Nigeria ꓗꓪ ꓒꓴ ꓓꓰꓽ ꓠꓹ ꓟ ꓐꓱ ꓶ ꓔꓲꓺ ꓟ ꓡꓲꓸ ꓣꓳ ꓔꓯ ꓣꓴ ꓔꓯꓹ ꓙꓰ ꓟ

Nigeria ꓗꓪ ꓒꓴ ꓓꓰꓽ ꓠꓹ ꓟ ꓐꓱ ꓶ ꓔꓲꓺ ꓟ ꓡꓲꓸ ꓣꓳ ꓔꓯ ꓣꓴ ꓔꓯꓹ ꓙꓰ ꓟ ꓓꓳꓽ

Nigeria ꓗꓴꓷꓼ ꓐꓶ ꓓꓳ ꓖꓴ ꓟꓶꓸ ꓲ-ꓟꓳ ꓗꓴꓷꓼ ꓫꓴ꓾ Okigwe-Umulolo ꓡꓳ ꓒꓱ ꓗꓪ 2022 ꓘꓳꓼ 8 ꓦ 21 ꓠꓬꓲ꓾ ꓠꓽ ꓦꓬ ꓠꓬꓲ ꓕꓯ ꓟꓽ ꓙꓲꓻ ꓢꓴ ꓐꓴ ꓡꓰ ꓗ-ꓕꓳ-ꓡꓲꓗ ꓔꓲꓺ ꓟ 4 ꓣꓳ ꓔꓯ ꓣꓴ ꓔꓯꓹ ꓙꓰ ꓗꓷꓳ=

ꓔꓲꓺ ꓟ Johannes Nwodo, ꓔꓲꓺ ꓟ Christabel Echemazu, ꓔꓲꓺ ꓟ Liberata Mbamalu ꓐꓰ ꓔꓲꓺ ꓟ Benita Agu ꓐꓴ ꓠꓬ ꓟꓲ-ꓢ ꓪꓽ ꓘꓴ ꓓꓴ ꓙꓰˍ ꓟ ꓙ ꓖꓴ ꓗꓪ ꓣꓴ ꓔꓯꓹ ꓙꓰ ꓟ ꓥ ꓡꓳ꓾ ꓐꓰ ꓢꓷꓸ ꓪ ꓡꓳ=

ꓣꓴ ꓔꓯꓹ ꓙꓰ ꓟꓶˍ ꓟ ꓔꓲꓺ ꓟ ꓐꓴ ꓠꓬ ꓚꓬꓴꓸ ꓢꓲ ꓒ ꓬꓰ-ꓢꓴ ꓔꓲꓺ ꓟ ꓜꓴ ꓗꓪ ꓐꓰ ꓥ ꓢꓲ ꓠꓬꓲ ꓬꓲ ꓪ ꓔꓯ ꓣꓴ ꓔꓯꓹ ꓙꓰ ꓟ ꓓꓳꓽ ꓔꓯ ꓔꓲꓺ ꓟ ꓜꓴ ꓗꓪ ꓔꓳꓹ ꓙ ꓟꓬꓱꓽ ꓬꓰ ꓢꓴ ꓔꓲꓺ ꓟ Zita Ihedoro ꓡꓰ ꓐꓯ ꓑꓶ ꓗꓷ ꓟ ꓥ ꓡꓳ=

Nigeria ꓗꓪ ꓟ ꓙꓲ-ꓢꓴ ꓢꓲ ꓤ ꓐꓴ ꓔꓯ ꓣꓴ ꓔꓯꓹ ꓙꓰˍ ꓟ ꓠꓬ ꓟꓽ ꓟꓶ ꓫꓵˍ ꓟ ꓬꓲ ꓘꓳꓼ ꓘꓴꓽ ꓗꓪ ꓮ ꓟꓬꓹ ꓧꓪꓹ ꓒꓬꓱꓼ ꓡ ꓟ ꓥ ꓢꓲ꓾ ꓗꓳꓸ ꓗꓷ ꓟ ꓕꓲ ꓠꓽ ꓗꓪˍ ꓟꓲ Okigwe ꓡꓳ ꓒꓱ ꓐꓰ Umunneochi ꓡꓳ ꓒꓱ ꓠꓬꓲꓽ ꓗꓴꓸ ꓚꓸꓼ ꓗꓪ ꓟ ꓙ ꓖꓴ ꓗꓪ ꓗ-ꓕꓳ-ꓡꓲꓗ ꓔꓲꓺ ꓒ ꓐꓰ ꓢꓷꓸ ꓠꓲꓹ ꓟꓸ ꓒ ꓕꓲ ꓣꓳ ꓔꓯ ꓣꓴ ꓔꓯꓹ ꓙꓰ ꓢꓲ꓾ ꓠꓬꓲꓽ ꓠꓬꓲ ꓗ ꓠꓯꓸ ꓡꓲꓹ ꓩꓴ ꓖꓶ ꓡ ꓟ ꓥ ꓡꓳ= ꓘꓴ-ꓜꓲ-ꓞꓳ ꓗꓪ ꓧꓳꓽ ꓣꓱꓽ ꓢꓴ ꓐꓴ ꓠꓬ ꓢꓲ ꓤ ꓐꓴ ꓙꓲ ꓣꓴ ꓓꓴ ꓟꓽ ꓙꓳ ꓠꓹ ꓟ꓾ ꓬꓲ ꓪ ꓑ ꓫꓬ ꓐꓴ ꓫ ꓓꓴ ꓟꓽ ꓔꓳꓹ ꓜꓳꓽ ꓠꓹ ꓟ ꓬꓰ ꓖꓶ ꓠꓹ ꓟ ꓐꓱ ꓶ ꓗꓴꓷꓼ ꓙꓵꓽ ꓢꓴ ꓐꓴ ꓔꓯ ꓓꓰꓽ ꓔ ꓡꓳ꓾ ꓐꓰ ꓢꓷꓸ ꓪ ꓡꓳ=