ꓢꓲꓺ ꓒ ꓬꓰ-ꓢꓴ ꓔꓯ ꓢꓲꓽ ꓫꓬ ꓦꓲ ꓗꓪ ꓔꓲꓺ ꓖꓶ ꓡꓯꓼ ꓙꓱˍ ꓟ

ꓡꓴ-ꓘ = 2ꓽ22-32

ꓢꓲꓺ ꓒ ꓬꓰ-ꓢꓴ ꓟꓲ ꓠꓯ ꓗꓪ ꓬꓯꓼ ꓡˍ ꓟ ꓦꓬꓼ ꓠꓬꓲ ꓕꓯ ꓬꓴ-ꓔ ꓞꓳ ꓫꓵꓽ ꓐꓴ ꓠꓬ ꓬꓲ ꓪ ꓞꓳ ꓙꓳ ꓔꓬ ꓟ ꓗꓪ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓢꓲꓽ ꓢꓲꓽ ꓫꓬ ꓫꓬ ꓡꓰꓽ꓾ ꓔꓱꓹ ꓜꓳꓽ ꓜꓳꓽ ꓡꓰꓽ ꓞꓳ ꓙꓳ ꓔꓬ ꓟ ꓬꓲ ꓢꓷꓸ ꓡꓰ ꓓꓴ ꓐꓱ ꓶ ꓡꓲꓽ ꓒꓰꓼ ꓙꓵꓽ ꓗ ꓮ ꓟꓬꓹ ꓔꓯ ꓛꓳ ꓫꓱꓽ ꓗꓷ ꓟ ꓥ ꓡꓳ=

ꓡꓲꓽ ꓒꓰꓼ꓾ ꓙꓵꓽ ꓗ ꓮ ꓟꓬꓹ ꓔꓯ ꓛꓳ ꓫꓱꓽˍ ꓟ ꓗꓪ ꓐꓰ ꓪꓴ-ꓢ ꓐꓰ ꓬꓲ ꓪ ꓠꓬꓲꓽ ꓗꓴꓸ ꓚꓸꓼ ꓗꓪ ꓝꓸ ꓔ ꓟ ꓠꓵꓻ ꓠꓲꓹ ꓐꓰ꓾ ꓪꓴ-ꓢ ꓐꓰ ꓬꓲ ꓪ ꓠꓯꓸꓼ ꓗꓪ ꓗꓷ ꓔ ꓟ ꓪꓵꓼ ꓘꓶꓽ ꓐꓴ ꓔꓯ ꓢꓷꓸ ꓡꓰ ꓝꓲ ꓠꓹ ꓟ ꓥ ꓡꓳ= ꓟꓬꓽ ꓠꓬꓲ ꓠꓬ ꓪꓴ-ꓢ ꓬꓲ ꓠꓵꓻ ꓠꓲꓹ ꓔꓯ ꓒꓳꓹ ꓖꓶˍ ꓟ ꓗꓪ ꓪꓴ-ꓢ ꓐꓯ ꓘꓶꓽ ꓔꓯ ꓠꓻ ꓠꓹ ꓟ ꓗꓪ ꓪꓴꓸ ꓓꓵ ꓱꓽ ꓱˍ ꓬꓰ ꓢꓲ ꓘꓳꓹ ꓣꓴˍ ꓟ ꓡꓰꓽ ꓟꓽ ꓥ ꓥ꓾ ꓒꓬꓱꓽ ꓔꓳꓹ ꓟꓬ ꓔꓳꓹ ꓣꓱꓽ ꓬꓰˍ ꓟ ꓤꓶꓻ ꓔꓯ ꓬꓰ ꓢꓲ ꓞꓳ ꓙꓳ ꓢꓯꓸ ꓔꓬ ꓟ ꓥ ꓡꓳ=

ꓢꓲꓺ ꓒ ꓬꓰ-ꓢꓴ ꓠꓬ ꓙꓵꓽ ꓗ ꓐꓰ ꓡꓲꓽ ꓒꓰꓼ ꓮ ꓙꓵꓽ ꓟ ꓬꓲ ꓝꓳꓹ ꓟꓶ ꓥ ꓡꓳ= ꓖꓳ ꓟ ꓪꓴꓸ ꓠꓬꓲ ꓢꓲ-ꓟꓰ ꓠꓬ ꓢꓲꓺ ꓒ ꓔꓯ ꓕꓲ ꓟꓲ ꓠꓯ ꓡꓱꓸꓼ ꓟ ꓠꓬꓲ ꓟꓳ ꓓꓴ ꓬꓲ ꓢꓲꓺ ꓒ ꓥ ꓡꓳ ꓐꓰ ꓐꓯ ꓗꓷꓳ= ꓠꓬꓲ ꓟꓳꓻ ꓓꓴ ꓢꓲꓺ ꓒ ꓖꓳ ꓕꓲ ꓣꓳ ꓠꓬ ꓠꓯ ꓞꓲꓹ ꓟ ꓗꓪ ꓔꓵꓸ ꓡꓰ ꓔꓬ ꓟ ꓞꓳ ꓤ ꓮ ꓙꓵꓽ ꓔꓯ ꓚꓬꓴꓸ ꓙˍ ꓟ ꓚꓬꓴꓸ ꓢꓲꓺ ꓒ ꓥ ꓡꓳ=

ꓚꓬꓴꓸ ꓙˍ ꓟ ꓬꓲ ꓟꓸ ꓟꓲꓽ ꓠꓬ ꓪꓴ-ꓢ ꓠꓯꓸꓼ ꓗꓪ ꓣꓳ ꓟꓲ ꓠꓯ ꓞꓳ ꓤ ꓮ ꓙꓵꓽ ꓠꓬ ꓕꓲ ꓠꓲꓹ ꓕꓲ ꓪ ꓙꓳˍ ꓟ ꓔꓯ ꓐꓯ ꓟ ꓥ ꓡꓳ= ꓕꓱ ꓟ ꓡꓰ ꓪꓴ-ꓢ ꓠꓯꓸꓼ ꓗꓪ ꓕꓲ ꓠꓲꓹ ꓕꓲ ꓪ ꓟ ꓤꓶꓻ ꓔꓯ ꓟꓶ ꓡꓰ ꓠꓹ ꓟ ꓐꓱ ꓶ ꓣꓳ ꓐꓴ ꓠꓬ ꓢꓲꓺ ꓒ ꓬꓰ-ꓢꓴ ꓬꓲ ꓐꓯ ꓘꓶꓽ꓾ ꓬꓲ ꓞꓳ ꓙꓳ ꓚꓱꓹ ꓐꓰ ꓙ ꓫꓱꓽ ꓚꓱꓹ ꓐꓴ ꓔꓯ ꓛꓳ ꓐ ꓡ ꓠꓹ ꓟ ꓬꓳꓸ ꓚꓵˍ ꓟ ꓥ ꓡꓳ= ꓢꓲꓺ ꓒ ꓬꓰ-ꓢꓴ ꓐꓰ ꓕꓲ ꓡꓰꓹ ꓣꓳ ꓐꓴ ꓥ ꓟꓲ ꓞꓳ ꓙꓳ ꓙꓰ ꓠꓹ ꓟ ꓥ ꓡꓳ=