ꓪ ꓔꓲ ꓩꓴ-ꓡꓲ ꓓꓵꓽ ꓙ ꓟꓬꓽˍ ꓟ

ꓠꓲꓹ ꓠꓵˍ ꓟꓲ ꓬꓲ ꓤ ꓠꓬꓲ ꓤ ꓐꓴꓳ꓾ ꓠꓬꓲꓸ ꓠꓬꓲ ꓟ ꓢꓲꓽ ꓫꓬ ꓕꓳ ꓶ ꓗꓪ ꓐꓰ ꓣꓳ ꓔꓯ ꓐꓯ ꓟꓳ ꓖꓶ ꓡ ꓔꓬ ꓟ ꓠꓬ ꓣꓳ ꓪꓴ-ꓢ ꓦ ꓡꓱ ꓢꓴ ꓐꓴ ꓠꓬ ꓮ ꓡꓰ ꓐꓰ ꓞꓳ ꓙꓳ ꓢꓯꓸ ꓔꓬ ꓪ ꓠꓹ ꓟ ꓐꓰ ꓣꓳ ꓠꓲꓹ ꓟ ꓠꓯꓸꓼ ꓗꓪ ꓢꓲꓺ ꓒ ꓬꓰ-ꓢꓴ ꓠꓽ ꓮ ꓟ ꓥ ꓡ꓾ ꓢꓲꓺ ꓒ ꓬꓰ-ꓢꓴ ꓠꓬ ꓮ ꓡꓰ ꓫꓵꓽ ꓕꓲ ꓣꓳ ꓥ ꓡ꓾ ꓢꓲꓺ ꓒ ꓬꓰ-ꓢꓴ ꓔꓯ ꓣꓳ ꓮ ꓡꓰ ꓐꓰ ꓘꓳꓹ ꓣꓴ ꓔꓬ ꓡ꓾ ꓐꓯ ꓟ ꓔꓯ ꓣꓳ ꓚꓲꓸ ꓛꓬ ꓥˍ ꓟꓲ ꓢꓷꓸ ꓠꓹ ꓟ ꓥ ꓡꓳ꓾ ꓐꓰ ꓠꓬꓲꓸ ꓠꓬꓲ ꓟ ꓢꓲꓽ ꓫꓬ ꓕꓳꓽ ꓶ ꓗꓪ ꓐꓰ ꓣꓳ ꓔꓯ ꓐꓯ ꓟꓸ ꓖꓶ ꓡ ꓔꓬ ꓡꓳ=

ꓠꓬꓲꓸ ꓠꓬꓲ ꓟ ꓢꓲꓽ ꓫꓬ ꓕꓳ ꓶ ꓗꓪ ꓣꓳ ꓵ ꓠꓬꓲˍ ꓕꓯ ꓠꓽ ꓩꓴ-ꓡꓲ ꓪ ꓔꓲ ꓠꓬ ꓖꓳ ꓓꓱ ꓔꓲꓹ ꓒ ꓬꓳ-ꓦ ꓔꓯ ꓪꓴꓸ ꓓꓵ ꓓꓶ ꓗꓷ ꓢꓴ ꓥ ꓡꓳ= ꓪ ꓔꓲ ꓠꓬ ꓬꓳ-ꓦ ꓔꓯ ꓮ ꓫꓵꓽ ꓪꓴꓸ ꓠꓬꓲ ꓪꓴꓸ ꓓꓵ ꓓꓶ ꓗꓷˍ ꓡ ꓐꓯ ꓠꓬ ꓬꓳ-ꓦ ꓠꓬ ꓬꓲ ꓔꓯ ꓕꓱ ꓡꓱ ꓐꓯ ꓗꓷ ꓟ ꓪꓴꓸ ꓠꓬꓲ ꓥ ꓡꓳ= ꓖꓳ ꓓꓱ ꓔꓲꓹ ꓒ ꓬꓳ-ꓦ ꓡꓰ ꓩꓴ-ꓡꓲ ꓪ ꓔꓲ ꓔꓯ ꓬꓲ ꓠꓽ ꓪꓴ-ꓢ ꓔꓯ ꓛꓬ ꓗꓷꓳ= ꓪꓴ-ꓢ ꓟꓽ ꓠꓲꓹ ꓒꓴ ꓟ ꓬꓰ ꓗꓷꓳ= ꓮ ꓡꓲꓳ ꓐꓯ ꓠꓬ ꓠꓴ ꓠꓽ ꓠꓴ ꓠꓬꓲ ꓤ ꓤ ꓟꓶ ꓔꓯ ꓦꓴ ꓔꓯꓹ ꓙꓰ ꓢꓲ ꓫ ꓗꓷ ꓟ ꓪꓴꓸ ꓠꓬꓲ ꓥ ꓡꓳ꓾ ꓐꓰ ꓬꓳ-ꓦ ꓡꓰ ꓐꓯ ꓕꓯ ꓪ ꓔꓲ ꓩꓴ-ꓡꓲ ꓠꓬ ꓠꓲꓹ ꓟ ꓦꓶ ꓢꓲ ꓬꓲ ꓔꓯ ꓪꓴꓸ ꓓꓵ ꓓꓶ ꓗꓷ ꓟ ꓥ ꓡꓳ꓾ ꓐꓰ ꓢꓷꓸ ꓪˍ ꓟ ꓥ ꓡꓳ=

ꓠꓲꓹ ꓠꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓖꓳ ꓓꓱ ꓔꓲꓹ ꓒ ꓬꓳ-ꓦ ꓠꓬ ꓮ ꓫꓵꓽ ꓑꓶꓸ ꓓꓴ ꓪꓴꓸ ꓓꓵ ꓓꓶˍ ꓟ ꓟꓶ ꓗꓷ ꓡ ꓐꓯ ꓠꓬ꓾ ꓬꓲ ꓠꓽ ꓪꓴ-ꓢ ꓐꓯ ꓘꓶꓽ ꓗꓪ ꓐꓰ ꓬꓲ ꓞꓳ ꓙꓳ ꓢꓯꓸ ꓔꓬ ꓟ ꓪꓴꓸ ꓠꓬꓲ ꓬꓲ ꓔꓯ ꓩꓴ-ꓡꓲ ꓪ ꓔꓲ ꓡꓰ ꓢꓰꓼ ꓗꓷ ꓟ ꓥ ꓡꓳ=

ꓖꓳ ꓟ ꓕꓲ ꓡꓰꓹꓼ ꓠꓬꓲꓸ ꓠꓬꓲ ꓣꓳꓽ ꓔꓯ ꓐꓯ ꓟꓳꓸ ꓖꓶ ꓡ ꓔꓬ ꓟ ꓠꓬ ꓣꓳ ꓥˍ ꓟꓲ ꓪꓴ-ꓢ ꓐꓯ ꓘꓶꓽ ꓕꓲ ꓡꓰꓹꓼ ꓞꓳ ꓙꓳ ꓢꓯꓸ ꓔꓬ ꓡ ꓐꓰ ꓓꓵꓽ ꓙ ꓠꓬꓲ ꓡꓯ= ꓖꓳ ꓓꓱꓽ ꓔꓲꓹ ꓒ ꓬꓳ-ꓦˍ ꓡꓰ ꓐꓰ ꓙꓲꓻ ꓔꓱꓹ ꓟ ꓣꓳ ꓐꓯ ꓔꓬ ꓡ= ꓪꓴ-ꓢ ꓐꓯ ꓘꓶꓽ ꓐꓰ ꓕꓲ ꓡꓰꓹꓼ ꓣꓳ ꓢꓯꓸ ꓔꓬ ꓡ= ꓣꓳ ꓮ ꓡꓰ ꓐꓰ ꓢꓯꓸ ꓔꓬ ꓪ ꓟ ꓔꓯ ꓣꓳ ꓓꓵꓽ ꓙ ꓠꓬꓲ ꓓꓴ ꓥ ꓡꓳ=