ꓥꓪ ꓶꓻ ꓠꓽ ꓡꓳꓻ ꓢꓲ ꓟꓯꓻ ꓢˍ ꓡꓳ

“ꓥꓪ ꓡꓽ ꓡꓰ ꓟꓯꓻ ꓢꓲ ꓥꓪ ꓔꓯ ꓢꓳꓺ ꓡꓯ= ꓮ ꓡꓲꓳ ꓐꓯ ꓠꓬ ꓥꓪ ꓡꓽ ꓡꓰ ꓠꓽ ꓟꓯꓻ ꓢˍ ꓡꓳ꓾ ꓥꓪ ꓶꓻˍ ꓟꓲ ꓡꓳꓻˍ ꓡꓳ=” ꓢꓲꓺ ꓒ ꓬꓰ-ꓢꓴ ꓐꓯ ꓟ ꓡꓽ ꓡꓰ ꓠꓬ ꓮ ꓡꓲ ꓫꓵꓽ ꓔꓯ ꓐꓯ ꓡ= ꓬꓳ-ꓔ ꓡ ꓞꓳ ꓐꓴ ꓠꓬ ꓪꓴ-ꓢ ꓟꓲꓽ ꓙꓬ ꓗꓪ ꓙ ꓣꓳˍ ꓟ ꓔꓯ ꓡꓽ ꓡꓰ ꓐꓰ ꓔꓯꓺ ꓔ ꓟ ꓥ ꓡꓳ= ꓬꓳ-ꓔ ꓞꓳ ꓫꓵꓽ ꓐꓴ ꓠꓬ ꓙꓵꓽ ꓗ ꓗꓪ ꓐꓰ ꓖꓶˍ ꓟ ꓡꓽ ꓡꓰ ꓾ ꓪꓴ-ꓢ ꓙꓵꓽ ꓗ ꓗꓪ ꓐꓰ ꓖꓶ ꓡˍ ꓟ ꓡꓽ ꓡꓰ꓾ ꓘꓴ ꓜꓲ ꓞꓳ ꓚꓱꓹ ꓔꓯ ꓟꓳꓸ ꓡꓽ ꓡꓰ ꓐꓯ ꓢꓲ ꓕꓱ ꓟꓬ ꓫꓵꓽ ꓙꓳˍ ꓟ ꓥ ꓡꓳ=

ꓠꓬꓲꓸ ꓠꓬꓲ ꓢꓲꓺ ꓒ ꓬꓰ-ꓢꓴ ꓠꓬ ꓡꓳꓻ ꓢꓲ ꓟꓯꓻ ꓢˍ ꓟ ꓬꓲ ꓡꓽ ꓡꓰ ꓔꓯ ꓟꓯꓻ ꓢꓲ ꓠꓬꓲ ꓣꓳ ꓤꓶꓻ ꓔꓯ ꓢ ꓢ ꓡꓰꓽ ꓛꓳ ꓫꓱꓽ ꓠꓹ ꓟ ꓬꓰ-ꓢꓴ ꓡꓰ ꓣꓳ ꓔꓯ ꓠꓬꓲꓸ ꓠꓬꓲ ꓘꓴ ꓔꓬ ꓟ ꓥ ꓡꓳ= ꓣꓳ ꓤꓶꓻ ꓗꓪ ꓢꓲꓺ ꓒ ꓬꓰ-ꓢꓴ ꓔꓯ ꓠꓵꓻ ꓠꓲꓹ ꓗꓪ ꓐꓰ ꓥˍ ꓟꓲ꓾ ꓬꓰ-ꓢꓴ ꓔꓯ ꓠꓲꓹ ꓥꓳꓻ ꓠꓲꓹ ꓗꓪ ꓐꓰ ꓥˍ ꓟꓲ꓾ ꓙ ꓣꓳ ꓠꓲꓹ ꓗꓪ ꓐꓰ ꓥˍ ꓟꓲ ꓬꓲ ꓡꓽ ꓡꓰ ꓔꓯ ꓟꓯꓻ ꓐ ꓡˍ ꓟ ꓥꓳ= ꓪꓴ-ꓢ ꓔꓯ ꓙꓳꓺ ꓒꓵꓽˍ ꓟ꓾ ꓪꓴ-ꓢ ꓠꓲꓹ ꓡꓶꓽ ꓙꓳˍ ꓟ ꓡꓰ ꓕꓲ ꓡꓰꓹ ꓞꓳ ꓙꓳ ꓢꓯꓸ ꓔꓬ ꓟ ꓠꓬ ꓢꓲꓺ ꓒ ꓬꓰ-ꓢꓴ ꓡꓰ ꓐꓯ ꓔ ꓟ ꓡꓳꓻ ꓢꓲ ꓟꓯꓻ ꓢꓹ ꓟ ꓬꓲ ꓶꓻ ꓥ ꓡꓳ=

ꓕꓱ ꓡꓱ ꓟꓽ ꓥ ꓥ ꓘꓶꓽ ꓘꓹ ꓟ꓾ ꓚꓲ ꓛꓬ ꓐꓱ ꓶˍ ꓡꓰꓽ ꓓꓵꓽ ꓙˍ ꓟ꓾ ꓠꓲꓹ ꓦꓯꓸ ꓟ꓾ ꓟꓬꓻ ꓠꓯꓻˍ ꓟ ꓠꓲꓹ ꓟ ꓗꓪ ꓐꓰ ꓚꓲ ꓛꓬ ꓡꓽ ꓡꓰ ꓔꓯ ꓟꓯꓻ ꓔꓬ ꓕꓯ ꓠꓽ ꓮ ꓘꓶꓸ ꓡꓲꓽˍ ꓟ ꓡꓽ ꓡꓰ ꓔꓯ ꓟꓽ ꓓ ꓟꓽ ꓞꓽ ꓟꓯꓻ ꓔꓬ ꓪˍ ꓥꓳ= ꓣꓳ ꓤꓶꓻ ꓠꓬ ꓕꓱ ꓟ ꓕꓯꓽ ꓢꓲꓺ ꓡꓳꓻ ꓡꓳꓻ ꓡꓰ ꓢꓯꓸ ꓔꓬ ꓒꓵꓽˍ ꓟ ꓥ ꓡꓳ=