ꓠꓬꓲ. ꓠꓬꓲ ꓟ ꓤꓽ ꓟꓶꓼ ꓤꓼ ꓚꓱꓹ

ꓠꓬꓲꓹ ꓠꓬꓲ ꓕꓲꓽ ꓞꓲꓼ ꓤꓽ ꓟꓶꓼ ꓤꓼ ꓚꓱꓹ ꓔꓯ ꓟꓳꓸ ꓮ ꓡꓲ ꓕꓲꓽ ꓘꓴꓸ ꓗꓪ ꓥˍ ꓟꓲ ꓮꓽ ꓟꓬ ꓐꓯ ꓔꓬ ꓟ ꓥ ꓡꓳ= ꓖꓳ ꓟ ꓪꓴ ꓠꓬꓲ ꓠꓲ ꓤꓽ ꓟꓶꓼ ꓤꓼ ꓚꓱꓹ ꓠꓬ ꓪꓴꓸ ꓓꓵ ꓛꓹ ꓢꓲ ꓟꓽ ꓐꓯ ꓟꓽ ꓓ ꓟ ꓚꓱꓹ ꓕꓲꓽ ꓟ ꓥ ꓪ= ꓜꓴ ꓠꓯꓸꓼ ꓗꓪ ꓤꓽ ꓟꓶꓼ ꓤꓼ ꓪ ꓠꓬꓲ ꓔꓸ ꓟ ꓟꓬꓱꓽ꓾ ꓙꓵꓽ ꓪꓽ꓾ ꓬꓳ ꓚꓲˍ ꓟ ꓚꓱꓹ ꓠꓬ ꓮꓽ ꓘꓶꓸ ꓐꓯ ꓓꓴ ꓙꓳ ꓡ ꓐꓶ= ꓠꓬꓲꓸ ꓠꓬꓲ ꓠꓬ ꓤꓽ ꓟꓶꓼ ꓤꓼ ꓔꓯ ꓔꓱꓹ ꓕꓽ ꓠꓬꓲ ꓙꓽ ꓟꓶꓽ ꓠꓬꓲ ꓠꓲ ꓕꓱ ꓠꓬꓲ ꓔ ꓟ ꓖꓳ ꓡꓰ ꓗꓶ ꓡꓰꓳ= ꓠꓬꓲꓸ ꓠꓬꓲ ꓪꓴꓽ ꓡ ꓟꓴ ꓡꓹ ꓟ ꓙꓵꓹ ꓗꓪ ꓠꓬ ꓟꓲ ꓠꓯ ꓞꓳ ꓤꓽ ꓜꓴ ꓠꓯꓸꓼ ꓗꓪ ꓮꓽ ꓟꓬ ꓟꓳ ꓓꓹ ꓟ ꓕꓲꓽ ꓫꓵꓽ ꓠꓬ ꓮꓸ ꓫꓵꓽ ꓥꓹ ꓡ? ꓐꓯ ꓟ ꓠꓬ꓾ ꓮꓸ ꓟꓲ ꓮꓸ ꓐꓲ ꓤꓼ ꓠꓱ ꓤꓽ ꓪ ꓟꓵ ꓟꓽ ꓢꓱ ꓟ ꓠꓲꓹ ꓟ ꓗꓶ ꓔ ꓟ ꓕꓲ ꓫꓵ ꓥ ꓡꓳ= ꓤꓼ ꓠꓱ ꓤꓼ ꓣꓴ ꓟ ꓠꓬ ꓮꓽ ꓘꓶꓸ ꓫꓸ ꓔ ꓥꓺꓦꓱ ꓫꓸ ꓥ꓾ ꓜꓽ ꓓꓴ ꓖꓶ ꓫꓸ ꓥ꓾ ꓐꓯ ꓢꓲ ꓠꓬꓲ ꓤꓼ ꓠꓱ ꓣꓴ ꓟꓵ ꓟ ꓫꓱ ꓠ ꓟꓸ ꓖꓶ ꓟ ꓮꓽ ꓟꓬ ꓙꓳ ꓡ ꓓꓳ ꓡ ꓐꓶ= ꓤꓼ ꓠꓱ ꓔꓯ ꓕꓱ ꓡꓱ ꓡꓳꓸ ꓔꓬ ꓟ ꓠꓬ ꓤꓽ ꓟꓶꓼ ꓤꓼ ꓪ ꓙꓵꓽ ꓪꓽ ꓮꓽ ꓘꓶꓸ ꓞꓳꓸ ꓡꓰˍ ꓥ ꓐꓰ ꓕꓱ ꓡꓱ ꓓꓵꓽ ꓙꓽ ꓡ ꓐꓶ= ꓤꓼ ꓠꓱ ꓤꓼ ꓣꓴ ꓟ ꓠꓬ ꓚꓵꓸ ꓚꓬ ꓙꓵꓽ ꓚꓱ ꓐꓰ ꓚꓵꓸ ꓛꓬ ꓓꓱꓹ ꓚꓵꓸ ꓛꓬ ꓙꓵꓹ ꓟ ꓔꓯ ꓙꓴ ꓡꓰ ꓠ ꓚꓳꓹ ꓔ ꓟ ꓕꓲꓽ ꓫꓵꓽ ꓗꓶ ꓡꓰꓳ=

Gꓳ ꓟ ꓪꓴꓸ ꓠꓬꓲ ꓠꓲ ꓮꓸ ꓟꓲꓽ ꓟꓹ ꓟ ꓐꓯꓹ ꓟ ꓮ ꓘꓶꓸ ꓬꓳꓸ ꓚꓵꓹ ꓟ ꓠꓬ ꓟꓬꓱ ꓓꓳꓽ ꓙꓳꓹ ꓟ ꓠꓬ ꓟꓶꓽ ꓡꓰˍ ꓟ ꓕꓱ ꓡꓰ ꓫꓵꓽ ꓗꓶ ꓡ ꓐꓶ= ꓪꓴ-ꓢ ꓠꓬ ꓬꓲ ꓒꓬꓱꓽ ꓡꓰ ꓐꓰ ꓞꓳ ꓤꓽ ꓔꓯ ꓚꓰꓼ ꓔ ꓟ ꓡꓰ ꓐꓰ ꓕꓲꓽ ꓡꓰ꓾ ꓪꓴ-ꓢ ꓚꓰꓼ ꓔ ꓕꓯꓽ ꓬꓲ ꓕꓯꓽ ꓢꓲ ꓕꓲꓽ ꓕ ꓛꓳꓽ ꓥꓳ ꓐꓯ ꓠꓬ ꓪ ꓙꓵꓽ ꓪꓽ ꓕꓲꓽ ꓡꓰꓺ ꓗꓶ ꓡꓰ ꓠ ꓚꓰꓼ ꓔ ꓡꓳ= ꓘꓴ ꓜꓲꓼ ꓞꓳ ꓚ ꓟꓲꓽ ꓗꓪ ꓥˍ ꓟꓲ ꓡꓲꓽ ꓒꓲꓼ ꓚꓱꓹ ꓗꓪ ꓥˍ ꓟꓲ ꓤꓽ ꓑꓸ ꓤꓼ ꓐꓰ ꓤꓽ ꓟꓶꓼ ꓤꓼ ꓪ ꓙꓵꓽ ꓪꓽ ꓖꓶꓽ ꓔ ꓟ ꓥ ꓐꓶ= ꓖꓳ ꓡꓱ ꓥˍ ꓟꓲ ꓤꓽ ꓑꓸ ꓤꓼ ꓐꓰ ꓤꓽ ꓟꓶꓼ ꓤꓼ ꓔꓯ ꓟꓽ ꓪꓽ ꓡꓯꓽ ꓘꓳ ꓟꓽ ꓫꓱꓹ ꓡꓯꓽ ꓘꓳ ꓠ ꓮꓽ ꓟꓬ ꓚꓰꓼ ꓔ ꓟ ꓙꓳ ꓐꓶ= ꓬꓲꓸ ꓚꓰ ꓬꓲꓸ ꓪꓴ 1ꓽ 27 ꓗꓪ ꓟꓬꓽ ꓡ ꓐꓶꓹ ꓡ ꓠ ꓪꓴ-ꓢ ꓠꓬ ꓟꓲ ꓠꓯ ꓞꓳ ꓤꓽ ꓔꓯ ꓚꓰꓼ ꓔ ꓡꓳ ꓕꓱ ꓡꓰ ꓐꓯˍ ꓡꓳ= ꓠꓬꓲ ꓪꓴ-ꓢ ꓟꓬꓱꓽ ꓟꓯ ꓢꓴ ꓐꓴ ꓔꓲ ꓒꓽ ꓐꓴ ꓟꓸ ꓒꓽ ꓟꓸ ꓟ ꓐꓴ ꓠꓬ ꓤꓽ ꓟꓶꓼ ꓚꓱꓹ ꓔꓯ ꓫꓯꓹ ꓑꓱ ꓠꓹ ꓟ ꓮꓽ ꓟꓬ ꓓꓵꓽ ꓙꓽ ꓢꓷꓸ ꓙ ꓚꓱꓹ ꓧꓳ ꓟꓳꓸ ꓖꓶꓽ ꓠꓬꓲ ꓔ ꓥ= ꓮꓽ ꓡꓰꓳ ꓐꓯꓹ ꓠꓬ ꓠꓬꓲꓸ ꓠꓬꓲ ꓓꓵꓽ ꓙꓹ ꓟ ꓐꓰ ꓧꓶꓸ ꓕꓯꓽ ꓓꓵꓽ ꓙꓹ ꓟ ꓠꓬ ꓟꓽ ꓪꓽ ꓡꓯꓽ ꓘꓳ ꓟꓽ ꓫꓱꓹ ꓡꓯ ꓘꓳˍ ꓡꓳ=

ꓐꓯ ꓡꓳꓹ ꓬꓲˍ ꓟ ꓡꓰ ꓐꓰ ꓕꓲꓽ ꓡꓰꓺ ꓤꓼ ꓠꓱ ꓪ ꓟꓵ ꓟꓽ ꓢꓱꓹ ꓟ ꓕꓲꓽ ꓦꓲ ꓡꓽ ꓞꓳ ꓦꓲ ꓕꓴ ꓖꓪ ꓕꓴ ꓠꓹ ꓟ ꓬꓰ ꓟꓵ ꓟꓽ ꓢꓱˍ ꓟ ꓮꓽ ꓟꓬ ꓕꓱ ꓡꓰ ꓗ ꓡ ꓐꓶ= ꓕꓱ ꓟ ꓔꓯ ꓓꓵꓽ ꓙꓽ ꓢꓷꓸ ꓪꓴ-ꓢ ꓠꓲꓹ ꓡꓶꓽ ꓔꓯ ꓛꓳ ꓢꓲ ꓠꓬꓲ ꓟꓬꓽ ꓡ ꓐꓶꓹ ꓡ ꓠ ꓪꓴ-ꓢ ꓠꓲꓹ ꓡꓶꓽ ꓕꓲ ꓡꓰ꓾ ꓟꓸ ꓖꓶꓽ ꓐ ꓡ ꓠꓹ ꓟ ꓢꓯꓽ ꓕꓵꓼ ꓠ ꓡꓳꓼ ꓥ= ꓡꓳꓹ ꓬꓲ ꓟ ꓙꓵꓹ ꓗꓪ ꓤꓽ ꓟꓶꓼ ꓤꓼ ꓐꓴ ꓠꓬ ꓮꓽ ꓟꓬ ꓒꓳꓹ ꓔꓴ ꓟ ꓪ ꓙꓵꓽ ꓪꓽ ꓪ ꓠꓹ ꓟ ꓢꓯꓼ ꓕꓵꓼ ꓟ ꓮꓽ ꓟꓬ ꓬꓲ ꓗꓷꓳ= ꓬꓲ ꓪꓽ ꓐꓯꓹ ꓟ ꓠꓬ ꓤꓽ ꓟꓶꓼ ꓤꓼ ꓐꓴ ꓡꓲꓹ ꓙꓲ ꓠꓹ ꓟ ꓐꓱ ꓶꓽ ꓟꓬ ꓠꓬꓲ ꓐꓶꓹ ꓠꓬꓲ ꓛꓲ ꓔꓴˍ ꓟ ꓔꓯ ꓥꓪ ꓠꓴꓽ ꓬꓰ ꓔꓬ ꓥꓳꓺ ꓐꓰ ꓕꓱ ꓡꓰ ꓐꓯˍ ꓡꓳ= ꓤꓽ ꓟꓶꓼ ꓤꓼ ꓐꓰ ꓤ ꓑꓸ ꓤꓼ ꓕꓲꓽ ꓫꓵꓽ ꓗꓶ ꓡꓰ ꓠ ꓢꓯꓼ ꓕꓴˍ ꓡꓳ= ꓪꓴ-ꓢ ꓚꓰꓼ ꓔ ꓟ ꓠꓯꓸꓼ ꓗꓪ ꓠꓬ ꓤꓼ ꓟꓶꓼ ꓤꓼ ꓐꓰ ꓤꓽ ꓑꓸ ꓤꓼ ꓔꓯ ꓟꓬꓱ ꓓꓳꓽ ꓕꓲꓽ ꓫꓵꓽ ꓗꓶ ꓡꓰ ꓠ ꓚꓰꓼ ꓔ ꓟ ꓥˍ ꓡꓳ= ꓪ ꓩꓴꓽ ꓪꓽ ꓕꓲꓽ ꓫꓵꓽ ꓗꓶ ꓡꓰ ꓠ ꓚꓰꓼ ꓔ ꓟ ꓥˍ ꓡꓳ= ꓖꓳ ꓡꓱ ꓥˍ ꓟꓲ ꓬꓲ ꓪꓽ ꓠꓯꓸꓼ ꓗꓪ ꓬꓲ ꓪꓽ ꓠꓯꓸꓼ ꓗꓪ ꓪꓴ-ꓢ ꓡꓰ ꓖꓶꓽ ꓔ ꓟ ꓧꓪꓽ ꓗꓳ ꓓꓱꓽ ꓠꓬ ꓟꓽ ꓪꓽ ꓡꓯꓽ ꓘꓳ ꓟꓽ ꓫꓱ ꓡꓯꓽ ꓗꓳˍ ꓟ ꓮꓽ ꓟꓬ ꓙꓳ ꓡꓳ ꓐꓯꓹ ꓟ ꓔꓯ ꓟꓬ ꓢꓷꓽ ꓡꓰ ꓡꓬꓽ ꓡꓬꓹ ꓟꓳ ꓪ ꓓ ꓡꓳ= ꓤꓼ ꓟꓶꓼ ꓤꓼ ꓧꓪꓽ ꓗꓳ ꓓꓱꓽ ꓔꓯ ꓮ ꓡꓰ ꓬꓲ ꓥˍ ꓟꓲ ꓤꓽ ꓟꓶꓼ ꓤꓼ ꓐꓯ ꓟ ꓠꓬ ꓟꓶꓽ ꓡꓰ ꓠꓹ ꓟ ꓮꓸ ꓓꓰ ꓫꓸ ꓥ= ꓮ ꓡꓲꓳ ꓐꓯ ꓠꓬ ꓪꓴ-ꓢ ꓠꓬ ꓠꓲꓹ ꓟ ꓗꓪ ꓚꓳꓸ ꓗꓳꓸ ꓑꓳꓸ ꓧꓪꓽ ꓗꓳ ꓓꓱꓽ ꓗꓪ ꓛꓲ ꓤꓽ ꓟꓶꓼ ꓤꓼ ꓠꓬ ꓤꓽ ꓟꓶꓼ ꓤꓼ ꓤꓽ ꓑꓸ ꓤꓼ ꓕꓱ ꓡꓰ ꓚꓰꓼ ꓔ ꓟ ꓥˍ ꓟ ꓪꓴꓸ ꓠꓬꓲ ꓠꓲ ꓕꓲꓽ ꓡꓰꓻ ꓗꓷ ꓡꓰ ꓠꓹ ꓟ ꓠꓬ ꓣꓳꓽ ꓬꓰ ꓟꓽ ꓐ ꓡ= ꓪꓴ-ꓢ ꓠꓬ ꓖꓳ ꓡꓱ ꓟꓽ ꓪꓽ ꓡꓰ ꓘꓳ ꓟꓽ ꓫꓱꓹ ꓡꓰ ꓘꓳ ꓟ ꓧꓪꓽ ꓗꓳ ꓓꓱꓽ ꓙꓳ ꓢꓴ ꓠꓬꓲꓽ ꓣꓳ ꓔꓯ ꓕꓲꓽ ꓦꓲ ꓡꓽ ꓞꓳ ꓗꓶ ꓡꓰ ꓠꓹ ꓟ ꓕꓱ ꓡꓱ ꓔꓶ ꓔ ꓟ ꓥˍ ꓡꓳ=

Add new comment

3 + 0 =