ꓪꓽ ꓘꓴˍ ꓕꓯ ꓟꓬꓱ ꓓꓳꓽ ꓕꓽ ꓧꓪ ꓠꓯꓹ ꓟ

ꓠꓲꓹ ꓠꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓣꓳ ꓟꓲ ꓠꓯ ꓕꓱ ꓟ ꓗꓪ ꓞꓳ ꓤ ꓕꓲ ꓣꓳ ꓛꓳ ꓕꓲ ꓣꓳ ꓫ ꓕꓱ ꓡꓯ ꓘꓳꓹ ꓕꓯ ꓮ ꓡꓲ ꓟ ꓔꓯ ꓠꓲꓹ ꓫꓵˍ ꓡ ꓐꓯ ꓠꓬ ꓔꓱꓹ ꓚꓵˍ ꓟ꓾ ꓗꓶꓸ ꓟꓽ ꓗꓴꓸ ꓟ ꓔꓯ ꓪ ꓙꓲ ꓫꓸ ꓕꓱ ꓠꓲꓹ ꓫꓵˍ ꓡꓳ ꓟꓽ ꓥ ꓡ= ꓞꓳ ꓤ ꓕꓲ ꓣꓳ ꓛꓳ ꓕꓲ ꓣꓳ ꓫ ꓕꓱ ꓡꓯ ꓘꓳꓹ ꓕꓯ ꓗꓶꓸ ꓟꓽ ꓗꓴꓸ꓾ ꓗꓶꓸ ꓜꓽ ꓟꓽ ꓗꓴꓸ꓾ ꓘꓶꓽ ꓘꓹ ꓘꓶꓽ ꓟꓽ ꓕꓱ꓾ ꓠꓲꓹ ꓟ ꓠꓯꓸꓼ ꓗꓪ ꓙꓳˍ ꓟ ꓔꓱꓹ ꓔꓱꓹ ꓚꓵ ꓚꓵ ꓡꓰ ꓐꓯ ꓠꓬ ꓟ ꓬꓲ ꓐꓯ ꓟ ꓟꓽ ꓜꓳꓽ ꓥˍ ꓟꓲ꓾ ꓥ ꓠꓬ ꓬꓲ ꓓꓵꓽ ꓙ ꓚꓱꓹ ꓟꓽ ꓜꓳꓽ ꓥˍ ꓟꓲ ꓣꓳ ꓘꓳꓹ ꓣꓴ ꓐ ꓡˍ ꓡꓳ= ꓮ ꓡꓲꓳ ꓐꓯ ꓠꓬ ꓬꓲ ꓠꓬ ꓬꓲ ꓠꓲꓹ ꓟ ꓗꓪ ꓓꓹ ꓟ ꓔꓯ ꓙꓽ ꓣꓳ ꓢꓲ ꓐꓯ ꓓꓳ ꓡˍ ꓟ ꓑꓶꓸ ꓓꓴ ꓣꓳ ꓠꓬ ꓘꓳꓹ ꓣꓴ ꓐ ꓡˍ ꓟ ꓥ ꓡꓳ= ꓗꓶꓸ ꓢꓴ ꓔꓯ ꓮ ꓟˍ ꓟꓲ ꓟꓽ ꓘꓳꓹ ꓣꓴ= ꓘꓶꓽ ꓘꓹ ꓢꓴ ꓔꓯ ꓮ ꓟˍ ꓟꓲ ꓟꓽ ꓠꓲꓹ ꓧꓳꓹ= ꓕꓱ ꓟ ꓠꓬ ꓞꓳ ꓤ ꓕꓲ ꓣꓳ ꓛꓳ ꓕꓲ ꓣꓳ ꓫ ꓕꓱ ꓡꓯ ꓘꓳꓹ ꓕꓯ ꓗꓴꓸ ꓙꓲ ꓙꓳ ꓡꓯ ꓘꓳꓹ ꓕꓯ ꓕꓱ ꓡꓱ ꓬꓰˍ ꓟ ꓥ ꓡꓳ=

ꓠꓬꓲꓸ ꓠꓬꓲ ꓪꓴ-ꓢ ꓥˍ ꓟꓲ ꓕꓱ ꓟ ꓔꓯ ꓮ ꓘꓶꓸ ꓠꓲꓹ ꓠꓵˍ ꓡꓳ= ꓮ ꓡꓲꓳ ꓐꓯ ꓠꓬ ꓬꓲ ꓠꓬ ꓣꓳ ꓠꓲꓹ ꓟ ꓠꓯꓸꓼ ꓗꓪ ꓮ ꓫꓵꓽ ꓓꓹ ꓟ ꓬꓲ ꓟꓳˍ ꓡꓳ= ꓣꓳ ꓮ ꓫꓵꓽ ꓓꓵꓽ ꓙ ꓔ ꓟ ꓬꓲ ꓢꓷˍ ꓡꓳ= ꓣꓳ ꓮ ꓫꓵꓽ ꓬꓰ ꓠ ꓔ ꓟˍ ꓟꓲ ꓬꓲ ꓢꓷˍ ꓡꓳ= ꓖꓳ ꓡꓱ ꓥˍ ꓟꓲ ꓣꓳ ꓪꓽ ꓘꓴˍ ꓕꓯ꓾ ꓥ ꓠꓬ꓾ ꓬꓲ ꓐꓰ ꓫ ꓕꓱ ꓡꓯ ꓘꓳꓹ ꓕꓯ ꓠꓲꓹ ꓟ ꓠꓯꓸꓼ ꓗꓪ ꓓꓹ ꓟ ꓕꓲ ꓙꓰꓽ ꓣꓳ ꓟꓷꓽ ꓠꓷꓹ ꓗꓪ ꓐꓰ ꓐꓯ ꓓꓳ ꓡˍ ꓟ ꓕꓲ ꓙꓰꓽ ꓓꓹ ꓕꓯ ꓠꓽ ꓪꓴ-ꓢ ꓠꓬ ꓮ ꓡꓲ ꓢꓲ ꓶꓼ ꓤ ꓫꓱꓹ ꓤ ꓖꓶꓽˍ ꓥꓳ ꓪ=

ꓬꓲ ꓡꓰ ꓠꓬꓲꓸ ꓠꓬꓲ ꓟꓸ ꓟꓲꓽ ꓟ-ꓕꓲ 6ꓽ7-15 ꓗꓪ ꓐꓯ ꓔ ꓡꓳ= ꓠꓴ ꓪꓽ ꓘꓴˍ ꓕꓯ ꓠꓱꓸ ꓐꓯ ꓢꓴ ꓐꓶꓽ ꓞꓳ ꓐꓴ ꓪꓽ ꓘꓴˍ ꓟ ꓡꓰ ꓐꓰ ꓕꓽ ꓬꓰ= ꓬꓲ ꓪ ꓠꓬ ꓬꓲ ꓪ ꓫ ꓕꓱˍ ꓟ꓾ ꓬꓲ ꓪ ꓐꓯ ꓘꓶꓽ ꓔꓯ ꓐꓲꓻ ꓠ ꓛꓲ ꓐꓯ ꓢꓲ ꓪꓽ ꓘꓴˍ ꓡꓳ꓾ ꓐꓰ ꓙꓳ ꓗꓽ ꓖꓶ ꓔ ꓡꓳ= ꓠꓴ ꓪ ꓪꓽ ꓘꓴˍ ꓠꓬ ꓠꓲꓹ ꓟ ꓠꓯꓸꓼ ꓗꓪ ꓓꓹ ꓟ ꓘꓴ= ꓠꓴ ꓐꓯ ꓘꓶꓽ ꓐꓲꓻ ꓟꓽ ꓛꓵ= ꓮ ꓫꓵꓸ ꓫꓵ ꓘꓴ ꓟꓽ ꓛꓵ= ꓮ ꓫꓵꓽ ꓬꓰ ꓛꓵˍ ꓡ ꓐꓯ ꓠꓬ ꓠꓴ ꓠꓲꓹ ꓟ ꓠꓯꓸꓼ ꓗꓪ ꓙꓳˍ ꓟ꓾ ꓮ ꓡꓲ ꓘꓴ ꓗꓴꓸˍ ꓮ ꓡꓲ ꓪꓽ ꓘꓴˍ ꓠꓬ ꓪꓴ-ꓢ ꓠ ꓠꓹ ꓡꓳ= ꓪꓴ-ꓢ ꓓꓽ ꓔꓳꓹ ꓡꓳ= ꓠꓴ ꓠꓲꓹ ꓟ ꓠꓯꓸꓼ ꓗꓪ ꓐꓰ ꓙ ꓣꓳꓽˍ ꓟ ꓠꓲꓹ ꓟ꓾ ꓮ ꓡꓲ ꓓꓹ ꓮ ꓡꓲ ꓔꓱꓹ ꓔꓱꓹ ꓚꓵ ꓚꓵ ꓐꓰ ꓪꓽ ꓘꓴˍ ꓠꓬ ꓪꓴ-ꓢ ꓡꓰ ꓘꓳꓹ ꓣꓴˍ ꓡꓳ=

ꓠꓬꓲꓸ ꓠꓬꓲ ꓢꓲꓺ ꓒ ꓡꓰ ꓟꓸ ꓖꓶ ꓡˍ ꓟ ꓬꓲ ꓪꓽ ꓘꓴ ꓘꓶꓽ ꓠꓬ ꓠꓬꓱꓸ ꓠꓬꓱˍ ꓐꓰ ꓮ ꓘꓶꓸ ꓐꓲ ꓜꓲꓼˍ ꓟ ꓪꓽ ꓘꓴ ꓘꓶꓽ ꓥ ꓡꓳ= ꓪꓽ ꓘꓴˍ ꓐꓯ ꓟ ꓠꓬ ꓣꓳꓽ ꓣꓱꓽ ꓞꓹ ꓟ ꓡꓰꓽ ꓘꓴˍ ꓟ ꓟꓽ ꓥ= ꓣꓼ ꓔ ꓟ ꓣꓱꓽ ꓞꓹ ꓟ ꓡꓰꓽ ꓟꓽ ꓠꓽ ꓠꓽ ꓐꓰ ꓓꓰꓽˍ ꓫꓵꓽ ꓟꓽ ꓥ= ꓮ ꓡꓲ ꓪꓽ ꓘꓴˍ ꓡ= ꓪꓴ-ꓢ ꓔꓯ ꓫꓱꓸ ꓖꓶꓽ ꓠ ꓗˍ ꓡꓳ= ꓬꓲ ꓟꓬꓱꓺ ꓔꓯ ꓓꓳ ꓟꓴꓹ ꓠ ꓗˍ ꓡꓳ= ꓬꓲ ꓔꓬ ꓗꓪ ꓐꓰ ꓢꓯꓼ ꓪ ꓓꓰꓽ ꓠ ꓗˍ ꓡꓳ= ꓕꓱ ꓟ ꓡꓰꓽ ꓟꓽ ꓞꓲ ꓚꓳ ꓡꓳ ꓚꓳ ꓫꓵ ꓐꓴ꓾ ꓣꓳ ꓒ ꓕꓲ ꓗꓪ ꓔꓬ ꓢꓴ ꓐꓴ ꓐꓱ ꓶ ꓪꓽ ꓘꓴ ꓖꓶ ꓠ ꓗˍ ꓡꓳ= ꓬꓲ ꓪ ꓣꓳ ꓔꓯ ꓛꓬꓹ ꓔ ꓟ ꓝꓴꓲꓸ ꓙꓳˍ ꓠꓬ ꓬꓲ ꓪ ꓖꓼ ꓖꓶ ꓠ ꓗˍ ꓡꓳ= ꓣꓳ ꓬꓲ ꓪ ꓔꓯ ꓝꓴꓲꓸ ꓖꓼ ꓖꓶˍ ꓟ ꓡꓰ ꓐꓰ ꓪꓴ-ꓢ ꓡꓰ ꓣꓳ ꓔꓯ ꓝꓴꓲꓸ ꓖꓼ ꓖꓶˍ ꓟ ꓥꓳ= ꓠꓬꓲꓸ ꓠꓬꓲ ꓢꓲꓺ ꓒ ꓬꓰ-ꓢꓴ ꓡꓰ ꓟꓸ ꓖꓶˍ ꓟ ꓪꓽ ꓘꓴ ꓘꓶꓽ ꓗꓪ ꓕꓱ ꓡꓰ ꓓꓹ ꓡꓳ=

ꓖꓳ ꓡꓱ ꓠꓬꓲ ꓣꓳ ꓪꓽ ꓘꓴˍ ꓕꓯ ꓪꓴ-ꓢ ꓔꓯ ꓫꓱꓸ ꓖꓶ ꓠ ꓗˍ ꓡꓳ= ꓬꓲ ꓔꓯ ꓓꓳ ꓟꓴ ꓠ ꓗˍ ꓡꓳ= ꓣꓳ ꓚꓳ ꓡꓳ ꓚꓳ ꓫꓵ ꓐꓱ ꓶ ꓪꓽ ꓘꓴ ꓖꓶ ꓠ ꓗˍ ꓡꓳ= ꓬꓲ ꓟꓶꓽ ꓗꓪ ꓢꓲꓸ ꓡꓳꓹ ꓬꓰ ꓕꓯ ꓢꓲꓸ ꓣꓳ ꓐꓱ ꓶ ꓪꓽ ꓘꓴ ꓠ ꓗˍ ꓡꓳ= ꓖꓳ ꓡꓱ ꓠꓬꓲ ꓣꓳ ꓕꓱ ꓡꓰ ꓛꓳ ꓫꓱꓽ ꓔꓬ ꓕꓯ ꓗꓶꓸ ꓢꓴ꓾ ꓘꓶꓽ ꓘꓹ ꓢꓴ꓾ ꓐꓶꓽ ꓞꓳ ꓐꓴ ꓡꓰ ꓟꓽ ꓥ ꓥ ꓠꓲꓹ ꓟ ꓠꓯꓸꓼ ꓗꓪ ꓮ ꓡꓲ ꓙꓳˍ ꓮ ꓡꓲ ꓫ ꓕꓱ ꓗꓴˍ ꓟ꓾ ꓮ ꓫꓵꓽ ꓔꓯˍ ꓟꓲ ꓟꓳ ꓘꓴˍ ꓟ ꓪꓴ-ꓢ ꓔꓯ ꓟꓽ ꓗꓶꓸ ꓗꓶꓸ ꓐꓰ ꓣꓳ ꓠꓬ ꓣꓳ ꓠꓲꓹ ꓟ ꓠꓯꓸꓼ ꓗꓪ ꓓꓹ ꓟ ꓡꓰꓽ ꓕꓱ ꓢꓲ ꓣꓳ ꓬꓰ ꓟꓽ ꓗꓴꓸ ꓟ꓾ ꓟꓽ ꓢꓷꓸ ꓟ꓾ ꓟꓽ ꓔꓱꓹ ꓜꓳꓽ ꓟ ꓮ ꓙꓵꓽ ꓔꓯ ꓡꓳ ꓗꓷ ꓢꓲ ꓠꓬꓲ ꓪꓴ-ꓢ ꓔꓯ ꓙ ꓣꓳˍ ꓟ ꓠꓲꓹ ꓟ ꓡꓰ ꓬꓲ ꓐꓰ ꓕꓲ ꓪ ꓙꓰ ꓡꓯ꓾ ꓐꓰ ꓠꓬꓲꓸ ꓠꓬꓲ ꓟꓸ ꓟꓲꓽ ꓗꓪ ꓐꓰ ꓣꓳ ꓔꓯ ꓟꓸ ꓖꓶ ꓡˍ ꓟ ꓥ ꓡꓳ=

Add new comment

5 + 6 =