ꓟꓲ ꓠꓯ ꓢꓷꓸ ꓠꓲꓹ ꓐꓰ ꓡꓲꓽ ꓒꓲꓼ

ꓡꓲꓽ ꓒꓲꓼ ꓠꓯꓸꓼ ꓗꓪ ꓟꓽ ꓬꓳꓸ ꓚꓵꓹ ꓟ ꓠꓬ ꓟꓲ ꓠꓯ ꓙꓽ ꓜꓲꓼ ꓠꓲꓹ ꓢꓷꓸ ꓠꓲꓹ ꓥˍ ꓡꓳ= ꓘꓴ ꓜꓲꓼ ꓞꓳ ꓚ ꓟꓲꓽ ꓔꓯ ꓛꓳꓽ ꓠꓬꓲ ꓠꓬ ꓶꓸ ꓕꓯꓽ ꓗꓪ ꓟ ꓙꓰ-ꓢꓴ ꓢꓲ ꓤꓽ ꓐꓴ ꓠꓯꓸꓼ ꓗꓪ ꓢꓷꓸ ꓠꓲꓹ ꓬꓳꓸ ꓚꓵꓹ ꓟ ꓔꓯ ꓘꓴ ꓜꓲꓼ ꓞꓳ ꓪꓴꓸ ꓓꓵ ꓣꓱꓽ ꓢꓴ ꓐꓴ ꓡꓰꓽ ꓐꓯ ꓔ ꓟ ꓙꓳˍ ꓟ ꓡꓳ= ꓚꓵꓸ ꓛꓬ ꓕꓲ ꓽ ꓣꓳ ꓡꓲꓸ ꓕꓲꓽ ꓣꓳ ꓚꓱꓹ ꓐꓰ ꓬꓲꓸ ꓘꓶ ꓡꓶꓽ ꓔꓸ ꓟ ꓫꓵꓽ ꓪꓴ ꓮꓽ ꓟꓬ ꓕꓱ ꓡꓱ ꓙꓳˍ ꓡꓳ= ꓕꓱ ꓡꓲꓺ ꓞꓳ ꓙꓳ ꓢꓯꓸ ꓔꓬ ꓚꓱꓹ ꓗꓪ ꓟꓬ ꓠꓬꓲ ꓐꓶꓹ ꓠꓬꓲ ꓞꓳ ꓙꓳ ꓢꓯꓸ ꓔꓬ ꓗꓴ ꓠꓹ ꓟ ꓠꓬ ꓕꓲ ꓡꓽ ꓞꓳ ꓠꓯꓸꓼ ꓗꓪ ꓟꓬꓱꓽ ꓓꓽ ꓟ ꓟꓯ ꓠꓬꓲ ꓔ ꓥˍ ꓟꓲ ꓬꓲ ꓜꓴ ꓬꓲ ꓟꓯꓼ ꓡꓰ ꓬꓲ ꓙ ꓔ ꓙꓹ ꓟ ꓥˍ ꓟꓲ ꓬꓳꓸ ꓚꓵˍ ꓐꓶ= ꓮ ꓡꓲꓳ ꓐꓯ ꓠꓬ ꓛꓲ ꓡꓹ ꓟ ꓙꓵꓹ ꓗꓪ ꓟꓲ ꓠꓯ ꓗꓪ ꓒꓬꓱꓹ ꓡ ꓠꓬꓲ ꓔ ꓟ ꓠꓬ ꓟꓲ ꓠꓯ ꓢꓷꓸ ꓠꓲꓹ ꓔꓶ ꓒꓬꓱꓽ ꓓꓯꓽ ꓢꓲ ꓗꓪ ꓛꓳꓽ ꓕꓯꓽ ꓢꓷꓸ ꓐ ꓡ ꓡꓳ= ꓢꓷꓸ ꓠꓲꓹ ꓟꓽ ꓢꓷꓸ ꓟ ꓞꓳ ꓤꓽ ꓟꓬꓽ ꓡꓹ ꓠꓬ ꓞꓳ ꓙꓳ ꓢꓯꓸ ꓔꓬ ꓚꓱꓹ ꓥˍ ꓟꓲ ꓐꓬ ꓡꓲ ꓢꓲ꓾ ꓟꓲ ꓠꓯ ꓕꓱ ꓟ ꓥˍ ꓟꓲ ꓐꓬ ꓡꓰ ꓟ ꓗꓷ ꓬꓲ ꓡ ꓓꓴ ꓥꓳ= ꓟꓲ ꓠꓯ ꓢꓷꓸ ꓠꓲꓹ ꓠꓬ ꓢꓷꓸ ꓫꓵꓽ ꓢꓷꓸ ꓙꓵꓽ ꓔꓯ ꓢꓷꓸ ꓠꓹ ꓟ ꓐꓱ ꓖꓶꓽ ꓠꓹ ꓟ ꓡꓰꓽ ꓟꓽ ꓥ= ꓞꓳ ꓤꓽ ꓕꓲꓽ ꓤꓳ ꓮ ꓡꓰ ꓢꓯꓸ ꓔꓬ ꓠꓹ ꓟ ꓮ ꓡꓰ ꓟ ꓥ= ꓞꓳ ꓤꓽ ꓕꓲꓽ ꓣꓳ ꓮ ꓡꓰ ꓢꓯꓸ ꓔꓬ ꓠꓹ ꓟ ꓮ ꓡꓰ ꓔꓬ ꓗꓴꓸ ꓠꓹ ꓟ ꓞꓳ ꓙꓳ ꓢꓯꓸ ꓔꓬ ꓠꓹ ꓟ ꓐꓱ ꓶꓽ ꓖꓳ ꓟ ꓡꓰ ꓟꓽ ꓞꓲ꓾ ꓬꓲ ꓮ ꓡꓰ ꓓꓵꓽ ꓙꓽ ꓗꓴ ꓠꓹ ꓟ ꓮ ꓡꓰ ꓢꓲꓸ ꓠꓲꓹ ꓟ ꓙꓳ ꓠꓹ ꓟ ꓮ ꓡꓲꓳ ꓫꓵꓽ ꓪꓴꓸ ꓠꓷꓸ ꓗꓪ ꓐꓰ ꓬꓰ ꓠꓹ ꓟ ꓡꓲꓽ ꓒꓲꓼ ꓚꓰꓹ ꓗꓪ ꓮ ꓡꓰ ꓢꓷꓸ ꓢꓯꓼ ꓕꓵꓼ ꓠꓹ ꓟ ꓕꓱ ꓡꓲ ˍ ꓫꓵꓽ ꓮꓽ ꓙꓵꓽ ꓔꓯ ꓥˍ ꓟꓲ ꓟꓲ ꓠꓯ ꓢꓷꓸ ꓠꓲꓹ ꓚꓱꓹ ꓗꓪ ꓐꓰ ꓣꓳ ꓔꓯ ꓟꓸ ꓖꓶꓽ ꓐ ꓡ ꓡꓳ=

ꓤꓽ ꓠꓱ ꓤꓼ ꓐꓴ ꓪꓴ-ꓢ ꓟꓸ ꓟꓬꓱ ꓔ ꓢꓷꓸ ꓠꓹ ꓟ ꓐꓱ ꓶꓽ ꓤꓼ ꓠꓱ ꓞꓳ ꓡꓱ ꓐꓴ ꓠꓬ ꓟꓴ ꓕꓲꓸ ꓢꓷꓸ ꓠꓲꓹ ꓔꓯ ꓢꓳ ꓪ ꓡꓰ ꓢꓲꓸ ꓡꓲꓽ ꓒꓲꓼ ꓚꓱꓹ ꓗꓪ ꓥˍ ꓟꓲ ꓟꓬ ꓠꓬꓲ ꓢꓷꓸ ꓪꓴ-ꓢ ꓚꓱꓹ ꓗꓪ ꓥ- ꓟꓲ ꓟꓬ ꓠꓬꓲ ꓢꓷꓸ ꓠ ꓕꓱ ꓡꓲ ꓬꓲ ꓐ ꓡ ꓕꓯꓽ ꓢꓲ ꓟꓲ ꓠꓯ ꓕꓱ ꓟ ꓠꓬ ꓪꓴꓽ ꓡ ꓟꓴ ꓡ ꓓꓴ ꓥꓳ= ꓕꓱ ꓡꓰ ꓪꓴ-ꓢ ꓚꓱꓹ ꓗꓪ ꓥꓳ ꓟꓲ ꓞꓳ ꓤꓽ ꓕꓲꓽ ꓣꓳ ꓞꓳ ꓙꓳ ꓢꓯꓹ ꓔꓬ ꓚꓱꓹ ꓗꓪ ꓥˍ ꓟꓲ ꓢꓷꓸ ꓠꓲꓹ ꓠꓬ ꓮ ꓟꓬ ꓗꓪ ꓛꓲ ꓬꓳꓸ ꓚꓵꓹ ꓟ ꓔ ꓞꓳ ꓤꓽ ꓐꓴ ꓔꓯ ꓢꓷꓸ ꓙ ꓟꓳ ꓙ ꓠꓹ ꓟ ꓐꓱ ꓶꓽ ꓥꓳ ▪ꓲ ꓬꓳꓸ ꓚꓵˍ ꓐꓶ= ꓕꓲ ꓽ ꓦꓲ ꓡꓽ ꓞꓳ ꓘꓴꓽ ꓗꓰ ꓢꓷꓸ ꓠꓲꓹ ꓢꓳ ꓦꓲ ꓗꓪ ꓢꓷꓸ ꓠꓲꓹ ꓢꓷꓸ ꓢꓴˍ ꓐꓰ ꓢꓷꓸ ꓠꓲꓹ ꓔꓯ ꓢꓳ ꓔꓬ ꓢꓴ ꓠꓬꓲꓽ ꓗꓴꓸ ꓚꓸ ꓗꓪ ꓪ ꓜꓲꓺ ꓬꓲ ꓟꓸ ꓟꓲꓽ ꓠꓯˍ ꓟ ꓝꓸ ꓡꓯꓽ ꓘꓳꓹ ꓟ ꓙꓳ ꓡꓳ= ꓖꓳ ꓡꓲ ꓝꓸ ꓡꓯꓽ ꓘꓳꓹ ꓟ ꓙꓳꓹ ꓟ ꓠꓬ ꓢꓷꓸ ꓠꓲꓹ ꓐꓯꓹ ꓟ ꓔꓯ ꓟꓬ ꓠꓬꓲ ꓢꓷꓸ ꓡ ꓝꓲꓸ ꓟ  ꓒꓬꓱꓼ ꓡꓹ ꓟ ꓥˍ ꓡꓳ= ꓖꓳ ꓟ ꓡꓰꓽ ꓟꓽ ꓞꓲ ꓔꓱꓹ ꓚꓵˍ ꓟ ꓐꓰ ꓠꓵ ꓠꓲꓹ ꓠꓬꓲ ꓟ ꓠꓬꓲ ꓗꓴꓸ ꓚ ꓗꓪ ꓐꓹ-ꓐꓽ ꓤꓽ-ꓔꓲꓸ ꓢꓲ-ꓫꓬ ꓟ-ꓦ ꓢꓼ ꓣꓳ ꓕꓲꓽ ꓗꓳ ꓓꓱꓽ ꓡꓰꓽ ꓗꓷ ꓡꓰˍ ꓟ ꓡꓰ ꓐꓰ ꓕꓲꓽ ꓡꓰ ꓢꓷꓸ ꓠꓲꓹ ꓪꓴꓸ ꓠꓬꓲ ꓦꓻ ꓕꓲꓽ ꓒꓳꓹ ꓔꓯ ꓢꓲ ꓗꓪ ꓪꓴꓽ ꓡ ꓟꓴ ꓡ ꓠꓬ ꓢꓽ ꓣꓳ ꓔꓲꓽ ꓗꓳ ꓓꓱꓽ ꓡꓲ ꓐꓰ ꓔ꓾ꓽ ꓟꓸꓼ ꓗꓷ ꓡꓰ ꓓꓴ ꓥꓳ ꓐꓰ ꓕꓱ ꓡꓰ ꓐꓯ ꓡꓳ= ꓕꓱ ꓟ ꓚꓱꓹ ꓔ ꓔꓲ ꓒꓽ ꓪꓸ ꓔꓲꓸ ꓡꓰ ꓐꓳ ꓛꓱ ꓩꓴ ꓡꓹ ꓟ ꓕꓲ ꓦꓲ ꓡ ꓞꓳ ꓚꓱꓹ ꓗꓪ ꓕꓱ ꓡꓲ ꓐꓳ ꓔ ꓡꓳ= ꓟꓲ ꓠꓯ ꓢꓷꓸ ꓠꓲꓹ ꓠꓬ ꓞꓳ ꓤꓽ ꓕꓲ ꓣꓳ ꓡꓰ ꓕꓲꓽ ꓣꓳ ꓔꓯ ꓪꓽ ꓡꓯꓽ ꓘꓳ ꓫꓱꓹ ꓡꓯꓽ ꓘꓳ ꓗꓴ ꓠꓹ ꓟ ꓖꓶꓹ ꓟ ꓡꓰ ꓟ ꓞꓲ ꓞꓳ ꓙꓳ ꓢꓯꓸ ꓔꓬ ꓠꓹ ꓟ꓾ ꓗꓴꓷꓼ ꓐꓱ ꓶꓽ ꓢꓯꓼ ꓕꓵꓼ ꓠꓹ ꓟ꓾ ꓗꓴꓷꓼ ꓘꓴꓽ ꓗꓪ ꓪ ꓙꓵꓽ ꓪꓽ ꓙꓳ ꓟ ꓐꓰ ꓟꓯ ꓠꓹ ꓟ ꓟꓬꓱꓽ ꓙꓳ ꓟ ꓔꓯ ꓟꓬ ꓠꓬꓲ ꓒꓵꓽ ꓗꓴ ꓢꓲ ꓘꓳꓼ ꓣꓴ ꓐ ꓡꓹ ꓟ ꓒꓬꓱꓼ ꓡ ꓝꓲˍ ꓡꓳ= ꓖꓳ ꓟ ꓡꓰꓽ ꓟꓽ ꓞꓲ ꓞꓳ ꓤꓽ ꓔꓯ ꓟꓬ ꓠꓬꓲ ꓐꓶꓹ ꓠꓲ ꓪꓽ ꓡꓯꓽ ꓘꓳ ꓫꓱꓹ ꓡꓯꓽ ꓘꓳ ꓠꓹ ꓟ ꓠꓲꓹ ꓟ ꓙꓳ ꓠꓹ ꓟ ꓐꓱ ꓶꓽ ꓗꓷ ꓡꓰ ꓝꓲˍ ꓟ ꓡꓰ ꓟꓽ ꓞꓲ ꓗꓴꓷꓼ ꓘꓴꓽ ꓗꓪ ꓟ ꓶ ꓜꓼ ꓶ ꓟꓲ  ꓚꓵꓸ ꓛꓬ ꓶ ꓜꓼ ꓶ ꓟꓲ ꓔꓯ ꓮ ꓡꓰ ꓢꓲ ꓣꓱꓽ ꓕꓽ ꓜꓳˍ ꓡ? ꓐꓯꓹ ꓟ ꓤ ꓟꓳ ꓖꓴꓸ ꓔ ꓟ ꓗꓷ ꓡꓰ ꓝꓲˍ ꓡꓳ= ꓢꓷꓸ ꓠꓲꓹ ꓢꓷꓸ ꓔ ꓢꓴ ꓡꓰ ꓫꓹ ꓩꓴ ꓡꓹ ꓟ ꓶ ꓜꓼ ꓶ ꓟꓲ ꓠꓬ ꓞꓳ ꓤꓽ ꓔꓯ ꓙꓲ ꓖꓴ ꓙꓳ ꓟ ꓒꓬꓱ ꓡ ꓝꓲˍ ꓡꓳ=

ꓛꓲ ꓡꓹ ꓟ ꓙꓵꓹ ꓗꓪ ꓞꓳ ꓤꓽ ꓠꓬ ꓮ ꓟꓬ ꓗꓪ ꓛꓲ ꓪꓴꓽ ꓡ ꓟꓴ ꓡ ꓓꓴ ꓥ ꓡ꓾ ꓐꓯ ꓟ ꓠꓬ ꓞꓳ ꓤꓽ ꓮ ꓟꓬ ꓗꓪ ꓛꓲ ꓪꓴꓽ ꓡ ꓟꓴ ꓡꓹ ꓡꓽ?  ꓢꓷꓸ ꓠꓲꓹ ꓮ ꓟꓬ ꓗꓪ ꓛꓲ ꓢꓷꓸ ꓔ ꓡ? ꓦ ꓕꓲꓽ ꓒꓳꓹ ꓗꓪ ꓚꓳ ꓮ ꓟꓬ ꓗꓪ ꓛꓲ ꓪꓴꓸ ꓠꓷꓸ ꓗꓪ ꓗꓷ ꓐ ꓡꓹ ꓡꓽ? ꓐꓯˍ ꓟ ꓕꓯꓽ ꓢꓲ ꓗꓪ ꓬꓳꓸ ꓛꓵ ꓡꓳ= ꓟꓽ ꓙꓲꓹ ꓟ ꓔꓯ ꓡꓳ ꓗꓷ ꓐ ꓡ ꓠ ꓟꓸ ꓖꓶ ꓐ ꓡ ꓠꓬꓲ ꓔ ꓡꓳ= ꓕꓲꓽ ꓫꓵꓽ ꓡꓰ ꓕꓲꓽ ꓫꓵꓽ ꓚꓱ ꓔꓯ ꓕꓲꓽ ꓦꓲ ꓡ ꓞꓳ ꓘꓴꓽ ꓗꓪ ꓥˍ ꓟꓲ꓾ ꓢꓷꓸ ꓠꓲꓹ ꓢꓳ ꓦꓲ ꓗꓪ ꓥˍ ꓟꓲ꓾ ꓟꓴ ꓕꓲꓸ ꓢꓷꓸ ꓠꓲꓹ ꓢꓳ ꓦꓲ ꓗꓪ ꓥˍ ꓟꓲ ꓟꓸ ꓖꓶ ꓢꓲ ꓠꓬꓲ 2000 ꓘꓳꓼ ꓐꓰ 3000 ꓘꓳ ꓠꓬꓲ ꓗꓴꓸ ꓚꓸ ꓗꓪ ꓪꓴ-ꓢ ꓶꓽ ꓓꓽ ꓫꓱꓸ ꓓꓳ ꓟꓬ ꓠꓬꓲ ꓐꓶꓹ ꓠꓬꓲ ꓪꓴꓽ ꓡ ꓟꓴ ꓡ ꓢꓲ ꓞꓳ ꓙꓳ ꓢꓯꓸ ꓔꓬ ꓟ ꓚꓰꓹ ꓗꓪ ꓥˍ ꓟꓲ ꓪꓴ-ꓢ ꓠꓲꓹ ꓡꓶꓽ ꓡꓰ ꓐꓰ ꓙꓲꓹ ꓟ ꓚꓱꓹ ꓗꓪ ꓛꓳ ꓫꓱꓽ ꓐ ꓡ ꓠꓹ ꓟ ꓠꓲꓹ ꓟ ꓗꓷ ꓐ ꓶ ꓟ ꓠꓬ ꓠꓬꓲꓸ ꓠꓬꓲ ꓣꓳꓽ ꓕꓲꓽ ꓞꓲꓼ ꓗꓪ ꓡꓲꓽ ꓒꓲꓼ ꓚꓱꓹ ꓬꓲ ꓫꓵꓼ ꓔꓯ ꓖꓶ ꓐ ꓡꓹ ꓟ ꓟꓲ ꓠꓯ ꓬꓲ ꓫꓵꓽ(ꓟꓳꓸ ꓖꓶꓽ ꓓꓴ) ꓞꓳ ꓤꓽ ꓣꓳꓽ ꓒꓬꓱꓼ ꓡ ꓠꓹ ꓟ ꓢꓯꓼ ꓕꓵꓼ ꓠ ꓗ ꓡꓳ=

Add new comment

3 + 2 =