ꓠ-ꓕ-ꓠꓰ ꓡꓰ ꓬꓰ-ꓢꓴ ꓔꓯ ꓡˍ ꓟ

ꓙꓵꓻ ꓠꓲꓹ ꓟꓬ ꓢꓶꓽ ꓣꓱꓽˍ ꓟ ꓠꓬ ꓙꓲ-ꓢꓴ ꓢꓲ ꓤ ꓤꓶꓻ ꓐꓱ ꓶ ꓟꓬꓽ ꓠꓬꓲ ꓬꓳꓸ ꓚꓵˍ ꓟ ꓥ ꓡꓳ= ꓣꓳ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓞꓳ ꓙꓳ ꓔꓬ ꓟ ꓤꓶꓻ ꓗꓪ ꓒꓬꓱꓼ ꓔꓬ ꓟ ꓠꓬ ꓣꓳ ꓪꓴ-ꓢ ꓐꓰ ꓘꓴ ꓔꓬꓹ ꓟ “ꓟꓳꓻ ꓟꓽ ꓓ ꓟ” ꓗꓪ ꓐꓰ ꓡˍ ꓟ ꓣꓱꓽ ꓛꓰꓽ ꓥ ꓟ ꓔꓯˍ ꓟꓲ ꓣꓳ ꓐꓴ ꓔꓯ ꓢꓷꓸ ꓡ ꓝꓲˍ ꓟ ꓥ ꓡꓳ= ꓬꓳ-ꓦ 20ꓽ29 ꓗꓪ ꓬꓰ-ꓢꓴ ꓡꓰ ꓬꓲ ꓝꓲ ꓓꓴ ꓐꓴ ꓔꓯ ꓕꓱ ꓡꓱ ꓐꓯ ꓡꓳ꓾ ꓟꓽ ꓟꓳꓻ ꓠꓬꓲˍ ꓟꓲ ꓙꓵꓻ ꓢꓴ ꓠꓽ ꓶꓼ ꓙꓳ ꓫꓱꓹ ꓙꓳˍ ꓡꓳ=” ꓐꓰ ꓐꓯ ꓔ ꓡꓳ= ꓠꓬꓲꓸ ꓠꓬꓲ ꓟ ꓢꓲꓽ ꓫꓬ ꓕꓳ ꓶ ꓥ ꓟ ꓬꓳ-ꓦ 1ꓽ47-51 ꓗꓪ ꓠꓬ ꓠ-ꓕ-ꓠꓰ ꓡꓰ ꓬꓰ-ꓢꓴ ꓔꓯ ꓡˍ ꓟ ꓟꓸ ꓟꓲꓽ ꓥ ꓡꓳ=

ꓖꓳ ꓟ ꓡꓰꓽ ꓟꓽ ꓞꓲꓺ ꓠꓬꓲꓸ ꓠꓬꓲ ꓗꓪ ꓠꓬ ꓗ-ꓕꓳ-ꓡꓲꓗ ꓘꓴ ꓜꓲꓼ ꓞꓳ ꓗꓪ ꓟꓴꓽ ꓗꓪ ꓝꓲ ꓓꓴ ꓐꓴ ꓥ ꓟ ꓙꓲꓻ ꓫꓬ ꓢꓴ Michael, Gabriel ꓐꓰ Raphael ꓐꓴ ꓑꓮꓲꓽ ꓔꓯ ꓬꓰ ꓔꓬ ꓟ ꓥ ꓡꓳ= ꓟꓴ ꓗꓪ ꓝꓲ ꓓꓴ ꓢ ꓣꓳ ꓟ ꓗꓪ ꓟꓲꓚꓧꓮꓰꓡ ꓠꓬ ꓟꓽ ꓙꓲꓻ ꓟ ꓥꓶˍ ꓟ ꓮ ꓙꓵꓽ ꓗꓪ ꓐꓰ ꓗꓽ ꓕ ꓙ ꓢꓴ ꓥ ꓡꓳ= ꓖꓮꓐꓣꓲꓰꓡ ꓠꓬ ꓪꓴ-ꓢ ꓐꓯ ꓘꓶꓽ ꓔꓯ ꓐꓯ ꓖꓶ ꓢꓴ ꓥ ꓢꓲ ꓠꓬꓲ ꓣꓮꓑꓧꓮꓰꓡ ꓠꓬ ꓠꓻ ꓫꓬꓹ ꓖꓶ ꓢꓴ ꓥ ꓡꓳ= ꓟꓴ ꓗꓪ ꓝꓲ ꓓꓴ ꓕꓱ ꓢ ꓣꓳ ꓠꓬ ꓪꓴ-ꓢ ꓟꓲꓽ ꓙꓬ ꓗꓪ ꓓꓳ ꓟꓴ ꓫꓱꓸ ꓖꓶˍ ꓟ ꓬꓰ ꓢꓲ ꓪꓴ-ꓢ ꓟꓬꓱꓽ ꓔꓯ ꓬꓰ ꓠꓹ ꓟ ꓪꓴ-ꓢ ꓡꓰ ꓬꓲ ꓪ ꓔꓯ ꓟꓬꓱꓽ ꓖꓶ ꓔ ꓟ ꓥ ꓡꓳ=

ꓬꓲ ꓪ ꓐꓴ ꓠꓬ ꓪꓴ-ꓢ ꓬꓲ ꓠꓵꓻ ꓠꓲꓹ ꓐꓰ ꓶꓼ ꓤ ꓫꓱ ꓤ ꓔꓯ ꓟꓲ ꓠꓯ ꓞꓳ ꓤ ꓔꓬ ꓗꓪ ꓣꓴ ꓔꓯꓹ ꓡ ꓢꓴ ꓐꓴ ꓥ ꓡꓳ= ꓞꓳ ꓤ ꓠꓬ ꓞꓳ ꓤ ꓔꓯ ꓙꓳˍ ꓟ ꓢꓯꓼ ꓪ꓾ ꓚꓲꓸ ꓛꓬ ꓢꓷꓸ ꓠꓲꓹ ꓗꓪ ꓐꓰ ꓚꓲꓸ ꓛꓬ ꓤꓶꓻ ꓗꓪ ꓔꓳꓹ ꓜꓳꓽ ꓪ ꓟ ꓫꓸ ꓙꓵ ꓓꓴ ꓔꓯ ꓧꓪꓸ ꓡꓰ ꓟꓽ ꓐ ꓡ ꓟ ꓪꓴꓸ ꓠꓬꓲ ꓪꓴ-ꓢ ꓠꓬ ꓟꓴꓽ ꓗꓪ ꓝꓲ ꓓꓴ ꓐꓴ ꓔꓯ ꓞꓳ ꓤ ꓐꓴ ꓔꓯ ꓬꓰ ꓙ ꓠꓹ ꓟ ꓟꓬꓱꓽ ꓖꓶ ꓔ ꓟ ꓥ ꓡꓳ= ꓟꓴꓽ ꓗꓪ ꓗꓪ ꓔꓬ ꓟ ꓢꓲꓽ ꓫꓬꓹ ꓟ ꓟꓴꓽ ꓗꓪ ꓝꓲ ꓓꓴ ꓐꓴ ꓠꓬ ꓞꓳ ꓤ ꓐꓴ ꓔꓯ ꓪꓴ-ꓢ ꓔꓯ ꓟꓬꓽ ꓠꓬꓲ ꓠꓶꓽ ꓡꓰ ꓝꓲˍ ꓟ ꓥ ꓡꓳ= ꓣꓳ ꓐꓴ ꓠꓬ ꓒꓲ-ꓡꓲ ꓐꓰ ꓠꓱꓸ ꓐꓯ ꓢꓴ ꓐꓴ ꓔꓯ ꓪꓴ-ꓢ ꓔꓬ ꓗꓪ ꓟꓬꓽ ꓠꓬꓲ ꓠꓶꓽ ꓞꓹ ꓡꓰ ꓝꓲˍ ꓟ ꓟꓴꓽ ꓗꓪ ꓝꓲ ꓓꓴ ꓐꓴˍ ꓡꓰ ꓐꓰ ꓒꓬꓱꓼ ꓐ ꓡˍ ꓡ= ꓣꓳ ꓙꓵꓻ ꓠꓲꓹ ꓟꓬ ꓢꓶꓽ ꓔꓯ ꓥˍ ꓟꓲ ꓣꓱꓽ ꓠꓹ ꓟ ꓙꓽ ꓖꓶꓽ ꓗꓷ ꓪ꓾ ꓐꓯ ꓟ ꓔꓯ ꓓꓵꓽ ꓙ ꓠꓬꓲ ꓡꓯ=