ꓬꓰ-ꓢꓴ ꓙꓲ-ꓢꓴ ꓦꓵꓻ ꓡ ꓟ

ꓬꓰ-ꓢꓴ ꓙꓲ-ꓢꓴ ꓦꓵꓻ ꓡ ꓟ ꓚ ꓟꓲꓽ ꓠꓬ ꓕꓱ ꓡꓱ ꓥꓳ= ꓟ-ꓡꓲ ꓠꓬ ꓬꓳ-ꓢꓷ ꓔꓯ ꓠꓲꓹ ꓒꓴ ꓗꓷ ꓗꓸ ꓠꓯ꓾ ꓬꓲ ꓪꓽ ꓟꓽ ꓝꓱꓺ ꓡꓯꓽ ꓘꓳ ꓢꓰ ꓕꓯ ꓟ-ꓡꓲ ꓠꓬ ꓢꓲ-ꓫꓬ-ꓟ-ꓦ ꓢꓯꓼ ꓪꓽ ꓠꓬꓲˍ ꓟ ꓗꓪ ꓐꓰ ꓬꓲ ꓖꓳ ꓓꓱ ꓗꓪ ꓤ ꓠꓱ ꓶꓻ ꓡꓰˍ ꓡꓳ꓿ ꓬꓲ ꓤ ꓖꓴ ꓬꓳ-ꓢꓷ  ꓠꓬ ꓔꓱꓹ ꓜꓳꓽ ꓢꓴ ꓕꓲ ꓣꓳ ꓥ ꓢꓲ꓾ ꓟ-ꓡꓲ ꓔꓯ ꓞꓳ ꓜꓴ ꓟꓲꓽ ꓙꓬ ꓗꓪ ꓫꓸ ꓔꓳ ꓡꓰ ꓝꓲ ꓠꓲꓹ ꓟꓽ ꓫꓵꓺ ꓠꓬꓲ꓾ ꓬꓲ ꓔꓯ ꓘꓳ ꓫꓱ ꓫꓱˍ ꓒꓰꓻ ꓗꓷ ꓠꓹ ꓟ ꓓꓵꓽ ꓙˍ ꓡꓳ꓿ 

ꓬꓲ ꓕꓱ ꓡꓱ ꓓꓵꓽ ꓙ ꓞꓷꓹ ꓗꓷ ꓗ ꓠꓯ꓾ ꓢꓲ ꓒꓽ ꓬꓲ ꓝꓲ ꓓꓴ ꓕꓲ ꓣꓳ ꓬꓲ ꓔꓯ ꓬꓲꓼ ꓟꓬ ꓘꓳꓻ ꓟ ꓗꓪ ꓐꓰ ꓟꓳꓸ ꓖꓶ ꓡ ꓢꓲ꓾ ꓓ-ꓪꓵ ꓞꓲꓼ ꓤ ꓡꓯꓹ ꓤ ꓬꓳ-ꓢꓷꓽꓳ꓾ ꓟ-ꓡꓲˍ ꓐꓰ ꓝꓱꓺ ꓡꓯꓽ ꓘꓳ ꓠꓹ ꓟ ꓕꓽ ꓓꓵꓽ ꓙ ꓟꓬ꓿ ꓮ ꓡꓲꓳ ꓐꓯ ꓠꓬ ꓬꓲ ꓠꓽ ꓢꓲ-ꓫꓬ-ꓟ-ꓦ ꓗꓪ ꓐꓰ ꓤꓽ ꓶꓻ ꓡꓰ ꓟ ꓥ ꓡꓳ꓿ ꓬꓲ ꓠꓬ ꓤ ꓕꓲ ꓣꓳ ꓦꓵꓻ ꓡ ꓥꓳ꓿ ꓤꓽ ꓖꓳ ꓕꓲ ꓣꓳ ꓠꓬ ꓬꓲ ꓑ ꓫꓬꓼ ꓐꓴ ꓔꓯ ꓝꓴꓲ ꓗꓪ ꓐꓰ ꓚꓬꓴ ꓓꓳ ꓡ ꓠ ꓗꓹ ꓢꓴ ꓥ ꓠꓬꓲ꓾ ꓠꓴ ꓬꓲ ꓔꓯ꓾ ꓬꓰ-ꓢꓴ꓾ ꓟꓬꓱꓺ ꓖꓶ ꓠ ꓗꓹ ꓡꓳ꓾ ꓐꓯˍ ꓡꓳ꓿ ꓕꓱ ꓟꓬ ꓫꓵꓽ ꓒꓬꓱꓼ ꓡ ꓟ ꓠꓬ ꓢꓲ ꓒꓽ ꓡꓰ ꓬꓲ ꓟꓷꓽ ꓠꓷꓹ ꓝꓸ ꓢꓴ ꓗꓪ ꓐꓰ ꓐꓯ ꓗꓷ ꓟ꓾ ꓠꓬꓲ ꓠꓹ꓾ ꓤ ꓟꓶ ꓡꓯꓸ ꓚꓵ ꓠꓬ ꓤ ꓠꓱ ꓶꓻ ꓡꓰ ꓢꓲ ꓤ ꓕꓲ ꓣꓳ ꓦꓵꓻ ꓡ ꓥꓳ꓿ ꓬꓲ ꓪꓽ ꓡꓰ ꓬꓲ ꓔꓯ ꓲ-ꓟ-ꓠꓴ-ꓡꓲ ꓟꓬꓱ ꓖꓶˍ ꓥꓳ꓾ ꓐꓰ ꓐꓯ ꓔ ꓟ ꓐꓲꓺ ꓡꓰ ꓝꓲ ꓠꓹ ꓟ ꓥ ꓡꓳ꓿

ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓠꓬꓲꓸ ꓠꓬꓲ ꓠꓬ ꓣꓳ ꓮ ꓙꓵꓽ ꓐꓱ ꓶ ꓗꓹ ꓛꓲꓽˍ ꓟ ꓠꓬꓲ ꓕꓲ ꓠꓬꓲ꓾ ꓪꓴ-ꓢ ꓔꓯ ꓫꓸ ꓟꓳ ꓠꓯꓹ ꓟ ꓦꓬꓼ ꓠꓬꓲ ꓥ ꓡꓳ= ꓮ ꓡꓲꓳ ꓐꓯ ꓠꓬ ꓠꓬꓲꓸ ꓠꓬꓲ ꓠꓬ ꓣꓳ ꓟꓹ ꓟ ꓟ-ꓡꓲ-ꓬ ꓬꓲ ꓦꓵꓻ ꓦꓬꓼ ꓠꓬꓲ ꓥ ꓡꓳ= ꓟꓹ ꓟ ꓟ-ꓡꓲ-ꓬ ꓠꓬ ꓚꓲꓸ ꓛꓬ ꓪꓽ ꓘꓴˍ ꓟ ꓗꓪ ꓐꓰ ꓥˍ ꓟꓲ꓾ ꓬꓲ ꓡꓰ ꓪꓴ-ꓢ ꓐꓰ ꓣꓳ ꓠꓬꓲꓽ ꓗꓴꓸ ꓚꓸꓼ ꓗꓪ ꓜꓲꓽ ꓟꓴ ꓬꓰˍ ꓟ ꓗꓪ ꓐꓰ ꓥˍ ꓟꓲ꓾ ꓣꓳ ꓐꓴ ꓔꓯ ꓧꓳꓽ ꓪꓴꓸ ꓟꓴ ꓖꓶ ꓔꓬ ꓡꓳ= ꓟꓹ ꓟ ꓟ-ꓡꓲ-ꓬ ꓠꓬ ꓬꓲ ꓤ ꓬꓲ ꓠꓱ ꓐꓴ ꓕꓯ ꓢꓲ ꓗꓪ ꓙꓳˍ ꓟ ꓪꓴꓽ ꓓꓰˍ ꓟ ꓠꓵꓻ ꓠꓲꓹ ꓪꓴꓸ ꓠꓬꓲ ꓙꓲ-ꓢꓴ ꓢꓲꓺ ꓤ ꓐꓴ ꓥˍ ꓟꓲ ꓬꓲ ꓔꓯ ꓮ ꓘꓶꓸ ꓠꓲꓹ ꓥꓳꓺ ꓔꓬ ꓟ ꓥ ꓡꓳ= ꓮꓓ 400 ꓘꓳꓼ ꓕꓯ ꓟꓹ ꓟ ꓟ-ꓡꓲ-ꓬ ꓔꓯ ꓦꓵꓻ ꓡ ꓗꓷ ꓟ ꓦꓲꓻ ꓕꓯꓽ ꓢꓲ ꓗꓪ ꓫꓬꓹ ꓔ ꓟ ꓙꓲꓻ ꓫꓬ ꓢꓴ ꓮ-ꓠ ꓪꓽ ꓘꓴ ꓦꓲꓻ ꓓꓽ ꓟ ꓔꓯ ꓔꓲꓺ ꓖꓶ ꓡꓯꓼ ꓙꓱˍ ꓟ ꓕꓲ ꓘꓳꓼ ꓗꓪ ꓐꓰ ꓪꓴꓸ ꓔꓴ ꓢꓲ ꓟꓹ ꓟ ꓟ-ꓡꓲ-ꓬ ꓑꓮꓲꓽ ꓔꓯ ꓬꓰ ꓩꓴ ꓡ ꓗꓷ ꓟ ꓥ ꓡꓳ=

Constantinople ꓡꓳ ꓒꓱ ꓗꓪ ꓟ ꓖꓣꓰꓰꓗ ꓟꓴꓽ ꓖꓪ ꓐꓳ ꓒ ꓕꓲ ꓣꓳ ꓥ ꓟ ꓔꓲꓺ ꓒ ꓣꓳ-ꓟ-ꓠꓴꓸ-ꓢꓶꓽ ꓠꓬ ꓟꓹ ꓟ ꓟ-ꓡꓲ-ꓬ ꓬꓲ ꓦꓵꓻ ꓡ ꓟ ꓚꓱꓹ ꓔꓯ 500 ꓘꓳꓼ ꓕꓯ ꓟꓴꓽ ꓖꓪ ꓕꓳ ꓶ ꓐꓳꓻ ꓔ ꓟ ꓔꓯ ꓡꓳꓸ ꓗꓷ ꓠꓬ ꓟꓹ ꓟ ꓟ-ꓡꓲ-ꓬ ꓦꓵꓻ ꓑꓮꓲꓽ ꓔꓯ ꓮ ꓡꓰ ꓟꓬ ꓗꓪ ꓛꓲꓺ ꓒꓵꓽ ꓗꓷ ꓟ ꓔꓯ ꓫꓬꓽ ꓫꓬꓽ ꓡꓰ ꓟꓳꓻ ꓪˍ ꓟ ꓥ ꓡꓳ= 

ꓠ-ꓢ-ꓡꓱˍ ꓡꓰ ꓐꓰ ꓮ ꓘꓶꓸ ꓣꓳˍ ꓟ ꓡꓳ ꓒꓱ ꓤ ꓗꓪ ꓐꓰ ꓦꓵꓻ ꓡ ꓟ ꓟꓹ ꓟ ꓟ-ꓡꓲ-ꓬ ꓠꓬ ꓪꓴ-ꓢ ꓠꓲꓹ ꓡꓶꓽ ꓔꓯ ꓛꓳ ꓗꓷ ꓟ ꓪꓴꓸ ꓠꓬꓲ꓾ ꓪꓴ-ꓢ ꓐꓯ ꓘꓶꓽ ꓠ ꓠꓹ ꓗꓷ ꓟ ꓪꓴꓸ ꓠꓬꓲ ꓪꓴ-ꓢ ꓬꓲ ꓟꓹ ꓟ ꓒꓬꓱꓼ ꓡˍ ꓟ ꓙꓵꓽ ꓪ ꓔꓯ ꓘꓳꓹ ꓣꓴ ꓟꓶ ꓡꓰ ꓟ ꓡꓰ ꓟꓽ ꓞꓲꓺ꓾ ꓣꓳ ꓐꓴ ꓔꓯ ꓥˍ ꓟꓲ ꓪꓴ-ꓢ ꓠꓲꓹ ꓡꓶꓽ ꓔꓯ ꓛꓳ ꓫꓱꓽˍ ꓠꓬ ꓶꓼ ꓤ ꓫꓱꓹ ꓤ ꓖꓶˍ ꓥꓳ꓾ ꓐꓰ ꓐꓯ ꓢꓲ ꓟꓸ ꓖꓶ ꓔꓬ  ꓟ ꓥ ꓡꓳ= ꓟꓹ ꓟ ꓟ-ꓡꓲ-ꓬ ꓡꓰ ꓐꓰ ꓪꓴ-ꓢ ꓠꓲꓹ ꓡꓶꓽ ꓙꓳˍ ꓟ ꓕꓲ ꓡꓰꓹ ꓛꓳ ꓫꓱꓽ ꓙꓰ ꓡꓯ=