ꓠꓴ ꓪ ꓠꓲꓹ ꓟ ꓕꓽ ꓙꓽ ꓫꓸ꓾ ꓙꓳꓺˍ ꓟꓲ ꓕꓽ ꓙꓳꓺ=

“ꓠꓴ ꓪ ꓠꓲꓹ ꓟ ꓕꓽ ꓙꓽ ꓫꓸ꓾ ꓙꓳꓺˍ ꓟꓲ ꓕꓽ ꓙꓳꓺ=” ꓬꓳ-ꓦ 14ꓽ27

ꓕꓱ ꓟ ꓠꓬ ꓣꓳ ꓮ ꓕꓯ ꓟꓲ ꓑ ꓙꓽ ꓠ ꓔ ꓟ ꓓꓵꓽ ꓙ ꓟꓶ ꓓꓴ ꓐꓯ ꓘꓶꓽ ꓕꓲ ꓘꓶꓽ ꓥ ꓡꓳ= ꓠꓴ ꓪ ꓠꓲꓹ ꓟ ꓕꓽ ꓙꓽ ꓫꓸ꓾ ꓙꓳꓺˍ ꓟꓲ ꓕꓽ ꓙꓳꓺ” ꓐꓯ ꓘꓶꓽ ꓕꓱ ꓟ ꓔꓯ ꓣꓳ ꓠꓲꓹ ꓟ ꓠꓯꓸꓼ ꓗꓪ ꓮ ꓟꓬ ꓧꓪꓹ ꓗꓶ ꓔ ꓢꓲ ꓛꓳ ꓫꓱꓽ ꓠꓬꓲˍ ꓡ?

ꓕꓱ ꓟ ꓠꓬ ꓐꓯ ꓘꓶꓽ ꓕꓲ ꓘꓶꓽˍ ꓡꓰꓽ ꓟꓽ ꓥ= ꓕꓱ ꓟ ꓠꓬ ꓣꓳ ꓢꓲ ꓒ ꓬꓲ ꓠꓵꓻ ꓠꓲꓹ ꓥ ꓡꓳ= ꓬꓲ ꓠꓬ ꓙꓽ ꓫꓸˍ ꓢꓲ ꓙꓳꓺˍ ꓟ ꓠꓲꓹ ꓟ ꓠꓬ ꓬꓲ ꓗꓪ ꓐꓰ ꓡˍ ꓟ ꓟꓽ ꓥ꓾ ꓐꓯˍ ꓟ ꓣꓳ ꓔꓯ ꓬꓲ ꓡꓰ ꓢꓷꓸ ꓝꓲ ꓠꓲꓹ ꓫꓵˍ ꓡꓳ= ꓕꓲ ꓫꓵꓽ ꓫꓵꓽ ꓑꓶꓸ ꓓꓴ ꓙꓽ ꓫꓸ ꓔꓬ ꓟ ꓐꓰ ꓙꓳꓺ ꓔꓬ ꓟ ꓠꓬ ꓣꓳ ꓔꓯ ꓐꓱꓽ ꓗꓷ ꓝꓲˍ ꓡꓳ꓾ ꓓꓳꓽ ꓡꓰ ꓝꓲˍ ꓡꓳ ꓐꓯ ꓟ ꓔꓯ ꓬꓲ ꓢꓷꓸˍ ꓡꓳ= ꓖꓳ ꓡꓱ ꓠꓬꓲ ꓬꓲ ꓠꓬ ꓣꓳꓽ ꓔꓯ ꓶꓻ ꓖꓳ ꓟ ꓗꓪ ꓐꓰ ꓡꓲꓹ ꓗꓷ ꓝꓲ ꓠꓲꓹ ꓫꓵˍ ꓡꓳ=  ꓚꓲꓸ ꓛꓬ ꓤꓶꓻ ꓗꓪ ꓗꓹ ꓛꓲꓽ ꓓꓴ ꓔꓯ ꓤꓹ ꓟꓶ ꓡꓰ ꓠꓹ ꓟ ꓐꓱ ꓶ꓾ ꓗꓹ ꓛꓲꓽ ꓓꓴ ꓔꓯ ꓘꓳ ꓣꓴ ꓟꓶ ꓡꓰ ꓠꓹ ꓟ ꓐꓱ ꓶ ꓬꓲ ꓠꓬ ꓣꓳ ꓐꓴ ꓔꓯ ꓙꓽ ꓫꓸˍ ꓟ ꓶꓻ ꓗꓪ ꓐꓰ꓾ ꓙꓳꓺˍ ꓟ ꓶꓻ ꓗꓪ ꓐꓰ ꓡꓲꓹ ꓙꓰ ꓝꓲ ꓠꓲꓹ ꓫꓵˍ ꓡꓳ=

ꓖꓳ ꓡꓱ ꓠꓬꓲ ꓣꓳ ꓤꓶꓻ ꓠꓯꓸꓼ ꓗꓪ ꓣꓳ ꓔꓯ ꓮ ꓘꓶꓸ ꓡꓲꓽˍ ꓟ ꓶꓻ ꓒꓬꓱꓼ ꓡ ꓝꓲˍ ꓟ ꓠꓬ ꓮ ꓫꓵꓽ ꓥ ꓡ? ꓠꓴ ꓤꓶꓻ ꓠꓯꓸꓼ ꓗꓪ ꓠꓴ ꓠꓲꓹ ꓟ ꓥꓳꓺ ꓓꓹ ꓖꓴ꓾ ꓠꓲꓹ ꓟ ꓮ ꓘꓶꓸ ꓦꓶꓻ ꓡꓰ ꓝꓲˍ ꓟ꓾ ꓠꓴ ꓚꓲꓸ ꓛꓬ ꓡꓰ ꓩꓴꓻ ꓗꓷ ꓠꓲꓹ ꓟꓽ ꓫꓵ ꓟ꓾ ꓟꓽ ꓥ ꓠꓬ꓾ ꓠꓴ ꓤꓶꓻ ꓔꓯ ꓙꓵꓽ ꓔ ꓟ ꓕꓲ ꓫꓵꓽ ꓫꓵꓽ ꓙꓳˍ ꓡ? ꓐꓯˍ ꓟ ꓓꓵꓽ ꓙ ꓠꓬꓲ ꓡꓯ= ꓟꓽ ꓥ ꓠꓬ ꓚꓲꓸ ꓛꓬ ꓤꓶꓻ ꓔꓯ ꓙꓵꓽ ꓔꓬ ꓟ ꓟꓽ ꓙꓳ ꓥ ꓟꓲ꓾ ꓮ ꓘꓶꓸ ꓣꓳˍ ꓟ ꓶꓻ ꓤ ꓤ ꓥ ꓟꓲ ꓙꓳ ꓗꓴꓸˍ ꓡꓳ= ꓶꓻ ꓕꓱ ꓟ ꓠꓬ ꓕꓲ ꓘꓳꓼ ꓗ ꓠꓯꓸ ꓕꓲ ꓘꓳꓼ ꓗꓳꓸ ꓡˍ ꓕꓯ ꓠꓬ ꓣꓳꓽ ꓔꓯ ꓮ ꓘꓶꓸ ꓫꓸ ꓡꓰ ꓝꓲˍ ꓡꓳ=

ꓖꓳ ꓗꓪ ꓐꓰ ꓡꓲꓹ ꓗꓷ ꓠꓹ ꓟ ꓐꓱ ꓶ ꓬꓲ ꓪꓴꓸ ꓟ ꓛꓲ ꓦꓽ ꓕꓲ ꓦꓽ ꓠꓬ꓾ ꓮ ꓫꓵꓽ ꓐꓱ ꓶ ꓶꓻ ꓥ ꓡ ꓐꓯ ꓟ ꓔꓯ ꓢꓷꓸ ꓠꓹ ꓟ ꓥ ꓡꓳ= ꓣꓳ ꓙꓽ ꓫꓸ ꓔꓬ ꓟ ꓠꓬ ꓮ ꓫꓵꓽ ꓪꓴꓸ ꓠꓬꓲ ꓥ ꓡ? ꓣꓳꓽ ꓙꓳꓺ ꓔꓬ ꓟ ꓠꓬ ꓮ ꓫꓵꓽ ꓪꓴꓸ ꓠꓬꓲ ꓥ ꓡ? ꓐꓯ ꓟ ꓔꓯ ꓢꓷꓸ ꓡꓰ ꓠꓹ ꓟ ꓧꓶꓸ ꓕꓯ ꓬꓰ ꓠ ꓗꓹ ꓡꓳ= ꓣꓳ ꓔꓯ ꓙꓽ ꓫꓸ ꓡꓰ ꓝꓲˍ ꓟ꓾ ꓙꓳꓺ ꓔꓬ ꓝꓲˍ ꓟ ꓠꓬ ꓣꓳꓽ ꓝꓴꓲꓸ ꓥ ꓕꓯ ꓠꓽ ꓝꓴꓲꓸ ꓐꓱ ꓶ ꓠꓲꓹ ꓟ ꓡꓶꓸ ꓢꓲ ꓝꓴꓲꓸ ꓥꓸ ꓠꓹ ꓟ꓾ ꓝꓴꓲꓸ ꓣꓷꓠꓸ ꓠꓹ ꓟ ꓢꓯꓼ ꓕꓵꓼ ꓠꓯꓹˍ ꓡꓳ= ꓕꓱ ꓟ ꓗꓪ ꓐꓰˍ ꓟꓲ ꓣꓳ ꓠꓬ ꓙꓽ ꓫꓸ ꓔꓬ ꓟ ꓗꓪ ꓐꓰ ꓡꓲꓹ ꓗꓷ ꓠꓹ ꓟ ꓬꓲ ꓚꓱꓹ ꓕꓲ ꓚꓱꓹ ꓥ ꓡꓳ=

ꓖꓳ ꓡꓱ ꓥ ꓟꓲ ꓣꓳ ꓙꓽ ꓫꓸ ꓔꓬ ꓟ ꓶꓻ ꓠꓬ ꓠꓱꓸ ꓐꓯ ꓕꓲ ꓣꓳ ꓑꓶꓸ ꓓꓴ ꓥ ꓕꓯ꓾ ꓟꓽ ꓥ ꓠꓬ꓾ ꓣꓳꓽ ꓫꓬꓹ ꓔꓱꓹ ꓟꓽ ꓐ ꓡ ꓟ ꓕꓲ ꓫꓵꓽ ꓫꓵꓽ ꓑꓶꓸ ꓓꓴ ꓥ ꓕꓯ ꓠꓽ ꓣꓳ ꓠꓬ ꓣꓳ ꓢꓲꓺ ꓒ ꓔꓬ ꓗꓪ ꓣꓳꓽ ꓙꓽ ꓫꓸ ꓔꓬ ꓟ ꓔꓯ ꓡꓯꓼ ꓙꓱ ꓖꓶ ꓠ ꓔ ꓡꓳ= ꓣꓳ ꓔꓳꓹ ꓜꓳꓽ ꓔꓬ ꓟ ꓙꓽ ꓫꓸ ꓓꓴ ꓙꓳꓺ ꓓꓴ ꓮ ꓙꓵꓽ ꓔꓯ ꓢꓲ ꓒ ꓔꓯ ꓡꓯꓼ ꓙꓱ ꓖꓶ ꓢꓲ꓾ ꓬꓲ ꓔꓯ ꓙꓵꓻ ꓢꓲ ꓠꓬꓲ ꓬꓲ ꓠꓲꓹ ꓡꓶꓽ ꓙꓳˍ ꓟ ꓡꓰ ꓣꓳ ꓩꓴꓻ ꓗꓷˍ ꓕꓯ ꓣꓳꓽ ꓠꓬ ꓡꓲꓹ ꓗꓷˍ ꓟ ꓔꓯ ꓧꓪ ꓟꓳꓻ ꓡꓰˍ ꓡꓳ= ꓣꓳꓽ ꓙꓽ ꓫꓸ ꓓꓴ ꓮ ꓙꓵꓽ ꓔꓯ ꓣꓳ ꓠꓲꓹ ꓟ ꓠꓯꓸꓼ ꓗꓪ ꓐꓰ ꓟꓽ ꓗꓶ ꓔ ꓔ ꓩꓴꓻ ꓗꓷˍ ꓕꓯ ꓣꓳ ꓠꓬ ꓡꓲꓹ ꓙꓰˍ ꓡꓳ= ꓣꓳꓽ ꓠꓲꓹ ꓟ ꓥ ꓟꓲ ꓢꓲ ꓡꓲ ꓐꓰ ꓗꓷ ꓡꓰˍ ꓡꓳ=

ꓣꓳ ꓤꓶꓻ ꓗꓪ ꓣꓳ ꓐꓱ ꓶ ꓡꓲꓽ ꓓꓰ ꓡꓰ ꓟ ꓶꓻ ꓠꓬ ꓮ ꓡꓲ ꓫꓵꓽ ꓶꓻ ꓥ ꓟ ꓔꓯ ꓕꓲ ꓑꓹ ꓤ ꓓꓵꓽ ꓙ ꓠꓬꓲ ꓡꓯ= ꓣꓳ ꓔꓯ ꓮ ꓘꓶꓸ ꓡꓲꓽ ꓡꓰ ꓝꓲˍ ꓟ ꓶꓻ ꓠꓬ ꓮ ꓫꓵꓽ ꓥ ꓡ? ꓣꓳ ꓔꓯ ꓡꓲꓽ ꓡꓰ ꓝꓲˍ ꓟ ꓶꓻ ꓔꓯ ꓢꓲꓺ ꓒ ꓬꓰ-ꓢꓴ ꓠꓬ ꓟꓯꓻ ꓙ ꓠꓲꓹ ꓫꓵˍ ꓡꓳ= ꓣꓳ ꓔꓯ ꓣꓳ ꓤꓶꓻ ꓗꓪ ꓬꓲ ꓡꓰ ꓖꓶ ꓡˍ ꓟ ꓗꓹ ꓛꓲꓽ ꓓꓴ ꓔꓯ ꓣꓳꓽ ꓑꓯꓹ ꓟꓶ ꓠꓹ ꓟ ꓐꓱ ꓶ ꓢꓲꓺ ꓒ ꓠꓬ ꓣꓳꓽ ꓔꓯ ꓡꓲꓹ ꓗꓷ ꓝꓲ ꓠꓲꓹ ꓫꓵˍ ꓡꓳ= ꓩꓴꓻ ꓖꓶ ꓠꓲꓹ ꓫꓵˍ ꓡꓳ=

ꓸꓸꓸꓸꓸꓸꓸꓸꓸꓸꓸ

ꓗꓹ ꓛꓲꓽ ꓓꓴ ꓚꓵ ꓥ ꓢꓲ ꓒꓽꓳ꓾ ꓥꓪ ꓠꓬ ꓡꓲꓹ ꓗꓷ ꓟꓶ ꓠꓲꓹ ꓫꓵˍ ꓡꓳ= ꓥꓪ ꓐꓱ ꓶ ꓠꓴ ꓡꓰ ꓙꓽ ꓖꓶꓼ ꓔ ꓟ ꓗꓹ ꓛꓲꓽ ꓠꓲꓹ ꓔꓯ ꓥꓪ ꓘꓳ ꓣꓴ ꓠꓲꓹ ꓫꓵˍ ꓡꓳ= ꓥꓪ ꓤꓶꓻ ꓗꓪ ꓟ ꓡꓲꓽˍ ꓟ ꓶꓻ ꓐꓴ ꓠꓬ ꓥꓪ ꓔꓯ ꓓꓳꓽ ꓡꓰ ꓝꓲˍ ꓕꓯ꓾ ꓥꓪ ꓣꓱꓽ ꓞꓹ ꓔꓬ ꓟ ꓓꓰꓽ ꓠꓹ ꓟ ꓐꓱ ꓶ ꓠꓴ ꓔꓬ ꓗꓪ ꓡ ꓠꓹ ꓟ ꓥꓪ ꓔꓯ ꓬꓰ ꓙ ꓖꓶ ꓡꓯ= ꓥꓪ ꓢꓲꓺ ꓒꓽꓳ꓾ ꓥꓪ ꓠꓬ ꓠꓴꓻ ꓔꓯ ꓙꓵꓻˍ ꓡꓳ=