ꓣꓦꓮ ꓡꓲ-ꓢꓴ ꓓꓳꓽ

1.ꓟꓶ-ꓚꓲ- ꓗꓪ ꓡꓲ-ꓢꓴ ꓤꓽ 2 ꓣꓳ ꓮꓸ ꓕꓽ ꓗꓸ ꓟꓶ ꓡꓰ ꓢꓲ 1 ꓣꓳ ꓫꓵꓻ 1 ꓣꓳ ꓠꓻ ꓫꓬꓹ ꓔꓬ ꓓꓳꓽ

ꓟꓶ-ꓚꓲ-ꓠ ꓡꓳ ꓒꓱ꓾ ꓫꓱ-ꓮꓲꓼ ꓘꓹ ꓜꓴ ꓜꓲꓼ꓾ ꓫꓱ-ꓠ-ꓓꓲ ꓫꓸ ꓜꓰꓸ ꓪꓴꓽ ꓔꓶꓸ ꓗꓪ꓾ ꓡꓳ ꓬꓰ ꓟ 2022 ꓘꓳꓼ 8 ꓦ 7 ꓠꓬꓲ ꓟꓶꓼ ꓘꓶꓼ 8 ꓙꓵꓹ ꓛꓲ ꓕꓯꓽ ꓡꓲ-ꓢꓴ ꓤꓽ 2 ꓣꓳ ꓔꓯ ꓮꓸ ꓕꓽ ꓗꓸ ꓟꓶ ꓡꓰ ꓢꓲ꓾ 1 ꓣꓳ ꓫꓵꓻ 1 ꓣꓳ ꓠꓻ ꓫꓬꓹ ꓔꓬ ꓡꓳ ꓐꓰ ꓢꓷꓸ ꓪ ꓡꓳ=

ꓡꓲ-ꓢꓴ ꓤꓽ ꓠꓬꓲꓽ ꓣꓳ ꓠꓬ ꓫꓸ ꓜꓰꓸ ꓪꓴꓽ ꓔꓬ ꓟ ꓟꓶꓼ ꓡꓯꓸ ꓔꓯ ꓡꓲꓽ ꓡꓲꓽ ꓗ ꓗ ꓫꓸ ꓕꓱ ꓡꓯ ꓘꓳ ꓢꓲ꓾ ꓐꓬꓱꓽ ꓓꓱꓽ ꓟ ꓗꓪ ꓐꓰ ꓒ ꓕꓲ ꓗꓪ ꓔꓬ ꓟ ꓫꓸ ꓜꓰꓸ ꓪꓴꓽ ꓢꓴ ꓟꓶꓼ ꓡꓯꓸ ꓬꓲꓸ ꓠꓲꓹ ꓙꓽ ꓡꓰ ꓠꓲꓹ ꓢꓲꓼ ꓢꓲꓸ ꓮ ꓕꓽ ꓗꓸ ꓡ ꓟ ꓥ ꓡꓳ꓾ ꓐꓯ ꓡꓳ꓿

ꓖꓳ ꓟ ꓑꓶꓸ ꓓꓴ ꓓꓶꓸ-ꓬꓳ-ꓢꓯꓸ ꓔꓯ ꓡꓯ ꓓꓴꓽ ꓘꓴ ꓙꓱ ꓗꓪ ꓡꓯ ꓘꓳꓽ 2 ꓕꓷꓹ ꓡꓯꓼ ꓶꓸ 2 ꓕꓷꓹ꓾ ꓦꓰꓼ ꓟ 1 ꓕꓷꓹ꓾ ꓳ’ ꓟꓶ ꓗꓪ 1 ꓕꓷꓹ ꓗꓸ ꓜꓯꓼ ꓡꓰ ꓐꓰ ꓐꓯ ꓡꓳ= ꓝꓮꓲ ꓮ-ꓒꓴ ꓔꓯ ꓠꓬ ꓳ’ ꓟꓶꓽ ꓗꓪ ꓕꓲ ꓕꓷꓹ ꓗꓸ ꓜꓯꓼ ꓬꓰ ꓢꓲꓸ ꓮ ꓟꓰ  2022 ꓘꓳꓼ 8 ꓦ 8 ꓠꓬꓲ ꓠꓯꓼ ꓝꓲꓸ ꓗꓪ ꓟꓶ-ꓚꓲ-ꓠ ꓠꓯ ꓞꓲꓼ ꓦꓲ ꓗꓪ ꓠꓻ ꓓꓴ ꓖꓳ ꓟ ꓑꓶꓸ ꓓꓴ ꓢꓯꓼ ꓟꓬ ꓡꓳꓹ ꓬꓰꓳ꓾ ꓐꓯ ꓡꓳ꓿ ꓮ-ꓒꓴ ꓠꓬ ꓢꓰꓼ ꓡꓯ ꓘꓳ ꓡ ꓟ ꓗꓪ ꓗꓽ ꓙ ꓟ ꓑꓶꓸ ꓓꓴ ꓗꓸ ꓜꓯꓼ ꓬꓰ ꓢꓲꓸ ꓢꓯꓼ ꓟꓬ ꓖꓶꓽ ꓗꓷ ꓟ ꓥ ꓡꓳ” ꓐꓰ ꓬꓲꓸ ꓫꓵꓽ ꓪꓳꓼ ꓕꓲ ꓣꓳ ꓡꓰꓽ ꓐꓯ ꓔꓸ ꓡꓳ ꓐꓰ ꓐꓯ ꓡꓳ=

2.-ꓚꓲ- ꓡꓳ ꓒꓱ -- ꓞꓳ ꓘꓹ ꓗꓪ ꓪꓲꓣꓰ ꓢꓧꓳꓚꓗ ꓮ ꓔꓳꓸ ꓔꓯꓹ ꓚꓳꓼ ꓡꓰ ꓢꓲ ꓦꓲꓸꓹ ꓕꓲ ꓦꓲꓸꓹ ꓕꓳꓸ ꓐꓬ ꓡꓰˍ ꓓꓳꓽ

ꓟꓲ-ꓚꓲ-ꓠ ꓡꓳ ꓒꓱ ꓓꓴ-ꓗ-ꓕꓮꓳ ꓞꓳ ꓘꓹ ꓗꓪ ꓮ ꓟꓰ ꓟꓶꓽ ꓘꓶꓼ 3 ꓙꓵꓹ ꓕꓯ ꓪꓲꓣꓰ ꓢꓧꓳꓚꓗ ꓮ ꓔꓳꓸ ꓔꓯꓹ ꓚꓳꓼ ꓡꓰ ꓢꓲ ꓦꓲꓸꓹ ꓕꓲ ꓦꓲꓸꓹ ꓮ ꓕꓳꓸ ꓐꓬꓸꓹ ꓡꓰꓳ ꓐꓰ ꓢꓷꓸ ꓪ ꓡꓳ= ꓓꓴ-ꓗ-ꓕꓮꓳ ꓙꓲꓸ ꓔꓲ ꓦꓲꓸꓹ ꓒ ꓕꓲ ꓗꓪ ꓢꓲꓹ ꓒꓲꓽ ꓠꓬꓲꓽ ꓝ ꓦꓲꓸꓹ ꓕꓲ ꓦꓲꓸꓹ ꓪꓲꓣꓰ ꓢꓧꓳꓚꓗ ꓮ ꓔꓳꓸ ꓔꓯꓹ ꓚꓳꓼ ꓡꓰ ꓢꓲ ꓮ ꓔꓳꓸ ꓐꓬꓸꓹ ꓡꓰꓳ꓾ ꓐꓰ ꓞꓳ ꓘꓹ ꓗꓪ ꓔꓬ ꓟ ꓑ ꓫꓬ ꓕꓲ ꓣꓳ ꓡꓰ ꓐꓯ ꓡꓳ ꓐꓰ ꓢꓷꓸ ꓪ ꓡꓳ= ꓕꓱ ꓡꓱ ꓮ ꓔꓳꓸ ꓐꓬꓸꓹ ꓡꓰ ꓟ ꓦꓲꓸꓹ ꓔꓯ ꓮ ꓕꓳꓸ ꓢꓰꓼ ꓜꓴ ꓐꓴ ꓡꓰ ꓮ ꓔꓳꓸ ꓢꓰꓼ ꓟꓳ-ꓓꓴ ꓠꓬꓲꓽ ꓢꓶꓽ ꓗꓪ ꓐꓰ ꓮ ꓔꓳꓸ ꓢꓰꓼ ꓩꓴ ꓡꓳ ꓐꓰ ꓞꓳ ꓘꓹ ꓗꓪ ꓟ ꓑ ꓫꓬ ꓕꓲ ꓣꓳ ꓡꓰ ꓐꓯ ꓡꓳ=

3ꓸꓬꓯꓼ-ꓢꓮꓳꓼ ꓡꓳ ꓒꓱ ꓗꓪ ꓟꓶꓽ ꓦ ꓮ ꓘꓶꓸ ꓦ ꓟ ꓑꓶ ꓓꓴ ꓞꓳ ꓘꓹ ꓗꓪ ꓬꓲꓻ ꓙꓬ ꓓꓵꓽ ꓡ ꓟ ꓓꓳꓽ

ꓐꓶ-ꓬꓲ ꓗꓴꓷꓼ ꓫꓴ꓾ ꓬꓯꓼ-ꓢꓮꓳꓼ ꓡꓳ ꓒꓱ Zawgyi ꓞꓳ ꓘꓹ ꓐꓰ Oat Tandar ꓞꓳ ꓘꓹ ꓗꓪ ꓮ ꓟꓰ 8 ꓠꓬꓲ ꓠꓯꓼ ꓠꓯꓼ ꓙꓵ, ꓗꓪ ꓐꓰ ꓟꓶꓽ ꓦ ꓮ ꓘꓶꓸ ꓦ ꓡ ꓟ ꓑꓶ ꓓꓴ ꓞꓳ ꓘꓹ ꓗꓪ ꓬꓲꓸꓹ ꓙꓬ ꓓꓵꓽ ꓡ ꓡꓳ꓾ ꓐꓰ ꓐꓯ ꓡꓳ= ꓕꓱ ꓡꓱ ꓟꓶꓽ ꓦ ꓮ ꓘꓶꓸ ꓦ ꓡ ꓟ ꓑꓶ ꓓꓳꓽ ꓞꓳ ꓘꓹ ꓗꓪ ꓔꓬ ꓟ ꓙꓲꓻ ꓟ ꓪꓴꓸ ꓠꓬꓲ ꓑ ꓫꓬ ꓐꓴ ꓫꓸ ꓓꓴ ꓔꓳꓹ ꓜꓳꓽ ꓔꓬ ꓡꓳ ꓐꓰ ꓮ ꓔꓳꓸ ꓢꓰꓼ ꓜꓴ ꓐꓴ ꓡꓰ ꓐꓯ ꓡꓳ ꓐꓰ ꓢꓷꓸ ꓪ ꓡꓳ=

ꓕꓱ ꓡꓱ ꓫꓸ ꓓꓳ ꓔꓳꓹ ꓜꓳꓽ ꓔꓬ ꓢꓴ ꓐꓴ ꓔꓯ ꓮ ꓔꓳꓸ ꓢꓰꓼ ꓜꓴ ꓐꓴ ꓐꓰ ꓠꓱꓸ ꓐꓯ ꓬꓰ ꓙ ꓢꓴ ꓜꓴ ꓐꓴ ꓐꓰ ꓕꓲ ꓪ ꓪꓽ ꓡꓯ ꓘꓳ ꓢꓲ ꓬꓰ ꓙ ꓔꓳ ꓙ ꓔꓬ ꓡꓳ ꓐꓰ ꓢꓷꓸ ꓪ ꓡꓳ=

4ꓸꓖꓴ ꓪꓴ. ꓗꓳ-ꓣꓲ-ꓬ ꓗꓴꓷꓼ ꓗꓪ 80 ꓘꓳꓼ ꓬꓲ ꓘꓴꓽ ꓠꓯꓸꓼ ꓗꓪ ꓬꓲꓸꓹ ꓙꓬ ꓘꓶꓸ ꓙꓰ ꓪꓴꓸ ꓠꓬꓲ 7 ꓣꓳ ꓫꓵꓸꓹ꓾ 6 ꓣꓳ ꓟꓶꓬꓰ ꓓꓳꓽ

ꓖꓴ ꓪꓴ.ꓗꓳ-ꓣꓲ-ꓬ ꓗꓴꓷꓼ ꓗꓪ 80 ꓘꓳꓼ ꓬꓲ ꓘꓴꓽ ꓠꓯꓸꓼ ꓗꓪ ꓬꓲꓸꓹ ꓙꓬ ꓮ ꓘꓶꓸ ꓙꓵ ꓽꓡ ꓟ ꓪꓴꓸ ꓠꓬꓲ 7 ꓣꓳ ꓫꓵꓸꓹ꓾ 6 ꓣꓳ ꓟꓶꓽ ꓬꓰ ꓔꓬ ꓡꓳ ꓐꓰ ꓢꓷꓸ ꓪ ꓡꓳ= ꓕꓱ ꓡꓱ ꓟꓶꓽ ꓦ ꓦ ꓬꓲꓸꓹ ꓙꓬ ꓙꓵꓽ ꓡ ꓟ ꓪꓴꓸ ꓠꓬꓲ ꓑ ꓫꓬ ꓐꓴ ꓮ ꓘꓶꓸ ꓫ ꓔꓬ ꓡꓳ ꓐꓰ ꓢꓷꓸ ꓪ ꓡꓳ= ꓟꓶꓽ ꓦ ꓠꓬ ꓕꓱ ꓕꓲ ꓠꓽ ꓟ ꓬꓲ ꓘꓴꓽ ꓗꓪ ꓟꓽ ꓠꓽ ꓦ ꓔꓬ ꓡꓳ ꓐꓰ ꓐꓯ ꓡꓳ=

5ꓸꓬꓲ. ꓪꓴ. ꓕꓲ ꓧꓪ, ꓗ‐ꓕꓳ‐ꓡꓲꓗ ꓢ‐ꓢꓶ‐ꓠ ꓟꓲ‐ꓚꓲ‐ꓠ ꓗꓪ ꓔꓬ ꓮꓽ ꓐꓽ ꓜꓴꓻ ꓐꓴ ꓑꓰ, ꓡꓴ. ꓔꓯꓺ ꓡꓯ ꓘꓳ ꓒꓴ ꓑꓮꓲ ꓬꓰˍ ꓓꓳꓽ

ꓮ ꓟꓰ  8 ꓦ 8 ꓠꓬꓲ 2022 ꓘꓳꓼ꓾ ꓟꓲ‐ꓚꓲ‐ꓠ ꓢ‐ꓢꓶ‐ꓠ ꓗꓪ ꓔꓬ ꓟ ꓮ ꓐ ꓜꓴꓻ ꓐꓴ ꓑꓰ, ꓡꓴ. ꓔꓯꓺ ꓡꓯ ꓘꓳ ꓒꓴ ꓑꓮꓲ ꓔꓯ ꓟꓲ‐ꓚꓲ‐ꓠ Edin ꓢꓲ ꓫꓬ ꓕꓳ ꓶ ꓢꓳꓻ ꓦꓲ ꓡꓳ ꓖꓪ ꓔꓶꓸ ꓗꓪ ꓟꓶꓽ ꓘꓶꓼ ꓙꓵꓹ 3ꓽ30 ꓑꓟ ꓕꓯ ꓬꓰ ꓗꓷꓳ=

ꓕꓱ ꓡꓳ ꓖꓪ ꓑꓮꓲ ꓔꓯ ꓠꓬ  a me 8 ꓦ 8 ꓠꓬꓲ ꓗꓪ ꓐꓰ 8 ꓦ 27 ꓠꓬꓲ ꓗꓪ ꓛꓲ ꓑꓰꓹ ꓔꓯꓺ ꓡꓯ ꓘꓳ ꓓꓴ ꓥ ꓡꓳ꓾ ꓐꓰ ꓢꓷꓸ ꓪ ꓡꓳ=

ꓕꓱ ꓑꓮꓲ ꓗꓪ ꓔꓲꓺ ꓒ Dr. Peter Hka Awng Tu ꓡꓰ ꓙꓵ: ꓪꓴꓸ ꓔꓴ ꓪꓽ ꓘꓴ ꓖꓶ ꓗꓷꓳ= ꓝꓮꓲ ꓔꓲꓺ ꓒ John La Raw ꓗꓪ ꓐꓰ ꓢꓯꓼ ꓖꓶ ꓘꓶꓽ ꓫꓸ ꓕꓱ ꓗꓷꓳ= ꓕꓱ ꓡꓱ ꓬꓰ_ ꓟ ꓬꓲꓸ ꓔꓶꓻ ꓙꓱꓼ ꓠꓬ ꓮꓽ ꓐꓽ ꓜꓴꓻ ꓐꓴ ꓧꓪ: ꓖꓳ ꓓꓱꓽ ꓔꓬ ꓢ ꓠꓹ ꓟ ꓐꓰ ꓬꓯ ꓒꓲꓸ ꓬꓯ (ꓬ) ꓜꓽ ꓓꓳ ꓓꓴ ꓟꓽ ꓙꓳ ꓠꓹ ꓟ ꓐꓱ ꓶ ꓥ ꓡꓳ= ꓬꓲꓸ ꓪꓴꓸ ꓕꓲ ꓟꓶꓽ ꓘꓶꓼ ꓕꓯ ꓰ-ꓓꓲ ꓐꓰ ꓟꓲ-ꓚꓲ-ꓠ ꓑꓰꓹ ꓔꓯꓺ ꓡꓯ ꓘꓳ ꓗꓷꓳ꓾ ꓐꓰ ꓢꓷꓸ ꓪ ꓡꓳ=

 

 

Add new comment

10 + 9 =