ꓠꓴ ꓪ ꓠꓲꓹ ꓟ ꓫꓸ ꓟ ꓠꓬ ꓗꓹ ꓛꓲ ꓓꓴ ꓒꓬꓱꓼ ꓡˍ ꓥꓳ

ꓥꓪ ꓔꓱꓹ ꓔꓱˍ ꓠꓴ ꓪ ꓔꓯ ꓐꓯ ꓖꓶ ꓠꓬꓲ-ꓸ ꓠꓴ ꓪ ꓠꓽ ꓮꓸ ꓛꓬ ꓙꓱꓸꓸ ꓢꓲ ꓥꓴˍ ꓥꓳ= ꓖꓳ ꓡꓱ ꓥˍ ꓟꓲ ꓟꓲ ꓠꓯ ꓡ ꓞꓳ ꓠꓽ ꓗ ꓛꓲ_ ꓥꓳ= ꓠꓴ ꓪ ꓠꓽ ꓠꓲꓹ ꓟ ꓫꓸˍ ꓥꓳ= ꓖꓳ ꓡꓱ ꓥˍ ꓟꓲ ꓠꓴ ꓪ ꓠꓲꓹ ꓟ ꓫꓸ ꓟ ꓠꓬ ꓗꓹ ꓛꓲ ꓓꓴ ꓒꓬꓱꓼ ꓡˍ ꓥꓳ= (ꓬꓳ-ꓦ 16ꓽ20)

ꓕꓲ ꓧꓪꓹ ꓧꓪꓹ ꓣꓳ ꓠꓬ ꓣꓳ ꓬꓰˍ ꓟ ꓮꓽ ꓙꓲ ꓧꓪꓸˍ ꓡꓰꓳ꓾ ꓜꓳꓽ ꓡꓰꓳ꓾ ꓐꓰ ꓓꓵꓽ ꓙꓽ ꓔꓬ ꓥ ꓟꓲ ꓬꓲ ꓟꓶꓽ ꓗꓪ ꓞꓳꓸ ꓡꓰ꓾ ꓥꓳꓽ ꓡꓰ ꓫꓵꓽ ꓮ ꓟꓬꓹ ꓔꓳꓹ ꓜꓳꓽ ꓗꓴꓸˍ ꓡꓳ= ꓕꓲ ꓧꓪꓹ ꓧꓪꓹ ꓣꓳ ꓞꓳꓸ ꓡꓰꓳ꓾ ꓥꓳꓽ ꓡꓰꓳ ꓐꓰ ꓓꓵꓽ ꓙꓽ ꓟꓶ ꓔꓬ ꓥ ꓟꓲ ꓬꓲ ꓟꓶꓽ ꓗꓪ꓾ ꓡꓳꓹ ꓬꓰˍ ꓗꓪ ꓧꓪꓸ ꓡꓰ ꓟ ꓮ ꓟꓬꓹ ꓘꓳꓹ ꓣꓳ ꓪ ꓟ ꓙꓳ ꓡꓳ=

ꓢꓲꓺ ꓒ ꓬꓰ-ꓢꓴ ꓔꓯ ꓞꓳꓹ ꓔꓯꓹ ꓙꓰˍ ꓟ ꓗꓪ ꓐꓰ꓾ ꓫꓵꓻ ꓗꓪ ꓛꓲ ꓫ ꓟ ꓗꓪ ꓐꓰ ꓝꓮꓲ ꓢꓯꓸ ꓬꓲꓼ ꓡ ꓗꓪ ꓛꓲ ꓝꓲ ꓓꓴ ꓐꓴ ꓠꓬ ꓮ ꓛꓬ ꓙꓱ ꓠꓬꓲ꓾ ꓠꓲꓹ ꓫ ꓟꓬ ꓫ ꓓꓴ ꓮ ꓟꓬꓹ ꓔꓳꓹ ꓜꓳꓽ ꓗꓷꓳ= ꓥꓴˍ ꓟꓲ ꓥꓴꓻ ꓗꓷꓳ= ꓖꓳ ꓡꓱ ꓥˍ ꓟꓲ ꓕꓲ ꓛꓱꓽ ꓗꓪ ꓡꓳꓸ ꓠꓬꓲ ꓠꓬ ꓢꓲꓺ ꓒ ꓬꓰ-ꓢꓴ ꓔꓯ ꓢꓰꓼ ꓢꓴ ꓐꓴ ꓠꓬ ꓬꓲ ꓪ ꓠꓬ ꓧꓪꓸ ꓡꓰꓳ꓾ ꓐꓰ ꓓꓵꓽ ꓙꓽ ꓢꓲ ꓗꓹ ꓛꓲꓽ ꓠꓬꓲ ꓐꓰ ꓔꓬ ꓡꓳ= ꓖꓳ ꓡꓱ ꓥ ꓟꓲ ꓢꓲꓺ ꓒ ꓬꓰ-ꓢꓴ ꓠꓬ ꓢ ꓠꓬꓲ ꓗ ꓠꓯꓸ ꓝꓮꓲ ꓢꓯꓸ ꓬꓲꓼ ꓡ ꓳ=

ꓝꓲ ꓓꓴ ꓐꓴ ꓞꓳꓸ ꓡꓰꓳ꓾ ꓐꓰ ꓓꓵꓽ ꓙꓽ ꓔꓬ ꓟ ꓠꓬ ꓧꓪꓸ ꓡꓰ ꓟ ꓒꓬꓱꓼ ꓢꓲ꓾ ꓢꓲꓺ ꓒ ꓬꓰ-ꓢꓴ ꓔꓯ ꓢꓰꓼ ꓢꓴ ꓐꓴ ꓧꓪꓸ ꓡꓰꓳ ꓐꓰ ꓓꓵꓽ ꓙꓽ ꓔꓬ ꓟ ꓙꓵꓹ ꓗꓪ ꓬꓲ ꓪ ꓓꓵꓽ ꓙꓽˍ ꓟ ꓡꓰ ꓟꓽ ꓗꓷ ꓡꓰ= ꓬꓲ ꓪ ꓠꓯꓸꓼ ꓗꓪ ꓠꓲꓹ ꓟ ꓐꓬ ꓡꓰ ꓓꓴ ꓗꓷ ꓡꓰꓳ=

ꓬꓲ ꓤ ꓠꓬꓲ ꓤ ꓐꓴꓳ ꓠꓬꓲꓸ ꓠꓬꓲ ꓣꓳ ꓔꓯ ꓟꓸ ꓖꓶ ꓡ ꓟ ꓠꓬ ꓪꓴ-ꓢ ꓐꓰ ꓕꓲ ꓪꓽ ꓟ ꓥ ꓠꓬ ꓣꓳ ꓧꓪꓸ ꓡꓰꓳ ꓐꓰ ꓓꓵꓽ ꓙꓽ ꓔ ꓟ ꓥˍ ꓟꓲ ꓞꓳꓸ ꓡꓰ ꓟ ꓗꓷ ꓡꓰˍ ꓥꓳ= ꓪꓴ-ꓢ ꓐꓰ ꓕꓲ ꓪꓽ ꓔꓬ ꓠꓬ ꓣꓳ ꓞꓳꓸ ꓡꓰꓳ ꓓꓵꓽ ꓙꓽˍ ꓟ ꓥˍ ꓟꓲ ꓧꓪꓸ ꓡꓰ ꓟ ꓒꓬꓱꓼ ꓡ ꓓꓴ ꓥꓳ= ꓣꓳ ꓠꓯꓸꓼ ꓗꓪ ꓧꓪꓸ ꓡꓰˍ ꓟ ꓮ ꓟꓬ ꓛꓲ ꓡ ꓓꓴ ꓥꓳ= ꓮ ꓟꓬ ꓑꓯꓹ ꓟꓶ ꓡ ꓓꓴ ꓥꓳ=