ꓢꓲꓽ ꓫꓬ ꓦꓲ ꓐꓬ ꓡꓰ ꓠꓹ ꓟ

ꓣꓳ ꓟꓲ ꓠꓯ ꓞꓳ ꓤ ꓠꓬ ꓟꓬ ꓢꓶꓽ ꓗꓪ ꓐꓰ ꓟꓳˍ ꓟ ꓔꓯ ꓡꓰꓽ ꓙꓵˍ ꓡꓳ= ꓟꓬ ꓢꓶꓽ ꓗꓪ ꓐꓰ ꓟꓳˍ ꓠꓬ ꓬꓲ ꓑꓰꓹ ꓥꓳ꓾ ꓐꓰ ꓓꓵꓽ ꓙˍ ꓡꓳ= ꓮ ꓠꓱ ꓕꓯ ꓟꓸ ꓟꓲꓽ ꓕꓲ ꓟ ꓙꓳˍ ꓟ ꓣꓳ ꓑ ꓙ ꓠꓬꓲˍ ꓟ ꓡꓰ ꓐꓰ ꓔꓲꓔꓮꓠꓲꓚ ꓡꓲꓺ ꓓ ꓟ ꓔꓯ ꓟꓲ ꓠꓯ ꓞꓳ ꓤ ꓡꓰ ꓟꓳˍ ꓕꓯ ꓮ ꓘꓶꓸ ꓐꓲˍ ꓡꓳ꓾ ꓮ ꓘꓶꓸ ꓙꓲˍ ꓡꓳ꓾ ꓮ ꓘꓶꓸ ꓧꓸˍ ꓡꓳ= ꓡꓲꓺ ꓓ ꓟ ꓕꓱ ꓟ ꓔꓯ ꓠꓽ ꓪꓴ-ꓢ ꓡꓰꓸ ꓠꓽ ꓐꓬ ꓡꓰ ꓝꓲ ꓟꓽ ꓐ ꓡ꓾ ꓐꓰ ꓕꓱ ꓟ ꓔꓯ ꓫꓬꓹ ꓢꓴ ꓡꓰ ꓐꓯ ꓡꓳ= ꓖꓳ ꓡꓱ ꓥ ꓟꓲ ꓣꓳ ꓢꓷꓸˍ ꓟ ꓡꓰ ꓐꓰ ꓔꓲꓔꓮꓠꓲꓚ ꓡꓲꓺ ꓕꓱ ꓟ ꓠꓬ ꓠꓯ ꓬꓲꓻ ꓘꓴꓽ ꓗꓪ ꓦꓱ ꓓꓵꓽ ꓙꓰ ꓟ ꓣꓳ ꓢꓷꓸ ꓪˍ ꓡꓳ= 

ꓮ ꓡꓲꓳ ꓐꓯ ꓠꓬ ꓣꓳ ꓠꓬ ꓣꓳ ꓟꓬ ꓢꓶꓽ ꓔꓯ ꓡꓰꓽ ꓙꓵˍ ꓡꓳ= ꓟꓬ ꓢꓶꓽ ꓠꓬ ꓗꓶꓸ ꓗꓴꓸˍ ꓡꓳ= ꓣꓳ ꓟꓬ ꓢꓶꓽ ꓔꓯ ꓠꓬ ꓠꓱꓸ ꓐꓯ ꓢꓴ ꓗꓶꓸ ꓜꓽ ꓟꓽ ꓠ= ꓥ ꓠꓬ ꓣꓳ ꓟꓬ ꓢꓶꓽ ꓗꓪ ꓐꓰ ꓟꓳꓻˍ ꓕ ꓑꓳꓸꓼ ꓠꓬ ꓟꓽ ꓥ ꓟ ꓔꓯ ꓣꓳꓽ ꓟꓽ ꓢꓷꓸ= ꓠꓬꓲꓸ ꓠꓬꓲ ꓣꓳ ꓑ ꓙꓽ ꓪˍ ꓟ ꓢꓲꓽ ꓫꓬ ꓕꓳꓽ ꓶ ꓥ ꓟ ꓡꓴ-ꓘ 21ꓽ5-11 ꓗꓪ ꓑ ꓫꓬ ꓐꓴ ꓠꓬ ꓙꓱ-ꓣꓴ-ꓢ-ꓡꓱ ꓪꓽ ꓘꓴ ꓦꓲ ꓮ ꓡꓰ ꓘꓶꓸ ꓐꓲˍ ꓟ ꓒꓵꓽˍ ꓟ꓾ ꓭꓸ ꓛꓲ ꓗꓪ ꓐꓰ ꓫꓬꓹ ꓔ ꓟ ꓔꓯ ꓫꓱꓸ ꓖꓶˍ ꓡꓳ= ꓖꓳ ꓡꓱ ꓠꓬꓲ ꓢꓲ ꓒ ꓬꓰ-ꓢꓴ ꓠꓬ ꓬꓲ ꓪ ꓔꓯ ꓠꓴ ꓪ ꓟꓳˍ ꓟ ꓪꓽ ꓘꓴ ꓦꓲꓻ ꓕꓱ ꓟ ꓠꓬ ꓭꓸ ꓛꓲ ꓕꓲ ꓟ ꓕꓯꓽ ꓢꓲ ꓕꓲ ꓟ ꓟꓽ ꓝꓰꓹ ꓓꓹ ꓟ ꓬꓲ ꓙꓵꓹ ꓛꓲ ꓡˍ ꓥꓳ꓾ ꓐꓰ ꓐꓯ ꓖꓶˍ ꓡꓳ=

ꓠꓲꓹ ꓠꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓟꓲ ꓠꓯ ꓕꓱ ꓟ ꓗꓪ ꓣꓳꓽ ꓠꓬ ꓟꓬ ꓢꓶꓽ ꓗꓪ ꓐꓰ ꓡꓰꓽ ꓢꓯꓸ ꓔꓬ ꓟ ꓟꓽ ꓥ= ꓟꓳꓻ ꓓꓹ ꓗꓪ ꓐꓰ ꓡꓰꓽ ꓢꓯꓸ ꓔꓬ ꓟ ꓟꓽ ꓥ= ꓣꓳ ꓠꓬ ꓟꓳꓻ ꓟꓽ ꓓ ꓟ ꓙꓵꓻ ꓠꓲꓹ ꓗꓪ ꓐꓰ ꓣꓳ ꓙ ꓫꓱꓽ ꓔꓬ ꓡꓳ= ꓟꓸ ꓟꓲꓽ ꓑꓷꓠꓽ ꓗꓪ ꓓꓵˍ ꓟ ꓡꓰ ꓐꓰ We journey by faith, no by sight  ꓐꓯ ꓟ ꓡꓰ ꓐꓰ ꓣꓳ ꓠꓬ ꓟꓳˍ ꓟ ꓗꓪ ꓐꓰ ꓟꓽ ꓥ ꓥ꓾ ꓙꓵꓻ ꓠꓲꓹ ꓗꓪ ꓐꓰ ꓙ ꓖꓴ ꓫꓱꓽ ꓔꓬ ꓡꓳ ꓐꓯ ꓟ ꓣꓳ ꓔꓯ ꓟꓸ ꓖꓶ ꓡ ꓔꓬ ꓡꓳ=

ꓖꓳ ꓡꓱ ꓠꓬꓲ ꓣꓳ ꓕꓲ ꓠꓬꓲ ꓕꓲ ꓠꓬꓲ ꓙ ꓖꓴ ꓫꓱꓽ ꓙꓰˍ ꓕꓯ ꓣꓳꓽ ꓓꓹ ꓕꓲ ꓒꓳꓹ ꓗꓪ ꓐꓰ ꓡꓰꓽ ꓓꓵꓽ ꓙ ꓞꓷꓹ ꓟ ꓟꓽ ꓥ ꓥ꓾ ꓟꓳꓻ ꓟꓽ ꓓ ꓟ ꓙꓵꓻ ꓠꓲꓹ ꓗꓪ ꓐꓰ ꓙ ꓫꓱꓽ ꓢꓲ꓾ ꓙꓵꓻ ꓠꓲꓹ ꓟꓬ ꓢꓶꓽ ꓗꓪ ꓐꓰ ꓣꓳ ꓡꓳꓸ ꓠ ꓗꓹ ꓡꓳ= ꓟꓳꓻ ꓓꓹ ꓟ ꓮ ꓙꓵꓽ ꓠꓬ ꓕꓲ ꓠꓬꓲ ꓙꓳˍ ꓠꓬ ꓐꓬ ꓡꓰˍ ꓥꓳ= ꓛꓵꓽ ꓡꓰˍ ꓥꓳ= ꓖꓳ ꓡꓱ ꓥˍ ꓟꓲ ꓙꓵꓻ ꓠꓲꓹ ꓕꓱ ꓟ ꓠꓬ ꓛꓵꓽ ꓡꓰ ꓟꓽ ꓓ= ꓪꓴ-ꓢ ꓮ ꓕꓯˍ ꓟꓲ ꓙꓳ ꓞꓹ ꓟ ꓑꓶꓸ ꓓꓴ ꓬꓲ ꓠꓬ ꓣꓳ ꓐꓰ ꓕꓲ ꓪꓽ ꓔꓬ ꓡꓳ= ꓕꓲ ꓠꓬꓲ ꓕꓲ ꓠꓬꓲ ꓣꓳ ꓕꓱ ꓡꓱ ꓛꓳ ꓫꓱꓽ ꓔꓬ ꓕꓯ ꓙꓵꓻ ꓠꓲꓹ ꓗꓪ ꓐꓰ ꓣꓳ ꓙꓰ ꓐ ꓡ ꓠꓹ ꓟ ꓪꓴ-ꓢ ꓔꓯ ꓶꓼ ꓓꓰꓽ ꓪꓽ ꓘꓴ ꓙꓰ ꓡꓯ=