ꓢꓲꓺ ꓒ ꓡˍ ꓟ ꓔꓯ ꓦꓴ ꓠꓬꓹ ꓠꓯꓹ ꓟ

ꓠꓬꓲꓸ ꓠꓬꓲ ꓟ ꓢꓲꓽ ꓫꓬ ꓕꓳ ꓶ ꓗꓪ ꓠꓬꓢꓲꓺ ꓒ ꓬꓰ-ꓢꓴ ꓡꓰ ꓬꓲ ꓝꓲ ꓓꓴ ꓐꓴ ꓔꓯ꓾ ꓠꓴ ꓪ ꓧꓪꓸ ꓛꓲꓽ ꓛꓲ ꓐꓰ ꓔꓬ꓾ ꓢꓲꓺ ꓒ ꓠꓽ ꓮ ꓕꓯ ꓡˍ ꓟꓽ ꓢꓷꓸ꓾ ꓐꓰ ꓐꓯ ꓡꓳ= ꓢꓲꓺ ꓒ ꓬꓰ-ꓢꓴ ꓡꓰ ꓝꓮꓲ ꓔꓯꓺ ꓥꓳꓽ ꓣꓱꓽ ꓢꓲ ꓐꓯ ꓟ ꓠꓬ꓾ ꓦꓲ ꓢꓲꓺ ꓒ ꓕꓲ ꓣꓳ ꓠꓬ ꓬꓲ ꓦꓲꓻ ꓗꓪ ꓞꓳ ꓘꓴꓽ ꓮ ꓕꓯ ꓡ ꓟ ꓔꓯ ꓢꓷꓸ ꓐꓭ ꓠꓬ꓾ ꓖꓳ ꓕꓲ ꓙꓵꓹ ꓗꓪ ꓦꓴ ꓠꓬꓹ ꓢꓲ ꓞꓳ ꓘꓴꓽ ꓔꓯ ꓣꓴˍ ꓥꓳ= ꓖꓳ ꓡꓱ ꓐꓯ ꓥ ꓟꓲ ꓞꓳ ꓘꓴꓽ ꓠꓽ ꓮ ꓕꓯ ꓡ ꓟ ꓔꓯ ꓢꓷꓸ ꓟꓽ ꓓ=

ꓖꓳ ꓟ ꓕꓲ ꓡꓰꓹˍ ꓡ ꓞꓳ ꓮ ꓐꓲꓻ ꓥ ꓟꓲ ꓮ ꓕꓯ ꓡ ꓟꓽ ꓢꓷ= ꓕꓱ ꓟ ꓔꓯ ꓠꓴ ꓪ ꓙꓽ ꓜꓲ ꓔ꓾ ꓐꓰ ꓬꓰ-ꓢꓴ ꓡꓰ ꓬꓲ ꓝꓲ ꓓꓴ ꓐꓴ ꓔꓯ ꓐꓯ ꓡꓳ= ꓝꓮꓲ ꓬꓰ-ꓢꓴ ꓡꓰ ꓝ ꓢꓲ ꓡ ꓞꓳ ꓮ ꓐꓲꓻ ꓥ ꓠꓬ ꓢꓲꓺ ꓒ ꓡˍ ꓕꓯ ꓢꓷꓸ ꓠꓲꓹ ꓙꓳ ꓙꓳ ꓡꓰ꓾ ꓙꓵꓻ ꓠꓲꓹ ꓙꓳ ꓙꓳ ꓡꓰ ꓐꓰ ꓢꓲꓺ ꓒ ꓔꓯ ꓘꓳ ꓣꓴ ꓢꓴ ꓠꓽ ꓶꓼ ꓙꓳ ꓫꓱꓹ ꓙꓳˍ ꓥꓳ꓾ ꓐꓰ ꓐꓯ ꓡꓳ=

ꓕꓱ ꓟ ꓡꓰꓽ ꓟꓽ ꓞꓲꓺ ꓡ ꓞꓳ ꓮ ꓐꓲꓻ ꓥ ꓠꓬ ꓢꓲꓺ ꓒ ꓡˍ ꓕꓯ ꓙ ꓖꓶ ꓔ ꓟ ꓟꓽ ꓙꓳ ꓢꓴ ꓠꓬ ꓥꓶˍ ꓟ ꓙꓱꓽ ꓘꓶꓽ ꓟꓶˍ ꓥꓳ꓾ ꓐꓰ ꓢꓲꓺ ꓒ ꓬꓰ-ꓢꓴ ꓡꓰ ꓐꓯ ꓡꓳ= ꓥꓶ ꓢꓴ ꓐꓯ ꓟ ꓠꓽ ꓡ ꓞꓳ ꓮ ꓐꓲ ꓠꓬ ꓠꓬꓲꓸ ꓠꓬꓲ ꓢꓸ ꓠꓯ ꓞꓼ ꓟꓽ ꓡ ꓢꓰꓽ= ꓖꓳ ꓟ ꓪꓴꓸ ꓠꓬꓲ ꓥꓪ ꓠꓬ ꓮ ꓫꓵꓸ ꓠꓲꓹ ꓫꓵˍ ꓮ ꓫꓵꓽ ꓥꓪ ꓬꓰ ꓓꓹ ꓡꓳ꓾ ꓐꓰ ꓐꓯ ꓢꓲ ꓟꓽ ꓙ ꓖꓶ꓾ ꓟꓽ ꓧꓪꓸ ꓛꓲ ꓛꓲ ꓔꓬ ꓡꓳ=ꓕꓱ ꓟ ꓔꓯ ꓠꓬ ꓢꓲꓺ ꓒ ꓡˍ ꓕꓯ ꓬꓲ ꓠꓬ ꓙ ꓖꓶ ꓔ ꓟ ꓟꓽ ꓙꓳ ꓠꓬꓲ ꓬꓲ ꓢꓲꓺ ꓒ ꓟꓳ ꓡꓰ ꓕꓯ ꓠꓬ ꓬꓲ ꓔꓯ ꓠꓯ ꓞꓲꓹ ꓟ ꓗꓪ ꓡꓳꓺ ꓩꓴ ꓗꓷˍ ꓥꓳ= ꓖꓳ ꓗꓪ ꓠꓬ ꓥꓴˍ ꓟ ꓐꓰ ꓢꓲꓽ ꓞꓲꓹ ꓟ ꓙꓳˍ ꓥꓳ꓾ ꓐꓯ ꓡꓳ=

ꓠꓲꓹ ꓠꓵˍ ꓟ ꓬꓲ ꓤ ꓠꓬꓲ ꓤ ꓐꓴꓳ ꓠꓬꓲꓸ ꓠꓬꓲ ꓟ ꓢꓲꓽ ꓫꓬ ꓕꓳ ꓶ ꓗꓪ ꓐꓰ ꓢꓲꓺ ꓒ ꓬꓰ-ꓢꓴ ꓡꓰ ꓣꓳ ꓔꓯ ꓬꓲ ꓪꓴꓸ ꓐꓯ ꓟꓸ ꓖꓶ ꓠꓲꓹ ꓫꓵˍ ꓟ ꓠꓬ ꓧꓪꓸ ꓛꓲ ꓛꓲ ꓐꓰ ꓔꓬ ꓐꓯ ꓟ ꓥ ꓡꓳ= ꓕꓱ ꓢꓲꓽ ꓫꓬ ꓕꓳ ꓶ ꓗꓪ ꓐꓰ ꓣꓳꓽ ꓢꓽ ꓫꓵꓽ ꓡꓳꓸ ꓟꓳˍ ꓡꓳ=

ꓢꓲꓺ ꓒ ꓬꓰ-ꓢꓴ ꓡˍ ꓟ ꓔꓯ ꓣꓳꓽ ꓢꓽ ꓙꓰꓽ ꓘꓶꓽ ꓢꓲ ꓡꓳꓸ ꓠꓬꓲ ꓡꓯ= ꓢꓲꓺ ꓒ ꓬꓰ-ꓢꓴ ꓬꓲꓸ ꓪꓴꓸ ꓡˍ ꓟ ꓠꓬ ꓣꓳ ꓠꓲꓹ ꓟ ꓠꓯꓸꓼ ꓗꓪ ꓣꓳꓽ ꓓꓵꓽ ꓙ ꓚꓱꓹ ꓗꓪ ꓐꓰ ꓡˍ ꓥꓳ= ꓠꓬꓲꓽ ꓙꓰꓽ ꓕꓲ ꓙꓰꓽ ꓟ ꓠꓬ ꓣꓳꓽ ꓡ ꓫꓵꓻ ꓘꓷ ꓡꓰˍ ꓕꓲ ꓠꓬꓲ ꓗꓪ ꓢꓲꓺ ꓒ ꓬꓰ-ꓢꓴ ꓡꓰ ꓣꓳꓽ ꓐꓰ ꓟꓳ ꓡꓯ ꓘꓳˍ ꓟ ꓥ ꓡꓳ=

ꓝꓮꓲ ꓢꓺ ꓙꓰꓽ ꓕꓲ ꓙꓰꓽ ꓠꓬ ꓟꓲ ꓠꓯ ꓕꓱ ꓟ ꓡꓳꓹ ꓬꓰˍ ꓕꓯ ꓠꓽ ꓢꓲꓺ ꓒ ꓬꓰ-ꓢꓴ ꓠꓬ ꓫꓵꓻ ꓢꓴ ꓐꓰ ꓢꓯꓸ ꓢꓴ ꓮ ꓙꓵꓽ ꓔꓯ ꓡꓳꓽ ꓢꓲ ꓠꓬꓲ꓾ ꓖꓳ ꓗꓪ ꓥˍ ꓟꓲ ꓢꓲꓺ ꓒ ꓬꓰ-ꓢꓴ ꓝꓮꓲ ꓕꓲ ꓧꓪꓹ ꓡˍ ꓥꓳ꓾ ꓐꓰ ꓐꓯ ꓟ ꓔꓯ ꓣꓳ ꓢꓷꓸ ꓠ ꓗꓹ ꓡꓳ=

ꓖꓳ ꓟ ꓪꓴꓸ ꓠꓬꓲ ꓢꓲꓺ ꓒ ꓬꓰ-ꓢꓴ ꓠꓬ ꓣꓳ ꓠꓲꓹ ꓟ ꓠꓯꓸꓼ ꓗꓪ ꓣꓳ ꓓꓵꓽ ꓙ ꓚꓱꓹ ꓗꓪ ꓮ ꓕꓯ ꓡ ꓥ ꓟꓽ ꓢꓷꓸ= ꓕꓱ ꓟ ꓡꓰꓽ ꓟꓽ ꓞꓲꓺ ꓣꓳ ꓠꓬ ꓮ ꓕꓯ ꓫꓵꓻ ꓘꓷ ꓡꓰˍ ꓥ ꓟꓽ ꓢꓷꓸ= ꓕꓱ ꓟ ꓡꓰꓽ ꓟꓽ ꓞꓲꓺ ꓢꓲꓺ ꓒ ꓬꓰ-ꓢꓴ ꓪꓴ-ꓢ ꓬꓲ ꓮ ꓐꓲꓻ ꓠꓬ ꓝꓮꓲ ꓠꓬꓲꓽ ꓧꓪꓹ ꓕꓲ ꓧꓪꓹ ꓛꓲꓺ ꓡˍ ꓟ ꓠꓬ ꓮ ꓕꓯ ꓥ ꓟꓽ ꓢꓷꓸ꓾ ꓐꓯ ꓟ ꓣꓳ ꓢꓷꓸ ꓠ ꓗꓹ ꓡꓳ=

ꓖꓳ ꓡꓱ ꓠꓬꓲ ꓣꓳꓽ ꓬꓰ ꓠ ꓔ ꓟ ꓠꓬ ꓣꓳ ꓧꓪꓸ ꓛꓲ ꓛꓲˍ ꓐꓰ ꓬꓰ ꓢꓲ ꓠꓬꓲ ꓙ ꓖꓶ ꓔ ꓠꓹ ꓟ ꓥ ꓡꓳ= ꓣꓳ ꓠꓲꓹ ꓟ ꓠꓯꓸꓼ ꓗꓪ ꓢꓲꓽ ꓢꓲꓽ ꓫꓬ ꓫꓬ ꓡꓰꓽ ꓗꓶ ꓔ ꓢꓲ ꓠꓬꓲ꓾ ꓢꓲꓺ ꓒ ꓬꓰ-ꓢꓴ ꓮ ꓕꓯ ꓡˍ ꓐꓭꓸ ꓠꓬ ꓧꓪꓸ ꓛꓲ ꓛꓲ ꓐꓰ ꓬꓲ ꓔꓯ ꓘꓳꓹ ꓣꓴ ꓘꓴ ꓠꓹ ꓟ ꓣꓳ ꓢꓯꓼ ꓕꓵꓼ ꓔ ꓠꓹ ꓟ ꓥ ꓡꓳ=

ꓕꓱ ꓟ ꓑꓶꓸ ꓓꓴ ꓢꓲꓺ ꓒ ꓬꓰ-ꓢꓴ ꓣꓳꓽ ꓠꓲꓹ ꓟ ꓠꓯꓸꓼ ꓗꓪ ꓡ ꓕꓯ ꓠꓽ ꓣꓳ ꓠꓲꓹ ꓟ ꓗꓪ ꓟꓽ ꓢꓲꓽ ꓟꓽ ꓫꓬ ꓟ꓾ ꓝꓴꓲꓸ ꓙꓳˍ ꓟ꓾ ꓦꓯꓸ ꓠꓲꓹ ꓙꓵꓽˍ ꓟ꓾ ꓓ ꓙꓴꓽ ꓚꓵꓹ ꓟ꓾ ꓥꓶˍ ꓟ꓾ ꓠꓲꓹ ꓟ ꓠꓯꓸꓼ ꓗꓪ ꓬꓰ-ꓢꓴ ꓐꓱ ꓶ ꓔꓬ ꓖꓴ ꓟꓽ ꓙꓳ ꓥꓳ ꓐꓯ ꓟ꓾ ꓣꓳ ꓠꓽ ꓮ ꓢꓳ ꓕꓯ ꓐꓯ ꓗꓷ ꓟ ꓥꓶˍ ꓟ ꓚꓳꓺ ꓑ ꓡꓰ ꓐꓰ ꓣꓳ ꓔꓯ ꓠꓯ ꓞꓲꓹ ꓟ ꓗꓪ ꓡꓳꓺ ꓩꓴ ꓗꓷˍ ꓥꓳ= ꓖꓳ ꓕꓯ ꓠꓬ ꓣꓳꓽ ꓖꓼ ꓟꓽ ꓟꓶ ꓳ=

ꓖꓳ ꓡꓱ ꓠꓬꓲ ꓠꓬꓲꓸ ꓠꓬꓲ ꓟ ꓢꓲꓽ ꓫꓬ ꓕꓳ ꓶ ꓗꓪ ꓐꓰ ꓣꓳ ꓪꓴ-ꓢ ꓔꓯ ꓮ ꓕꓯ ꓥ ꓟꓲ ꓧꓪꓸ ꓛꓲ ꓛꓲ ꓡꓰꓽ ꓘꓳꓹ ꓣꓴ ꓔꓬ ꓟꓶ ꓘꓴ ꓠꓹ ꓟ ꓢꓯꓼ ꓕꓵꓼ ꓙꓰ ꓡꓯ= ꓣꓳ ꓠꓲꓹ ꓟ ꓠꓯꓸꓼ ꓗꓪ꓾ ꓣꓳ ꓓꓵꓽ ꓙ ꓚꓱꓹ ꓗꓪ꓾ ꓣꓳ ꓢꓯꓸ ꓔꓬ ꓟ ꓤꓶꓻ ꓦꓬꓼ ꓠꓬꓲ ꓗꓪ ꓪꓴ-ꓢ ꓐꓱ ꓶ ꓡꓰꓽ ꓣꓳ ꓣꓱꓽ ꓬꓰ ꓠꓹ ꓟ ꓥ ꓡꓳ꓾ ꓐꓰ ꓠꓬꓲꓸ ꓠꓬꓲ ꓟ ꓢꓲꓽ ꓫꓬ ꓕꓳ ꓶ ꓗꓪ ꓐꓰ ꓢꓲꓺ ꓒ ꓬꓰ-ꓢꓴ ꓡꓰ ꓣꓳ ꓔꓯ ꓐꓯ ꓖꓶ ꓡ ꓔꓬ ꓟ ꓥ ꓡꓳ=