ꓫꓱ. ꓤ ꓓꓴ ꓟꓬꓱꓽ ꓬꓰ ꓠꓯˍ ꓟ

ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓗ, ꓛꓲˍ ꓟ ꓠꓯꓼ ꓠꓯꓼ ꓕꓲꓽ ꓙꓵꓹ ꓗꓪ ꓣꓳꓽ ꓪꓴ‐ꓢ ꓔꓯ ꓧꓶ. ꓕꓯ ꓪꓽ ꓘꓴ ꓡꓯ꓾ ꓬꓲ. ꓐꓯ ꓘꓶꓽ ꓔꓯ ꓧꓶ. ꓕꓯ ꓠꓻ ꓠꓹ ꓢꓲ ꓟꓬꓱꓽ ꓬꓰ ꓡꓳ ꓬꓰ ꓡꓯ꓿

ꓠꓬꓲ. ꓠꓬꓲ ꓦ ꓢꓯꓼ ꓪ ꓣꓴ ꓓꓴ ꓠꓬ꓾ ꓬꓲ-ꓢ-ꓬ ꓕꓳ ꓶ (1ꓽ14‐20) ꓗꓪ ꓛꓲ ꓥꓳ꓿ ꓮ ꓟꓶ ꓣꓱꓽ ꓛꓰꓽ ꓦꓬꓼ ꓠꓬꓲ ꓗꓪ ꓣꓳꓽ ꓟꓲ ꓠꓯ ꓞꓳ ꓤ ꓔꓯ ꓬꓲ. ꓔꓬ, ꓗꓪ ꓒꓳꓹ ꓬꓲꓼ ꓡ ꓠꓯˍ ꓟ ꓟꓽ ꓠꓽ ꓠꓽ ꓘꓴ ꓔꓬ, ꓟ ꓥꓳ꓿ ꓢꓲ ꓫꓬ ꓕꓳ ꓶ ꓗꓪ ꓐꓰ ꓣꓳꓽ ꓠꓬ ꓪꓴ‐ꓢ ꓘꓴ ꓢꓯꓼ꓾ ꓪꓴ‐ꓢ ꓢꓯꓼ ꓪ ꓖꓶꓽˍ ꓟ ꓔꓯ ꓠꓻ ꓠ ꓓꓴ ꓬꓰ ꓡꓯ꓿

ꓟ. ꓟꓲꓽ ꓘꓴꓽ ꓗꓪ ꓠꓬ꓾ ꓥꓪ ꓒꓬꓱꓽ ꓕꓯ ꓗꓪ ꓠꓴ ꓪ ꓟꓽ ꓙꓲꓻ ꓟꓬꓱꓽ ꓔꓯ ꓠꓽ ꓗꓷ꓾ ꓥꓶˍ ꓟ ꓬꓰˍ ꓟ ꓡꓳ ꓗꓷ꓾ ꓙꓲˍ ꓟ ꓬꓰ ꓢꓳ꓾ ꓠꓬꓲ. ꓞ, ꓢꓴ ꓔꓯ ꓢ ꓡꓰ ꓝꓲ꓾ ꓤ ꓛꓵꓽ ꓔꓯ ꓔ, ꓙ꓾ ꓟꓶꓽ ꓛꓵꓽ ꓟ ꓐꓱ ꓶ ꓓꓰꓽ ꓙ꓾ ꓐꓰ ꓐꓯ ꓔ ꓡꓳ꓿ ꓕꓱ ꓡꓱ ꓐꓰ ꓬꓰˍ ꓠꓬ ꓣꓳꓽ ꓝꓴꓲ. ꓠꓬ ꓮ ꓭ. ꓫꓵꓽ ꓡꓰ ꓐꓰ ꓓ ꓥˍ ꓟꓲ ꓪꓽ ꓡꓰ ꓐꓰ ꓒꓴ ꓡꓰ ꓥꓳ꓾ ꓮ ꓣꓳ ꓟꓵˍ ꓡꓰ ꓐꓰ ꓒꓴ ꓡꓰ ꓥꓳ ꓐꓰ ꓬꓲ‐ꓢ‐ꓬ ꓕꓳ ꓶ 1ꓽ18‐20 ꓗꓪ ꓐꓯ ꓔ ꓡꓳ꓿

ꓢꓲ, ꓢꓶꓽ ꓜꓲ ꓠꓬ ꓢꓲ, ꓢꓶꓽ ꓓꓱꓼ ꓠꓯ ꓡꓳ꓾ ꓢꓲ, ꓪꓰ ꓠꓬ ꓢꓲ, ꓪꓰ ꓪꓰ ꓠꓯˍ ꓡꓳ꓾ ꓮ ꓭ. ꓒ ꓥˍ ꓟꓲ ꓐꓵ ꓠꓯ ꓡꓳ꓾ ꓮ ꓫꓵꓽ ꓥˍ ꓟꓲ ꓮ ꓫꓵꓽ ꓟꓬꓱꓽ ꓙꓳˍ ꓡꓳ꓿ ꓖꓳ ꓡꓱ ꓬꓰ ꓢꓲ ꓡꓰ ꓬꓲ. ꓬꓲ ꓢꓲ ꓙꓳˍ ꓡꓳ ꓟꓽ ꓥ ꓡ?

ꓕꓱ ꓟ ꓡꓰ ꓐꓰ ꓪꓴ‐ꓢ ꓔꓯ ꓠꓲ, ꓠꓵˍ ꓡꓳ꓾ ꓪꓴ‐ꓢ ꓔꓯ ꓙꓵꓻ ꓔꓬ, ꓡꓳ ꓐꓰ ꓣꓳꓽ ꓐꓯˍ ꓥˍ ꓟꓲ꓾ ꓬꓲ. ꓢꓶꓽ ꓟꓽ ꓓꓱꓼ ꓕꓯ꓾ ꓙꓵꓻ ꓠꓲ, ꓖꓳ ꓟ ꓫꓵꓻ ꓓ ꓕꓯ ꓮ ꓫꓵꓽ ꓬꓲ. ꓬꓲ ꓢꓲˍ ꓟꓲ ꓟꓽ ꓙꓳ꓿

ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓣꓳꓽ ꓮ ꓭ. ꓫꓵꓽ ꓡꓰ ꓐꓰ ꓫꓵꓽ ꓓꓹ ꓟ ꓣꓳꓽ ꓝꓴꓲ. ꓠꓬ  ꓪꓽ ꓡꓰ ꓐꓰ ꓒꓴ ꓡꓰ ꓠꓲ, ꓫꓵ ꓡ? ꓟꓲꓽ ꓢꓯꓼ ꓡꓰ ꓐꓰ ꓠꓯꓺ ꓓ ꓟ ꓝꓴꓲ. ꓔꓯ ꓮ ꓣꓳ ꓟꓵˍ ꓡꓰ ꓐꓰ ꓒꓴ ꓡꓰ ꓠꓲ, ꓫꓵ ꓡ? ꓪꓴ‐ꓢ ꓠꓬ ꓣꓳꓽ ꓔꓯ ꓬꓲ. ꓚꓱ ꓖꓶꓽ ꓔ ꓡꓳ꓿ ꓕꓱ ꓟ ꓠꓬꓕꓯ ꓢꓲ ꓗꓪ ꓐꓯ ꓔ ꓟ ꓡꓰ ꓐꓰ ꓫꓱ. ꓤ ꓓꓴ ꓟꓬꓱꓽ ꓬꓰ, ꓠ ꓟ ꓥꓳ꓿ ꓢꓴ ꓔꓯ ꓫꓱ. ꓤ ꓗꓴ. ꓠ, ꓟ꓾ ꓠꓵ, ꓠꓲ, ꓙꓳ ꓠ, ꓟ ꓥꓳ꓿

ꓠꓴ ꓮ ꓡꓰ ꓘꓶ. ꓛꓲ ꓐꓳꓺ ꓡ? ꓐꓯ ꓟ ꓔꓯ ꓢꓷ. ꓠꓲ, ꓫꓵˍ ꓡ? ꓖꓳ ꓟ ꓔꓯ ꓢꓷ. ꓠꓲ, ꓫꓵˍ ꓠꓬ ꓒꓴ ꓗꓪ ꓐꓰ ꓪꓴꓻ ꓠ, ꓟ ꓮ ꓙꓵꓽ ꓔꓯ ꓟꓽ ꓢꓪ. ꓢꓪ. ꓐꓰ ꓵ ꓠꓬꓲ꓾ ꓠꓴ ꓮ ꓡꓰ ꓘꓶ ꓛꓲ ꓐꓳ. ꓡ꓾ ꓐꓯ ꓟ ꓔꓯ ꓢꓷ. ꓡꓰ ꓥꓳ꓿ ꓒꓴ ꓗꓪ ꓐꓰ ꓪꓴꓻ ꓟꓽ ꓠ ꓟ ꓮ ꓙꓵꓽ ꓔꓯ ꓣꓴ, ꓦ ꓗꓷ, ꓠꓬ ꓣꓳꓽ ꓐꓳ ꓶ ꓓꓳ ꓡ ꓥꓳ꓿ ꓒꓴ ꓗꓪ ꓐꓰ ꓪꓴꓻ ꓠ. ꓟ ꓠꓬ ꓣꓳꓽ ꓐꓳ ꓶ ꓚꓵ ꓚꓵ ꓟꓽ ꓥ꓿

ꓖꓳ ꓡꓱ ꓠꓬꓲ ꓣꓳ ꓐꓳ ꓶ꓾ ꓣꓳ ꓐꓰ ꓕꓲꓽ ꓪ ꓮ ꓕꓯˍ ꓟꓲ ꓓꓯ ꓟ ꓠꓬ ꓫꓱ. ꓤ ꓓꓴ ꓟꓬꓱꓽ꓾ ꓠꓵ, ꓠꓲ ꓟꓬꓱꓽ ꓡꓰ ꓥꓳ꓿ ꓣꓳꓽ ꓐꓳ ꓶ ꓠꓬ ꓕꓱ ꓟ ꓡꓰ ꓥꓳ꓿ ꓬꓲ ꓤ ꓠꓬꓲ ꓤ ꓐꓴꓳ ꓠꓵꓻ ꓠꓲꓹ ꓟꓬꓱꓽ ꓬꓰ ꓡꓯ꓾ ꓢꓯꓼ ꓕꓵꓼ ꓡꓯ꓾ ꓕꓲꓽ ꓑꓹ ꓤ ꓡꓰ ꓔꓬ, ꓟꓶˍ ꓟ ꓟꓲ ꓠꓯ ꓕꓱ ꓟ ꓗꓪ ꓠꓵꓻ ꓠꓲ ꓟꓬꓱꓽ ꓬꓰ ꓡꓯ꓿ ꓮ ꓫꓵꓽ ꓬꓰˍ ꓟ ꓗꓪ ꓥˍ ꓟꓲ꓾ ꓚꓲ. ꓛꓬ ꓦꓲ ꓘꓴꓽ ꓟꓬꓱꓽ ꓗꓪ ꓥˍ ꓟꓲ꓾ ꓪꓴ‐ꓢ ꓟꓬꓱꓽ ꓬꓰˍ ꓟ ꓗꓪ  ꓥˍ ꓟꓲ ꓠꓵꓻ ꓠꓲ ꓗꓪ ꓐꓰ ꓬꓰˍ ꓠꓬ ꓪꓴ‐ꓢ ꓣꓱꓽ ꓛꓰꓽ ꓖꓶꓽ ꓡ ꓥꓳ꓿

ꓮ ꓙꓵꓽ ꓢꓴ ꓪꓴ‐ꓢ ꓣꓱꓽ ꓛꓰ ꓑꓯ, ꓟꓶ ꓟ ꓠꓬꓲ ꓕꓲꓽ ꓠꓬꓲ ꓒꓬꓱꓼ ꓡ ꓝꓲ꓿