ꓝꓲ ꓓꓴ ꓟꓬꓱꓽ ꓗꓪ ꓟꓽ ꓓꓵꓽ ꓙ-ꓸ ꓟꓽ ꓥꓳ ꓡꓳꓸ ꓟ ꓚꓱꓹ ꓗꓪ ꓐꓰ ꓥ ꓟꓲ ꓙꓸꓸ ꓫꓱ: ꓓꓴ ꓣꓱꓽ ꓬꓯꓼ_ ꓟ

ꓝꓲ ꓓꓴ ꓟꓬꓱꓽ ꓗꓪ ꓟꓽ ꓓꓵꓽ ꓙ-ꓸ ꓟꓽ ꓥꓳ ꓡꓳꓸ ꓟ ꓚꓱꓹ ꓗꓪ ꓐꓰ ꓥ ꓟꓲ ꓙꓸꓸ ꓫꓱ: ꓓꓴ ꓣꓱꓽ ꓬꓯꓼ_ ꓟ

            ꓔꓲꓸꓸ ꓒ ꓪ ꓔꓲ ꓡꓰ ꓡꓽ ꓞꓳ ꓐꓴ ꓐꓰ ꓜꓲꓸꓸ ꓡꓯꓼ ꓘꓳ_ ꓟ ꓠꓽ ꓢ ꓠꓬꓲ ꓗꓪ ꓖ-ꓡ-ꓕꓲ-ꓬ ꓘꓴ ꓜꓲꓼ ꓞꓳ ꓔꓯ ꓝꓲ ꓓꓴ ꓒꓳ-ꓡꓳ ꓡꓰ ꓐꓳ ꓔ ꓟ ꓕꓳ ꓶ ꓗꓪ ꓐꓰ ꓚ_ ꓟ ꓥꓳ=

            ꓝꓲ ꓓꓴ ꓒꓳ-ꓡꓳ ꓠꓬ ꓬꓲ ꓒꓳꓹ ꓡꓲꓼ_ ꓟ ꓐꓰ ꓬꓰ-ꓢꓴ ꓝꓲ ꓓꓴ ꓟꓬꓱꓽ ꓔꓯ ꓬꓰ ꓠꓹ ꓟ ꓐꓱ ꓶ ꓬꓲ ꓤꓶꓸꓹ ꓔꓯ ꓡꓯꓼ ꓙꓱ ꓠꓹ ꓟ ꓐꓱ ꓶ ꓓꓵꓽ ꓙ ꓞꓷꓹ ꓗꓷ ꓟ ꓔꓯ ꓣꓳ ꓢꓷꓸ ꓠꓹ ꓟ-ꓸ ꓶꓼ ꓓꓳ ꓫꓱꓸ ꓓꓳ ꓗꓪ ꓐ_ ꓡꓳ ꓐꓰ ꓔꓲꓸꓸ ꓒ ꓪ ꓔꓲ ꓡꓰ ꓐꓯ_ ꓡꓳ= ꓡꓲꓹ ꓙꓰ ꓟ-ꓸ ꓶꓼ ꓤ ꓫꓱꓸ ꓤ ꓐꓰ ꓙꓲ-ꓢꓴ ꓢꓲ ꓤ ꓐꓴ ꓚꓱꓹ ꓡꓰ ꓐꓰ ꓮ ꓘꓶꓸ ꓣꓳꓸ ꓚꓵ_ ꓟ ꓠꓬ “ ꓣꓳ ꓮ ꓟꓶ ꓤꓶꓸꓹ ꓗꓪ ꓢ-ꓢꓶ-ꓠ ꓟꓬꓱꓽ ꓚꓱꓹ ꓠꓯꓼ ꓗꓪ ꓮ ꓟꓬꓹ ꓐ_ ꓟ ꓥꓳ” ꓐꓰ ꓐꓯ ꓢꓲ-ꓸ ꓕꓱ ꓟ ꓠꓬ ꓝꓲ ꓓꓴ ꓒꓳ-ꓡꓳ ꓔꓯ ꓟꓬ ꓠꓬꓲ ꓢꓷꓸ ꓡ_ ꓟ ꓡꓰ ꓟꓽ ꓞꓲ ꓶꓼ ꓓꓳ ꓫꓱꓸ ꓓꓳ ꓔꓯ ꓟꓸ ꓠꓹ ꓟ ꓐꓱ ꓶ ꓣꓳꓸ ꓚꓵ_ ꓟ ꓔꓯ ꓟꓸ ꓖꓶ_ ꓟ ꓕꓳ ꓶ ꓥ ꓡꓳ=

ꓝꓲ ꓓꓴ ꓒꓳ-ꓡꓳ ꓝꓲ ꓓꓴ ꓟꓬꓱꓽ

            ꓖ-ꓡ-ꓕꓲ-ꓬ ꓕꓳ ꓶ ꓗꓪ ꓓꓽ ꓪꓴꓸ ꓕꓳ ꓶ ꓗꓪ ꓠꓬ ꓢ-ꓢꓶ-ꓠ ꓟꓬꓱꓽ ꓬꓰ_ ꓟ ꓙꓵꓹ ꓗꓪ ꓠꓬꓲꓽ ꓧꓪꓹ ꓛꓲ_ ꓟ ꓶꓽ ꓓꓳ ꓫꓱꓸ ꓓꓳ ꓟꓬꓱꓽ ꓥ ꓟ-ꓸ ꓝꓲ ꓓꓴ ꓒꓳ-ꓡꓳ ꓟꓵꓽ ꓐꓰ ꓕꓳ ꓶ ꓔꓯ ꓐꓳ ꓔ ꓟ ꓦꓬꓼ ꓠꓬꓲ ꓟꓽ ꓢꓷꓸ ꓟꓲ ꓖ-ꓡ-ꓕꓲ-ꓬ ꓞꓳ ꓫꓵꓽ ꓐꓴ ꓠꓬ ꓖꓳ ꓕꓲ ꓙꓵꓹ ꓗꓪ Anatolia ꓐꓰ Ancyra ꓗꓪ ꓔꓬ ꓢꓴ ꓥ ꓟ-ꓸ ꓝꓲ ꓓꓴ ꓒꓳ-ꓡꓳ ꓠꓸꓹ ꓔꓬ ꓟ ꓑꓶ ꓓꓴ ꓖꓳ ꓗꓪ ꓔꓬ ꓟ ꓥꓳ ꓐꓰ ꓐꓯ ꓟꓸ ꓖꓶ_ ꓡꓳ= ꓖꓳ ꓡꓱ ꓥ ꓟꓲ ꓝꓲ ꓓꓴ ꓕꓳ ꓶ ꓗꓪ ꓠꓬ ꓝꓲ ꓓꓴ ꓡꓴ-ꓘ ꓗꓪ ꓐꓰ ꓦ ꓕꓲ ꓒꓳꓹ ꓗꓪ ꓢꓯꓼ ꓖꓶ_ ꓟ ꓔꓯ ꓟꓳ ꓪ ꓡꓳ= “ꓢꓲ-ꓫꓬ-ꓟ-ꓦ ꓡꓰ ꓬꓲ ꓪ ꓔꓯ ꓮ-ꓢꓲ-ꓬ ꓟꓵꓽ ꓗꓪ ꓪꓴ-ꓢ ꓐꓯ ꓘꓶ ꓟꓽ ꓚ ꓙꓰ ꓝꓲ ꓠꓬꓲ-ꓸ ꓬꓲ ꓪ ꓠꓬ ꓩ-ꓡꓴ-ꓚꓲ-ꓬ ꓟꓵꓽ_ ꓐꓰ ꓖ-ꓡ-ꓕꓲ-ꓬ ꓟꓵꓽ ꓗꓪ ꓗꓳꓸ ꓙꓸꓹ ꓙꓰ_ ꓡꓳ=” (ꓝꓲ ꓓꓴ 16ꓽ6)

ꓫꓸ ꓙꓵ ꓟꓶ ꓙꓵ_ ꓟ ꓗꓪ ꓐꓰ ꓙꓽ ꓫꓸ ꓟ

            ꓝꓲ ꓓꓴ ꓒꓳ-ꓡꓳ ꓡꓰ ꓘꓴ ꓜꓲꓼ ꓞꓳ ꓔꓯ ꓔꓳꓹ ꓓꓳ ꓕꓯ ꓬꓴ-ꓔ ꓗꓪ ꓐꓰ ꓓꓵꓽ ꓡ ꓢꓴ ꓙꓲ-ꓢꓴ ꓢꓲ ꓤ ꓐꓴ ꓕꓲ ꓐꓱ ꓠꓬ ꓬꓲ ꓟꓸ ꓖꓶ_ ꓟ ꓔꓯ ꓟꓽ ꓛꓳ ꓢꓴ ꓥ ꓟꓲ ꓔꓬ ꓟ ꓥꓳ= ꓬꓲ ꓪ ꓠꓬ ꓟꓳ-ꓫꓲ ꓙꓵꓽ ꓗ ꓗꓪ ꓐꓰ ꓠꓱꓸ ꓐꓯꓼ ꓞꓳ ꓫꓵꓽ ꓡꓰ ꓶꓹ ꓟ ꓗ ꓫꓵ ꓔꓯ ꓬꓰ ꓠꓹ ꓟ ꓖ-ꓡ-ꓕꓲ-ꓬ ꓞꓳ ꓫꓵꓽ ꓐꓴ ꓠꓬ ꓚꓲ ꓚꓬ ꓡꓲ ꓒꓲꓼ ꓔꓯ ꓟꓽ ꓛꓳ ꓬꓴ-ꓔ ꓡꓲ ꓒꓲꓼ ꓔꓯ ꓛꓳ ꓠ ꓔ ꓡꓳ ꓐꓰ ꓕꓱ ꓡꓱ ꓐꓯ ꓔꓳꓹ ꓡꓯꓼ ꓘꓳ_ ꓟ ꓥꓳ= ꓖꓳ ꓟ ꓡꓰ ꓟ ꓞꓲ ꓝꓲ ꓓꓴ ꓒꓳ-ꓡꓳ ꓔꓯ ꓛꓴꓽ ꓙꓳ ꓢꓴ ꓥ ꓟꓲ ꓝꓲ ꓓꓴ ꓒꓳ-ꓡꓳ ꓠꓬ ꓔꓱ_ ꓟ ꓝꓲ ꓓꓴ ꓟꓽ ꓥ ꓟ ꓑꓶ ꓓꓴ ꓶꓽ ꓓꓳ ꓫꓱꓸ ꓓꓳ ꓚ ꓠꓹ ꓟ ꓙꓵꓽ ꓪ ꓟꓽ ꓙꓳ ꓐꓰ ꓐꓯ_ ꓟ ꓥꓳ= ꓣꓳ-ꓟ ꓪ ꓔꓲ ꓕꓲ ꓤꓶꓸꓹ ꓗꓪ ꓚꓳ ꓑꓸ ꓬꓰ ꓟ ꓚꓲ ꓛꓬ ꓚ ꓟꓲ ꓗꓪ ꓐꓰ ꓬꓰ-ꓢꓴ ꓡꓰ ꓖꓶ ꓡ_ ꓟ ꓚꓬꓴ ꓙ_ ꓟ ꓗꓹ ꓛꓲ_ ꓟ ꓓꓳꓽ ꓗꓪ ꓦꓬꓼ ꓠꓬꓲ ꓫꓵꓼ ꓤꓶꓸꓹ ꓫꓵꓼ ꓟꓶ ꓠꓹ ꓟ ꓔꓯ ꓢꓷꓸ ꓡ ꓢꓲ-ꓸ ꓙꓵꓸꓹ ꓡ_ ꓢꓴ ꓖ-ꓡ-ꓕꓲ-ꓬ ꓞꓳ ꓫꓵꓽ ꓐꓴ ꓠꓬ ꓕꓱ ꓫꓸ ꓓꓴ ꓔꓯ ꓠꓲꓹ ꓟ ꓗꓪ ꓓꓵꓽ ꓙ ꓥꓳ ꓐꓰ ꓔꓲꓸꓸ ꓒ ꓪ ꓔꓲ ꓡꓰ ꓐꓯ_ ꓡꓳ=

ꓮ ꓟꓶ ꓤꓶꓸꓹ ꓗꓪ ꓥ ꓟꓲ ꓔꓬ ꓟ

            ꓔꓲꓸꓸ ꓒ ꓪ ꓔꓲ ꓡꓰ ꓕꓱ ꓟ ꓔꓯ ꓮ ꓟꓶ ꓤꓶꓸꓹ ꓔꓯ ꓔꓯ ꓢꓲ-ꓸ ꓫꓸ ꓕꓱ ꓓꓴ ꓚꓱꓹ ꓫꓵꓼ ꓗꓪ ꓐꓰ ꓪꓴ-ꓢ ꓶ ꓓꓳ ꓫꓱꓸ ꓓꓳ ꓔꓯ ꓟꓽ ꓚ-ꓸ ꓔꓱ_ ꓟ ꓔꓯ ꓛꓳ ꓢꓴ ꓐꓰ ꓚꓲ ꓛꓬ ꓠꓬ ꓟꓸ ꓒꓽ ꓥꓳ ꓐꓰ ꓐꓯ ꓢꓴ ꓔꓬ ꓟ-ꓸ ꓬꓲ ꓪ ꓠꓬ ꓡꓳꓹ ꓬꓰ ꓟ ꓤꓶꓸꓹ ꓗꓪ ꓥ ꓟꓲ ꓔꓱ_ ꓟ ꓙꓲ-ꓢꓴ ꓢꓲ ꓤ ꓐꓴ ꓔꓯ ꓙꓵꓸꓹ ꓢꓴ ꓥꓳ ꓐꓰ ꓓꓵꓽ ꓙ_ ꓡꓳ= ꓮ ꓟꓶ ꓤꓶꓸꓹ ꓗꓪ ꓫꓸ ꓔꓬ ꓟ-ꓸ ꓔꓱ_ ꓟ ꓔꓯ ꓟꓽ ꓟꓶꓽ ꓡꓰ ꓠꓹ ꓟ ꓐꓱ ꓶ ꓡꓳꓹ ꓬꓰ_ ꓟ ꓤꓶꓸꓹ ꓔꓯ ꓝꓮꓲ ꓙꓰ_ ꓟ ꓥ ꓡꓳ=

ꓔꓲꓸꓸ ꓒ ꓪ ꓔꓲ ꓡꓰ ꓖ-ꓡ-ꓕꓲ-ꓬ ꓞꓳ ꓫꓵꓽ ꓐꓴ ꓔꓯ ꓐꓳ_ ꓟ ꓕꓳ ꓶ ꓗꓪ ꓝꓲ ꓓꓴ ꓒꓳ-ꓡꓳ ꓟꓸ ꓖꓶ_ ꓟ ꓠꓬ ꓣꓳ ꓛꓳ ꓠꓹ ꓟ ꓚꓱꓹ ꓔꓯ ꓢꓷꓸ ꓠꓹ ꓟ ꓣꓳ ꓔꓯ ꓬꓰ ꓙ ꓡ_ ꓟ ꓐꓰ ꓡꓯꓼ ꓐꓳ ꓔꓶꓸ ꓓꓴ ꓗꓪ ꓫꓵꓸꓹ ꓙ ꓢꓲ-ꓸ ꓢꓯꓸ ꓬꓲꓼ ꓡ_ ꓟ ꓬꓰ-ꓢꓴ ꓡꓲꓹ ꓙꓰ ꓟ ꓐꓰ ꓮ ꓕꓯ ꓥ ꓟꓲ ꓬꓲꓸ ꓫꓵꓼ ꓥ ꓟ ꓚꓱꓹ ꓥꓳ ꓐꓰ ꓐꓯ_ ꓡꓳ=

ꓕꓱ ꓟ ꓠꓬ ꓠꓲꓹ ꓟ ꓣꓳ ꓢꓲ-ꓸ ꓣꓳ ꓠꓬꓲ ꓤ ꓡꓰ ꓐꓰ ꓠꓲꓹ ꓔꓬ ꓟ ꓗꓪ ꓐꓰ ꓧꓪꓸ ꓡꓰ ꓓꓴ ꓚꓱꓹ ꓥ ꓡꓳ= ꓢꓲ-ꓫꓬ-ꓟ-ꓦ ꓠꓬ ꓢ-ꓢꓶ-ꓠ ꓟꓬꓱꓽ ꓗꓪ ꓢꓯꓸ ꓔꓬ ꓟ ꓥꓳ -ꓸ ꓐꓰ ꓔꓲꓸꓸ ꓒ ꓪ ꓔꓲ ꓡꓰ ꓐꓯ_ ꓡꓳ=