ꓠꓲꓽ ꓜꓶꓽ ꓞꓹ ꓢꓴ ꓔꓯ ꓫꓬ ꓡꓰ ꓝꓲˍ ꓟ

 ꓬꓲ ꓪ ꓓꓳ ꓙꓰ ꓕꓯ꓾ ꓠꓲꓽ ꓜꓶꓽ ꓞꓹ ꓟ ꓞꓳ ꓟꓶꓻ ꓕꓲ ꓣꓳ ꓔꓯ ꓬꓲ ꓪ ꓡꓰ ꓬꓰ-ꓢꓴ ꓔꓬ ꓗꓪ ꓧꓳꓽ ꓡˍ ꓡꓳ= ꓠꓲꓽ ꓔꓯ ꓖꓼ ꓓꓳ ꓗꓷ ꓠꓬ ꓞꓳ ꓟꓶ ꓠꓽ ꓫꓸ ꓕꓱ ꓓꓳ ꓡ ꓠꓬꓲ ꓞꓳ ꓜꓴ ꓠꓬ ꓓꓵꓽ ꓙ ꓟꓶ ꓡꓰ ꓢꓲ꓾ ꓬꓲ-ꓢꓷ-ꓡꓰ ꓗꓳ ꓡꓳ ꓗꓪ ꓕꓱ ꓡꓱ ꓡꓴ ꓫꓵꓽ ꓮ ꓕꓯˍ ꓟꓲ ꓟꓽ ꓟꓳꓻ ꓠꓬꓲ꓾ ꓐꓯ ꓡꓳ= ꓖꓳ ꓡꓱ ꓥˍ ꓟꓲ ꓒ-ꓡꓲ-ꓢꓷ ꓐꓴ ꓠꓬ꓾ ꓬꓲ ꓠꓽ ꓠꓲꓽ ꓪ ꓔꓲ ꓢꓯꓼ ꓗꓪ ꓐꓰ ꓠꓲꓽ ꓖꓼˍ ꓟ ꓥ ꓡꓳ꓾ ꓐꓯˍ ꓡꓳ=

ꓬꓰ-ꓢꓴ ꓠꓬ ꓡꓳ ꓒꓱ ꓘꓹ ꓥ ꓕ ꓑꓳꓸ ꓗꓪ ꓚꓳ ꓙꓰ ꓢꓲ꓾ ꓬꓲ ꓪ ꓜꓲꓼ ꓦꓲ ꓗꓪ ꓟꓸ ꓟꓲꓽ ꓟꓸ ꓖꓶ ꓠꓬꓲ꓾ ꓪꓴ-ꓢ ꓗꓴꓷꓼ ꓶꓼ ꓓꓳꓽ ꓫꓱꓹ ꓓꓳ ꓚ ꓟꓸ ꓖꓶ ꓠꓬꓲ ꓐꓰ ꓠꓻ ꓫꓵꓽ ꓠꓻ ꓙꓰꓽ ꓠꓻ ꓢꓴ ꓮ ꓙꓵꓽ ꓔꓯ ꓫꓬꓹ ꓖꓶˍ ꓡꓳ= ꓬꓰ-ꓢꓴ ꓠꓬ ꓞꓳ ꓜꓴ ꓞꓳ ꓟꓯꓼ ꓔꓯ ꓟꓳˍ ꓕꓯ ꓬꓲ ꓪ ꓔꓯ ꓫꓱꓸ ꓤˍ ꓡꓳ= ꓮ ꓡꓲꓳ ꓐꓯˍ ꓠꓬ ꓬꓲ ꓪ ꓠꓽ ꓡꓳꓸ ꓢꓴ ꓟꓽ ꓙꓳ ꓟ ꓮ ꓣꓳˍ ꓡꓰ ꓐꓰ ꓗꓹ ꓢꓲ꓾ ꓬꓰ ꓙ ꓔ ꓙ ꓢꓴ ꓟꓽ ꓙꓳ ꓟˍ ꓐꓰ ꓫꓸ ꓙꓵꓻ ꓟꓷꓼ ꓙꓵꓻˍ ꓟꓲ ꓟꓽ ꓔꓳꓹ ꓜꓳ ꓢꓴ ꓐꓴ ꓥ ꓡꓳ= ꓖꓳ ꓕꓯ ꓬꓲ ꓠꓬ ꓬꓲ ꓛꓳꓽ ꓒꓯꓹ ꓐꓴ ꓔꓯ꓾ ꓶꓼ ꓫ ꓠꓯꓹ ꓟ ꓜꓽ ꓪꓳꓽ ꓡꓳ ꓪꓳꓽ ꓠꓬ ꓮ ꓘꓶꓸ ꓟꓬꓽˍ ꓟꓲ ꓟꓬꓱꓽ ꓬꓰ ꓢꓴ ꓠꓽ ꓠꓲꓸˍ ꓡꓳ꓾ ꓐꓯ ꓡꓳ=

ꓖꓳ ꓡꓱ ꓠꓬꓲ ꓠꓬꓲꓸ ꓠꓬꓲ ꓣꓳ ꓠ ꓠꓹ ꓗꓷ ꓟ ꓗꓪ ꓢꓲꓺ ꓒ ꓬꓰ-ꓢꓴ ꓠꓬ ꓠꓲꓽ ꓖꓼ ꓓꓳˍ ꓟ꓾ ꓠꓻ ꓢꓴ ꓒꓬꓽ ꓢꓴ ꓔꓯ ꓫꓬꓹ ꓖꓶˍ ꓟ ꓟꓸ ꓟꓲꓽ ꓥ ꓡꓳ= ꓣꓳ ꓕꓱ ꓟ ꓓꓵꓽ ꓙ ꓠꓬꓲˍ ꓕꓯ ꓣꓳ ꓢꓲꓽ ꓫꓬ ꓕꓳꓽ ꓶ ꓕꓱ ꓟ ꓗꓪ ꓐꓰ ꓦꓻ ꓢꓯꓼ ꓪ ꓣꓴ ꓓꓴ ꓠꓬ ꓢꓲꓺ ꓒ ꓬꓰ-ꓢꓴ ꓠꓬ ꓬꓲ ꓠꓲꓹ ꓟ ꓠꓯꓸꓼ ꓗꓪ ꓮ ꓕꓯ ꓟꓲ ꓫꓱꓸ ꓤ ꓠꓲꓹ ꓙꓳˍ ꓡꓳ= ꓫꓱꓸ ꓤ ꓠꓲꓹ ꓗꓪ ꓚꓳꓸ ꓗꓳꓸ ꓙꓰˍ ꓠꓬ ꓬꓲ ꓠꓲꓹ ꓟ ꓠꓯꓸꓼ ꓗꓪ ꓕꓲ ꓫꓵꓽˍ ꓟꓲ ꓟꓽ ꓙꓳ= ꓡ ꓞꓳ ꓕꓲ ꓣꓳ ꓔꓯ ꓮ ꓡꓲ ꓐꓰ ꓙꓲˍ ꓟ ꓬꓰ ꓖꓶ ꓠꓯꓹ ꓥ꓾ ꓮ ꓡꓲ ꓐꓰ ꓖꓶ ꓜꓽ ꓖꓶ ꓓꓳ ꓠꓯꓹ ꓥ꓾ ꓪꓴꓽ ꓡ ꓟꓴ ꓡ ꓝꓲ ꓠꓯꓹ ꓥ꓾ꓐꓯ ꓟ ꓔꓯ ꓮ ꓕꓯˍ ꓟꓲ ꓓꓵꓽ ꓙ ꓔꓬ ꓡꓳ= ꓕꓱ ꓟ ꓠꓬ ꓬꓲ ꓠꓵꓻ ꓠꓲꓹ ꓥ ꓡꓳ= ꓬꓲ ꓠꓬ ꓕꓲ ꓣꓳˍ ꓟ ꓐꓹ ꓐ ꓪꓴ-ꓢ ꓬꓲ ꓤ ꓔꓲꓸ ꓥ ꓡꓳ= ꓖꓳ ꓡꓱ ꓠꓬꓲ ꓐꓹ ꓐ ꓬꓲ ꓠꓵꓻ ꓠꓲꓹ ꓠꓬ ꓢꓲꓺ ꓒ ꓬꓰ-ꓢꓴ ꓔꓬ ꓗꓪ ꓟꓳꓻ ꓪ ꓓꓹ ꓡꓳ=

ꓠꓬꓲꓸ ꓠꓬꓲ ꓟꓸ ꓟꓲꓽ ꓗꓪ ꓞꓳ ꓟꓶꓻ ꓔꓯˍ ꓟꓲ ꓫꓬꓹ ꓖꓶˍ ꓡꓳ= ꓠꓲꓽ ꓜꓶꓽ ꓞꓹ ꓢꓴ ꓔꓯˍ ꓟꓲ ꓠꓲꓽ ꓖꓼ ꓓꓳ ꓖꓶˍ ꓡꓳ= ꓕꓱ ꓟ ꓔꓯ ꓬꓲ ꓪ ꓠꓲꓹ ꓟ ꓠꓯꓸꓼ ꓗꓪ ꓟꓽ ꓙꓲꓻ ꓟ ꓓꓹ ꓟ ꓑꓶꓸ ꓓꓴ ꓮ ꓕꓯˍ ꓟꓲ ꓟꓽ ꓥ ꓟ ꓟꓳꓻ ꓔꓬ ꓟ ꓒ-ꓡꓲ-ꓢꓷ ꓐꓴ ꓠꓬ ꓢꓲꓺ ꓒ ꓬꓰ-ꓢꓴ ꓔꓯ ꓮ ꓕꓯˍ ꓟꓲ ꓗꓸ ꓧꓪꓸ ꓡꓳ꓾ ꓐꓯ ꓒꓬꓹ ꓡꓳ= ꓖꓳ ꓡꓱ ꓥˍ ꓟꓲ ꓢꓲꓺ ꓒ ꓬꓰ-ꓢꓴ ꓠꓬ ꓬꓲ ꓪ ꓔꓯ ꓟꓽ ꓡꓳꓸ= ꓬꓲ ꓪ ꓐꓯ ꓘꓶꓽ ꓔꓯ ꓠꓲꓹ ꓟ ꓠꓯꓸꓼ ꓗꓪ ꓟꓽ ꓗꓷ= ꓬꓲ ꓬꓰ ꓙꓲ ꓙꓳˍ ꓟ ꓬꓲ ꓬꓰˍ ꓡꓳ=

ꓖꓳ ꓡꓱ ꓠꓬꓲ ꓣꓳ ꓤꓶꓻ ꓗꓪ ꓥˍ ꓟꓲ ꓢꓲꓺ ꓒ ꓬꓰ-ꓢꓴ ꓔꓯ ꓔꓯꓺ ꓢꓳ ꓠ ꓗꓹ ꓡꓳ= ꓣꓳ ꓢꓷꓸ ꓠꓹ ꓟ ꓠꓬ ꓢꓲꓺ ꓒ ꓬꓰ-ꓢꓴ ꓠꓬ ꓣꓳ ꓔꓯ ꓠꓲꓹ ꓠꓵˍ ꓡꓳ꓾ ꓐꓯ ꓟ ꓥ ꓡꓳ= ꓝꓮꓲ ꓣꓳ ꓥˍ ꓟꓲ ꓣꓳ ꓠꓲꓹ ꓟ ꓠꓬ ꓒ-ꓡꓲ-ꓢꓷ ꓐꓴˍ ꓡꓰ ꓐꓰ ꓢꓴ ꓔꓯ ꓟꓽ ꓧ ꓟ ꓟꓳꓻˍ ꓡ= ꓟꓽ ꓙꓲꓻ ꓟ ꓟꓳꓻˍ ꓡ= ꓢꓴ ꓙꓲꓻˍ ꓟ ꓬꓰ ꓔꓬ ꓕꓯ꓾ ꓢꓴ ꓧꓸˍ ꓟ ꓬꓰ ꓔꓬ ꓕꓯ ꓣꓳ ꓗꓹ ꓛꓲꓽ ꓐ ꓡˍ ꓡ꓾ ꓐꓯ ꓟ ꓓꓵꓽ ꓙ ꓠꓬꓲ ꓓꓴ ꓥ ꓡꓳ=

ꓖꓳ ꓡꓱ ꓠꓬꓲ ꓢꓲꓺ ꓒ ꓬꓰ-ꓢꓴ ꓗ ꓠꓯꓸ ꓖꓼ ꓢꓴ꓾ ꓥ ꓠꓬ꓾ ꓢꓲꓺ ꓒ ꓬꓰ-ꓢꓴˍ ꓡꓰ ꓐꓰ ꓢꓴ ꓔꓯ ꓙꓲꓻˍ ꓟ ꓬꓰ ꓖꓶ ꓗꓴꓸˍ ꓟ꓾ ꓢꓴ ꓔꓯ ꓠꓲꓹ ꓠꓵꓻ ꓐ ꓡˍ ꓟ꓾ ꓢꓴ ꓔꓯ ꓮ ꓔꓳ ꓟꓽ ꓐꓯ ꓒꓬꓹ ꓒꓬꓹ ꓐꓰ ꓠꓲꓹ ꓟ ꓠꓯꓸꓼ ꓗꓪ ꓐꓰ ꓗꓹ ꓛꓲꓽˍ ꓟ꓾ ꓢꓲꓺ ꓡꓲˍ ꓟ ꓠꓲꓹ ꓟ ꓙꓳˍ ꓡ꓾ ꓐꓯ ꓟ ꓔꓯ ꓓꓵꓽ ꓙ ꓠꓬꓲ ꓢꓲ ꓠꓬꓲ ꓠꓬꓲꓸ ꓠꓬꓲ ꓢꓲꓺ ꓒ ꓬꓰ-ꓢꓴ ꓗꓪ ꓐꓰ ꓢꓯꓼ ꓪ ꓓꓰꓽ ꓙꓰ ꓡꓯ=