ꓡꓲꓽ ꓒꓲꓼ ꓫꓸ ꓕꓱ ꓕꓯ ꓟꓲ ꓠꓯ ꓢꓷ ꓠꓲꓹ ꓬꓳꓸ ꓛꓵˍ ꓟ (Dialogue with Culture)

Sunday, March 21, 2021

ꓞꓳ ꓡꓱ ꓐꓴ ꓠꓬ ꓟꓲ ꓠꓯ ꓢꓷ ꓠꓲꓹ ꓔꓯ ꓢꓳꓹ ꓟ ꓗꓪ ꓐꓰ ꓟꓬꓽ ꓠꓬꓲ ꓐꓶꓹ ꓠꓬꓲ ꓟꓲ ꓠꓯ ꓢꓷꓸ ꓠꓲꓹ ꓐꓱ ꓶ ꓢꓯꓼ ꓔꓵꓼ ꓐ ꓡꓹ ꓟ꓾ ꓬꓰ ꓙ ꓔ ꓙ ꓐ ꓡꓹ ꓟ꓾ ꓢꓯꓼ ꓖꓶ ꓐ ꓡꓹ ꓟ꓾ ꓖꓳ ꓟ ꓡꓰ ꓟꓽ ꓞꓲ ꓢꓷꓸ ꓠꓲꓹ ꓕꓳ ꓶ ꓔꓯ ꓟꓸ ꓔ ꓟ ꓟꓸ ꓒꓽ ꓐꓴ ꓒꓬꓱꓼ ꓡ ꓠꓹ ꓟ ꓕꓱ ꓡꓰꓳ ꓫꓵꓽ ꓮ ꓟꓬ ꓓꓳ ꓡ ꓠꓹ ꓟ ꓐꓱ ꓶ ꓥˍ ꓡꓳ= ꓕꓱ ꓡꓰ ꓘꓴ ꓜꓲꓼ ꓞꓳ ꓗꓪ ꓐꓰ ꓒꓴ ꓔ ꓟ ꓟꓴ ꓕꓲꓸ ꓢꓳ ꓦꓲ꓾ college꓾ ꓐꓰ ꓕꓲꓽ ꓝꓸ ꓖꓴ ꓕꓲꓽ ꓝꓸ ꓗꓪ ꓟ ꓢꓷꓸ ꓠꓲꓹ ꓔꓯ ꓧꓪ ꓢꓲ ꓪꓴ-ꓢ ꓐꓯ ꓘꓶꓽ ꓔꓯ ꓟꓽ ꓪꓽ ꓡꓯꓽ ꓘꓳ ꓟꓽ ꓫꓱ ꓡꓯꓽ ꓘꓳꓹ ꓟ ꓡꓲꓽ ꓒꓲꓼ ꓘꓴꓽ ꓗꓪ ꓢꓷꓸ ꓙ ꓟꓴ ꓙ ꓐ ꓡ ꓢꓲ ꓟꓬꓽ ꓠꓬꓲ ꓐꓶꓹ ꓠꓬꓲ ꓞꓳ ꓤꓽ ꓮ ꓟꓬ ꓢꓷꓸ ꓡ ꓠꓹ ꓟ ꓐꓱ ꓶ ꓟꓸ ꓖꓶꓽ ꓐ ꓡꓹ ꓟ ꓔꓯ ꓪꓴꓸ ꓓꓵ ꓛꓹ ꓔ ꓟ ꓥˍ ꓡꓳ=

ꓢꓷꓸ ꓠꓲꓹ ꓢꓳ ꓦꓲ ꓗꓪ ꓢꓳ ꓢꓲ ꓠꓬꓲ ꓬꓲ ꓪꓽ ꓠꓬ ꓬꓲ ꓪꓴꓸ ꓬꓲ ꓚꓰ ꓥꓹ ꓟ ꓡꓲꓽ ꓒꓲꓼ ꓚꓱꓹ ꓮ ꓟꓬ ꓗꓪ ꓛꓲ ꓒꓵꓹ ꓟ ꓔꓯ ꓢꓷꓸ ꓡꓰ ꓠꓹ ꓟ ꓡꓲꓽ ꓒꓲꓼ ꓚꓱꓹ ꓚꓵ ꓚꓵ ꓢꓷ ꓡꓰ ꓠꓹ ꓟ ꓬꓲ ꓪꓽ ꓠꓬ ꓬꓰ ꓙ ꓔ ꓙ ꓐ ꓡˍ ꓡꓳ= ꓢꓴ ꓔꓯ ꓖꓶ ꓐ ꓡꓹ ꓡꓳ ꓢꓷꓸ ꓙ ꓟꓴ ꓙ ꓐ ꓡˍ ꓡꓳ= ꓕꓱ ꓟ ꓠꓬ ꓙꓽ ꓜꓲꓼ ꓠꓲꓹ ꓢꓷꓸ ꓠꓲꓹ ꓐꓰ ꓙꓵ ꓠꓲꓹ ꓠꓬꓲ ꓗꓴꓸ ꓚꓸ ꓗꓪ ꓟ ꓢꓷꓸ ꓠꓲꓹ ꓔꓯ ꓣꓱꓽ ꓢꓲ ꓟꓬꓽ ꓠꓬꓲ ꓐꓶꓹ ꓠꓬꓲ ꓡꓲꓽ ꓒꓲꓼ ꓬꓲ ꓟꓸ ꓟꓲ ꓔꓯ ꓢꓷꓸ ꓠꓹ ꓟ ꓚꓱꓹ ꓧꓪꓸ ꓟ ꓥˍ ꓡꓳ= ꓕꓱ ꓡꓰ ꓙꓽ ꓜꓲꓼ ꓠꓲꓹ ꓢꓷꓸ ꓠꓲꓹ ꓕꓯ ꓖꓶˍ ꓕꓯ ꓪꓴꓸ ꓠꓷꓸ ꓗꓪ ꓐꓰ ꓙꓽ ꓜꓲꓼ ꓠꓲꓹ ꓢꓷꓸ ꓠꓲꓹ ꓥˍ ꓟ ꓑꓧꓲꓡꓳꓢꓳꓑꓧꓬ꓾ ꓟꓲ ꓠꓯ ꓚ ꓟꓲꓹ ꓐꓰ ꓕꓳ ꓶ ꓕꓱ ꓡꓰꓳ ꓫꓵꓽ ꓔꓯ ꓪꓴꓸ ꓓꓴ ꓛꓹ ꓢꓲ ꓢꓳꓹ ꓟ ꓗꓪ ꓐꓰ ꓙꓵ ꓠꓲꓹ ꓐꓰ ꓟꓽ ꓪꓽ ꓡꓯꓽ ꓘꓳ ꓟꓽ ꓫꓱꓹ ꓡꓯ ꓘꓳˍ ꓟ ꓡꓲꓽ ꓒꓲꓼ ꓠꓬꓲ ꓗꓴꓸ ꓙꓸ ꓗꓪ ꓟꓬꓽ ꓠꓬꓲ ꓐꓶꓹ ꓠꓬꓲ ꓙꓲˍ ꓟ ꓔꓯ ꓟꓳꓸ ꓖꓶ ꓐ ꓡꓹ ꓟ ꓡꓲꓽ ꓒꓲꓼ ꓐꓰ ꓙꓵ ꓠꓲꓹ ꓕ꓾ꓽ ꓠꓲꓹ ꓕꓲꓽ ꓪꓼ ꓙ ꓫꓱꓽ ꓐ ꓡ ꓠꓹ ꓟ ꓚꓱꓹ ꓔꓯ ꓬꓰ ꓠꓹ ꓟ ꓥˍ ꓡꓳ=

ꓠꓬꓲꓹ ꓠꓬꓲ ꓘꓴ ꓜꓲꓼ ꓞꓳ ꓗꓪ ꓟ ꓟꓴ ꓔꓲꓸ ꓢꓳ ꓦꓲ ꓗꓪ ꓡꓲꓽ ꓒꓲꓼ ꓚꓱꓹ ꓔꓯ ꓟꓳ ꓢꓳꓹ ꓟ ꓟꓴ ꓕꓲꓸ ꓢꓳ ꓦꓲ ꓗꓪ ꓟ ꓡꓲꓽ ꓒꓲꓼ ꓐꓰ ꓫꓸ ꓕꓱꓹ ꓟ ꓚꓱꓹ ꓔꓯ ꓬꓰꓹ ꓟ ꓠꓬ ꓟꓬꓽ ꓠꓬꓲ ꓐꓶꓹ ꓠꓬꓲ ꓬꓳꓸ ꓚꓵˍ ꓟ ꓔꓯ ꓕꓳꓹ ꓕꓲ ꓡꓰ ꓟ ꓙꓳ ꓐꓶ= ꓖꓳ ꓡꓰ ꓢꓲ ꓠꓬꓲ꓾ ꓠꓬꓲꓹ ꓠꓬꓲ ꓙꓲ-ꓢꓴ ꓢꓲ ꓤꓽ ꓐꓴ ꓠꓯꓸꓼ ꓗꓪ ꓡꓲꓽ ꓒꓲꓼ ꓬꓲ ꓫꓵꓼ ꓔꓯ ꓟꓬꓽ ꓠꓬꓲ ꓐꓶꓹ ꓠꓬꓲ ꓛꓵꓽ ꓔꓴ ꓐ ꓡꓹ ꓟ ꓢꓴ ꓮ ꓙꓵꓽ ꓠ ꓠꓹ ꓗꓴ ꓐ ꓡꓹ ꓟ ꓕꓱ ꓡꓰꓳ ꓫꓵꓽ ꓔꓯ ꓟꓸ ꓖꓶ ꓐꓡꓹ ꓐꓶ=