ꓥꓪ ꓮꓽ ꓟ ꓥ ꓟ ꓠꓴ ꓪ ꓮ ꓡꓲ ꓐꓯˍ ꓡ?

ꓟ-ꓘꓳ 8ꓽ27-33

ꓢꓲꓽ ꓫꓬ ꓢꓴ ꓟ-ꓘꓳ ꓡꓰ ꓐꓳ ꓔ ꓟ ꓠꓬꓲꓸ ꓠꓬꓲ ꓟ ꓢꓲꓽ ꓫꓬ ꓕꓳꓽ ꓶ ꓗꓪ ꓢꓲꓺ ꓒ ꓬꓰ-ꓢꓴ ꓠꓬ ꓬꓲ ꓝꓲ ꓓꓴ ꓐꓴ ꓔꓯ ꓠꓺ ꓠꓬꓲ ꓘꓶꓽ ꓕꓲ ꓟ ꓠꓺ ꓠꓬꓲ ꓗꓷꓳ= “ꓥꓪ ꓮꓽ ꓟ ꓥ ꓟ ꓢꓴ ꓮ ꓡꓰ ꓐꓯ ꓔꓬ ꓡ?꓾ ꓥꓪ ꓮꓽ ꓟ ꓥ ꓟ ꓠꓴ ꓪ ꓮ ꓡꓲ ꓐꓯ ꓡ?꓾ ꓐꓯ ꓟ ꓥ ꓡꓳ= ꓠꓺ ꓠꓬꓲ ꓘꓶꓽ ꓕꓱ ꓠꓬꓲ ꓟ ꓡꓱꓸꓼ ꓔꓯ ꓒꓳꓹ ꓖꓶ ꓠꓹ ꓟ ꓢꓲꓺ ꓒ ꓬꓰ-ꓢꓴ ꓔꓯ ꓛꓳꓻ ꓔꓬ ꓟ ꓣꓳ ꓙꓲ-ꓢꓴ ꓢꓲꓺ ꓤ ꓐꓴ ꓮ ꓙꓵꓽ ꓡꓱꓸꓼ ꓶꓻ ꓙꓳˍ ꓟ ꓥ ꓡꓳ=

ꓚꓵ ꓚꓵ ꓣꓳ ꓐꓴ ꓐꓱ ꓶ ꓢꓲꓺ ꓒ ꓬꓰ-ꓢꓴ ꓮꓽ ꓟ ꓥ ꓟ ꓔꓯ ꓢꓷꓸ ꓔꓬ ꓡ? ꓣꓳ ꓐꓴ ꓠꓬ ꓠꓱꓸ ꓐꓯ ꓢꓴ ꓐꓯ ꓔꓬ ꓟ ꓕꓲ ꓡꓰꓹ ꓢꓲꓺ ꓒ ꓠꓬ ꓖꓳ ꓕꓲ ꓣꓳ ꓟ ꓥ ꓡꓳ꓾ ꓐꓰ ꓐꓯ ꓥꓳ ꓪ? ꓟꓽ ꓥ ꓠꓬ ꓣꓳ ꓚꓲꓸ ꓛꓬ ꓡꓰ ꓢꓲꓺ ꓒ ꓐꓰ ꓒ ꓕꓲꓺ ꓗꓪ ꓔꓬ ꓢꓲ ꓢꓲꓺ ꓒ ꓮꓽ ꓟ ꓥ ꓟ ꓔꓯ ꓢꓷꓸ ꓡꓰ ꓠ ꓢꓯꓸ ꓕꓵꓼˍ ꓡ?

ꓝꓲ ꓓꓴ ꓒꓲ-ꓕꓱ ꓔꓯ ꓔꓯꓺ ꓢꓳ ꓢꓲ ꓣꓳ ꓐꓴ ꓥˍ ꓟꓲ ꓢꓲꓺ ꓒ ꓬꓰ-ꓢꓴ ꓔꓯ ꓮ ꓡꓲ ꓐꓰ ꓙꓵꓻ ꓔꓬ ꓟ ꓔꓯ ꓓꓵꓽ ꓙ ꓠꓬꓲ ꓠ ꓗꓹ ꓡꓳ= ꓬꓲ ꓠꓬ ꓢꓲꓺ ꓒ ꓬꓰ-ꓢꓴ ꓔꓯ ꓙꓲ-ꓢꓴ ꓥ ꓡꓳ ꓐꓰ ꓬꓲ ꓟꓷꓽ ꓠꓷꓹ ꓗꓪ ꓐꓰ ꓒꓳꓹ ꓖꓶ ꓐ ꓡˍ ꓥ ꓟꓲ ꓙꓲ-ꓢꓴ ꓐꓯ ꓟ ꓬꓲ ꓟꓸ ꓟꓲꓽ ꓔꓯ ꓬꓲ ꓓ ꓬꓲ ꓕꓲ ꓚꓱꓹ ꓓꓵꓽ ꓙ ꓔꓬ ꓡꓳ= ꓬꓲ ꓓꓵꓽ ꓙ ꓔ ꓟ ꓠꓬ ꓢꓲꓺ ꓒ ꓬꓰ-ꓢꓴ ꓠꓬ ꓠꓱꓸ ꓐꓯ ꓢꓴ ꓐꓯ ꓔꓬ ꓟ ꓕꓲ ꓡꓰꓹ ꓟꓯꓼ ꓜꓴ ꓒ ꓐꓲꓸꓼ꓾ ꓟꓲ ꓠꓯ ꓐꓳ ꓶ ꓵꓻ ꓖꓴ ꓟꓽ ꓓ ꓠꓺ ꓛꓲ ꓙꓳ ꓢꓲ꓾ ꓙꓵꓽ ꓪ ꓙꓳ ꓙꓳ ꓡꓰꓽ ꓪꓽ ꓠꓬꓲ ꓠꓬꓲ ꓡꓰꓽ ꓐꓰ ꓑ ꓫꓬ ꓐꓴ ꓔꓯ ꓙꓵꓽ ꓢꓴ ꓥ ꓡꓳ꓾ ꓐꓰ ꓓꓵꓽ ꓙ ꓔ ꓡꓳ=

ꓖꓳ ꓟ ꓪꓴꓸ ꓠꓬꓲ ꓟꓽ ꓓ ꓟꓽ ꓞꓽ ꓟꓽ ꓬꓰ꓾ ꓬꓲ ꓢꓲ ꓤ ꓐꓴ ꓙꓳꓺ ꓡꓰ ꓓꓴ ꓚꓱꓹ ꓔꓯ ꓟꓽ ꓣꓱꓽ꓾ ꓠꓵꓻ ꓠꓲꓹ ꓗꓪ ꓐꓰ ꓟꓲ ꓠꓯ ꓞꓳ ꓤ ꓮ ꓙꓵꓽ ꓠꓲꓹ ꓟ ꓔꓯ ꓐꓲ ꓜꓲꓼ ꓡꓰ ꓝꓲ ꓠꓹ ꓟ ꓐꓱ ꓶ ꓡ ꓞꓳ ꓖꓳ ꓓꓱꓽ ꓣꓴ ꓢꓲ ꓞꓳ ꓤ ꓐꓴ ꓐꓰ ꓕꓲ ꓪ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓬꓲ ꓤꓶꓻ ꓔꓯ ꓞꓳ ꓙꓳ ꓔꓬ ꓟ ꓬꓰ-ꓢꓴ ꓙꓲ-ꓢꓴ ꓔꓯ ꓘꓳꓹ ꓣꓴ ꓟꓽ ꓐ ꓡ ꓗꓷ ꓡꓰꓳ=

ꓣꓳ ꓐꓴ ꓤꓶꓻ ꓠꓬ ꓕꓲ ꓑꓹ ꓤ ꓙꓳ ꓜꓽ ꓠꓹ ꓟ ꓐꓱ ꓶ ꓟꓲ ꓠꓯ ꓕꓱ ꓟ ꓗꓪ ꓢꓯꓸ ꓔꓬ ꓟ ꓟꓽ ꓥ= ꓕꓲ ꓞꓲꓼ ꓕꓲ ꓑ ꓟ ꓢꓯꓼ ꓟꓬ ꓟꓶ ꓠꓹ ꓟ ꓐꓱ ꓶ ꓥ ꓡꓳ= ꓖꓳ ꓟ ꓑꓶꓸ ꓓꓴ ꓢꓲꓺ ꓒ ꓬꓰ-ꓢꓴ ꓬꓲ ꓤꓶꓻ ꓐꓰ ꓣꓳ ꓐꓴ ꓔꓯ ꓟꓸ ꓖꓶ ꓔꓬ ꓟ ꓕꓲ ꓡꓰꓹ ꓫꓸ ꓙꓵ ꓓꓴ ꓐꓰ ꓫꓵꓻ ꓟ ꓔꓯ ꓗꓳꓸ ꓙꓰ ꓕꓯ ꓢꓲꓺ ꓒ ꓐꓰ ꓕꓲ ꓪ ꓢꓯꓸ ꓬꓲꓼ ꓡ ꓢꓲ ꓢꓲꓺ ꓡꓲ ꓗꓹ ꓛꓲꓽ ꓢꓲ ꓠꓬꓲ ꓠꓵꓻ ꓠꓲꓹ ꓐꓲ ꓞꓹ ꓟ ꓟꓴꓽ ꓗꓪ ꓗꓴꓷꓼ ꓗꓪ ꓣꓳ ꓐꓴ ꓔꓬꓹ ꓪ ꓠꓹ ꓟ ꓥ ꓡꓳ=

ꓖꓳ ꓟ ꓪꓴꓸ ꓠꓬꓲ ꓢꓲꓺ ꓒ ꓡꓰ ꓠꓺ ꓠꓬꓲˍ ꓟ ꓠꓺ ꓠꓬꓲ ꓘꓶꓽ ꓔꓯ ꓣꓳ ꓐꓴ ꓕꓲ ꓣꓳ ꓡꓰ ꓕꓲ ꓣꓳ ꓚꓲꓸ ꓛꓬ ꓞꓳ ꓙꓳ ꓔꓬ ꓟ ꓚꓱꓹ ꓗꓪ ꓐꓰ ꓬꓰ-ꓢꓴ ꓡꓰ ꓠꓺ ꓠꓬꓲ ꓔꓬ ꓟ ꓔꓯ ꓒꓳꓹ ꓖꓶ ꓙꓰ ꓡꓯ= ꓔꓱꓹ ꓚꓵˍ ꓟ ꓚꓱꓹ ꓗꓪ ꓙ ꓫꓱꓽ ꓙꓰ ꓡꓯ=