ꓕꓮꓲꓹ ꓗꓴꓷꓼ ꓟꓬꓱꓽ ꓢꓲꓺ ꓓꓽ ꓟ ꓔꓯ ꓙꓵꓽ ꓪꓽ ꓗꓪ ꓐꓰ ꓕꓲ ꓑꓹ ꓠꓽ ꓔꓸ ꓝꓲ ꓟ ꓓꓳꓽ

ꓕꓮꓲꓹ ꓗꓴꓷꓼ ꓙꓵꓽ ꓚꓱꓹ ꓔꓯ ꓟꓳꓸ ꓐꓯ ꓟꓴ ꓕꓲꓺ ꓗꓪ ꓐꓰ ꓮ ꓟꓰ 2022 ꓘꓳꓼ 8 ꓦ 24 ꓠꓬꓲ ꓕꓯꓽ ꓕꓮꓲꓹ ꓗꓴꓷꓼ ꓟꓬꓱꓽ ꓢꓲꓺ ꓓꓽ ꓟ ꓑ-ꓣ-ꓬꓴꓼ (Prayut Chan-o-cha) ꓔꓯ ꓙꓵꓽ ꓪꓽ ꓗꓪ ꓐꓰ ꓕꓲ ꓑꓹ ꓠꓽ ꓔꓸ ꓝꓲꓳ꓾ꓐꓰ ꓢꓷꓸ ꓪ ꓡꓳ= ꓕꓮꓲꓹ ꓑ ꓫꓬ ꓝꓲ ꓓꓴ 172 ꓣꓳ ꓗꓪ ꓐꓰ ꓗꓴꓷꓼ ꓟꓬꓱꓽ ꓢꓲꓺ ꓓ ꓟ ꓑ-ꓣ-ꓬꓴꓼ ꓙꓵꓽ ꓪ ꓠꓬꓲꓺ ꓖꓴ ꓗꓪ 8 ꓘꓳꓼ ꓕꓯꓽ ꓢꓲꓺ ꓔꓬ ꓟ ꓠꓬ ꓕꓮꓲꓹ ꓗꓴꓷꓼ ꓙꓵꓽ ꓗ ꓬꓲꓸ ꓚꓰꓺ ꓔꓯ ꓪꓽ/ ꓟꓽ ꓪꓽ ꓢꓪꓼ ꓖꓶ ꓡꓯ ꓐꓯ ꓢꓲꓸ ꓕꓮꓲꓹ ꓗꓴꓷꓼ ꓙꓵꓽ ꓗ ꓚꓰꓺ ꓔꓯ ꓟꓳꓸ ꓐꓯ ꓟꓴ ꓘꓶꓽ ꓜꓴ ꓗꓪ ꓗꓳꓹ ꓩꓴ ꓡ ꓟ ꓑꓶꓸ ꓓꓴ ꓕꓱ ꓡꓱ ꓠꓽ ꓔꓸ ꓝꓲ ꓟ ꓥ ꓡꓳ ꓐꓰ ꓢꓷꓸ ꓪ ꓡꓳ= ꓗꓳꓹ ꓢꓴ ꓐꓴ ꓵꓺ ꓟꓬꓱꓺ ꓠꓬ 172 ꓣꓳ ꓙꓳˍ ꓠꓬꓲ꓾ ꓬꓲꓸ ꓪ ꓗꓳꓹ ꓘꓶꓽ ꓔꓯ ꓚꓲꓸ ꓚ ꓠꓹ ꓟ ꓐꓱ ꓶ ꓮ ꓟꓰ 8 ꓦ ꓟ 24 ꓠꓬꓲ ꓗꓪ ꓐꓰ ꓪꓴꓸ ꓔꓴ ꓢꓲꓸ ꓚꓲꓸ ꓚ ꓓꓳ ꓬꓰ ꓡꓳ= ꓐꓯ ꓟꓴ ꓘꓶꓽ ꓩꓴ ꓡ ꓕꓲꓽ ꓠꓬꓲ ꓗꓪ ꓛꓲ ꓬꓲꓸ ꓙꓵꓽ ꓪ ꓟꓬꓱꓽ ꓮ ꓙꓵꓽ ꓗꓪ ꓐꓰ ꓠꓽ ꓔꓸ ꓝꓲ ꓓꓴ ꓥ ꓡꓳ ꓐꓰ ꓐꓯ ꓡꓳ=