ꓮ ꓣꓳ ꓒꓲꓼ ꓬꓰ ꓟ ꓔꓯ ꓥꓳꓽ ꓐꓰ ꓒꓴ ꓒꓯꓼ ꓒꓲꓼ ꓬꓰ ꓟ ꓔꓯ ꓥꓳꓽ

Thursday, November 05, 2020

ꓡꓴ-ꓘ=15ꓽ1-10

ꓝꓲꓸ ꓫ ꓢꓴ_ ꓐꓰ ꓝꓴꓲ ꓙꓳ ꓢꓴ ꓮ ꓙꓵ ꓠꓬ꓾ ꓬꓰ-ꓢꓴ ꓟꓸ ꓟꓲ ꓚ_ ꓟ ꓔꓯ ꓠ ꓠꓹ ꓠꓹ ꓟ ꓬꓲ ꓔꓯ ꓠꓶꓽ ꓡ_ ꓡꓳ꓿

ꓖꓳ ꓡꓱ ꓠꓬ ꓒ-ꓡꓲ-ꓢꓷ ꓐꓴ ꓥ_ ꓟꓲ꓾ ꓕꓳ ꓶ ꓐꓳ ꓒ ꓐꓴ ꓥ_ ꓟꓲ ꓚꓲ ꓡꓲ ꓥꓳꓽ ꓠꓳꓽ ꓪ ꓕꓱ ꓢꓲ꓾ ꓕꓱ ꓕꓲ ꓣꓳ ꓠꓽ ꓝꓴꓲ ꓙꓳ ꓢꓴ ꓔꓯ ꓘꓳ ꓣꓴ ꓢꓲ꓾ ꓬꓲ ꓪ_ ꓐꓰ ꓕꓲ ꓪꓺꓼ ꓜ ꓜꓽ_ ꓡꓳ꓾ ꓐꓯ_ ꓡꓳ꓿

ꓬꓰ-ꓢꓴ ꓠꓬ ꓬꓲ ꓪ ꓔꓯ ꓔꓯꓺ ꓥꓳ ꓕꓱ ꓟ ꓐꓯ ꓖꓶ_ ꓡꓳ꓾ꓠꓴ ꓪ ꓗꓪ ꓟ ꓡ ꓞꓳ ꓮ ꓡꓲ ꓕꓲ ꓣꓳ꓾ ꓮ ꓣꓳ ꓕꓲ ꓦꓬꓻ ꓙꓳ ꓢꓲ ꓕꓲ ꓟ ꓒꓲꓼ ꓬꓰ ꓠꓬ꓾ ꓗꓴ ꓞꓲ ꓗꓴ ꓟ ꓔꓯ ꓡꓲ ꓛꓲ ꓗꓪ ꓡꓳꓺ ꓔ ꓬꓰ ꓢꓲ꓾ ꓒꓲꓼ ꓬꓰ ꓟ ꓔꓯ ꓟꓽ ꓧꓪ ꓟꓶ ꓕ ꓑꓳ ꓟꓽ ꓧꓪ ꓙꓰ ꓡꓺꓽ꓿ꓧꓪ ꓟꓶ ꓗꓷ ꓠꓬ꓾ ꓬꓲ ꓠꓽ ꓗꓹ ꓛꓲ ꓠꓬꓲ ꓡꓯꓼ ꓒꓶ ꓗꓪ ꓑꓱꓸ ꓔ ꓢꓲ꓾ ꓬꓲ ꓦꓲ ꓗꓪ ꓬꓲꓼ ꓛꓲ ꓡ ꓠꓬ꓾ ꓬꓲ ꓗꓪ ꓛꓳꓽ_ ꓐꓰ ꓠꓶꓽ ꓛꓳ ꓕꓲ ꓛꓳ ꓐꓴ ꓔꓯ ꓘꓴ ꓔꓯꓹ ꓡ ꓢꓲ꓾ ꓥꓪ ꓮ ꓣꓳ ꓒꓲꓼ ꓬꓰ ꓟ ꓠꓬ ꓧꓪꓺ ꓟꓶ ꓡꓰꓳ꓿ ꓖꓳ ꓡꓱ ꓠꓬꓲ ꓥꓪ_ ꓐꓰ ꓕꓲ ꓡꓰꓹꓼ ꓗꓹ ꓛꓲ ꓡꓯ꓾ ꓐꓰ ꓐꓯ_ ꓡꓳ꓿ ꓥꓪ ꓠꓴ ꓪ ꓔꓯ ꓐꓯ ꓖꓶ_ ꓠꓬꓲ꓾ ꓖꓳ ꓟ_ ꓡꓰ ꓐꓰ꓾ ꓝꓴꓲ ꓙꓳ ꓢꓴ ꓕꓲ ꓣꓳ ꓓꓵ ꓙ ꓒꓳꓹ ꓬꓲꓼ ꓡ_ ꓠꓬ꓾ ꓟꓴ ꓗꓪ ꓕꓯ ꓢꓲ ꓗꓪ ꓬꓲ ꓑꓶ ꓓꓴ ꓗꓹ ꓛꓲ_ ꓟ ꓠꓬ꓾ ꓒꓳꓹ ꓬꓲꓼ ꓡ ꓟꓽ ꓛꓵ ꓟ ꓙꓲ ꓫꓬ ꓢꓴ ꓗꓴ ꓞꓲ ꓗꓴ ꓣꓳ ꓟ ꓑꓶ ꓓꓴ ꓢꓶꓸ ꓟꓽ ꓞꓲ ꓗꓹ ꓛꓲ_ ꓡꓳ꓿

ꓝꓮꓲ ꓠꓬ ꓤ ꓟꓶ ꓤ ꓕꓲ ꓣꓳ꓾ ꓒꓴꓻ ꓞꓲ ꓒꓯꓼ ꓙꓳ ꓢꓲ ꓕꓲ ꓒꓯꓼ ꓒꓲꓼ ꓬꓰ ꓕꓯ ꓠꓽ꓾ ꓟꓬ ꓡꓴ ꓟꓬꓺ ꓔ ꓢꓲ ꓦꓲꓻ ꓫꓵꓹ ꓢꓲ ꓠꓬꓲ꓾ ꓧꓪ ꓟꓽ ꓟꓶ ꓕ ꓑꓳ ꓬꓲ ꓜꓶ ꓐꓰ ꓟꓽ ꓧꓪ ꓡꓺꓽ꓿ꓬꓲ ꓧꓪ ꓟꓶ ꓗꓷ ꓠꓬ꓾ ꓬꓲ ꓗꓪ ꓛꓳ_ ꓐꓰ ꓠꓶꓽ ꓛꓳ ꓕꓲ ꓛꓳ ꓐꓴ ꓔꓯ ꓘꓴ ꓔꓯꓹ ꓡ ꓢꓲ꓾ ꓥꓪ ꓒꓴꓻ ꓒꓲꓼ ꓬꓰ ꓟ ꓖꓳ ꓕꓲ ꓒꓯꓼ ꓠꓬ ꓧꓪ ꓟꓶ ꓡꓰꓳ꓿ ꓖꓳ ꓡꓱ ꓠꓬꓲ ꓥꓪ_ ꓐꓰ ꓕꓲ ꓡꓰꓹꓼ ꓗꓹ ꓛꓲ ꓡꓯ꓾ ꓐꓰ ꓐꓯ_ ꓡꓳ꓿ꓥꓪ ꓠꓴ ꓪ ꓔꓯ ꓐꓯ ꓖꓶ_ ꓠꓬꓲ꓾ ꓖꓳ ꓟ_ ꓡꓰ ꓐꓰ꓾ ꓝꓴꓲ ꓙꓳ ꓢꓴ ꓕꓲ ꓣꓳ ꓓꓵ ꓙ ꓒꓳꓹ ꓬꓲꓼ ꓡ_ ꓠꓬ꓾ ꓪꓴ-ꓢ ꓬꓲ ꓟꓴ ꓗꓪ ꓝꓲ ꓓꓴ ꓐꓴ ꓗꓳ ꓡꓳ ꓗꓪ ꓬꓲ ꓑꓶ ꓓꓴ ꓗꓹ ꓛꓲ ꓓꓴ ꓙꓳ_ ꓡꓳ꓾ ꓐꓯ_ ꓡꓳ꓿

Add new comment

14 + 6 =

Quick Links