Brunei ꓗꓴꓷꓼ ꓗꓪ ꓓꓽ ꓪꓴꓸ ꓟ Brunei ꓞꓳ ꓫꓵꓽ Cardinal ꓙꓵꓽ ꓪ ꓟꓶ ꓡꓰ ꓟ

10 ꓦ ꓟ (25) ꓠꓬꓲ ꓕꓯ ꓾ Brunei ꓗꓴꓷꓼ ꓗꓪ ꓟ ꓔꓲꓺ ꓒ ꓓꓽ Cornelius Sim ꓠꓬ꓾ ꓟꓽ ꓥꓳ ꓡꓳꓸ ꓔ ꓟ ꓓꓵꓽ ꓙ ꓮ’ ꓡꓰ ꓓꓴ ꓓꓳꓽ ꓔꓯ ꓢꓷꓸ ꓗꓷ ꓪ= ꓓꓳꓽ ꓖꓳ ꓟ ꓠꓬ “ꓮ ꓟꓶ ꓡ ꓠꓹ ꓟ꓾ 11 ꓦ ꓟ (28) ꓠꓬꓲ ꓕꓯ Cardinal (13) ꓣꓳ ꓔꓯ Cardinal ꓙꓵꓽ ꓪ ꓖꓶˍ ꓥꓳ”꓾ ꓐꓯˍ ꓟ ꓓꓳꓽ ꓔꓯ ꓔꓲꓺ ꓒ ꓪ ꓔꓲ ꓡꓰ ꓐꓯ ꓖꓶ ꓩꓴ ꓡˍ ꓟ ꓥ ꓡꓳ= ꓖꓳ Cardinal (13) ꓣꓳ ꓘꓴꓽ ꓗꓪ ꓠꓬ ꓾ Brunei ꓗꓪ ꓟ ꓔꓲꓺ ꓒ ꓓꓽ ꓕꓲ ꓣꓳˍ ꓟꓲ ꓐˍ ꓟ ꓥꓳ=

ꓔꓲꓺ ꓒ ꓓꓽ ꓠꓬ “ꓥꓪ ꓠꓬ ꓓꓳꓽ ꓕꓱ ꓟ ꓔꓯ ꓟꓽ ꓥꓳ ꓡꓳꓸ ꓔ= ꓮ ꓟꓶˍ ꓟꓲ ꓠꓲꓹ ꓟ ꓗꓪ ꓮ ꓘꓶꓸ ꓟꓽ ꓙꓵꓻ ꓙꓵꓻ ꓓˍ ꓡꓳ= ꓖꓳ ꓡꓱ ꓥˍ ꓟꓲ ꓙꓲ-ꓢꓴ ꓢꓲ ꓤ ꓐꓴ ꓐꓱ ꓶ ꓠꓽ꓾ ꓢꓯꓼ ꓙꓳ ꓡ ꓓꓴ ꓕꓲ ꓫꓵꓽ ꓥꓳ= ꓮ ꓡꓲꓳ ꓐꓯˍ ꓠꓬ Vatican ꓗꓪ ꓐꓰ Brunei ꓗꓴꓷꓼ ꓗꓪ ꓟ ꓙꓲ-ꓢꓴ ꓢꓲ ꓤ ꓐꓴ ꓔꓯ ꓥˍ ꓟꓲ ꓒꓵꓽ ꓗ ꓬꓰ ꓖꓶˍ ꓟ ꓔꓯ ꓢꓷꓸ ꓪ ꓡꓰ ꓟ ꓥꓳ= ꓖꓳ ꓡꓱ ꓢꓲ ꓕꓲ ꓟꓲꓺ ꓠꓯ ꓡꓱꓸꓼ ꓐꓰ ꓗꓴꓸ ꓙꓲꓽ ꓙꓳˍ ꓟ ꓘꓴ-ꓜꓲ-ꓞꓳ ꓗꓪ ꓐ ꓠꓹ ꓟ ꓙꓵꓽ ꓪ ꓒꓺ ꓐꓲꓸꓼ ꓟꓶ ꓡꓰ ꓟ ꓥꓳ”꓾ ꓐꓰ ꓐꓯ ꓖꓶ ꓗꓷꓳ=

ꓔꓲꓺ ꓒ ꓓꓽ ꓖꓳ ꓕꓲ ꓣꓳ ꓔꓯ (2004) ꓘꓳꓼ ꓕꓯ ꓔꓲꓺ ꓒ ꓪ ꓔꓲ John Paul II ꓡꓰ ꓬꓲꓸ ꓔꓯ ꓢ-ꓢꓶ-ꓠꓽ ꓘꓴꓽ ꓗꓪ ꓙꓵꓽ ꓪ ꓖꓶ ꓗꓷ ꓢꓲ꓾ ꓝꓮꓲ ꓕꓲ ꓘꓳꓼ ꓗꓪ ꓬꓲ ꓠꓬ꓾ Brunei ꓗꓴꓷꓼ ꓗꓪ ꓓꓽ ꓪꓴꓸ ꓟ ꓔꓲꓺ ꓒ ꓓꓽ ꓒꓬꓱꓼ ꓡ ꓗꓷꓳ= Brunei ꓗꓴꓷꓼ ꓠꓬ Southeast Asian ꓗꓴꓷꓼ ꓐꓴ ꓗꓪ ꓮ ꓘꓶꓸ ꓣꓳˍ ꓟ ꓗꓴꓷꓼ ꓕꓲ ꓗꓴꓷꓼ ꓥ ꓢꓲ꓾ Muslim ꓮ ꓟꓬꓹ ꓔꓬ ꓟ ꓗꓴꓷꓼ ꓥ ꓡꓳ= ꓮ ꓟꓶ ꓟ ꓡꓰ ꓐꓰ Brunei ꓗꓴꓷꓼ ꓔꓯ ꓢꓷꓸ ꓙ ꓟꓳ ꓙ ꓖꓶˍ ꓟ ꓪꓴꓸ ꓠꓬꓲ꓾ ꓔꓲꓺ ꓒ ꓓꓽ ꓗꓪ ꓐꓰ ꓔꓲꓺ ꓒ ꓪ ꓔꓲ ꓔꓯ ꓮ ꓘꓶꓸ ꓫꓸ ꓟꓳˍ ꓟ ꓥꓳ=ꓮ ꓡꓲꓳ ꓐꓯˍ ꓠꓬ ꓾ ꓗꓴꓷꓼ ꓘꓴꓽ ꓗꓪ ꓗ-ꓔꓳ-ꓡꓲ ꓘꓴ ꓜꓲ ꓞꓳ ꓙꓳˍ ꓟ ꓔꓯ ꓞꓳ ꓤ ꓮ ꓟꓬꓹ ꓟꓽ ꓢꓷꓸ ꓔ ꓟ ꓾ ꓢ-ꓢꓶ-ꓠꓽ ꓟꓵꓽ ꓗꓪ ꓮ ꓟꓶ ꓟ ꓡꓰ ꓐꓰ ꓢꓷꓸ ꓙ ꓟꓳ ꓙ ꓖꓶꓽ ꓡˍ ꓟ ꓪꓴꓸ ꓠꓬꓲ ꓥ ꓡꓳ= ꓖꓳ ꓡꓱ ꓥˍ ꓟꓲ ꓬꓲꓸ ꓪ ꓐꓴ ꓙꓵꓻ ꓠꓲꓹ ꓠꓽ ꓮ ꓟꓬꓹ ꓕꓶꓻ ꓞꓹ ꓡꓳ=

ꓔꓲꓺ ꓒ ꓓꓽ ꓠꓬ “ꓥꓪ ꓠꓴꓽ ꓠꓬ ꓬꓲꓸ ꓟꓶꓸ ꓘꓴꓽ ꓗꓪ ꓟ ꓬꓲꓸ ꓟꓶꓸ ꓥ ꓡꓳ= ꓥꓪ ꓠꓴꓽ ꓢ-ꓢꓶ-ꓠꓽ ꓟꓵꓽ ꓠꓬ ꓣꓳˍ ꓡꓳ= ꓖꓳ ꓡꓱ ꓥˍ ꓟꓲ ꓥꓪ ꓠꓴ ꓥˍ ꓟꓲ ꓾ ꓮ ꓘꓶꓸ ꓢꓯꓼ ꓕꓵꓼ ꓢꓲ ꓪꓴ-ꓢ ꓗꓴꓷꓼ ꓟꓸ ꓟꓲꓽ ꓚꓺ ꓖꓶ ꓔꓬ ꓡꓳ= ꓘꓴ ꓜꓲ ꓞꓳ ꓔꓯˍ ꓟꓲ ꓮ ꓘꓶꓸ ꓠꓲꓹ ꓠꓵˍ ꓟ ꓪꓴ-ꓢ ꓞꓳ ꓫꓵꓽ ꓥꓳ= ꓕꓱ ꓡꓱ ꓐꓯˍ ꓟ ꓠꓬ ꓚꓲꓸ ꓛꓬ ꓟꓬꓱꓺ ꓓꓳꓽ ꓔꓯ ꓚꓲꓸ ꓛꓬ ꓛꓵ ꓔꓴˍ ꓟ ꓡꓰ ꓐꓰ ꓗꓹ ꓟ ꓪꓴꓸ ꓠꓬꓲ ꓾ ꓐꓯ ꓓꓴ ꓠꓽ ꓟꓽ ꓥ= ꓖꓳ ꓡꓱ ꓥˍ ꓟꓲ ꓘꓴ ꓜꓲ ꓞꓳ ꓠꓬ ꓥꓪ ꓠꓴꓽ ꓟ, ꓟ ꓥ ꓡꓳ”꓾ ꓐꓰ ꓬꓲꓸ ꓗꓹ ꓛꓲꓽ ꓠꓲꓹ ꓔꓯ ꓐꓯ ꓓꓳ ꓗꓷꓳ=

ꓚꓳꓦꓲꓓ ꓠ ꓪꓴꓸ ꓠꓬꓲ ꓔꓲꓺ ꓒ ꓓꓽ ꓠꓬ Vatican ꓗꓪ ꓙꓰ ꓢꓲ꓾ ꓜꓲꓼ ꓓꓴ ꓾ Cardinal ꓐꓴ ꓔꓯ Cardinal ꓣꓱꓽ ꓫꓵꓽ ꓣꓱꓽ ꓙꓰꓽ ꓖꓶˍ ꓟ ꓑꓮꓲꓽ ꓐꓴ ꓗꓪ ꓙꓰ ꓟꓽ ꓙꓰ ꓟ ꓔꓯ ꓠꓬ꓾ ꓟꓽ ꓓꓵꓽ ꓙ ꓞꓷꓹ ꓔ= ꓚꓵꓺ ꓚꓵꓺ ꓐꓯˍ ꓠꓬ ꓾ Cardinal ꓣꓱꓽ ꓫꓵꓽ ꓣꓱꓽ ꓙꓰꓽ ꓐꓴ ꓔꓯ ꓙꓲ-ꓢꓴ ꓢꓲ ꓤ ꓐꓴ ꓐꓱ ꓶ꓾ ꓑ ꓫꓬ ꓐꓴ ꓟꓲꓽ ꓙꓬꓼ ꓗꓪ ꓣꓱꓽ ꓛꓰꓽ ꓙꓳ ꓙꓳ ꓡꓰꓽ ꓘꓳꓹ ꓣꓴ ꓠꓯˍ ꓟ ꓥꓳ=

Photo courtesy of: LiCAS News

https://bit.ly/2UN0Q66