ꓪꓴ-ꓢ ꓗꓴꓷꓼ ꓗꓪ ꓮꓽ ꓟ ꓪꓴ:ˍ ꓟ

ꓕꓲ ꓠꓬꓲ ꓙꓳˍ ꓕꓯ ꓢꓲ ꓒ ꓬꓰ-ꓢꓴ ꓬꓲ ꓝꓲ ꓓꓴ ꓐꓴ ꓠꓬ ꓢꓲ ꓒ ꓬꓰ-ꓢꓴ ꓔꓯ ꓕꓱ ꓡꓱ ꓠ ꓠꓬꓲˍ ꓡꓳ= ꓟꓴ ꓗꓪ ꓗꓴꓷꓼ ꓗꓪ ꓠꓬ ꓪꓴꓽ ꓓꓰ ꓡꓰˍ ꓟ ꓮꓽ ꓟ ꓥ ꓡ꓾ ꓐꓰ ꓠ ꓠꓬꓲˍ ꓡꓳ= ꓟꓲ ꓠꓯ ꓞꓳ ꓤ ꓐꓯ ꓟ ꓠꓬ ꓢꓴ ꓕꓯ ꓢꓲ ꓪꓴꓽˍ ꓟ꓾ ꓢꓴ ꓕꓯ ꓢꓲ ꓓꓹ ꓐꓰ ꓐꓯ ꓠꓬ ꓮ ꓡꓲ ꓗꓪˍ ꓟꓲ ꓢꓴ ꓕꓯꓽ ꓢꓲ ꓗꓪ ꓔꓬ ꓠꓲꓹ ꓫꓵˍ ꓡꓳ= ꓢꓲ ꓒ ꓬꓰ-ꓢꓴ ꓬꓲ ꓝꓲ ꓓꓴ ꓐꓴ ꓥˍ ꓟꓲ ꓟꓲ ꓠꓯ ꓗꓪ ꓡꓰꓽ ꓟꓽ ꓞꓲꓺ ꓟꓴꓽ ꓗꓪ ꓗꓴꓷꓼ ꓗꓪ ꓡꓰꓸ ꓮꓽ ꓟ ꓪꓴꓽˍ ꓡ꓾ ꓮꓽ ꓟ ꓪꓽ ꓠꓬꓲˍ ꓡ꓾ ꓐꓰ ꓢꓲ ꓒ ꓬꓰ-ꓢꓴ ꓔꓯ ꓠ ꓠꓬꓲˍ ꓡꓳ= 

ꓢꓲꓺ ꓒ ꓬꓰ-ꓢꓴ ꓡꓰ ꓮ ꓡꓰ ꓒꓳꓹ ꓖꓶˍ ꓐꓯ ꓠꓬ ꓤ ꓠꓱ ꓤ ꓕꓲ ꓣꓳ ꓘꓴ ꓔꓯꓹ ꓡ ꓢꓲ ꓠꓴ ꓪ ꓠꓬ ꓤ ꓠꓱ ꓤ ꓕꓱ ꓕꓲ ꓣꓳˍ ꓡꓰ ꓐꓰ ꓠꓲꓹ ꓟ ꓟꓽ ꓡꓶꓸ ꓠꓬ ꓠꓲꓹ ꓟ ꓟꓽ ꓒꓳꓹ ꓬꓲꓼ ꓡ ꓠꓬ ꓟꓴ ꓗꓪ ꓗꓴꓷꓼ ꓗꓪ ꓓꓯ ꓙꓰ ꓟꓽ ꓓ꓾ ꓐꓰ ꓟꓸ ꓖꓶˍ ꓡꓳ= ꓮ ꓫꓵꓽ ꓪꓴꓸ ꓠꓬꓲ ꓥ ꓡ= ꓝꓲ ꓓꓴ ꓐꓴ ꓠ ꓠꓬꓲˍ ꓟ ꓠꓬ ꓟꓴꓽ ꓗꓪ ꓗꓴꓷꓼ ꓗꓪ ꓮꓽ ꓟ ꓪꓴꓽˍ ꓡ ꓐꓰ ꓠ ꓠꓬꓲˍ ꓡꓳ= ꓢꓲꓺ ꓒ ꓬꓰ-ꓢꓴ ꓠꓬ ꓮ ꓫꓵꓽ ꓑꓶꓸ ꓓꓴ ꓤ ꓠꓱ ꓤ ꓔꓯ ꓔꓯꓺ ꓢꓲ ꓠꓬꓲ ꓤ ꓠꓱ ꓤˍ ꓡꓰ ꓐꓰ ꓠꓲꓹ ꓟ ꓟꓽ ꓥ ꓠꓬ ꓟꓴꓽ ꓗꓪ ꓗꓴꓷꓼ ꓗꓪ ꓓꓵꓽ ꓙꓰ ꓟꓽ ꓓ ꓐꓰ ꓐꓯ ꓡ= 

ꓤ ꓠꓱ ꓤ ꓐꓴ ꓠꓬ ꓬꓲ ꓪ ꓤꓶꓻ ꓗꓪ ꓤ ꓠꓱ ꓤ ꓗꓪ ꓮꓽ ꓐ ꓮ ꓟ ꓚꓳꓸ ꓗꓳꓸ ꓙꓰ ꓠꓬ ꓠꓱꓸ ꓐꓯ ꓟꓽ ꓙꓳ= ꓬꓲ ꓪ ꓠꓬ ꓮꓽ ꓐ ꓮ ꓟ ꓔꓯ ꓙꓵˍ ꓡꓳ= ꓟꓽ ꓪ ꓜꓽ ꓟꓽ ꓪ ꓓꓳ ꓟ ꓔꓯ ꓓꓵꓽ ꓙ ꓟꓽ ꓫ= ꓟꓽ ꓪ ꓖꓪꓽ ꓟꓽ ꓪ ꓡꓱ ꓟ ꓓꓵꓽ ꓙ ꓟꓽ ꓫ= ꓮ ꓙꓵꓽ ꓠꓬ ꓮꓽ ꓐ ꓮ ꓟ ꓡꓰ ꓬꓰ ꓖꓶˍ ꓡꓳ꓾ ꓐꓰ ꓙꓵˍ ꓡꓳ= ꓗꓹ ꓛꓲꓽ ꓛꓲꓽ ꓡꓰꓽ ꓔꓬ ꓡꓳ= ꓤ ꓠꓱ ꓕꓲ ꓣꓳ ꓠꓲꓹ ꓟ ꓟꓯˍ ꓐꓯ ꓟ ꓠꓬ ꓮ ꓫꓵꓽ ꓔꓯ ꓐꓯ ꓡ= ꓗꓹ ꓛꓲꓽ ꓗꓴˍ ꓟ꓾ ꓠꓲꓹ ꓠꓵꓻ ꓗꓴˍ ꓟ꓾ ꓠꓲꓹ ꓟ ꓙꓬ ꓟꓽ ꓗꓴꓸ ꓟ꓾ ꓠꓲꓹ ꓟ ꓫ ꓟꓽ ꓗꓴꓸ ꓟ ꓔꓯ ꓐꓯ ꓡꓳ= 

ꓢꓲ ꓒ ꓬꓰ-ꓢꓴ ꓐꓯ ꓠꓲꓹ ꓫꓵˍ ꓟ ꓠꓬ ꓠꓴ ꓠꓬ ꓠꓴ ꓮꓽ ꓐ꓾ ꓟꓴꓽ ꓗꓪ ꓗꓴꓷꓼ ꓗꓪ ꓔꓬ ꓟ ꓮ ꓐ ꓠꓬ ꓠꓴ ꓔꓯ ꓮ ꓕꓯˍ ꓟꓲ ꓠꓲꓹ ꓠꓵ ꓔꓬ ꓡꓳ= ꓠꓴ ꓔꓯ ꓠꓬꓲ ꓡꓳꓸ ꓗꓪꓼ ꓫꓵꓼ ꓔꓬ ꓡꓳ= ꓠꓴ ꓔꓯ ꓙ ꓖꓴ ꓧꓳꓽ ꓟꓳꓸ ꓖꓶ ꓔꓬ ꓡꓳ= ꓖꓳ ꓡꓱ ꓠꓬꓲ ꓠꓴ ꓞꓲꓸ ꓟꓽ ꓛꓵ= ꓗꓹ ꓛꓲꓽ ꓛꓲꓽ ꓡꓰꓽ ꓔꓬ꓾ ꓐꓰ ꓐꓯ ꓟ ꓥ ꓡꓳ= ꓕꓱ ꓟ ꓡꓰꓽ ꓟꓽ ꓞꓲꓺ ꓬꓲ ꓡꓰ ꓐꓯ ꓟ ꓠꓬ ꓠꓴ ꓪ ꓠꓬ ꓤ ꓠꓱ ꓤ ꓕꓲ ꓣꓳˍ ꓡꓰ ꓐꓰ ꓠꓲꓹ ꓟ ꓟꓯꓻ ꓠꓹ ꓟ꓾ ꓤ ꓠꓱ ꓤ ꓕꓲ ꓣꓳˍ ꓡꓰ ꓐꓰ ꓒꓳꓹ ꓬꓲꓼ ꓡ ꓠꓹ ꓟ ꓬꓲ ꓡꓰ ꓐꓯ ꓟ ꓥ ꓡꓳ= 

ꓖꓳ ꓡꓱ ꓠꓬꓲ ꓣꓳ ꓟꓲ ꓠꓯ ꓕꓱ ꓟ ꓗꓪ ꓪꓴꓽ ꓠꓲꓹ ꓫꓵ꓾ ꓢꓴ ꓕꓯꓽ ꓢꓲ ꓓꓻ ꓠꓹ ꓫꓵˍ ꓕꓯ ꓢꓲ ꓒ ꓬꓰ-ꓢꓴ ꓡꓰ ꓬꓲ ꓚꓱꓹ ꓟꓳꓸ ꓖꓶ ꓡ ꓟ ꓠꓬ ꓤ ꓠꓱ ꓤ ꓕꓲ ꓣꓳˍ ꓡꓰ ꓐꓰ ꓒꓳꓹ ꓡꓰꓼ ꓡꓯ= ꓖꓳ ꓡꓱ ꓠꓬꓲ ꓢꓲ ꓒ ꓬꓰ-ꓢꓴ ꓡꓰ ꓝꓮꓲ ꓡꓯꓼ ꓫꓵ ꓐꓯ ꓟ ꓠꓬ ꓠꓴ ꓪ ꓗꓪ ꓟ ꓮꓽ ꓟˍ ꓟꓲ ꓪꓴꓽ ꓠꓲꓹ ꓫꓵˍ ꓠꓬ ꓮ ꓙꓵꓽ ꓟ ꓚꓳꓻ ꓑ ꓬꓰ ꓠꓯꓹ ꓡꓳ꓾ ꓐꓰ ꓬꓲ ꓡꓰ ꓐꓯ ꓟꓳꓸ ꓖꓶ ꓔ ꓡꓳ= ꓖꓳ ꓡꓱ ꓠꓬꓲ ꓣꓳ ꓠꓬ ꓢꓴ ꓕꓯꓽ ꓢꓲ ꓪꓴꓽ ꓠꓲꓹ ꓫꓵˍ ꓡ= ꓢꓴ ꓕꓯꓽ ꓢꓲ ꓓꓻ ꓠꓲꓹ ꓫꓵˍ ꓡ= ꓢꓴ ꓕꓯꓽ ꓢꓲ ꓪ ꓜꓲ ꓙꓵꓽ ꓪ ꓙꓳ ꓠꓲꓹ ꓫꓵˍ ꓡ= ꓕꓱ ꓡꓰ ꓬꓰ ꓠꓲꓹ ꓫꓵˍ ꓠꓬ ꓢꓲꓺ ꓒ ꓬꓰ-ꓢꓴ ꓐꓯ ꓟ ꓠꓬ ꓠꓱꓸ ꓐꓯ ꓢꓴ ꓔꓯ ꓬꓰ ꓙ= ꓕꓱ ꓟ ꓠꓬ ꓢꓲ ꓒ ꓬꓰ-ꓢꓴ ꓬꓲ ꓚꓱꓹ ꓥ ꓡꓳ=

ꓖꓳ ꓡꓱ ꓠꓬꓲ ꓣꓳ ꓟꓲ ꓠꓯ ꓕꓱ ꓟ ꓗꓪ ꓛꓳ ꓫꓱꓽ ꓔꓬ ꓕꓯ ꓪꓴ-ꓢ ꓐꓯ ꓘꓶꓽ ꓔꓯ ꓠ ꓠꓹ ꓕꓯ ꓢꓴ ꓕꓯꓽ ꓢꓲ ꓪꓴꓽ ꓠꓲꓹ ꓫꓵ꓾ ꓢꓴ ꓕꓯꓽ ꓢꓲ ꓓꓻ ꓠꓲꓹ ꓫꓵˍ ꓠꓬ ꓢꓲ ꓒ ꓬꓰ-ꓢꓴ ꓐꓯ ꓘꓶꓽ ꓔꓯ ꓠ ꓠꓹ ꓠ ꓗˍ ꓡꓳ= ꓢꓲ ꓒ ꓬꓰ-ꓢꓴ ꓠꓬ ꓣꓱꓽ ꓛꓰꓽ ꓖꓶ ꓢꓴ ꓥ ꓡꓳ= ꓢꓲ ꓒ ꓬꓰ-ꓢꓴ ꓠꓬ ꓡꓯꓼ ꓫꓴ ꓖꓶ ꓢꓴ ꓥ ꓡꓳ= ꓢꓲ ꓒ ꓬꓰ-ꓢꓴ ꓗꓪ ꓐꓰ ꓟꓽ ꓥ ꓠꓬ ꓣꓳ ꓠꓬ ꓮ ꓫꓵꓽ ꓟꓲ ꓪ ꓟꓽ ꓓ= ꓖꓳ ꓡꓱ ꓠꓬꓲ ꓣꓳ ꓠꓬ ꓢꓲ ꓒ ꓬꓰ-ꓢꓴ ꓐꓯ ꓟ ꓡꓰ ꓢꓴ ꓔꓯ ꓠꓲꓹ ꓠꓵˍ ꓕꓯ꓾ ꓢꓴ ꓔꓯ ꓬꓰ ꓙˍ ꓕꓯ꓾ ꓢꓴ ꓔꓯ ꓠꓬꓲꓺ ꓡꓳꓸ ꓗꓪꓼ ꓫꓵꓼˍ ꓕꓯ ꓣꓳ ꓠꓬ ꓶꓼ ꓙꓳ ꓫꓱꓹ ꓙꓳˍ ꓟ ꓡꓰꓽ ꓟꓽ ꓞꓲꓺ ꓣꓱꓽ ꓛꓰꓽ ꓮ  ꓟꓬꓹ ꓟꓶˍ ꓥꓳ꓾ ꓐꓰ ꓐꓯ ꓡꓳ=

ꓖꓳ ꓡꓱ ꓠꓬꓲ ꓣꓳ ꓟꓲ ꓠꓯ ꓕꓱ ꓟ ꓗꓪ ꓢꓯꓸ ꓔꓬ ꓕꓯ ꓐ ꓡ ꓕ ꓑꓳꓸꓼ ꓮ ꓡꓰ ꓬꓰ ꓙ ꓐ ꓡˍ ꓡ= ꓮ ꓡꓰ ꓠꓬꓲꓺ ꓡꓳꓸ ꓐ ꓡˍ ꓡ= ꓣꓳ ꓚꓲ ꓛꓬ ꓐꓱ ꓶ ꓣꓳ ꓦꓲꓻ ꓐꓱ ꓶˍ ꓡꓰꓽ ꓟꓽ ꓞꓲꓺ ꓣꓳ ꓠꓶꓽ ꓛꓳ ꓕꓲ ꓛꓳ ꓔꓯ ꓮ ꓡꓰ ꓐꓰ ꓬꓰ ꓖꓶ ꓐ ꓡˍ ꓡ= ꓕꓱ ꓟ ꓡꓰꓽ ꓟꓽ ꓞꓲꓺ ꓤ ꓠꓱ ꓤ ꓕꓲ ꓣꓳˍ ꓡꓰ ꓐꓰ ꓐꓹ ꓐ ꓪꓴ-ꓢ ꓔꓯ ꓠꓲꓹ ꓠꓵ ꓔꓬ ꓡ= ꓙꓳꓺ ꓒꓵꓽ ꓔꓬ ꓡ= ꓙꓵꓻ ꓔꓬ ꓡ꓾ ꓐꓯ ꓟ ꓔꓯ ꓓꓵꓽ ꓙ ꓠꓬꓲ ꓓꓴ ꓥ ꓡꓳ= ꓖꓳ ꓡꓱ ꓠꓬꓲ ꓠꓬꓲꓸ ꓠꓬꓲ ꓟ ꓦꓬꓼ ꓠꓬꓲ ꓗꓪ ꓣꓳ ꓠꓲꓹ ꓟ ꓔꓯ ꓡꓬꓽ ꓡꓬꓽ ꓡꓰꓽ ꓗꓷ ꓔ ꓢꓲ ꓤ ꓠꓱ ꓤ ꓕꓲ ꓣꓳˍ ꓡꓰ ꓐꓰ ꓠꓲꓹ ꓟ ꓟꓯꓻ ꓠꓹ ꓟ꓾ ꓪꓴ-ꓢ ꓔꓯ ꓙꓵꓻ ꓠꓹ ꓟ꓾ ꓪꓴ-ꓢ ꓠꓬ ꓣꓳ ꓔꓯ ꓠꓬꓲꓺ ꓡꓳꓸ ꓗꓪ ꓫꓵꓼ ꓔꓬ ꓡꓳ ꓐꓯ ꓟ ꓔꓯ ꓙꓵꓻ ꓢꓲ ꓠꓬꓲ ꓗꓹ ꓛꓲꓽ ꓛꓲꓽ ꓡꓰꓽ ꓛꓳ ꓙꓳ ꓐ ꓡ ꓠꓹ ꓟ ꓣꓱꓽ ꓞꓹ ꓟ ꓣꓱꓽ ꓛꓰꓼ ꓓꓰꓽ ꓡꓯ ꓐꓰ ꓐꓯ ꓖꓶ ꓠꓲꓹ ꓫꓵˍ ꓡꓳ=