ꓡꓲ ꓒꓰꓼ ꓐꓰ ꓫꓸ ꓕꓱˍ ꓟ(Dialogue with Culture)

ꓧꓪꓸ ꓧꓪꓸꓼ꓾ ꓕꓱ ꓕꓲ ꓙꓵꓹ ꓘꓴ ꓜꓲꓼ ꓞꓳ ꓡꓰ ꓟꓸ ꓖꓶ ꓡˍ ꓟ Social Teaching ꓐꓯˍ ꓟ ꓞꓳ ꓙꓳ ꓢꓯꓸ ꓔꓬ ꓚꓱꓹ ꓠꓯꓸꓼ ꓗꓪ ꓚꓳꓸ ꓢꓲꓺ ꓒ ꓬꓰ-ꓢꓴ ꓡꓰ ꓟꓸ ꓖꓶ ꓡˍ ꓟ ꓡꓲꓽ ꓒꓰꓼ ꓚꓱꓹ ꓔꓯ ꓟꓳꓸ ꓝꓸ ꓢꓲ ꓣꓳꓽ ꓠ ꓠꓹ ꓓꓴ ꓬꓰ ꓡꓯ=

          ꓡꓳꓹ ꓬꓰ ꓟ ꓕꓲ ꓫꓵꓽ ꓠꓽ ꓗꓪ ꓣꓳꓽ ꓠꓬ ꓢꓲꓺ ꓒ ꓬꓰ-ꓢꓴ ꓠꓬ ꓬꓲ-ꓢꓷ-ꓡꓰ ꓡ ꓞꓳ ꓒꓬꓱꓼ ꓡ ꓢꓲ ꓠꓬꓲ ꓬꓴ-ꓔ ꓙꓵꓻ ꓠꓲꓹ ꓔꓯ ꓙꓵꓻ꓾ ꓬꓴ-ꓔ ꓞꓳ ꓤ ꓕꓲ ꓣꓳˍ ꓡꓰ ꓐꓰ ꓬꓲ ꓠꓬ ꓢꓯꓸ ꓔꓬ ꓟ ꓥ ꓪ= ꓖꓳ ꓟ ꓡꓰ ꓐꓰ ꓕꓲ ꓡꓰꓹ ꓬꓴ-ꓔ ꓕꓲ ꓣꓳˍ ꓡꓰ ꓐꓰ ꓬꓴ-ꓔ ꓡꓲꓽ ꓒꓰꓼ ꓞꓳ ꓚꓱꓹ ꓔꓯ ꓮ ꓕꓯ ꓥˍ ꓟꓲ ꓪꓴ-ꓢ ꓗꓴꓷꓼ ꓟꓸ ꓟꓲꓽ ꓚꓺˍ ꓟ ꓠꓯꓸꓼ ꓗꓪ ꓔꓯꓺ ꓢꓲ ꓠꓬꓲ ꓐꓯˍ ꓟ ꓚꓱꓹ ꓔꓯ ꓟꓳꓸ ꓣꓳꓽ ꓡꓳꓸ ꓟꓳꓻ ꓪ ꓓꓹ ꓡꓳ=

          ꓕꓱ ꓕꓲ ꓫꓵꓽ ꓠꓽ ꓗꓪ ꓠꓬ ꓢꓲꓺ ꓒ ꓬꓰ-ꓢꓴ ꓡꓰ ꓮ ꓣꓳ ꓡꓳꓸ ꓒ ꓚꓱꓹ ꓔꓯ ꓟꓳꓸ ꓔꓯꓺ ꓢꓲ ꓐꓯˍ ꓟ ꓔꓯ ꓣꓳ ꓡꓳꓸ ꓟꓳꓻ ꓪ ꓓꓹ ꓡꓳ= ꓖꓳ ꓟ ꓠꓬ ꓪꓴꓽ ꓓꓰ ꓡꓰˍ ꓟ ꓪꓴ-ꓢ ꓠꓵꓻ ꓠꓲꓹ ꓔꓯ ꓟꓬꓽ ꓠꓬꓲ ꓢꓷꓸ ꓡꓰ ꓠꓹ ꓟ ꓐꓱ ꓶ ꓥ ꓡꓳ= ꓬꓳ-ꓦ 10ꓽ11 ꓗꓪ ꓥꓪ ꓠꓬ ꓙꓲꓻˍ ꓟ ꓮ ꓣꓳ ꓡꓳꓸ ꓒ ꓥ ꓡꓳ= ꓙꓲˍ ꓟ ꓮ ꓣꓳ ꓡꓳꓸ ꓒ ꓠꓬ ꓮ ꓣꓳ ꓐꓱ ꓶ ꓬꓲ ꓢꓯꓼ ꓟꓬ ꓔꓯ ꓖꓶ ꓐ ꓡˍ ꓡꓳ꓾ ꓐꓯˍ ꓟ ꓚꓱꓹ ꓔꓯ ꓟꓳꓸ ꓣꓳ ꓡꓳꓸ ꓟꓳꓻ ꓪ ꓓꓹ ꓡꓳ=

ꓬꓴ-ꓔ ꓞꓳ ꓫꓵꓽ ꓐꓴ ꓠꓬ ꓮ ꓣꓳ ꓔꓯ ꓡꓳꓸ ꓔ ꓟ ꓟꓬꓱꓽ ꓔꓯ ꓮꓽ ꓟ ꓥˍ ꓟꓲ ꓕꓲꓽ ꓢꓯꓸ ꓟꓽ ꓥ ꓠꓬ ꓮ ꓟꓬꓹ ꓬꓰ ꓠꓬꓲ ꓢꓴˍ ꓡꓰꓽ ꓥꓳ= ꓕꓲ ꓦꓲ ꓡꓰ ꓕꓲ ꓦꓲ ꓗꓪ ꓚꓲꓸ ꓛꓬ ꓮ ꓣꓳ ꓙꓳˍ ꓟ ꓡꓰ ꓐꓰ ꓕꓲ ꓡꓰꓹ ꓟꓳꓼ ꓙꓳˍ ꓟ ꓮ ꓣꓳ ꓡꓳꓸ ꓔꓶꓸ ꓗꓪ ꓙꓰ ꓢꓲ ꓬꓲꓸ ꓙꓵꓹ ꓘꓶꓽ ꓢꓲ ꓠꓬꓲ ꓮ ꓣꓳ ꓔꓯ ꓡꓳꓸ ꓠ ꓔ ꓡꓳ=

ꓖꓳ ꓟ ꓑꓶꓸ ꓓꓴ ꓮ ꓣꓳ ꓡꓳꓸ ꓒ ꓬꓰ ꓠ ꓔ ꓟ ꓟꓬꓱꓽ꓾ ꓮ ꓣꓳ ꓡꓳꓸ ꓒ ꓟꓯꓻ ꓠ ꓔ ꓟ ꓶꓻ ꓔꓯ ꓬꓲ ꓪ ꓠꓬ ꓢꓷꓸ ꓔ ꓡꓳ= ꓮ ꓣꓳ ꓐꓴ ꓔꓯ ꓬꓲ ꓜꓻ ꓮ ꓟꓬꓹ ꓙꓳˍ ꓟ ꓔꓶꓸ ꓗꓪ ꓧꓳꓽ ꓙꓰ ꓠ ꓔ ꓡꓳ= ꓟꓶꓽ ꓡꓰˍ ꓟ ꓒꓲ ꓡꓰˍ ꓟ ꓮ ꓣꓳ ꓔꓯ ꓧꓪ ꓠ ꓔ ꓡꓳ= ꓮ ꓣꓳ ꓐꓴ ꓢꓯꓼ ꓟꓬ ꓔꓯ ꓒꓬꓹ ꓜꓽ ꓢꓴ ꓐꓴ ꓗꓪ ꓐꓰ ꓡꓳꓸ ꓖꓶ ꓠ ꓔ ꓡꓳ= ꓕꓲ ꓧꓪꓹ ꓧꓪꓹ ꓠꓬ ꓚꓲꓸ ꓛꓬ ꓢꓯꓼ ꓟꓬ ꓔꓯ ꓖꓶ ꓢꓲ ꓡꓳꓸ ꓙ ꓟꓳ ꓙ ꓗꓽ ꓕꓸ ꓙ ꓖꓶˍ ꓟ ꓶꓻ ꓓꓽ ꓟ꓾ ꓟꓬꓱꓽ ꓓꓽ ꓟ ꓔꓯ ꓟꓯꓻ ꓠ ꓗꓹ ꓡꓳ=

ꓬꓲ ꓪ ꓬꓰˍ ꓟ ꓞꓳ ꓚꓱꓹ ꓡꓲꓽ ꓒꓰꓼ ꓔꓯ ꓣꓱꓽ ꓢꓲ ꓢꓲꓺ ꓒ ꓬꓰ-ꓢꓴ ꓠꓬ ꓪꓴ-ꓢ ꓪꓴꓽ ꓓꓰ ꓡꓰˍ ꓟ ꓠꓵꓻ ꓠꓲꓹ ꓚꓱꓹ ꓔꓯ ꓟꓳꓸ ꓟꓬꓽ ꓠꓬꓲ ꓟꓳꓻ ꓠꓹ ꓟ ꓐꓱ ꓶ ꓮ ꓣꓳ ꓡꓳꓸ ꓒ ꓚꓱꓹ ꓔꓯ ꓟꓳꓸ ꓬꓲ ꓠꓬ ꓐꓯ ꓟꓸ ꓖꓶˍ ꓟ ꓥ ꓡꓳ= ꓮ ꓣꓳ ꓡꓳꓸ ꓒ ꓠꓬ ꓢꓯꓼ ꓟꓬ ꓖꓶ ꓗꓷˍ ꓗꓪ ꓛꓲ ꓠꓲꓹ ꓠꓵˍ ꓡꓳ꓾ ꓐꓯˍ ꓟ ꓔꓯ ꓟꓳꓻ ꓠꓹ ꓟ ꓕꓱ ꓡꓱ ꓟꓸ ꓖꓶˍ ꓟ ꓥ ꓪ=

ꓠꓬꓲꓽ ꓟ ꓕꓲ ꓟ꓾ ꓪꓴ-ꓢ ꓠꓲꓹ ꓡꓶꓽ꓾ ꓪꓴ-ꓢ ꓙꓵꓽ ꓗ ꓔꓯ ꓛꓳˍ ꓟ ꓠꓯꓸꓼ ꓗꓪ ꓥꓳꓽ ꓡꓰˍ ꓟ꓾ ꓧꓶꓸ ꓡꓰˍ ꓟ ꓪꓴ-ꓢ ꓙꓵꓽ ꓗ ꓔꓯ ꓔꓯ ꓣꓱꓽ ꓢꓲ ꓠꓬꓲ ꓟꓽ ꓙꓲꓻ ꓟ ꓟꓬꓱꓽ ꓔꓯ ꓬꓰ ꓔꓬ ꓟ ꓔꓯ ꓬꓲ ꓠꓬ ꓫꓬꓹ ꓑꓱ ꓖꓶˍ ꓡꓳ= ꓪꓴ-ꓢ ꓙꓵꓽ ꓗ ꓔꓯ ꓛꓳˍ ꓟ ꓕꓯꓽ ꓢꓲ ꓚꓲꓸ ꓛꓬ ꓠꓲꓹ ꓟ ꓠꓬ ꓚꓲꓸ ꓛꓬ ꓠꓲꓹ ꓟ ꓘꓴꓽ ꓗꓪ ꓢꓲꓽ ꓫꓬ ꓠꓹ ꓟ ꓬꓳꓸ ꓚꓵˍ ꓟ ꓚꓱꓹ ꓔꓯ ꓢꓲꓺ ꓒ ꓬꓰ-ꓢꓴ ꓐꓯ ꓟꓸ ꓖꓶˍ ꓟ ꓠꓬ ꓬꓴ-ꓔ ꓡ ꓞꓳ ꓐꓴ ꓠꓬ ꓙꓵꓻ ꓠꓲꓹ ꓛꓳ ꓚꓱꓹ꓾ ꓞꓳ ꓙꓳ ꓢꓯꓸ ꓔꓬ ꓚꓱꓹ ꓮ ꓙꓵꓽ ꓠꓬ ꓙꓵꓻ ꓠꓲꓹ ꓙꓵꓽ ꓗ ꓗꓪ ꓐꓰ ꓑꓲꓸ ꓔ ꓟ ꓙꓵꓽ ꓪ ꓟꓽ ꓖꓶˍ ꓟ ꓔꓯ ꓟꓽ ꓬꓰ= ꓙꓵꓻ ꓠꓲꓹ ꓗꓪ ꓐꓰ ꓬꓰ ꓝꓲˍ ꓟ ꓙꓵꓽ ꓪ ꓖꓶꓽ ꓡˍ ꓟ ꓔꓯ ꓡꓰꓽ ꓬꓰˍ ꓟ꓾ ꓕꓰ ꓡꓰ ꓛꓳ ꓚꓱꓹ ꓥ ꓡꓳ=

ꓬꓲꓸ ꓪ ꓙꓵꓻ ꓠꓲꓹ ꓔꓯ ꓘꓳꓹ ꓣꓴˍ ꓟ ꓠꓬ ꓚꓲꓸ ꓠꓬ ꓠꓲꓹ ꓟ ꓢꓲꓽ ꓫꓬ ꓠꓹ ꓟ ꓕꓯꓽ ꓢꓲ ꓙꓵꓽ ꓗ ꓔꓯ ꓛꓳˍ? ꓟꓽ ꓛꓳˍ? ꓔꓯ ꓢꓲꓸ ꓠꓬꓲ ꓟꓽ ꓓ ꓬꓳꓸ ꓚꓵˍ ꓟ ꓐꓰ ꓓꓵꓽ ꓙˍ ꓟ ꓥ ꓡꓳ= ꓙꓵꓽ ꓗ ꓔꓯ ꓛꓳˍ ꓟ ꓪꓴꓸ ꓠꓬꓲ ꓡꓲꓽ ꓒꓰꓼ ꓚꓱꓹ ꓘꓴꓽ ꓗꓪ ꓟꓽ ꓔꓱꓹ ꓟ꓾ ꓢꓴ ꓔꓯ ꓫꓱꓸ ꓤˍ ꓟ ꓟꓽ ꓙꓳ ꓟ꓾ ꓠꓵꓻ ꓠꓲꓹ ꓟꓽ ꓙꓳ ꓟ꓾ ꓕꓱ ꓡꓱ ꓫꓵꓽ ꓔꓯ ꓡꓳꓸ ꓟꓳꓻ ꓪ ꓓꓹ ꓡꓳ=

ꓖꓳ ꓟ ꓑꓶꓸ ꓓꓴ ꓢꓲꓺ ꓒ ꓬꓰ-ꓢꓴ ꓡꓰ ꓟꓸ ꓖꓶ ꓡˍ ꓟ ꓠꓬ ꓙꓵꓻ ꓠꓲꓹ ꓚꓱꓹ ꓠꓯꓸꓼ ꓗꓪ ꓒꓳꓹ ꓡꓶꓸ ꓠꓹ ꓟ ꓬꓲꓸ ꓡꓰ ꓟꓸ ꓖꓶ ꓡˍ ꓟ ꓙꓳˍ ꓡꓳ= ꓔꓯꓺ ꓥꓳꓽ ꓐꓯˍ ꓠꓬ ꓟ-ꓕꓲ 5ꓽ21-26 ꓗꓪ ꓞꓳ ꓤ ꓕꓽ ꓢꓰꓼ ꓐꓯˍ ꓟ ꓚꓱꓹ ꓔꓯ ꓟꓳꓸ ꓢꓰꓼ ꓢꓴ ꓠꓬ ꓫꓵꓻ ꓘꓶꓻ ꓔꓶꓸ ꓗꓪ ꓫꓵꓻ ꓘꓶꓻˍ ꓟ ꓔꓯ ꓑꓯꓹ ꓟꓶ ꓠ ꓗꓹ ꓡꓳ= ꓕꓱ ꓡꓰ ꓮ ꓠꓱ ꓕꓯ ꓡꓰ ꓛꓳ ꓠ ꓔ ꓟ ꓡꓲꓽ ꓒꓰꓼ ꓔꓯ ꓞꓳꓸˍ ꓟ ꓘꓳꓹ ꓣꓴ ꓔ ꓟ ꓥ ꓪ=

ꓮ ꓡꓲꓳ ꓐꓯˍ ꓠꓬ ꓢꓲꓽ ꓫꓬ ꓕꓳ ꓶ ꓗꓪ ꓥꓪ ꓙꓵꓽ ꓗ ꓠꓬ ꓬꓲꓼ ꓤ ꓠꓬꓲ ꓤ ꓐꓴ ꓔꓯ ꓠꓲꓹ ꓟ ꓦꓶˍ ꓟ꓾ ꓠꓬꓲꓸ ꓘꓶꓻ ꓔ ꓟ꓾ ꓫꓵꓻ ꓘꓶꓻ ꓔꓶꓸ ꓗꓪ ꓫꓵꓻ ꓘꓶꓻ ꓟꓶ ꓒꓵꓽˍ ꓡꓳ꓾ ꓐꓰ ꓕꓱ ꓡꓱ ꓐꓯꓳ ꓡꓳ= ꓮ ꓬꓲꓼ ꓠꓬꓲ ꓤ ꓔꓯ ꓠꓲꓹ ꓙꓳ ꓢꓴ ꓠꓲꓹ ꓟꓽ ꓦꓰꓽ ꓢꓴ ꓠꓬ ꓫꓵꓻ ꓘꓶꓻ ꓔꓶꓸ ꓗꓪ ꓫꓵꓻ ꓘꓶꓻ ꓡꓰ ꓢꓲ ꓝꓴꓲꓸ ꓖꓶˍ ꓟ ꓟꓶ ꓒꓵꓽˍ ꓡꓳ= ꓖꓳ ꓟ ꓡꓰꓽ ꓟꓽ ꓞꓲꓺ ꓮ ꓬꓲꓼ ꓠꓬꓲ ꓤ ꓔꓯ ꓙꓱꓽ ꓠꓬꓲ ꓬꓰ ꓢꓴ ꓠꓬ ꓖꓰ-ꓦꓯ-ꓠ ꓐꓯˍ ꓟ ꓮ ꓔꓳꓸ ꓮ ꓕꓯˍ ꓟꓲ ꓟꓽ ꓐꓬ ꓡꓰˍ ꓟ ꓮ ꓔꓳꓸ ꓞꓴꓻ ꓢꓰꓼ ꓠꓹ ꓟ ꓝꓴꓲꓸ ꓖꓶ ꓒꓵꓽˍ ꓡꓳ꓾ ꓐꓰ ꓕꓱ ꓡꓱ ꓐꓳ ꓔ ꓡꓳ=

ꓞꓳ ꓤ ꓐꓴ ꓔꓯ ꓕꓽ ꓛꓬꓻ ꓐꓰ ꓧꓶꓸ ꓕꓯ ꓕꓲ ꓞꓲꓼ ꓗꓪ ꓕꓱ ꓡꓱ ꓟꓸ ꓔ ꓡꓳ= ꓖꓳ ꓡꓱ ꓥˍ ꓟꓲ ꓢꓲꓺ ꓒ ꓬꓰ-ꓢꓴ ꓡꓰ ꓟꓸ ꓔ ꓟ ꓠꓬ ꓛꓬꓻ ꓥꓳꓽ ꓡꓰˍ ꓟ ꓡꓰꓽ ꓟꓽ ꓥ= ꓠꓲꓹ ꓟ ꓗꓪ ꓐꓰ ꓢꓴ ꓦꓲꓻ ꓢꓲꓺ ꓒ ꓔꓯ꓾ ꓢꓴ ꓤ ꓟꓶ ꓔꓯ ꓛꓬꓻ ꓥꓳꓽ ꓡꓰˍ ꓟ ꓥˍꓟꓲ ꓝꓴꓲꓸ ꓓꓽ ꓟ ꓥ ꓪ꓾ ꓐꓰ ꓕꓱ ꓡꓱ ꓟꓸ ꓖꓶ ꓡˍ ꓡꓳ=

ꓢꓲꓺ ꓒ ꓬꓰ-ꓢꓴ ꓡꓰ ꓟꓸ ꓖꓶ ꓡˍ ꓟ ꓠꓬ ꓠꓲꓹ ꓟ ꓬꓳꓸ ꓚꓵˍ ꓟ ꓚꓱꓹ ꓔꓯ ꓐꓯ ꓟꓸ ꓖꓶ ꓡˍ ꓟ ꓥ ꓪ= ꓮ ꓟꓬ ꓙꓲˍ ꓫꓵꓽ ꓬꓰˍ ꓥˍ ꓟꓲ ꓠꓲꓹ ꓟ ꓠꓯꓸꓼ ꓗꓪ ꓚꓳꓸ ꓥꓳꓽ ꓡꓰˍ ꓟ꓾ ꓢꓴ ꓔꓯ ꓫꓱꓸ ꓤˍ ꓟ ꓟꓽ ꓙꓳ꓾ ꓢꓴ ꓔꓯ ꓠꓵꓻ ꓠꓲꓹ ꓟꓽ ꓙꓳ꓾ ꓕꓱ ꓡꓱ ꓫꓵꓽ ꓬꓰˍ ꓠꓬ ꓪꓴ-ꓢ ꓙꓵꓽ ꓗ ꓔꓯ ꓛꓳˍ ꓥˍ ꓟꓲ ꓮ ꓣꓳ ꓥꓳ꓾ ꓐꓰ ꓢꓲꓺ ꓒ ꓬꓰ-ꓢꓴ ꓡꓰ ꓕꓱ ꓡꓱ ꓐꓯ ꓟꓸ ꓖꓶ ꓡˍ ꓟ ꓥ ꓪ=