ꓢꓲꓽ ꓫꓬ ꓕꓳꓽ ꓶ ꓚꓱꓹ

Saturday, February 12, 2022

ꓢꓲꓽ ꓫꓬ ꓕꓳꓽ ꓶ ꓐꓯ ꓟ ꓠꓬ ꓠꓱ ꓐꓯꓼ ꓕꓳꓽ ꓶ ꓡꓰ ꓐꓰ ꓟꓽ ꓥ= ꓕꓱ ꓟ ꓮ ꓙꓵꓽ ꓠꓽ ꓪꓴ-ꓢ ꓟꓸ ꓟꓲꓽ ꓥ ꓢꓲ ꓠꓬꓲ꓾ ꓪꓴ-ꓢ ꓣꓳ ꓔꓯ ꓮ ꓟꓬꓹ ꓛꓲꓺ ꓠꓲꓹ ꓠꓵˍ ꓟ ꓚꓱꓹ ꓥ ꓡꓳ= ꓮ ꓟꓶ ꓣꓳ ꓠꓬ ꓕꓱ ꓡꓱ ꓓꓵꓽ ꓙ ꓗꓴˍ ꓡꓳ= ꓢꓲꓽ ꓫꓬ ꓕꓳꓽ ꓶ ꓠꓽ ꓠꓱ ꓐꓯ ꓕꓳꓽ ꓶ ꓑꓷꓠꓽ ꓕꓯ ꓢꓲ ꓪꓴꓽˍ ꓟ ꓥ ꓢꓲ ꓠꓬꓲ ꓟꓽ ꓓ ꓫꓵˍ ꓟ ꓙꓵꓽ ꓗ ꓔꓯ ꓐꓳ ꓔ ꓟ꓾ ꓬꓲ ꓟꓬꓱ ꓮ ꓟꓬꓹ ꓐꓳ ꓔ ꓟ ꓥ ꓡꓳ ꓐꓰ ꓓꓵꓽ ꓟꓶˍ ꓟ ꓟꓲ ꓙꓳˍ ꓥꓳ= ꓖꓳ ꓡꓱ ꓠꓽ ꓟꓽ ꓥ= ꓝꓮꓲ ꓪꓴ-ꓢ ꓙꓵꓽ ꓗ ꓔꓯ ꓮ ꓕꓯ ꓟꓲ ꓠ ꓡꓳꓸ ꓞꓳ ꓒꓵꓽˍ ꓟ ꓐꓲ ꓜꓲꓼˍ ꓟ ꓞꓳ ꓤ ꓕꓲ ꓜꓴ ꓟꓸ ꓟꓲꓽ ꓔꓯ ꓡꓰꓽ ꓐꓳ ꓔ ꓟ ꓥ ꓡꓳ ꓐꓰˍ ꓟꓲ ꓓꓵꓽ ꓙ ꓟꓶ ꓗꓴˍ ꓡꓳ= ꓚꓵ ꓚꓵ ꓢꓲꓽ ꓫꓬ ꓕꓳ ꓶ ꓠꓽ ꓚꓺ ꓟꓲꓽ ꓐꓴ꓾ ꓥꓳꓽ ꓙꓱꓻ꓾ ꓕꓳꓽ ꓶ ꓐꓰ ꓟꓴꓽ ꓖꓪ꓾ ꓮ ꓙꓵꓽ ꓔꓯ ꓐꓳ ꓔ ꓟ ꓪꓴꓽ ꓓꓰˍ ꓟ ꓕꓲ ꓟˍ ꓟ ꓟꓸ ꓟꓲꓽ ꓕꓳ ꓶ ꓥ ꓡꓳ= ꓝꓮꓲ ꓕꓳ ꓶꓽ ꓗꓪ ꓓꓵꓽˍ ꓟ ꓮ ꓙꓵꓽ ꓠꓬ ꓔꓱꓹ ꓟ ꓥ ꓡꓳ= ꓮ ꓔꓳ ꓔꓳ ꓐꓳ ꓔ ꓟ ꓕꓲ ꓙꓰꓽˍ ꓟꓲ ꓟꓽ ꓙꓳ= ꓪꓴ-ꓢ ꓠꓬ ꓟꓲ ꓠꓯ ꓕꓲ ꓟ ꓡꓱꓸꓼ ꓐꓰ ꓟꓲ ꓠꓯ ꓗꓪ ꓙꓳˍ ꓟ ꓮ ꓙꓵꓽ ꓔꓯ ꓮ ꓡꓰ ꓐꓰ ꓚꓰꓼ ꓔ ꓟ꓾ ꓝꓮꓲ ꓠꓬ ꓪꓴ-ꓢ ꓬꓲ ꓤ ꓔꓲ ꓬꓰ-ꓢꓴ ꓙꓲ-ꓢꓴ ꓚꓱꓹ ꓔꓯ ꓐꓳ ꓔ ꓟ ꓥ ꓡꓳ= ꓕꓱ ꓟ ꓘꓴꓽ ꓗꓪ ꓞꓳ ꓫꓵꓽ ꓞꓳ ꓙꓰꓽ ꓮ ꓟꓬꓹ ꓡꓰ ꓟꓸ ꓟꓲꓽ ꓚꓺ ꓟꓲꓽ ꓮ ꓟꓬꓹ ꓔꓯ ꓐꓳ ꓔ ꓟ ꓙꓳˍ ꓡꓳ= ꓖꓳ ꓡꓱ ꓥˍ ꓟꓲ ꓢꓲꓽ ꓫꓬ ꓕꓳꓽ ꓶ ꓐꓰ ꓗꓴꓸ ꓙꓲ ꓙꓳ ꓢꓲ ꓠꓬꓲ ꓓꓵꓽ ꓙ ꓟꓶ ꓓꓴ ꓕꓲ ꓫꓵꓽ ꓠꓬ꓾ ꓢꓲꓽ ꓫꓬ ꓕꓳꓽ ꓶ ꓗꓪ ꓟ ꓟꓸ ꓟꓲꓽ ꓚꓺ ꓟꓲꓽ ꓮ ꓙꓵꓽ ꓠꓬ ꓪꓴ-ꓢ ꓗꓪ ꓐꓰ ꓡꓰꓽ ꓡˍ ꓟ ꓥ ꓡꓳ= ꓢꓲꓽ ꓫꓬ ꓕꓳꓽ ꓶ ꓬꓲ ꓪꓴꓸ ꓕꓲ ꓕꓱ ꓟ ꓔꓯ ꓘꓶꓽ ꓫꓵꓽ ꓡꓵꓺ ꓐꓯˍ ꓟ ꓥ ꓡꓳ= ꓘꓶꓽ ꓫꓵꓽ ꓡꓵꓺ ꓗꓪ ꓠꓬ ꓪꓴ-ꓢ ꓬꓲ ꓑ ꓫꓬ ꓐꓴ ꓥ ꓟ ꓬꓲ-ꓢꓷ-ꓡꓰ ꓡ ꓞꓳ ꓐꓴ ꓚꓱꓹ ꓔꓯ ꓟꓳ ꓪˍ ꓟ ꓥ ꓡꓳ= ꓬꓲ-ꓢꓷ-ꓡꓰ ꓞꓳ ꓫꓵꓽ ꓐꓴ ꓗꓪ ꓐꓰ ꓟꓲ ꓠꓯ ꓔꓯ ꓪꓴ-ꓢ ꓠꓬꓲ ꓙ ꓡꓳꓸ ꓙ ꓥꓳ ꓐꓰ ꓪꓴ-ꓢ ꓡꓰ ꓐꓯ ꓔ ꓡꓳ= ꓐꓯ ꓘꓶꓽ ꓖꓳ ꓟ ꓐꓲ ꓡ ꓠꓹ ꓟ ꓐꓱ ꓶ ꓬꓲ-ꓢꓷ-ꓡꓰ ꓐꓴ ꓛꓳ ꓠꓹ ꓟ ꓙꓵꓽ ꓗ ꓐꓴ ꓔꓯˍ ꓟꓲ ꓬꓲ ꓪ ꓐꓱ ꓶ ꓖꓶꓽ ꓗꓷꓳ= ꓕꓱ ꓟ ꓠꓬ ꓬꓲ-ꓢꓷ-ꓡꓰ ꓡ ꓞꓳ ꓐꓴ ꓠꓱꓸ ꓐꓯ ꓞꓳ ꓫꓵꓽ ꓐꓴ ꓐꓰ ꓟꓽ ꓫꓱꓸ ꓟ ꓥ ꓡꓳ= ꓬꓲ ꓪ ꓐꓴ ꓠꓬ ꓠꓱꓸ ꓐꓯ ꓞꓳ ꓫꓵꓽ ꓐꓴ ꓔꓯ ꓘꓳꓹ ꓣꓴˍ ꓟ ꓡꓰ ꓟꓽ ꓞꓲꓺ ꓕꓲ ꓣꓳ ꓛꓳꓽ ꓕꓲ ꓣꓳ ꓝꓴꓲꓸ ꓖꓼ ꓖꓶ ꓢꓲ ꓠꓲꓹ ꓠꓵ ꓛꓳ ꓒꓵꓽ ꓡꓯ ꓘꓳꓹ ꓟ ꓚꓱꓹ ꓗꓪ ꓐꓰ ꓞꓳ ꓙꓳ ꓔꓬ ꓠꓹ ꓟ ꓥ ꓡꓳ= ꓮ ꓡꓰ ꓫꓵꓽ ꓕꓲ ꓣꓳ ꓥˍ ꓟꓲ ꓙꓵꓽ ꓗ ꓮ ꓙꓵꓽ ꓔꓯ ꓖꓼ ꓛꓳ ꓟꓽ ꓐ ꓡ ꓟ ꓠꓬ ꓬꓰ ꓫꓸ ꓓꓴ ꓕꓲ ꓟ ꓥ ꓡꓳ= ꓕꓱ ꓟ ꓔꓯ ꓢꓲꓽ ꓫꓬ ꓕꓳꓽ ꓶ ꓔꓱꓹ ꓫꓵꓺ ꓗꓪ ꓟꓸ ꓖꓶ ꓔ ꓡꓳ= ꓞꓳ ꓤ ꓐꓴ ꓠꓬ ꓬꓲ ꓪ ꓐ ꓡˍ ꓕ ꓑꓳ ꓙꓵꓽ ꓗ ꓔꓯ ꓛꓳ ꓠꓹ ꓟ ꓢꓯꓼ ꓕꓵꓼ ꓔꓬ ꓥˍ ꓟꓲ ꓥꓳꓽ ꓡꓰ ꓓꓴ ꓔꓯ ꓝ ꓢꓲ ꓬꓰ ꓔꓬ ꓖꓴˍ ꓡꓳ= ꓖꓳ ꓡꓱ ꓥꓶˍ ꓟ ꓥꓳꓽ ꓡꓰˍ ꓟ ꓚꓱꓹ ꓬꓰ ꓔꓬ ꓕ ꓑꓳꓸꓼ ꓪꓴ-ꓢ ꓠꓬ ꓬꓲ ꓪ ꓔꓯ ꓖꓼ ꓖꓶ ꓗꓷ ꓢꓲ ꓠꓬꓲ꓾ꓪꓴ-ꓢ ꓠꓬ ꓮ ꓡꓰ ꓫꓵꓽ ꓕꓲ ꓣꓳ ꓥ ꓟ ꓟꓳꓸ ꓖꓶ ꓡ ꓢꓴ ꓪ ꓔꓲ ꓕꓲ ꓣꓳ꓾ ꓙꓵꓽ ꓗ ꓮ ꓙꓵꓽ ꓔꓯ ꓛꓳˍ ꓟ ꓚꓬꓴꓸ ꓢꓲꓺ ꓒ ꓕꓲ ꓣꓳ ꓛꓲꓺ ꓡˍ ꓥꓳ꓾ ꓐꓰ ꓪꓴ-ꓢ ꓡꓰ ꓪꓵꓼ ꓘꓶꓽ ꓖꓶ ꓗꓷꓳ= ꓖꓳ ꓡꓱ ꓠꓬꓲ ꓬꓲ-ꓢꓷ-ꓡꓰ ꓐꓴ ꓠꓬ ꓚꓬꓴꓸ ꓢꓲꓺ ꓒ ꓥ ꓟ ꓪ ꓔꓲ ꓔꓯ ꓮ ꓟꓬꓹ ꓘꓳꓼ ꓡꓳꓸ ꓠꓬ ꓗꓷꓳ= ꓖꓳ ꓡꓱ ꓡꓳꓸ ꓠꓬ ꓔꓬ ꓟ ꓙꓵꓹ ꓗꓪ ꓬꓲ-ꓢꓷ-ꓡꓰ ꓐꓴ ꓔꓯ ꓙꓲˍ ꓟ ꓪ ꓔꓲ꓾ ꓥꓶˍ ꓟ ꓪ ꓔꓲ ꓮ ꓟꓬꓹ ꓙꓳ ꓡꓰꓳ= ꓕꓲ ꓖ ꓕꓲ ꓧꓪꓹ ꓪ ꓔꓲ ꓐꓴ ꓠꓬ ꓪꓴ-ꓢ ꓔꓯ ꓟꓲ ꓡꓰꓹ ꓗꓷ ꓢꓲ ꓠꓱꓸ ꓐꓯ ꓢꓲꓺ ꓐꓴ ꓔꓯ ꓦ ꓡꓱˍ ꓡꓳ= ꓕꓲ ꓖ ꓕꓲ ꓧꓪꓹ ꓗꓪ ꓠꓬ ꓬꓲ-ꓢꓷ-ꓡꓰ ꓗꓴꓷꓼ ꓔꓯ ꓐꓶꓽ ꓛꓳ ꓐꓴ ꓡꓰ ꓣꓴ ꓔꓯꓹ ꓙꓰˍ ꓟ ꓟꓶ ꓗꓷꓳ= ꓪꓴ-ꓢ ꓡꓰ ꓬꓰ ꓗꓷ ꓟ ꓓꓵꓽ ꓙ ꓟꓶ ꓓꓴ ꓟꓬꓱꓽ ꓮ ꓙꓵꓽ ꓔꓯ ꓘꓶꓽ ꓫꓵꓽ ꓡꓵꓺ ꓗꓪ ꓐꓳ ꓔ ꓡꓳ= ꓔꓯꓺ ꓥꓳꓽ꓾ ꓮ ꓘꓶꓸ ꓞꓻˍ ꓟ ꓮ ꓔꓳꓸ ꓘꓴꓽ ꓗꓪ ꓟ ꓞꓳ ꓡꓯꓸ ꓤ 3 ꓣꓳ ꓔꓯ ꓚꓬꓴꓸ ꓙ ꓗꓷ ꓟ ꓚꓱꓹ꓾ ꓟꓷꓽ ꓠꓷꓹ ꓝ ꓒ ꓬꓰ-ꓡꓲ-ꓟꓲ꓾ ꓬꓲ-ꓫꓲ-ꓚꓰ ꓐꓴ ꓡꓰ ꓐꓰ ꓟꓷꓽ ꓠꓷꓹ ꓝ ꓢꓴ ꓐꓴ ꓔꓯ ꓪꓴ-ꓢ ꓡꓰ ꓫꓸ ꓕꓱˍ ꓟ ꓚꓱꓹ꓾ ꓬꓲ-ꓢꓷ-ꓡꓰ ꓞꓳ ꓫꓵꓽ ꓟꓽ ꓥ ꓟ ꓣꓴ-ꓕꓱ ꓔꓯ ꓪꓴ-ꓢ ꓬꓲ ꓡ ꓞꓳ ꓒꓬꓱꓼ ꓡ ꓝꓲˍ ꓟ ꓚꓱꓹ꓾ ꓕꓱ ꓟꓬ ꓟ ꓔꓯ ꓐꓳ ꓗꓷ ꓔ ꓟ ꓥ ꓡꓳ= ꓪꓴ-ꓢ ꓡꓰ ꓬꓰ ꓗꓷ ꓟ ꓟꓬꓱꓽ ꓮ ꓙꓵꓽ ꓔꓯ ꓐꓳ ꓝꓲ ꓔ ꓢꓲ ꓠꓬꓲ ꓬꓲ ꓪ ꓞꓲꓼ ꓤ ꓡꓯꓹ ꓤ ꓐꓴ ꓔꓯ ꓝ ꓢꓲ ꓟꓸ ꓖꓶ ꓠꓲꓹ ꓫꓵˍ ꓟ ꓠꓲꓹ ꓡꓶꓽ ꓬꓲ ꓪ ꓔꓯ ꓙꓳˍ ꓡꓳ= ꓪꓴ-ꓢ ꓠꓬ ꓪꓽ ꓠꓬꓲˍ ꓡꓳ꓾ ꓠꓵ ꓠꓲꓹ ꓐꓲ ꓞꓹ ꓢꓲ ꓙꓲˍ ꓟ ꓔꓱˍ ꓟ ꓪꓴ-ꓢ ꓥ ꓟ ꓔꓯ ꓬꓲ ꓪ ꓤ ꓠꓱ ꓐꓴ ꓔꓯ ꓢꓷꓸ ꓡꓰ ꓝꓲ ꓠꓲꓹ ꓫꓵˍ ꓟ ꓥ ꓡꓳ= ꓢꓲꓽ ꓫꓬꓹ ꓕꓳ ꓶ ꓕꓲ ꓖ ꓕꓲ ꓔꓳꓸ ꓗꓪ ꓠꓬ ꓪꓴ-ꓢ ꓠꓬ ꓬꓲ ꓡ ꓞꓳ ꓐꓴ ꓔꓯ ꓙꓳꓺ ꓓꓴ ꓫ ꓓꓴ ꓬꓲ ꓘꓶꓽ ꓗꓪ ꓐꓰ ꓚꓬꓴꓸ ꓙˍ ꓟ ꓪꓽ ꓠꓬꓲ ꓢꓴ ꓙꓲˍ ꓟ ꓪ ꓔꓲ ꓕꓲ ꓣꓳ ꓥ ꓟ ꓣꓳ ꓐꓴ ꓔꓯ ꓬꓲꓼ ꓠꓬꓲꓸ ꓖꓶ ꓔ ꓡꓳ= ꓝꓮꓲ ꓕꓲ ꓚꓱꓹ ꓗꓪ ꓠꓬ ꓪꓴ-ꓢ ꓠꓬ ꓬꓲ ꓤ ꓬꓲ ꓠꓱ ꓐꓴ ꓔꓯ ꓡꓳꓸ ꓙˍ ꓟ ꓙꓲˍ ꓟ ꓐꓹ ꓐ ꓕꓲ ꓣꓳ ꓥ ꓟ ꓣꓳ ꓔꓯ ꓬꓲꓼ ꓠꓬꓲꓸ ꓖꓶ ꓔ ꓡꓳ= ꓙꓲˍ ꓟ ꓮ ꓣꓳ ꓡꓳꓸ ꓒ ꓕꓲ ꓣꓳ ꓡꓰ ꓐꓰ ꓬꓲ ꓮ ꓣꓳ ꓜꓴ ꓔꓯ ꓡꓳꓸˍ ꓡꓳ= ꓕꓱ ꓟ ꓮ ꓙꓵꓽ ꓠꓬ ꓘꓶꓽ ꓫꓵꓽ ꓡꓵꓺ ꓗꓪ ꓓˍ ꓟ ꓥ ꓡꓳ=