ꓪꓴ-ꓢ ꓚꓱꓹ ꓐꓰ ꓟꓲ ꓠꓯ ꓞꓳ ꓤ ꓚꓱꓹ

ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓠꓬꓲꓸ ꓠꓬꓲ ꓣꓳ ꓓꓵꓽ ꓙ ꓓꓴ ꓠꓬ ꓪꓴ-ꓢ ꓚꓱꓹ ꓐꓰ ꓟꓲ ꓠꓯ ꓞꓳ ꓤ ꓚꓱꓹ ꓮ ꓡꓰ ꓐꓰ ꓟꓽ ꓫꓱꓸ ꓡꓯ ꓘꓳ ꓟ ꓔꓯ ꓡꓳꓸ ꓠꓬꓲ ꓢꓲ ꓠꓬꓲ ꓦ ꓢꓯꓼ ꓪ ꓣꓴ ꓓꓴ ꓬꓰ ꓡꓯ= ꓟꓲ ꓠꓯ ꓕꓱ ꓟ ꓗꓪ ꓠꓬ ꓟꓬꓱꓽ ꓕꓲ ꓫꓵ ꓫꓵ ꓬꓰ_ ꓗꓪ ꓥ ꓟꓲ ꓮ ꓡꓰ ꓫꓵ ꓗꓪ ꓥ ꓟꓲ ꓓ_ ꓟ ꓡ ꓞꓳ ꓪꓽ ꓠꓬꓲ_ ꓟ ꓡ ꓞꓳ ꓢꓷꓸ ꓠꓲꓹ ꓙꓳ_ ꓟ ꓡ ꓞꓳ ꓔꓯ ꓡꓰ ꓢꓲ_ ꓡꓳ= ꓚꓲꓸ ꓛꓬ ꓟꓬꓱꓽ ꓬꓰ ꓗꓪ ꓓ_ ꓫꓵ꓾ ꓢꓷꓸ ꓠꓲꓹ ꓢꓷꓸ ꓫꓵ꓾ ꓕꓲ ꓫꓵ ꓡ ꓞꓳ ꓔꓯ ꓡꓰ ꓣꓳ ꓠꓬ ꓢꓲ ꓠꓲꓹ ꓫꓵ_ ꓡꓳ= ꓖꓳ ꓡꓱ ꓐꓯ ꓥ ꓟꓲ ꓪꓴ-ꓢ ꓠꓬ ꓕꓱ ꓡꓱ ꓟꓽ ꓥ꓾ ꓪꓴ-ꓢ ꓠꓬ ꓣꓳ ꓗꓳꓸ ꓡꓳ ꓗꓪ ꓮ ꓡꓰ ꓕꓲ ꓣꓳ ꓟ ꓢꓯꓼ ꓐ_ ꓡ? ꓮ ꓡꓰ ꓕꓲ ꓣꓳ ꓟ ꓪ ꓙꓲ ꓢꓯꓼ ꓐ_ ꓡ? ꓖꓳ ꓟ ꓔꓯ ꓡꓳꓸ ꓠꓬꓲ ꓢꓲ ꓬꓲ ꓠꓬ ꓢꓲ_ ꓡꓳ= ꓢꓯꓼ ꓙꓳ ꓢꓴ ꓔꓯ ꓟꓽ ꓢꓲ ꓢꓲ꓾ ꓢꓯꓼ ꓐ ꓢꓴ ꓔꓯ ꓢꓲ_ ꓡꓳ= ꓕꓱ ꓟ ꓠꓬ ꓪꓴ-ꓢ ꓚꓱꓹ ꓥ ꓡꓳ= ꓣꓳ ꓐꓱ ꓶ ꓓꓵꓽ ꓙ ꓟꓶ ꓓꓴ ꓥ ꓡꓳ= ꓖꓳ ꓡꓱ ꓠꓬꓲ ꓙꓵ ꓗ ꓐꓯ ꓟꓸ ꓕꓳ ꓶ 7ꓽ 7 ꓗꓪ ꓮ ꓡꓰ ꓐꓰ ꓑ ꓙ ꓐꓯ ꓠꓬ ꓪꓴ-ꓢ ꓡꓰ ꓠꓴ ꓪ ꓔꓯ ꓠꓲꓹ ꓠꓵ ꓢꓲ꓾ ꓬꓲ ꓑ ꓫꓬ ꓬꓰ ꓠꓹ ꓟ ꓢꓲ ꓓꓳ ꓡ_ ꓟ ꓕꓱ ꓟ ꓠꓬ꓾ ꓠꓴ ꓪ ꓠꓽ ꓠꓱꓸ ꓐꓯꓼ ꓞꓳ ꓫꓵꓽ ꓕꓯ ꓢꓲ ꓟꓬꓽ_ ꓠꓬꓲ ꓟꓽ ꓥ= ꓠꓴ ꓪ ꓠꓽ ꓠꓱꓸ ꓐꓯꓼ ꓢꓴ ꓢꓶꓸ ꓟꓽ ꓞꓲ ꓠꓲꓸ_ ꓟ ꓞꓳ ꓫꓵꓽ ꓥ ꓟ ꓑꓶ ꓓꓴ ꓥ ꓡꓳ ꓐꓰ ꓣꓳ ꓵ ꓪ_ ꓡꓳ=

ꓬꓲ-ꓢꓷ-ꓡꓲ ꓡ ꓞꓳ ꓐꓴ ꓔꓯ ꓪꓴ-ꓢ ꓡꓰ ꓬꓲ ꓞꓳ ꓤ ꓢꓲ ꓢꓲ ꓠꓬꓲ ꓬꓲ ꓪ ꓔꓯ ꓠꓲꓹ ꓠꓵ ꓐꓯ ꓟ ꓠꓬ ꓬꓲꓸ ꓪ ꓠꓬ ꓠꓱꓸ ꓐꓯꓼ ꓕꓯ ꓢꓲ ꓢꓯꓼ ꓙꓳ ꓟ꓾ ꓠꓱꓸ ꓐꓯꓼ ꓕꓯ ꓢꓲ ꓟꓬ_ ꓟ꓾ ꓞꓳ ꓤ ꓟꓬ_ ꓟ ꓑꓶ ꓓꓴ ꓟꓽ ꓥ꓾ ꓮ ꓫꓵ ꓑꓶ ꓓꓴ ꓐꓯ ꓠꓬ ꓡ ꓞꓳ ꓮ ꓘꓶꓸ ꓠꓬꓲꓸ ꓟ ꓑꓶ ꓓꓴ ꓥ ꓡꓳ꓾ ꓢꓯꓼ ꓐ_ ꓟ ꓑꓶ ꓓꓴ ꓥ ꓡꓳ꓾ ꓐꓰ ꓐꓯ_ ꓡꓳ= ꓕꓱ ꓟ ꓠꓬ ꓪꓴ-ꓢ ꓬꓲ ꓠꓲꓹ ꓡꓶꓽ ꓥ ꓡꓳ= ꓪꓴ-ꓢ ꓠꓵ ꓠꓲꓹ ꓥ ꓡꓳ= ꓦꓲꓻ ꓕꓲ ꓦꓲꓻ ꓘꓴꓽ ꓗꓪ ꓮꓸ ꓝꓲ ꓠꓬꓲ ꓤ ꓕꓱ ꓡꓱ ꓐꓰ ꓙꓳ ꓕꓯ ꓢꓯꓼ ꓪ ꓙꓲ ꓐ_ ꓟ꓾ ꓮ ꓘꓶꓸ ꓠꓻ ꓓꓴ ꓙꓳ_ ꓟ꓾ ꓠꓬꓲ ꓤ ꓔꓯ ꓠꓬ ꓮꓽ ꓐ ꓮ ꓟ ꓪ ꓙꓲ ꓠꓲꓹ ꓠꓵ_ ꓡꓳ= ꓮ ꓫꓵ ꓑꓶ ꓓꓴ ꓥ ꓡ? ꓢꓯꓼ ꓐ_ ꓟ꓾ ꓠꓻ ꓚꓵ_ ꓟ ꓖꓳ ꓕꓲ ꓣꓳ ꓠꓬ ꓮꓽ ꓐ ꓮ ꓟ ꓠꓵ ꓠꓲꓹ ꓪ ꓙꓲ ꓪ_ ꓡꓳ= ꓬꓲ ꓠꓬ ꓠꓱꓸ ꓐꓯꓼ ꓢꓴ ꓟꓽ ꓞꓲ ꓠꓵ ꓠꓲꓹ ꓣꓱ ꓞꓹ ꓡꓳ= ꓠꓵ ꓠꓲꓹ ꓐꓰ ꓣꓳ ꓐꓯ ꓕꓯ ꓠꓵ ꓠꓲꓹ ꓬꓲꓸ ꓚꓱꓹ ꓠꓬ ꓕꓱ ꓡꓱ ꓥꓳ=

ꓠꓬꓲꓸ ꓠꓬꓲ ꓣꓳ ꓵ ꓪ ꓟ ꓢꓲ ꓫꓬ ꓕꓳ ꓶ ꓗꓪ ꓥ ꓟꓲ ꓟ-ꓕꓲ ꓕꓳ ꓶ 11ꓽ 25-27 ꓗꓪ ꓥ ꓟꓲ ꓢꓲ ꓒ ꓬꓰ-ꓢꓴ ꓠꓬ ꓕꓱ ꓡꓱ ꓐꓯ ꓔ ꓡꓳ= ꓟꓴ ꓗꓪ ꓗꓪ ꓔꓬ ꓟ ꓐꓹ ꓐꓽꓳ꓾ ꓠꓴ ꓠꓬ ꓢꓷꓸ ꓠꓲꓹ ꓙꓳ ꓢꓴ꓾ ꓙ ꓜꓲꓼ ꓗꓴꓸ ꓢꓴ ꓔꓯ ꓕꓱ ꓟꓬ ꓫꓵꓽ ꓟ ꓚꓵ ꓔ ꓢꓲ ꓤ ꓠꓱ ꓤ ꓐꓴ ꓔꓯ ꓟꓳꓸ ꓖꓶ_ ꓟ ꓑꓶ ꓓꓴ ꓫꓸ ꓟꓳ꓾ ꓐꓰ ꓢꓲ ꓒ ꓬꓰ-ꓢꓴ ꓠꓬ ꓐꓹ ꓐ ꓔꓯ ꓫꓸ ꓟꓳ ꓟ ꓟꓸ ꓟꓲꓽ ꓥ ꓡꓳ= ꓟꓴ ꓗꓪ ꓗꓴꓷꓼ ꓚꓵꓹ ꓖꓶ꓾ ꓡꓯꓼ ꓪ ꓕꓱ ꓟ ꓔꓯ ꓢꓷꓸ ꓠꓲꓹ ꓙꓳ ꓢꓴ꓾ ꓢꓯꓼ ꓪ ꓙꓳ ꓢꓴ ꓔꓯ ꓟꓽ ꓟꓳꓸ ꓖꓶ ꓖꓶ ꓐꓰ ꓮ ꓫꓵ ꓟꓽ ꓢꓷꓸ ꓟ꓾ ꓮ ꓫꓵ ꓬꓰ ꓟꓽ ꓗꓴꓸ ꓟ꓾ ꓮ ꓫꓵ ꓓꓵꓽ ꓙ ꓟꓽ ꓗꓴꓸ ꓟ꓾ ꓤ ꓠꓱ ꓤ ꓐꓴ ꓕꓲ ꓚꓱꓹ ꓐꓯ ꓠꓬ ꓬꓲꓸ ꓝꓲ ꓓꓴ ꓐꓴ ꓔꓯ ꓟꓳꓸ ꓖꓶ_ ꓟ ꓑꓶ ꓓꓴ ꓢꓲ ꓒ ꓬꓰ-ꓢꓴ ꓢꓲ ꓖꓶ_ ꓟ ꓥ ꓡꓳ= ꓬꓲꓸ ꓝꓲ ꓓꓴ ꓐꓴ ꓠꓬ ꓮ ꓫꓵ ꓕꓳ ꓶ ꓢꓷꓸ ꓢꓲ ꓟꓽ ꓙꓳ꓾ ꓢꓷꓸ ꓠꓲꓹ ꓢꓷꓸ ꓢꓲ ꓟꓽ ꓙꓳ꓾ ꓞꓳ ꓤ ꓟꓲ ꓙꓬ ꓗꓪ ꓥ ꓟꓲ ꓟꓬꓱꓺ ꓓꓳꓽ ꓙꓳ ꓢꓴ ꓟꓽ ꓥ꓾ ꓬꓲꓸ ꓪ ꓖꓳ ꓗꓪ ꓟ ꓕꓲ ꓣꓳ ꓟꓲ ꓘꓹ ꓞꓳ ꓪꓴꓽ ꓬꓰ ꓔꓬ ꓢꓲ ꓟꓽ ꓙꓳ꓾ ꓮ ꓙꓵ ꓠꓬ ꓞꓳ ꓫ ꓤ ꓐꓰ ꓥ ꓡꓳ= ꓖꓳ ꓡꓱ ꓠꓬꓲ ꓟꓴ ꓗꓪ ꓗꓴꓷꓼ ꓚꓵ ꓖꓶ ꓔꓯ ꓬꓲ ꓪ ꓔꓯ ꓟꓳꓸ ꓖꓶ_ ꓟ ꓠꓬ ꓓꓵꓽ ꓙ ꓟꓶ ꓓꓴ ꓥ ꓡꓳ= ꓕꓱ ꓟ ꓠꓬ ꓪꓴ-ꓢ ꓠꓲꓹ ꓡꓶꓽ ꓥ ꓡꓳ= ꓮ ꓫꓵ ꓑꓶ ꓓꓴ ꓪꓴ-ꓢ ꓠꓬ ꓢꓯꓼ ꓐ_ ꓟ꓾ ꓢꓯꓼ ꓟꓽ ꓙꓳ ꓟ ꓔꓯ ꓢꓲ ꓢꓲ ꓠꓬꓲ ꓬꓲꓸ ꓟꓬꓱꓺ ꓓꓳ ꓓꓳ ꓡ ꓠꓹ ꓟ ꓬꓰ_ ꓡ? ꓢꓯꓼ ꓟꓽ ꓙꓳ ꓢꓴ꓾ ꓚꓲꓸ ꓛꓬ ꓔꓱ ꓚꓲ ꓛꓬ ꓙ ꓣꓳꓽ ꓢꓴ ꓠꓬ ꓬꓲ ꓢꓯꓼ ꓪ ꓠꓬ ꓪꓴ-ꓢ ꓔꓬ ꓖꓴ ꓡꓰ ꓓ_ ꓟ ꓑꓶ ꓓꓴ ꓥ ꓡꓳ= ꓥꓪ ꓠꓬ ꓮ ꓫꓵ ꓬꓰ ꓟꓽ ꓐ ꓡ꓾ ꓥꓪ ꓠꓬ ꓮ ꓫꓵ ꓬꓰ ꓟꓽ ꓒꓵ꓾ ꓖꓳ ꓡꓱ ꓠꓬꓲ ꓪꓴ-ꓢ ꓥꓪ ꓔꓯ ꓢꓲ ꓔ ꓟ ꓑꓶ ꓓꓴ ꓪꓴ-ꓢ ꓢꓯꓼ ꓪ ꓗꓪ ꓐꓰ ꓥꓪ ꓙꓰ ꓘꓴ_ ꓡꓳ꓾ ꓐꓰ ꓐꓯ ꓢꓲ ꓮ ꓫꓵ ꓥ ꓟꓲ ꓪꓴ-ꓢ ꓟꓬꓱꓺ ꓗꓪ ꓐꓰ ꓬꓰ ꓬꓰ_ ꓟ ꓑꓶ ꓓꓴ ꓪꓴ-ꓢ ꓟꓬꓱꓺ ꓓꓳ ꓪ ꓙꓲ ꓓꓳ_ ꓡꓳ= ꓢꓯꓼ ꓙꓳ ꓪ ꓠꓬꓲ ꓢꓴ꓾ ꓢꓷꓸ ꓠꓲꓹ ꓙꓳ ꓢꓴ꓾ ꓪꓴ-ꓢ ꓟꓬꓱꓽ ꓬꓰ_ ꓟ ꓢꓷꓸ ꓟꓽ ꓞꓲ ꓢꓯꓼ ꓐ ꓢꓲ ꓠꓬꓲ ꓪꓴ-ꓢ ꓢꓯꓼ ꓪ ꓗꓪ ꓐꓰ ꓬꓰ_ ꓟ ꓖꓳ ꓕꓲ ꓣꓳ ꓠꓬ ꓪ ꓙꓲ ꓪꓴ-ꓢ ꓟꓬꓱꓺ ꓓꓳ ꓓꓳ ꓐ ꓡ ꓡꓳ= ꓮ ꓫꓵ ꓑꓶ ꓓꓴ ꓥ ꓡ? ꓬꓲ ꓚꓲꓸ ꓛꓬ ꓠꓬ ꓟꓽ ꓐꓲ ꓜꓲꓼ꓾ ꓚꓲ ꓛꓬ ꓠꓬ ꓮ ꓟꓬꓹ ꓝꓴꓲ ꓙꓳ ꓥ ꓟꓲ ꓪꓴ-ꓢ ꓔꓯ ꓠꓵ_ ꓟ ꓬꓲꓸ ꓠꓵ ꓠꓲꓹ꓾ ꓪꓴ-ꓢ ꓡꓰ ꓖꓶ ꓡ ꓟ ꓶꓻ ꓔꓯ ꓗꓹ ꓛꓲ ꓛꓲ ꓡꓰ ꓬꓲ ꓟꓯ_ ꓟ ꓑꓶ ꓓꓴ ꓕꓲ ꓚꓱꓹ ꓐꓯ ꓠꓬ ꓪꓴ-ꓢ ꓡꓰ ꓟꓬꓱꓺ ꓓꓳ ꓓꓳ ꓠꓹ ꓟ ꓐꓱ ꓶ ꓬꓲꓸ ꓟꓽ ꓐꓲ ꓜꓲꓼ ꓟ ꓔꓯ ꓬꓲ ꓣꓱ_ ꓟ ꓑꓶ ꓓꓴ ꓪꓴ-ꓢ ꓟꓬꓱꓺ ꓓꓳ ꓠꓬ ꓪ ꓙꓲ ꓓꓳ ꓡ_ ꓡꓳ= ꓬꓲ ꓢꓯꓼ ꓪ ꓠꓬ ꓪꓴ-ꓢ ꓡꓰ ꓥꓳ= ꓬꓲ ꓔꓯ ꓠꓬ ꓮ ꓫꓵ ꓟꓽ ꓙꓳ=

ꓖꓳ ꓡꓱ ꓠꓬꓲ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓠꓬꓲꓸ ꓠꓬꓲ ꓠꓴ ꓥꓪ ꓠꓬ ꓢꓯꓼ ꓐ ꓢꓴ ꓡꓰ ꓥꓳ= ꓣꓳ ꓔꓯ ꓪꓴ-ꓢ ꓣꓱ ꓠꓲꓹ ꓫꓵ_ ꓡꓳ= ꓖꓳ ꓡꓱ ꓠꓬꓲ ꓣꓳ ꓠꓬ ꓮ ꓡꓰ ꓕꓲ ꓚꓱꓹ ꓗꓪ ꓐꓰ ꓪꓴ-ꓢ ꓟꓬꓱꓺ ꓓꓳ ꓓꓳ ꓠꓹ ꓟ ꓢꓯꓼ ꓕꓵꓼ ꓔꓬ ꓡ? ꓐꓯ_ ꓟ ꓠꓬꓲꓸ ꓠꓬꓲ ꓣꓳ ꓓꓵꓽ ꓙ ꓠꓬꓲ ꓓꓴ ꓬꓰ ꓡꓯ= ꓮ ꓡꓰꓳ ꓐꓯ ꓠꓬ ꓢꓯꓼ ꓐ ꓢꓴ꓾ ꓢꓯꓼ ꓟꓽ ꓙꓳ ꓢꓴ꓾ ꓮ ꓘꓶꓸ ꓢꓯꓼ ꓐ ꓢꓴ ꓔꓯ ꓪꓴ-ꓢ ꓢꓲ_ ꓟ ꓑꓶ ꓓꓴ ꓠꓴ ꓥꓪ ꓮ ꓙꓵ ꓠꓬ ꓪꓴ-ꓢ ꓢꓲ ꓔ ꓟ ꓟꓶ ꓡꓰ ꓢꓴ ꓥ ꓡꓳ= ꓣꓳ ꓗꓪ ꓐꓰ ꓪꓴ-ꓢ ꓟꓬꓱꓺ ꓓꓳ ꓓꓳ ꓠꓹ ꓟ ꓢꓯꓼ ꓕꓵꓼ ꓙꓰ ꓡꓯ=