ꓟꓷꓽ ꓠꓷꓹ ꓝ ꓒ ꓬꓲ-ꓡꓲ-ꓬ ꓐꓰ ꓮ ꓔꓳꓸ ꓖ; ꓡꓲꓽ

ꓟꓷꓽ ꓠꓷꓹ ꓝ ꓒ ꓬꓲ-ꓡꓲ-ꓬ ꓠꓬ ꓪꓴ-ꓢ ꓬꓲ ꓟꓷꓽ ꓠꓷꓹ ꓝ ꓢꓴ ꓕꓲ ꓣꓳ ꓥ ꓡꓳ= ꓬꓲ ꓔꓯ ꓠꓬ ꓔꓲꓺ ꓒ ꓙꓵꓽ ꓪ ꓙꓳˍ ꓡꓳ= ꓪꓴ-ꓢ ꓬꓲ ꓢꓯꓼ ꓪˍ ꓟꓲ ꓬꓲ ꓔꓯ ꓓꓯꓹ ꓡꓳ= ꓬꓲ ꓠꓬ ꓞꓲꓼ ꓟꓳꓽ ꓡꓻꓳ=

ꓖꓳ ꓕꓯ ꓪꓴ-ꓢ ꓡꓰ ꓬꓲ-ꓡꓲ-ꓬ ꓔꓯ ꓝ ꓢꓲ ꓟꓷ ꓠꓷꓹ ꓢꓴ ꓬꓰ ꓝꓲ ꓠꓹ ꓟ ꓬꓲ-ꓡꓲ-ꓫ ꓔꓯ ꓟꓰ ꓞꓶ ꓟꓰ ꓖꓶ ꓬꓰ ꓝꓲˍ ꓡꓳ= ꓖꓳ ꓡꓱ ꓠꓬꓲ ꓬꓲ-ꓡꓲ-ꓬ ꓠꓬ ꓮ-ꓐꓱ-ꓟꓷ-ꓧꓳ-ꓡ ꓗꓪ ꓙꓰ ꓢꓲ ꓫ-ꓩ-ꓕꓱ ꓬꓲ ꓤ ꓬꓲ-ꓡꓲ-ꓫ ꓔꓯ ꓧꓪ ꓙꓰ ꓢꓲ ꓟꓳ ꓡꓰ ꓠꓬ ꓬꓲ-ꓡꓲ-ꓫˍ ꓟꓲ ꓬꓲ-ꓡꓲ-ꓬ ꓔꓯ ꓣꓱꓽ ꓙ ꓠꓹ ꓟ ꓛꓳ ꓙꓰˍ ꓡꓳ= ꓖꓳ ꓡꓱ ꓢꓲ ꓬꓲ ꓠꓬ ꓬꓲ-ꓡꓲ-ꓬ ꓗ ꓠꓯꓸ ꓛꓳ ꓢꓲ ꓮ ꓟꓬꓹ ꓘꓳꓼ ꓣꓱꓽ ꓙ ꓗꓷˍ ꓡꓳ=

ꓬꓲ-ꓡꓲ-ꓬ ꓐꓰ ꓬꓲ-ꓡꓲ-ꓫ ꓬꓲ ꓪ ꓠꓬꓲꓽ ꓣꓳ ꓗꓲ-ꓡꓷ-ꓖ ꓗꓪ ꓐꓰ ꓓꓳ ꓙꓰ ꓔꓬ ꓕꓯ ꓬꓲ-ꓡꓲ-ꓬ ꓡꓰ ꓬꓲ-ꓡꓲ-ꓫ ꓔꓯ꓾ ꓠꓴ ꓕꓱ ꓗꓪ ꓔꓲꓹ ꓬꓰ꓾ ꓥꓪ ꓠꓬ ꓪꓴ-ꓢ ꓕꓵꓼ ꓘꓶ ꓙꓳˍ ꓟˍ ꓡꓰ ꓐꓰ ꓐꓱ-ꓕꓷ-ꓡꓲ ꓗꓪ ꓙꓰ ꓠ ꓗꓹ ꓡꓳ꓾ ꓐꓯ ꓖꓶˍ ꓡꓳ= ꓖꓳ ꓡꓱ ꓥˍ ꓟꓲ ꓬꓲ-ꓡꓲ-ꓫ ꓡꓰ ꓪꓴ-ꓢˍ ꓐꓰ ꓠꓴ ꓢꓯꓸ ꓔꓬ ꓟ ꓔꓯ ꓖꓴ ꓢꓲ ꓥꓪ ꓮ ꓡꓲ ꓥˍ ꓟꓲ ꓠꓴ ꓔꓯˍ ꓐꓰ ꓟꓽ ꓧꓹ ꓙꓰ꓾ ꓐꓯ ꓖꓶˍ ꓡꓳ=

ꓖꓳ ꓡꓱ ꓠꓬꓲ ꓬꓲ ꓪ ꓠꓬꓲ ꓣꓳ ꓠꓬ ꓕꓲ ꓛꓳˍ ꓐꓱ-ꓕꓷ-ꓡꓲ ꓗꓪ ꓙꓰˍ ꓡꓳ= ꓬꓲ ꓪ ꓠꓬꓲ ꓣꓳ ꓐꓱ-ꓕꓷ-ꓡꓲ ꓗꓪ ꓛꓲ ꓬꓰ ꓠꓬ꓾ ꓖꓳ ꓗꓪ ꓟ ꓟꓷ ꓠꓷꓹ ꓝ ꓢꓴ ꓠꓬ ꓬꓲ-ꓡꓲ-ꓫ ꓔꓯ ꓡ ꓢꓲ꓾ ꓪꓴ-ꓢ ꓠꓬ ꓠꓬꓲꓸ ꓠꓬꓲ ꓠꓴ ꓟꓸ ꓒ ꓬꓲ-ꓡꓲ-ꓬ ꓔꓯ ꓧꓳꓽ ꓔꓯꓹ ꓙꓰˍ ꓐꓰ ꓬꓰˍ ꓟ ꓠꓴ ꓟꓽ ꓢꓷꓸ ꓡ? ꓐꓯ ꓖꓶˍ ꓡꓳ= ꓬꓲ-ꓡꓲ-ꓫ ꓡꓰ ꓒꓳꓹ ꓖꓶ ꓢꓲ꓾ ꓥꓪ ꓢꓷˍ ꓡꓳ= ꓖꓳ ꓡꓱ ꓥˍ ꓟꓲ ꓣꓳ ꓠꓬ ꓕꓱ ꓟ ꓔꓯ ꓟꓳꓸ ꓕꓽ ꓫꓸ ꓕꓱ ꓡꓯ꓾ ꓐꓯˍ ꓡꓳ=

ꓝꓮꓲ ꓬꓲ-ꓡꓲ-ꓬ ꓡꓰ ꓬꓲ-ꓡꓲ-ꓫ ꓳ ꓠꓴ ꓕꓱ ꓗꓪ ꓔꓲꓹ ꓬꓰ= ꓪꓴ-ꓢ ꓡꓰ ꓥꓪ ꓔꓯ ꓙꓱ-ꓡꓱ-ꓘꓳ ꓗꓪ ꓙꓰ ꓠꓹ ꓟ ꓕꓵꓼ ꓪ ꓖꓶ ꓡ ꓠꓬꓲ ꓥꓪ ꓙꓰ ꓠ ꓗꓹ ꓡꓳ꓾ ꓐꓯ ꓖꓶˍ ꓟꓲ ꓬꓲ-ꓡꓲ-ꓫ ꓠꓽ ꓪꓴ-ꓢˍ ꓐꓰ ꓠꓴ ꓢꓯꓸ ꓔꓬ ꓟ ꓔꓯ ꓖꓴ ꓢꓲ ꓪꓵꓼ ꓙꓱꓽˍ ꓠꓬꓲ꓾ ꓥꓪ ꓠꓬ ꓮ ꓡꓲ ꓥˍ ꓟꓲ ꓠꓴ ꓔꓯ ꓟꓽ ꓧꓹ ꓗꓷ꓾ ꓐꓯ ꓖꓶˍ ꓡꓳ= ꓖꓳ ꓡꓱ ꓠꓬꓲ ꓬꓲ ꓪ ꓠꓬꓲꓽ ꓣꓳ ꓕꓲ ꓛꓳˍ ꓐꓰ ꓙꓱ-ꓡꓱ-ꓘꓳ ꓗꓪ ꓙꓰˍ ꓡꓳ=

ꓙꓱ-ꓡꓱ-ꓘꓳ ꓗꓪ ꓔꓬ ꓟ ꓟꓷ ꓠꓷꓹ ꓝ ꓢꓴ ꓐꓴ ꓠꓬ ꓬꓲ-ꓡꓲ-ꓫ ꓔꓯ ꓡ ꓢꓲ ꓠꓬꓲꓸ ꓠꓬꓲ ꓪꓴ-ꓢ ꓡꓰ ꓠꓴ ꓟꓸ ꓒ ꓬꓲ-ꓡꓲ-ꓬ ꓔꓯ ꓧꓳꓽ ꓔꓯꓹ ꓙꓰˍ ꓐꓰ ꓬꓰˍ ꓟ ꓠꓴ ꓟꓽ ꓢꓷꓸ ꓡ? ꓐꓰ ꓠ ꓠꓬꓲˍ ꓕꓯ ꓬꓲ-ꓡꓲ-ꓫ ꓡꓰ ꓥꓪ ꓢꓷˍ ꓡꓳ= ꓠꓴ ꓪ ꓟꓽ ꓪꓳꓹ ꓔꓬ꓾ ꓐꓰ ꓒꓳꓹ ꓖꓶˍ ꓡꓳ=

ꓖꓳ ꓗ ꓠꓯꓸ ꓬꓲ-ꓡꓲ-ꓬ ꓡꓰ ꓬꓲ-ꓡꓲ-ꓫ ꓔꓯ ꓮ ꓟꓶ ꓠꓴ ꓠꓬ ꓕꓱ ꓗꓪ ꓔꓲꓹ ꓬꓰ= ꓥꓪ ꓔꓯ ꓠꓽ ꓪꓴ-ꓢ ꓡꓰ ꓬꓳ-ꓔ ꓬꓲꓽ ꓟ ꓗꓪ ꓙꓰ ꓠꓹ ꓟ ꓕꓵꓼ ꓪ ꓖꓶ ꓡꓺꓳ꓾ ꓐꓯ ꓖꓶˍ ꓟꓲ꓾ ꓪꓴ-ꓢ ꓐꓰ ꓠꓴ ꓢꓯꓸ ꓔꓬ ꓟ ꓔꓯ ꓖꓴ ꓢꓲ ꓐꓯ ꓖꓶˍ ꓠꓬꓲ꓾ ꓥꓪ ꓠꓬ ꓮ ꓡꓲ ꓥˍ ꓟꓲ ꓠꓴ ꓔꓯ ꓐꓰ ꓟꓽ ꓧꓹ ꓙꓰ꓾ ꓐꓯˍ ꓠꓬꓲ꓾ ꓬꓲ ꓪ ꓠꓬꓲꓽ ꓣꓳ ꓕꓲ ꓛꓳˍ ꓐꓰ ꓬꓳ-ꓔ ꓬꓲꓽ ꓟ ꓗꓪ ꓙꓰˍ ꓡꓳ= ꓟꓷ ꓠꓷꓹ ꓝ ꓒ ꓠꓱꓸ ꓐꓯꓼ ꓥꓪꓽ ꓞꓲ ꓣꓳˍ ꓟꓲ ꓬꓲ ꓪ ꓔꓯ ꓛꓳ ꓙꓰˍ ꓡꓳ=

ꓬꓲ ꓪ ꓐꓴ ꓬꓳ-ꓔ ꓬꓲꓽ ꓟ ꓗꓪ ꓛꓲ ꓬꓰ ꓕꓯ ꓬꓲ-ꓡꓲ-ꓬ ꓠꓬ ꓬꓲ ꓐꓵ ꓞꓶꓽ ꓐꓽ ꓢꓽ ꓡꓵꓸ ꓢꓲ ꓡꓲꓺ ꓗꓷ ꓢꓲ ꓠꓬꓲ ꓬꓲꓻ ꓙꓬ ꓔꓯ ꓓꓶꓽ ꓗꓷ ꓠꓬ꓾ ꓬꓲꓻ ꓙꓬ ꓡꓳꓻ ꓠꓬ ꓠꓬꓲꓽ ꓕꓱꓻ ꓞꓷꓹ ꓡꓰ ꓢꓲ ꓬꓲ ꓪ ꓠꓬꓲꓽ ꓣꓳ ꓠꓬ ꓟꓲ ꓙꓴ ꓗꓪ ꓫꓱꓽ ꓗꓳꓸ ꓙꓰˍ ꓡꓳ= ꓠꓱꓸ ꓐꓯ ꓟꓷ ꓠꓷꓹ ꓝ ꓢꓴ ꓥꓪꓽ ꓞꓲ ꓣꓳ ꓠꓬ ꓬꓳ-ꓔ ꓬꓲꓽ ꓟ ꓕꓲ ꓛꓱꓽ ꓗꓪ ꓔꓲꓹ ꓬꓰ ꓢꓲ ꓬꓲ ꓪ ꓠꓬꓲꓽ ꓣꓳ ꓔꓯ ꓡꓳꓸ ꓔꓬ ꓡꓳ=

ꓬꓲ ꓪ ꓖꓳ ꓐ ꓢꓲ ꓗꓪ ꓛꓲ ꓬꓰ ꓠꓬ ꓬꓲ-ꓡꓲ-ꓬ ꓡꓰ ꓬꓲ-ꓡꓲ-ꓫ ꓔꓯ꓾ ꓥꓪ ꓔꓯ ꓟꓽ ꓛꓵꓽ ꓓꓯ ꓙꓰ ꓢꓰꓽ ꓕꓯ ꓠꓴ ꓐꓱ ꓶ ꓮ ꓫꓵꓽ ꓬꓰ ꓠꓯꓹ ꓡ? ꓐꓯˍ ꓡꓳ= ꓠꓴ ꓔꓯ ꓙꓳˍ ꓟ ꓦ ꓠꓬꓲꓽ ꓝ ꓥꓪ ꓔꓯ ꓙꓳ ꓡ ꓝꓲ꓾ ꓐꓰ ꓒꓳꓹ ꓖꓶˍ ꓡꓳ= ꓬꓲ-ꓡꓲ-ꓬ ꓡꓰ ꓠꓴ ꓓꓰꓽˍ ꓟ ꓕꓱ ꓟ ꓠꓬ ꓮ ꓘꓶ ꓬꓰ ꓫꓸ ꓟ ꓕꓲ ꓫꓵꓽ ꓥꓳ= ꓖꓳ ꓡꓱ ꓥˍ ꓟꓲ ꓥꓪ ꓔꓯ ꓛꓵꓽ ꓓꓯ ꓙꓰˍ ꓟ ꓠꓴ ꓟꓳˍ ꓠꓬ꓾ ꓠꓴ ꓓꓰꓽˍ  ꓖꓳ ꓟ ꓠꓴ ꓟꓶˍ ꓥꓳ= ꓟꓽ ꓟꓳ ꓠꓬ ꓟ ꓟꓶ ꓐꓯ ꓖꓶˍ ꓡꓳ=

ꓬꓲ ꓪ ꓕꓱ ꓡꓱ ꓫ ꓕꓱ ꓕꓱ ꓡꓱ ꓙꓰ ꓔꓬ ꓕꓯ꓾ ꓞꓼ ꓐꓰ ꓬꓲ ꓪ ꓠꓬꓲꓽ ꓗꓴꓸ ꓚꓸꓼ ꓗꓪ ꓮ ꓔꓳꓸ ꓮ ꓟꓴꓽ ꓡꓰ ꓖꓳꓻ ꓔꓬ ꓟ ꓮ ꓔꓳꓸ ꓖꓼ ꓡꓲꓽ ꓬꓯꓼ ꓡ ꓢꓲ꓾ ꓟꓲꓽ ꓦꓲ ꓪꓳ ꓡꓳ ꓗꓪ ꓐꓰ ꓬꓲ-ꓡꓲ-ꓬ ꓔꓯ ꓛꓵꓽ ꓔꓯꓹ ꓙꓰꓳ= ꓬꓲ-ꓡꓲ-ꓬ ꓠꓬ ꓟꓴꓽ ꓗꓪ ꓗꓪ ꓓꓯ ꓙꓰꓳ= ꓬꓲ-ꓡꓲ-ꓬ ꓬꓲ ꓐꓵ ꓞꓶꓽˍ ꓟꓲ ꓞꓰꓻ ꓩꓴ ꓡˍ ꓡꓳ=

ꓕꓱ ꓟ ꓔꓯ ꓬꓲ-ꓡꓲ-ꓫ ꓟꓳ ꓡꓰ ꓕꓯ꓾ ꓥꓪ ꓐꓹ ꓐꓽꓳ꓾ ꓥꓪ ꓐꓹ ꓐꓽꓳ꓾ ꓬꓲ-ꓢꓷ-ꓡꓰ ꓐꓴ ꓖꓼ ꓡꓲꓽˍ ꓐꓰ ꓟꓯꓼ ꓜꓴ ꓐꓴꓳ꓾ ꓐꓰ ꓘꓴˍ ꓡꓳ= ꓬꓲ-ꓡꓲ-ꓫ ꓠꓬ ꓬꓲ-ꓡꓲ-ꓬ ꓔꓯ ꓟꓽ ꓟꓳ ꓗꓷ ꓡꓰ ꓕꓯ ꓬꓲ ꓐꓵ ꓞꓶꓽ ꓫꓵꓹ ꓧꓽ ꓗꓷˍ ꓡꓳ= ꓗ ꓠꓯꓸ ꓬꓲ-ꓡꓲ-ꓬ ꓡꓰ ꓡꓵꓸ ꓞꓰꓻ ꓩꓴ ꓡ ꓟ ꓐꓵ ꓞꓶꓽ ꓖꓳ ꓔꓯꓹ ꓔ ꓢꓲ ꓬꓳ-ꓔ ꓬꓲꓽ ꓟ ꓘꓶꓽ ꓗꓪ ꓦꓰꓼ ꓞ ꓢꓲ ꓠꓬꓲ꓾ ꓐꓵ ꓞꓶꓽ ꓖꓳ ꓟ ꓡꓰ ꓬꓲꓻ ꓙꓬ ꓔꓯ ꓓꓶꓽ ꓗꓷˍ ꓡꓳ= ꓬꓲ-ꓡꓲ-ꓬ ꓬꓲ ꓪꓴ-ꓢ ꓮ ꓡꓰ ꓗꓪ ꓔꓬ ꓡ? ꓐꓰ ꓐꓯ ꓢꓲ ꓠꓬꓲ꓾ ꓬꓲꓻ ꓙꓬ ꓔꓯ ꓝꓮꓲ ꓕꓲ ꓧꓪꓹ ꓓꓶꓽ ꓗꓷ ꓠꓬ ꓬꓲꓻ ꓙꓬ ꓠꓬꓲꓽ ꓕꓱꓻ ꓞꓷꓹ ꓡꓰ ꓠꓬꓲ꓾ ꓬꓲ-ꓡꓲ-ꓫ ꓠꓬ ꓟꓲ ꓙꓴ ꓗꓪ ꓖꓳ ꓐꓽ ꓢꓲ ꓫꓱꓽ ꓗꓳꓸ ꓙꓰˍ ꓡꓳ=

ꓖꓳ ꓟ ꓔꓯ ꓙꓱ-ꓡꓱ-ꓘꓳ ꓗꓪ ꓐꓰ ꓡ ꓟ ꓟꓷ ꓠꓷꓹ ꓝ  ꓢꓴ ꓥꓪꓽ ꓞꓲ ꓣꓳ ꓟ ꓟꓳꓻ ꓡꓰ ꓕꓯ꓾ ꓬꓲ-ꓡꓲ-ꓬ ꓬꓲ ꓪꓽ ꓠꓬꓲˍ ꓟ ꓠꓬ ꓬꓲ-ꓡꓲ-ꓫ ꓟꓶ ꓡꓰ ꓐꓷ꓾ ꓐꓯ ꓢꓲ꓾ ꓬꓲ ꓔꓯ ꓠꓲꓹ ꓞ ꓞꓵ ꓡ ꓢꓲ ꓠꓬꓲ ꓬꓲ ꓟꓲ ꓙꓬꓼ ꓗꓪ ꓟꓳꓼ ꓡꓰˍ ꓡꓳ=