Covid ꓦꓬꓼ ꓠꓬꓲ ꓘꓴꓽ ꓠꓯꓸꓼ ꓗꓪ ꓟꓬꓱꓽ ꓪ ꓠꓹ ꓟ / ꓟꓬꓱꓽ ꓟꓶ ꓠꓹ ꓟ ꓐꓱ ꓶ American ꓗꓴꓷꓼ Kentucky ꓗꓪ ꓟ ꓗ-ꓔꓳ-ꓡꓲ ꓐꓴ ꓬꓰ ꓙˍ ꓟ

Covid ꓠꓻ ꓫꓵꓽ ꓪꓴꓸ ꓠꓬꓲ American ꓗꓴꓷꓼ ꓗꓪ ꓟ ꓶꓻ ꓡꓯꓼ ꓟꓬꓱꓽ ꓮ ꓟꓬꓹ ꓞꓰ ꓡꓰ ꓢꓲ꓾ ꓟꓬꓱꓽ ꓮ ꓟꓬꓹ ꓠꓽ ꓗꓷ ꓪ ꓡꓰꓳ= ꓖꓳ ꓡꓱ ꓠꓬꓲ ꓟꓬꓱꓽ ꓬꓰ ꓢꓴ ꓮ ꓟꓬꓹ ꓠꓬ ꓟꓬꓱꓽ ꓟꓽ ꓙꓳ ꓗꓷ ꓡꓰ ꓢꓲ꓾ ꓜꓽ ꓓꓴ ꓐꓱ ꓶ ꓮ ꓘꓶꓸ ꓫ ꓡꓰꓳ= ꓖꓳ ꓕꓲ ꓙꓵꓹ ꓗꓪ American ꓗꓴꓷꓼ Kentucky ꓗꓴꓷꓼ ꓫꓴ ꓗꓪ ꓟ ꓗ-ꓔꓳ-ꓡꓲ ꓕꓲ ꓣꓳ ꓡꓰ ꓬꓰ ꓙˍ ꓟ ꓟꓬꓱꓽ ꓬꓰ ꓪꓴꓸ ꓔꓴ ꓗꓷꓳ=

Louisville’s Epiphany Parish ꓗꓪ ꓐꓰ Brayton Bowen ꓐꓰ ꓟꓬꓱꓺ ꓔ ꓟ ꓘꓴ-ꓜꓲ-ꓞꓳ ꓢꓲꓺ ꓤ ꓕꓲ ꓣꓳ ꓠꓬ꓾ “Rethinking Employment: New-Age Branding” ꓐꓰ ꓟꓬꓱ ꓔ ꓟ ꓟꓬꓱꓽ ꓧꓪ ꓓꓴ Website ꓕꓲ ꓟ ꓫꓬꓹ ꓗꓷꓳ= ꓬꓲ ꓠꓬ “HR(ꓟꓬꓱꓽ ꓬꓰ ꓠꓹ ꓟ ꓬꓰ ꓔꓬꓹ ꓢꓴ ꓐꓴ ꓔꓯ ꓣꓱꓽ ꓞꓹ ꓟ ꓗꓪ ꓬꓰ ꓙ ꓢꓴ)  ꓗꓪ 20 ꓘꓳꓼ ꓛꓲꓺ ꓬꓰ ꓗꓷ ꓢꓴ ꓥ ꓡꓳ=

ꓗ-ꓔꓳ-ꓡꓲ ꓓꓳꓽ ꓦ ꓖꓴ ꓗꓪ ꓫꓸ ꓕꓱˍ ꓕꓯ꓾ ꓬꓲ ꓬꓰ ꓔꓬꓹ ꓟ ꓟꓬꓱꓽ ꓗꓪ ꓠꓬ ꓟꓬꓱꓽ ꓟꓶ ꓠꓹ ꓟ ꓐꓱ ꓶꓼ ꓡꓰꓽ ꓟꓽ ꓛꓲꓺ ꓾ ꓟꓬꓱꓽ ꓠꓽ ꓗꓷ ꓪ ꓡꓰ ꓢꓴ ꓐꓴ ꓔꓯ ꓠꓲꓹ ꓗꓴ ꓟꓬ ꓗꓴ ꓖꓶˍ ꓟ ꓔꓯˍ ꓟꓲ ꓬꓰ ꓾ ꓬꓲꓸ ꓟꓬꓱꓽ ꓠꓬ ꓟꓬꓱꓽ ꓧꓪꓺ ꓚꓱꓹ ꓾ Interview ꓒꓳꓹ ꓚꓱꓹ ꓐꓴ ꓔꓯ ꓥˍ ꓟꓲ ꓟꓸ ꓖꓶꓽ ꓢꓲ꓾ ꓟꓬꓱꓽ ꓧꓪꓺ ꓢꓴ ꓐꓴ ꓚꓲꓸ ꓛꓬ ꓟꓸ ꓟꓲꓽ ꓐꓳ ꓔˍ ꓟ ꓕꓳꓽ ꓶꓽ ꓐꓴ ꓠꓬ ꓬꓲꓸ ꓔꓬꓹ ꓗꓪ ꓛꓲ ꓡ ꓢꓲ꓾ ꓬꓲꓸ ꓗꓪ ꓐꓰ ꓕꓲꓽ ꓝꓸ ꓟꓬꓱꓽ ꓗꓪ ꓧꓳꓽ ꓖꓶˍ ꓟ ꓥ ꓡꓳ=

ꓟꓬꓱꓽ ꓧꓪˍ ꓕꓯ ꓣꓱꓽ ꓞꓹ ꓟ ꓚꓲꓸ ꓛꓬ ꓟꓸ ꓟꓲ ꓚꓱꓹ ꓐꓴ ꓔꓯ  ꓠꓬ email , ph , skype ꓗꓪ ꓐꓰ ꓖꓶꓽ ꓩꓴ ꓠ ꓔ ꓡꓳ= ꓟꓬꓱꓽ ꓧꓪꓺ ꓢꓴ ꓐꓴ ꓠꓬ ꓗ-ꓔꓳ-ꓡꓲ ꓘꓴ-ꓜꓲ-ꓞꓳ ꓟꓽ ꓥˍ ꓟꓲ ꓬꓲ ꓬꓰ ꓙˍ ꓡꓳ=

ꓬꓲ ꓠꓬ꓾ “ ꓟꓬꓱꓽ ꓠꓽ ꓗꓷ ꓪˍ ꓕꓯ ꓾ ꓞꓳ ꓤ ꓮ ꓙꓵꓽ ꓠꓬ ꓠꓲꓹ ꓟ ꓙꓬ ꓡꓰ ꓢꓲ꓾ ꓚꓲꓸ ꓛꓬ ꓣꓱꓽ ꓛꓰꓽ ꓔꓯ ꓟꓽ ꓟꓳ꓾ ꓚꓲꓸ ꓛꓬ ꓔꓱꓹ ꓚꓲꓸ ꓛꓬ ꓠꓬꓲꓺ ꓟꓽ ꓟꓵꓺ ꓗꓷ ꓡꓰˍ ꓡꓳ= ꓥꓪ ꓠꓴ ꓔꓶꓻ ꓙꓱꓼ ꓠꓬ ꓞꓳ ꓤ ꓕꓲ ꓣꓳ ꓡꓰ ꓕꓲ ꓣꓳ ꓠꓯꓸꓼ ꓗꓪ ꓓꓯꓹ ꓟ ꓣꓱꓽ ꓛꓰꓽ ꓾ ꓒꓵꓽ ꓶ ꓔꓯ ꓚꓬꓹ ꓪ ꓡꓰ ꓢꓲ꓾ ꓥꓳ ꓡꓳꓸ ꓓꓴ ꓙꓳ ꓡ ꓠꓹ ꓟ ꓐꓱ ꓶ ꓥ ꓡꓳ꓾” ꓐꓰ CNA ꓗꓪ ꓐꓯ ꓖꓶꓽ ꓗꓷꓳ=

Photo courtesy of: ArTono/Shutterstock

https://bit.ly/39PUkSY