ꓣꓱꓽ ꓬꓯꓼˍ ꓟ ꓔꓯ ꓙꓵꓻ ꓠꓲꓹ ꓗꓪ ꓐꓰ ꓓꓰꓽ꓾

ꓟꓲ ꓠꓯ ꓗꓪ ꓡ ꓞꓳ ꓮ ꓟꓬꓹ ꓠꓬ ꓬꓲ ꓪ ꓪꓽ ꓘꓴˍ ꓕꓯ ꓚꓲ ꓛꓬ ꓟꓶ ꓠꓲꓹ ꓫꓵˍ ꓟ꓾ ꓚꓲ ꓛꓬ ꓒꓬꓱꓼ ꓠꓲꓹ ꓫꓵˍ ꓟ ꓔꓯ ꓟꓷꓽ ꓠꓷꓹ ꓘꓶꓽ ꓗꓪ ꓐꓰ ꓟꓽ ꓠꓽ ꓠꓽ ꓐꓯ ꓔꓬ ꓡꓳ= ꓚꓲ ꓛꓬ ꓐꓱ ꓶ ꓚꓵꓺ ꓚꓵꓺ ꓣꓱꓽ ꓬꓯꓼ꓾ ꓟꓽ ꓣꓱꓽ ꓬꓯꓼ ꓟ ꓔꓯ ꓟꓽ ꓓꓵꓽ ꓙꓽ꓾ ꓠꓲꓹ ꓫꓵˍ ꓟ ꓡꓰꓽ ꓓꓰꓽ ꓔꓬ ꓟ ꓥ ꓡꓳ= ꓞꓳ ꓤ ꓕꓲ ꓐꓱ ꓠꓬ ꓮ ꓡꓲ ꓠꓳ-ꓪꓰ-ꓠ ꓪꓽ ꓘꓴˍ ꓠꓬ ꓮ ꓡꓲ ꓫꓵꓽ ꓪ ꓘꓴ ꓐꓲˍ ꓟ꓾ ꓟꓴꓽ ꓖꓪ ꓕꓳ ꓶꓽ ꓮ ꓡꓲ ꓕꓲ ꓕꓱꓻ ꓔꓯ ꓵˍ ꓠꓬ ꓮ ꓡꓲ ꓫꓵꓽ ꓒꓬꓱꓼ ꓡˍ ꓥꓳ꓾ ꓐꓯ ꓢꓲ ꓠꓬꓲ ꓠꓳ-ꓪꓰ-ꓠ ꓪꓽ ꓘꓴˍ ꓟ ꓟꓽ ꓠꓽ ꓠꓽ ꓬꓰ ꓩꓴ ꓬꓰˍ ꓡꓳ= ꓟꓴ ꓖꓪ ꓕꓳ ꓶꓽ ꓔꓯˍ ꓟꓲ ꓟꓽ ꓠꓽ ꓠꓽ ꓵꓻ ꓔꓴ ꓡˍ ꓡꓳ=

ꓗꓳꓸ ꓟ 10 ꓘꓳꓼ ꓟꓽ ꓞꓲꓺ ꓟꓬ-ꓟ ꓗꓴꓷꓼ ꓗꓪ ꓲꓠꓔꓰꓣꓠꓰꓔ ꓖꓳ ꓘꓶꓸ ꓟꓽ ꓙꓳ ꓢꓰꓽ ꓕꓯ꓾ ꓮ ꓟꓶ ꓟ ꓡꓰ ꓑꓧꓳꓠꓰ ꓕꓲ ꓣꓳ ꓕꓲ ꓢꓶꓽ ꓟꓽ ꓙꓳ ꓢꓰꓽ ꓕꓯ ꓙꓵꓻ ꓠꓲꓹ ꓔꓯ ꓟꓳꓸ ꓧꓶꓸ ꓡꓰ ꓓꓴ ꓕꓲ ꓫꓵꓽ ꓓꓳ ꓡˍ ꓡꓳ= ꓡ ꓞꓳ ꓮ ꓟꓬꓹ ꓠꓬ ꓕꓱ ꓟ ꓔꓯ ꓔꓳꓹ ꓜꓳꓽ ꓠꓬꓲˍ ꓥꓳ ꓐꓰ ꓓꓵꓽ ꓙˍ ꓡꓳ= ꓕꓱ ꓟ ꓠꓬ ꓪꓽ ꓘꓴ ꓕꓳꓽ ꓶ ꓕꓱ ꓕꓲ ꓒꓬꓽ ꓔꓯ 10 ꓒꓬꓽ꓾ ꓥ ꓠꓬ 15 ꓒꓬꓽ ꓫꓬꓹ ꓗꓷ ꓢꓲ ꓡ ꓞꓳ 10 ꓣꓳ (15 ꓣꓳ) ꓔꓯ ꓐꓱ ꓖꓶˍ ꓠꓬ ꓒꓴꓻ ꓮ ꓟꓬꓹ ꓪ ꓡˍ ꓥꓳ꓾ ꓪꓴꓽ ꓡ ꓟꓴ ꓡˍ ꓥꓳ= ꓕꓳ ꓶꓽ ꓒꓬꓽ ꓕꓱ ꓟ ꓚꓲꓸ ꓛꓬ ꓡꓯꓽ ꓒꓯꓹ ꓗꓪ ꓛꓲꓺ ꓡ ꓕꓯ ꓠꓱꓸ ꓐꓯ ꓢꓴ ꓔꓯ ꓟꓽ ꓐꓱ ꓖꓶ ꓖꓶ ꓫ ꓔ ꓠꓬ ꓠꓴ ꓔꓯ ꓫꓸ ꓓꓴ ꓔꓳꓹ ꓜꓳꓽ ꓡˍ ꓥꓳ꓾ ꓠꓻ ꓒꓬꓽ ꓟꓬꓽ ꓡˍ ꓥꓳ꓾ ꓫꓸ ꓙꓵ ꓓꓴ ꓓꓽ ꓟ ꓔꓳꓹ ꓜꓳꓽˍ ꓥꓳ꓾ ꓐꓰ ꓐꓳ ꓔ ꓟ ꓕꓳꓽ ꓶ ꓒꓬꓽ ꓥ ꓡꓳ= ꓕꓱ ꓟ ꓠꓬ ꓥꓳꓽ ꓡꓰ ꓓꓴ ꓕꓲ ꓟ ꓥ ꓡꓳ= ꓕꓱ ꓟ ꓠꓬ ꓙꓲ-ꓢꓴ ꓢꓲꓺ ꓤ ꓐꓴ ꓗꓸ ꓚꓵꓺ ꓥ ꓟ ꓔꓱꓹ ꓚꓵˍ ꓟ ꓐꓰ ꓠꓵꓻ ꓠꓲꓹ ꓔꓯ ꓧꓶꓸ ꓡꓰ ꓝꓲˍ ꓟ ꓥ ꓡꓳ= ꓙꓲ-ꓢꓴ ꓢꓲꓺ ꓤ ꓐꓴ ꓔꓯ ꓟꓽ ꓔꓱꓹ ꓟ ꓚꓱꓹ ꓗꓪ ꓙꓻ ꓫꓱꓽ ꓙꓰ ꓝꓲˍ ꓟ ꓥ ꓡꓳ= ꓛꓳ ꓫꓱꓽ ꓥꓳꓽ ꓡꓰ ꓝꓲˍ ꓟ ꓥ ꓡꓳ=

ꓚꓵꓺ ꓚꓵꓺ ꓠꓬ ꓕꓱ ꓡꓱ ꓟꓽ ꓜꓳꓽ ꓟ ꓚꓱꓹ꓾ ꓟꓽ ꓥ ꓟ ꓚꓱꓹ ꓗꓪ ꓐꓰ ꓪꓽ ꓘꓴˍ ꓟ ꓠꓬ ꓣꓳ ꓠꓯꓸꓼ ꓗꓪ ꓙꓳˍ ꓟ ꓠꓲꓹ ꓦꓯꓸ ꓟ꓾ ꓟꓬ ꓠꓯꓸ ꓟ ꓪꓴꓸ ꓠꓬꓲ ꓪꓽ ꓘꓴ ꓒꓬꓱꓼ ꓡˍ ꓟ ꓥ ꓡꓳ= ꓪ ꓜꓲ ꓟꓶ ꓠꓲꓹ ꓫꓵˍ ꓟ꓾ ꓪ ꓜꓲ ꓪꓴꓽ ꓡ ꓟꓴ ꓡ ꓠꓲꓹ ꓫꓵˍ ꓟ ꓠꓲꓹ ꓟ ꓪꓴꓸ ꓠꓬꓲ ꓟꓽ ꓜꓳꓽ ꓟ ꓚꓱꓹ꓾ ꓟꓽ ꓥ ꓟ ꓚꓱꓹ ꓗꓪ ꓐꓰ ꓪꓽ ꓘꓴ ꓔꓬ ꓟ ꓥ ꓡꓳ= ꓠꓬꓲꓸ ꓠꓬꓲ ꓢꓲꓺ ꓒ ꓬꓰ-ꓢꓴ ꓡꓰ ꓪꓴꓽ ꓘꓴ ꓓꓴ ꓔꓯ ꓟꓳꓸ ꓟꓸ ꓖꓶꓽ ꓔ ꓟ ꓗꓪ ꓠꓬ ꓪꓽ ꓘꓴˍ ꓕꓯ ꓐꓯ ꓘꓶꓽ ꓮ ꓟꓬꓹ ꓟꓽ ꓣꓱꓽ ꓠꓹ ꓟ ꓕꓵꓼ ꓪ ꓖꓶ ꓔ ꓡꓳ= ꓖꓳ ꓡꓱ ꓠꓬꓲ ꓪꓽ ꓘꓴˍ ꓕꓯ ꓙꓵꓻ ꓠꓲꓹ ꓗꓪ ꓐꓰ ꓣꓱꓽ ꓬꓯꓼˍ ꓟ ꓔꓯ ꓡꓰꓽ ꓓꓰꓽ ꓠꓹ ꓟ ꓬꓳꓸ ꓚꓵˍ ꓡꓳ= ꓖꓳ ꓟ ꓪꓴꓸ ꓠꓬꓲ ꓢꓲꓺ ꓒ ꓬꓰ-ꓢꓴ ꓠꓬ ꓣꓳ ꓐꓴ ꓐꓱ ꓶ “ꓢꓲꓺ ꓒ ꓡꓰ ꓟꓸ ꓔ ꓟ ꓪꓽ ꓘꓴ ꓓꓴ” ꓔꓯ ꓟꓸ ꓖꓶ ꓗꓷ ꓟ ꓥ ꓡꓳ= “ꓢꓲꓺ ꓒ ꓡꓰ ꓟꓸ ꓔ ꓟ ꓪꓽ ꓘꓴ ꓓꓴ” ꓔꓯ ꓣꓳ ꓮ ꓕꓯ ꓟꓲ ꓪꓽ ꓘꓴ ꓔꓬ ꓐꓯˍ ꓥ ꓟꓲ ꓬꓲ ꓔꓶꓺ ꓙꓱꓼ ꓠꓬ ꓣꓳ ꓤꓶꓻ ꓐꓰ ꓕꓲ ꓠꓲꓹ ꓕꓲ ꓪ ꓗꓷ ꓡꓰ ꓠ ꓬꓰˍ ꓕꓯ ꓫꓸ ꓓꓴ ꓙꓳ ꓡˍ ꓡꓳ=

ꓖꓳ ꓡꓱ ꓠꓬꓲ ꓪꓽ ꓘꓴ ꓓꓴ ꓕꓲ ꓔꓳꓸ ꓤ ꓔꓯ ꓡꓰꓽ ꓙ ꓜꓲꓼ ꓡꓰ ꓠ꓾ ꓘꓳꓹ ꓣꓴ ꓢꓲ ꓛꓳ ꓫꓱꓽ ꓐ ꓡ ꓠ ꓬꓰˍ ꓕꓯ ꓠꓬ “ꓕꓲ ꓠꓬꓲ ꓡꓰ ꓕꓲ ꓠꓬꓲ ꓥꓪ ꓠꓴꓽ ꓣꓱꓽ ꓬꓯꓼˍ ꓟ ꓜꓽ ꓓꓴ ꓠꓬꓲꓸ ꓠꓬꓲ ꓥꓪ ꓠꓴꓽ ꓔꓯ ꓖꓶꓽ ꓜꓽ ꓡꓯ” ꓐꓯ ꓟ ꓔꓯ ꓔꓱꓹ ꓕˍ ꓠꓬꓲ ꓡꓯ= ꓡ ꓞꓳ ꓮ ꓟꓬꓹ ꓪꓽ ꓘꓴˍ ꓟ ꓡꓰ 'ꓒꓬꓱꓼ ꓠꓲꓹ ꓫꓵˍ ꓟ꓾ ꓟꓶ ꓠꓲꓹ ꓫꓵˍ ꓟ' ꓔꓯ ꓓꓰꓽ ꓓꓴ ꓐꓱ ꓶ ꓟꓽ ꓥ ꓥ꓾ 'ꓚꓵꓺ ꓚꓵꓺ ꓣꓱꓽ ꓞꓹ ꓟ꓾ ꓣꓱꓽ ꓬꓯꓼˍ ꓟ꓾ ꓒꓬꓱꓼ ꓡ ꓓˍ ꓟ' ꓔꓯ ꓡꓰꓽ ꓓꓰꓽ ꓠꓹ ꓟ꓾ ꓪꓽ ꓘꓴ ꓠꓹ ꓟ ꓬꓰ-ꓢꓴ ꓙꓲ-ꓢꓴ ꓡꓰ ꓟꓸ ꓖꓶ ꓔꓬ ꓟ ꓥ ꓡꓳ= ꓣꓳ ꓚꓵꓺ ꓚꓵꓺ ꓣꓱꓽ ꓬꓯꓼˍ ꓟ ꓔꓯ ꓚꓲꓹ ꓛꓬ ꓠꓲꓹ ꓫꓵˍ ꓟ ꓡꓰ ꓕꓽ ꓑꓲꓸ ꓡꓰ ꓝꓲ=

ꓖꓳ ꓟ ꓪꓴꓸ ꓠꓬꓲ ꓣꓳ ꓣꓱꓽ ꓬꓯꓼˍ ꓟ ꓔꓯ ꓙꓵꓻ ꓠꓲꓹ ꓗꓪ ꓐꓰ ꓓꓰꓽ= 'ꓠꓴ ꓪ ꓐꓹ ꓐꓽ ꓠꓬ ꓬꓲ ꓔꓯ ꓟꓽ ꓓꓰꓽ ꓧꓶꓸ ꓕꓯˍ ꓡꓰ꓾ ꓠꓴ ꓪ ꓮ ꓫꓵꓽ ꓣꓱꓽ ꓬꓯꓼˍ ꓟ ꓢꓷꓸˍ ꓡꓳ='