ꓡ-ꓞꓳ-ꓮ-ꓐꓲ ꓠꓽ ꓒꓲꓼ ꓬꓰ ꓢꓴ ꓔꓯ ꓧꓪ ꓢꓲ ꓚꓬꓴˍ ꓐꓰ ꓡ ꓟ ꓥ ꓡꓳ꓾

ꓮ ꓙꓵꓽ ꓢꓴ ꓔꓯ ꓧꓪꓸ ꓧꓪꓸꓼ꓾ ꓠꓬꓲꓸ ꓠꓬꓲ ꓟ ꓐꓱ ꓶ ꓢꓲꓽ ꓫꓬ ꓕꓳꓽ ꓶ ꓠꓬ ꓡꓴ-ꓘ 19ꓽ1-10 ꓥ ꓡꓳ= ꓟꓸ ꓟꓲꓽ ꓘꓴꓽ ꓗꓪ ꓠꓬ ꓬꓲ ꓘꓳꓸ ꓖꓳ ꓢꓴ꓾ ꓝꓲꓸ ꓫ ꓢꓴ ꓬꓲ ꓪꓴꓸ ꓓꓵ ꓣꓱꓽ ꓢꓴ ꓢ-ꓘꓰ-ꓬꓴ ꓠꓬ ꓢꓲ ꓒ ꓬꓰ-ꓢꓴ ꓔꓯ ꓘꓳ ꓣꓴˍ ꓟ ꓟꓸ ꓟꓲꓽ ꓥ ꓡꓳ= ꓢꓲ ꓒ ꓬꓰ-ꓢꓴ ꓠꓬ ꓝꓴꓲꓸ ꓙꓳ ꓢꓴ ꓐꓰ ꓕꓲ ꓪ ꓔꓬ ꓡꓳ= ꓢꓲ ꓒ ꓬꓰ-ꓢꓴ ꓠꓬ ꓝꓴꓲꓸ ꓙꓳ ꓢꓴ ꓔꓯ ꓫꓱꓸ ꓤˍ ꓡꓳ= ꓝꓴꓲꓸ ꓙꓳ ꓢꓴ ꓔꓯ ꓠꓲꓹ ꓠꓵˍ ꓡꓳ꓾ ꓐꓯ ꓟ ꓟꓸ ꓟꓲꓽ ꓥ ꓡꓳ= ꓢ-ꓘꓰ-ꓬꓴ ꓔꓯ ꓠꓬ ꓮꓼ ꓟˍ ꓟꓲ ꓠꓲꓹ ꓐꓴˍ ꓡꓳ= ꓮꓽ ꓟˍ ꓟꓲ ꓬꓲ ꓔꓯ ꓟꓽ ꓠꓵꓻ= ꓮ ꓡꓲꓳ ꓐꓯ ꓠꓬ ꓬꓲ ꓠꓬ ꓣꓳ-ꓟ ꓡ ꓞꓳ ꓐꓱ ꓶ ꓝꓲꓸ ꓖꓳ ꓢꓴ ꓥ ꓡꓳ= ꓬꓲ ꓘꓳꓸ ꓖꓳ ꓢꓴ ꓥ ꓡꓳ= ꓖꓳ ꓟ ꓑꓶꓸ ꓢꓴ ꓬꓲ ꓠꓬ ꓣꓳ-ꓟ ꓡ ꓞꓳ ꓐꓱ ꓶ ꓚꓲꓸ ꓛꓬ ꓫꓵꓽ ꓔꓯ ꓟꓽ ꓫꓱꓸ ꓤ ꓢꓴ ꓥ ꓐꓯ ꓢꓲ ꓠꓬꓲ ꓑ ꓫꓬ ꓐꓴ ꓡꓰ ꓬꓲ ꓔꓯ ꓡꓳ ꓒꓰ ꓔ ꓟ ꓥ ꓡꓳ= ꓖꓳ ꓡꓱ ꓠꓬꓲ ꓬꓲ ꓠꓬ ꓬꓲ ꓤꓶꓻ ꓗꓪ ꓕꓲ ꓣꓳ ꓔꓵꓸꓼ ꓡꓰꓽ ꓞꓳ ꓙꓳ ꓔꓬ ꓪˍ ꓟ ꓥ ꓡꓳ=

ꓕꓲ ꓠꓬꓲ ꓙꓳˍ ꓠꓬ ꓢꓲ ꓒ ꓬꓰ-ꓢꓴ ꓠꓬ ꓬꓲ ꓦꓲꓻ ꓗꓪ ꓛꓲꓺ ꓡˍ ꓟ ꓬꓲ ꓙꓵꓹ ꓛꓲ ꓡˍ ꓡꓳ= ꓖꓳ ꓕꓯ ꓑ ꓫꓬ ꓐꓴ ꓡꓰ ꓢꓲ ꓒ ꓬꓰ-ꓢꓴ ꓔꓯ ꓱꓽ ꓠꓱꓽˍ ꓡꓳ= ꓬꓲ ꓠꓬ ꓝꓴꓲꓸ ꓙꓳ ꓢꓴ ꓐꓰ ꓕꓲ ꓪꓽ ꓔꓬ ꓡꓳ= ꓝꓴꓲꓸ ꓙꓳ ꓢꓴ ꓐꓰ ꓕꓲ ꓪꓽ ꓜꓽˍ ꓡꓳ= ꓝꓴꓲꓸ ꓙꓳ ꓢꓴ ꓦꓲꓻ ꓗꓪ ꓠꓽ ꓙꓰˍ ꓡꓳ= ꓪꓰ ꓤ ꓟꓴ ꓙꓰˍ ꓡꓳ꓾ ꓐꓰ ꓬꓲ ꓔꓯ ꓐꓯ ꓕꓯ ꓢꓲ ꓒ ꓬꓰ-ꓢꓴ ꓠꓬ꓾ ꓥꓪ ꓠꓬ ꓝꓴꓲꓸ ꓙꓳ ꓢꓴ ꓐꓱ ꓶ ꓬꓯꓼ ꓡ ꓟ ꓥ ꓡꓳ= ꓝꓴꓲꓸ ꓙꓳ ꓢꓴ ꓔꓯ ꓪꓴ-ꓢ ꓔꓬ ꓗꓪ ꓘꓴ ꓠꓹ ꓟ꓾  ꓝꓴꓲꓸ ꓙꓳ ꓢꓴ ꓔꓯ ꓪꓴ-ꓢ ꓔꓬ ꓗꓪ ꓙꓰ ꓠꓹ ꓟ ꓥꓪ ꓡꓰ ꓬꓯꓼ ꓡ ꓟ ꓥ ꓡꓳ꓾ ꓐꓰ ꓒꓳꓹ ꓖꓶˍ ꓡꓳ=

ꓢꓲ ꓒ ꓬꓰ-ꓢꓴ ꓠꓬ ꓒꓲꓼ ꓬꓰ ꓟ ꓮ ꓣꓳ ꓔꓯ ꓧꓪ ꓢꓴ ꓥ ꓡꓳ= ꓢꓲ ꓒ ꓬꓰ-ꓢꓴ ꓠꓬ ꓙ ꓖꓴ ꓪꓴꓸ ꓢꓴ꓾ ꓙ ꓖꓴ ꓛꓬꓻ ꓢꓴ ꓐꓴ ꓔꓯ ꓧꓪ ꓢꓴ ꓥ ꓡꓳ= ꓢꓲ ꓒ ꓬꓰ-ꓢꓴ ꓠꓬ ꓣꓳ ꓔꓯ ꓠꓲꓹ ꓠꓵˍ ꓡꓳ= ꓣꓳ ꓝꓴꓲꓸ ꓮ ꓡꓰ ꓘꓶ ꓛꓲ ꓙꓳˍ ꓥ ꓟꓲ꓾ ꓮ ꓡꓰ ꓘꓶ ꓛꓲ ꓬꓲ ꓔꓯ ꓛꓬꓻ ꓗꓷ ꓥˍ ꓟꓲ ꓬꓲ ꓠꓬ ꓣꓳ ꓔꓯ ꓠꓲꓹ ꓠꓵˍ ꓡꓳ ꓐꓯ ꓟ ꓣꓳ ꓢꓷꓸ ꓠ ꓗꓹ ꓡꓳ=