢꓴ ꓔꓯ ꓠꓲꓹ ꓠꓵ_ ꓡꓳ ꓐꓰ ꓐꓯ ꓔ ꓡꓳ= ꓬꓲ ꓤ ꓠꓬꓲ ꓤ ꓐꓴꓳ꓾ ꓣꓳ ꓠꓬ ꓮ ꓔꓲꓸ ꓤ ꓔꓶꓻ ꓔ ꓠꓬ ꓮ ꓔꓲꓸ ꓤ ꓟꓶ_ ꓥꓳ꓾ ꓮ ꓟꓬꓹ ꓔꓶꓻ ꓔ ꓠꓬ ꓮ ꓟꓬꓹ ꓟꓶ_ ꓥꓳ ꓐꓰ ꓙꓲ ꓫꓬ ꓢꓴ ꓒꓳ-ꓡꓳ ꓡꓰ ꓫꓬ ꓫꓬ ꓡꓰ ꓐꓯ ꓔ ꓡꓳ= ꓥ ꓡꓳ꓾ ꓣꓳ ꓐꓱ ꓤ ꓐꓱ ꓟꓲ ꓬꓰ ꓥ ꓟꓲ ꓮ ꓫꓵ ꓬꓰ ꓥ ꓟꓲ ꓮ ꓔꓲꓸ ꓤ ꓔꓶꓻ ꓔ ꓠꓬ ꓮ ꓔꓲꓸ ꓤ ꓡꓰ ꓟꓶ_ ꓥꓳ= ꓮ ꓟꓬꓹ ꓔꓶꓻ ꓔ ꓠꓬ ꓮ ꓟꓬꓹ ꓟꓶ ꓥꓳ= ꓢ ꓢ_ ꓡꓰ ꓥꓳ꓾ ꓖꓳ ꓡꓱ ꓥ ꓟꓲ ꓒꓳ-ꓡꓳ ꓡꓰ ꓐꓯ_ ꓟ ꓠꓬ ꓤ ꓫꓵ ꓤ ꓪꓳ ꓔꓯ ꓐꓯ ꓫꓵ ꓟꓽ ꓥ꓾ ꓐꓰ ꓣꓳ ꓕꓲ ꓠꓬꓲ ꓡꓲ ꓕꓲ ꓠꓬꓲ ꓞꓳ ꓙꓳ ꓔꓬ ꓟ ꓗꓪ ꓣꓳ ꓣꓱꓽ ꓔꓬ ꓬꓲꓸ ꓙꓵꓹ꓾ ꓣꓳ ꓬꓰ ꓔꓬ ꓟ ꓢꓯꓼ ꓪ ꓠꓬ ꓮ ꓡꓰ ꓗꓪ ꓣꓱꓽ ꓔꓬ ꓡ? ꓐꓯ_ ꓟ ꓔꓯ ꓣꓳ ꓓꓵꓽ ꓙ ꓠꓬꓲ ꓔ ꓟ ꓥ ꓡꓳ= ꓣꓳ ꓟꓲ ꓠꓯ ꓞꓳ ꓤ ꓐꓯ ꓟ ꓠꓬ ꓧꓪꓽ ꓖꓳ ꓓꓱ ꓐꓰ ꓦ ꓕꓱ ꓡꓱ ꓠꓬꓲꓽ ꓒꓳꓹ ꓙꓳ ꓫꓵ ꓞꓳ ꓤ ꓥ ꓡꓳ= ꓖꓳ ꓡꓱ ꓠꓬꓲ ꓧꓪꓽ ꓖꓳ ꓓꓱ ꓐꓱ ꓶ ꓥ ꓟꓲ ꓢꓯꓼ ꓕꓵꓼ ꓟ ꓡꓰ ꓐꓰ ꓦ ꓐꓱ ꓶ ꓥ ꓟꓲ ꓢꓯꓼ ꓕꓵꓼ ꓠ ꓗꓹ ꓡꓳ= ꓣꓳ ꓠꓬ ꓕꓲ ꓠꓬꓲ ꓡꓲ ꓕꓲ ꓠꓬꓲ ꓧꓪꓽ ꓖꓳ ꓓꓱ ꓐꓱ ꓶ ꓡꓰ ꓓꓵꓽ ꓙ ꓢꓲ ꓠꓬꓲ ꓧꓪꓽ ꓖꓳ ꓓꓱ ꓐꓱ ꓶ ꓡꓰ ꓢꓯꓼ ꓕꓵꓼ ꓔꓬ ꓕꓯ ꓠꓽ ꓣꓳ ꓫ ꓟꓶ_ ꓟ ꓠꓬ ꓧꓪꓽ ꓖꓳ ꓓꓱ ꓐꓱ ꓶ ꓟꓲ ꓠꓯ ꓕꓱ ꓟ ꓐꓱ ꓶ ꓡꓰ ꓒꓬꓱꓼ ꓡ ꓥꓳ= ꓮ ꓡꓰꓳ ꓐꓯ ꓠꓬ ꓣꓳ ꓬꓰ_ ꓟ ꓮ ꓙꓵ ꓣꓳ ꓫꓸ ꓕꓱ_ ꓟ ꓮ ꓙꓵ ꓣꓳ ꓙꓰ_ ꓟ ꓮ ꓙꓵ ꓠꓬ ꓕꓲ ꓠꓬꓲ ꓡꓲ ꓕꓲ ꓠꓬꓲ ꓣꓳ ꓔꓶꓻ ꓔꓬ ꓟ ꓬꓲꓸ ꓫꓵꓸ ꓥ ꓡꓳ= ꓕꓲ ꓠꓬꓲ ꓙꓳ ꓠꓬ ꓣꓳ ꓫ ꓪ_ ꓟ꓾ ꓕꓲ ꓠꓬꓲ ꓙꓳ ꓠꓬ ꓣꓳ ꓟꓶ_ ꓟ ꓬꓰ ꓔꓬ ꓟ ꓥ ꓡꓳ= ꓣꓳ ꓬꓲꓸ ꓙꓵꓹ ꓔꓯ ꓮ ꓡꓲ ꓣꓱꓽ ꓔꓬ ꓡ? ꓣꓳ ꓬꓲꓸ ꓙꓵꓹ ꓠꓬ ꓕꓲ ꓠꓬꓲ ꓣꓳ ꓠꓬ ꓣꓳ ꓬꓰ ꓔ ꓟ ꓣꓳ ꓔꓯ ꓖꓶ ꓡ ꓟ ꓠꓬ ꓕꓱ ꓡꓱ ꓬꓲ ꓙꓵꓹ ꓗꓪ ꓐꓰ ꓥ ꓡꓳ=

ꓖꓳ ꓡꓱ ꓠꓬꓲ ꓬꓲꓼ ꓤ ꓠꓬꓲ ꓤ ꓐꓴ ꓣꓳ ꓟꓲ ꓠꓯ ꓕꓱ ꓟ ꓗꓪ ꓞꓳ ꓙꓳ ꓔꓬ ꓕꓯ ꓚꓵ ꓚꓵ ꓣꓳꓸ ꓚꓵ ꓓꓰ ꓡꓰ_ ꓟ ꓠꓬ ꓦ ꓐꓱ ꓶ ꓟꓴ ꓗꓪ ꓡꓯꓼ ꓫꓴꓻ ꓐꓱ ꓶ ꓢꓯꓼ ꓕꓵꓼ ꓠꓹ ꓟ ꓥꓳ ꓐꓯ_ ꓟ ꓢꓲ ꓫꓬ ꓕꓳ ꓶ ꓗꓪ ꓐꓰ ꓣꓳ ꓔꓯ ꓐꓯ ꓟꓳꓸ ꓖꓶ ꓔ ꓬꓰ_ ꓡꓳ= ꓟꓲ ꓠꓯ ꓕꓱ ꓟ ꓗꓪ ꓐꓰ ꓓꓳꓺ ꓙꓰ ꓕꓯ ꓣꓳ ꓧꓪ ꓔ ꓟ ꓮ ꓙꓵ ꓠꓬ ꓗꓸ ꓠꓯꓸ ꓢꓲ ꓗꓪ ꓗꓷ ꓡꓰ ꓢꓲ ꓠꓬꓲ ꓣꓳ ꓖꓶ ꓗꓷ ꓟ ꓮ ꓙꓵ ꓠꓬ ꓣꓳ ꓔꓯꓹ ꓙꓰ_ ꓟ ꓬꓲꓸ ꓙꓵꓹ ꓥ ꓡꓳ= ꓖꓳ ꓡꓱ ꓠꓬꓲ ꓙꓲ ꓫꓬ ꓢꓴ ꓕꓲ ꓣꓳ ꓡꓰ ꓕꓱ ꓡꓱ ꓐꓯ ꓔ ꓡꓳ= ꓫꓵꓻ ꓐꓯ_ ꓟ ꓠꓬ ꓠꓱꓸ ꓐꓯꓼ ꓟꓽ ꓥ꓾ ꓣꓳ ꓧꓪ ꓔ ꓟ ꓮ ꓙꓵ ꓔꓯ ꓗꓸ ꓠꓯꓸ ꓢꓲ ꓗꓪ ꓗꓷ ꓔꓲꓸ ꓠ ꓗꓷ ꓡꓰ ꓢꓲ꓾ ꓣꓳ ꓖꓶ ꓗꓷ ꓟ ꓮ ꓙꓵ ꓠꓬ ꓣꓳ ꓔꓯꓹ ꓙꓰ ꓪ_ ꓟ ꓦꓯꓼ ꓠꓬꓲ ꓬꓲꓸ ꓙꓵꓹ ꓞ ꓕ ꓟ ꓥ ꓡꓳ= ꓠꓱꓸ ꓐꓯꓼ ꓟꓽ ꓥ ꓐꓰ ꓐꓯ ꓔ ꓡꓳ= ꓖꓳ ꓡꓱ ꓠꓬꓲ ꓣꓳ ꓕꓲ ꓠꓬꓲ ꓡꓲ ꓕꓲ ꓠꓬꓲ ꓞꓳ ꓙꓳ ꓔꓬ ꓟ ꓗꓪ ꓣꓳ ꓠꓬ ꓧꓪ_ ꓟ ꓡꓰ ꓬꓰ ꓔꓬ ꓡ? ꓖꓶ_ ꓟ ꓟꓽ ꓬꓰ ꓬꓰ ꓐꓰ ꓐꓯ ꓠꓬ ꓟꓴ ꓗꓪ ꓡꓯꓼ ꓫꓴꓻ ꓟꓽ ꓧꓪ ꓧꓪ ꓐꓰ ꓚꓲꓸ ꓛꓬ ꓧꓪꓽ ꓖꓳ ꓓꓱ ꓚꓲꓸ ꓛꓬ ꓦꓲꓻ ꓐꓱ ꓶ ꓡꓰ ꓧꓪ ꓔꓬ ꓡ? ꓐꓰ ꓓꓵꓽ ꓙ ꓠꓬꓲ ꓠ ꓔ ꓡꓳ= ꓮ ꓡꓰꓳ ꓐꓯ ꓠꓬ ꓕꓲ ꓠꓬꓲ ꓙꓳ ꓠꓬ ꓣꓳ ꓔꓶꓻ ꓔ ꓟ ꓣꓳ ꓟꓶ ꓪ ꓡꓳ= ꓣꓳ ꓔꓶꓻ ꓔ ꓟ ꓠꓬ ꓙꓲ_ ꓟ ꓥ ꓟ ꓠꓵ ꓠꓲꓹ ꓟꓵꓽ ꓥ ꓟ꓾ ꓟꓴ ꓗꓪ ꓡꓯꓼ ꓫꓴꓻ ꓥ ꓟ꓾ ꓕꓲ ꓫꓵ ꓥ ꓡ ꓐꓰ ꓣꓳ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓓꓵꓽ ꓙ ꓠꓹ ꓟ ꓣꓳꓸ ꓚꓵ ꓓꓰ ꓡꓰ_ ꓟ ꓥꓳ=

ꓖꓳ ꓡꓱ ꓠꓬꓲ ꓠꓬꓲꓸ ꓠꓬꓲ ꓢꓲ ꓫꓬ ꓕꓳ ꓶ ꓗꓪ ꓐꓰ ꓣꓳ ꓠꓬ ꓣꓳ ꓔꓶꓻ ꓔ ꓟ ꓡꓰ ꓐꓰ ꓣꓳ ꓪ_ ꓡꓳ ꓣꓳ ꓫ ꓪ_ ꓡꓳ꓾ꓐꓯ_ ꓟ ꓡꓰ ꓐꓰ ꓣꓳ ꓠꓬ ꓕꓲ ꓠꓬꓲ ꓕꓲ ꓠꓬꓲ ꓮ ꓫꓵ ꓔꓶꓻ ꓔꓬ ꓡ? ꓣꓳ ꓓꓵꓽ ꓙ ꓚꓱꓹ ꓗꓪ ꓮ ꓡꓰ ꓫꓵ ꓬꓲꓸ ꓫꓵꓸ ꓔꓯ ꓫꓵꓸ ꓔ ꓡ? ꓟꓽ ꓥ ꓟ ꓔꓯ ꓣꓳ ꓫꓵꓸ ꓔ ꓡ? ꓕꓲ ꓚꓱꓹ ꓐꓯ ꓠꓬ ꓜ ꓫꓵꓼ ꓬꓲꓸ ꓫꓵꓸ ꓣꓳ ꓫꓵꓸ ꓔ ꓡ ꓐꓯ_ ꓟ ꓣꓳ ꓓꓵꓽ ꓙ ꓠꓬꓲ ꓠꓹ ꓟ ꓣꓳꓸ ꓚꓵ_ ꓡꓳ= ꓙꓲ_ ꓟ ꓬꓲꓸ ꓫꓵꓸ ꓫꓵꓸ ꓔ ꓢꓲ ꓠꓬꓲ ꓙꓲ_ ꓟ ꓔꓯ ꓔꓶꓻ ꓢꓲ ꓠꓬꓲ ꓙꓲ_ ꓟ ꓔꓯ ꓫ ꓟꓶ ꓠꓹ ꓟ ꓢꓯꓼ ꓕꓵꓼ ꓙꓰ ꓡꓯ= ꓪꓴ-ꓢ ꓠꓬ ꓗꓹ ꓛꓲ ꓛꓲ ꓡꓰ ꓠꓲꓹ ꓪꓴ ꓪꓴ ꓡꓰ ꓖꓶ ꓢꓴ ꓔꓯ ꓶ ꓤ ꓫꓱꓸ ꓤ ꓟꓬ ꓠꓬꓲ ꓖꓶ_ ꓡꓳ ꓐꓰ ꓐꓯ_ ꓟ ꓡꓰ ꓐꓰ ꓣꓳ ꓖꓶ ꓓꓴ ꓙꓳ ꓟ ꓗꓪ ꓖꓶ ꓢꓲ ꓠꓬꓲ ꓪꓴ-ꓢ ꓡꓰ ꓖꓶ ꓡ ꓟ ꓔꓯ ꓮ ꓕꓯ ꓟꓲ ꓣꓳ ꓠꓲꓹ ꓟ ꓠꓯꓼ ꓗꓪ ꓗꓷ ꓔ ꓢꓲ ꓖꓶ ꓐ ꓡ ꓠꓹ ꓟ ꓣꓳ ꓕꓲ ꓠꓬꓲ ꓡꓲ ꓕꓲ ꓠꓬꓲ ꓔꓶꓻ ꓔꓬ ꓟ ꓬꓲꓸ ꓫꓵꓸ ꓔꓯ ꓥ ꓟꓲ ꓮ ꓡꓰ ꓫꓵ ꓬꓲꓸ ꓫꓵꓸ ꓥ ꓡ ꓙꓲ_ ꓟ ꓬꓲꓸ ꓫꓵꓸ ꓥ ꓡ? ꓟꓽ ꓙꓲ_ ꓟ ꓬꓲꓸ ꓫꓵꓸ ꓥ ꓡ? ꓕꓱ ꓟ ꓔꓯ ꓓꓵꓽ ꓙ ꓢꓲ ꓠꓬꓲ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓙꓻ ꓜꓲꓼ ꓢꓲ ꓙꓰ ꓠꓬ ꓪꓴ-ꓢ ꓡꓰ ꓣꓳ ꓔꓯ ꓶ ꓤ ꓫꓱꓸ ꓤ ꓖꓶ ꓡ ꓥꓳ ꓐꓰ ꓮ ꓙꓵ ꓢꓴ ꓔꓯ ꓢꓯꓼ ꓖꓶ ꓠꓲꓹ ꓫꓵ_ ꓡꓳ=