ꓞꓳ ꓐꓳ ꓟꓴ ꓗꓪ ꓗꓴꓷꓼ ꓗꓪ ꓓꓵꓽ ꓡꓰ ꓫˍ ꓟ

ꓮ ꓠꓱ ꓣꓳꓽ ꓪꓴ-ꓢ ꓦ ꓡꓱ ꓢꓴ ꓟꓽ ꓒꓬꓱꓼ ꓡ ꓧꓶꓸ ꓕꓯ ꓣꓳ ꓠꓬ ꓠꓲꓽ ꓔꓯ ꓙꓳꓺˍ ꓟ ꓑꓶꓸ ꓓꓴ ꓠꓲꓽ ꓖꓴ ꓬꓰ ꓗꓳꓸ ꓡˍ ꓟ ꓥ ꓡꓳ= ꓠꓲꓽ ꓔꓯ ꓙꓳꓺˍ ꓟ ꓑꓶꓸ ꓓꓴ ꓣꓳ ꓔꓯ ꓙꓳˍ ꓟ ꓮ ꓭꓸ ꓢꓰꓼ ꓔꓲꓺ ꓠꓬꓲ꓾ ꓮ ꓪꓯꓼ ꓢꓰꓼ ꓠꓬꓲ ꓬꓰ ꓢꓲ ꓠꓲꓽ ꓒ ꓔꓯ ꓡꓯꓼ ꓙꓱ ꓖꓶˍ ꓡꓳ= ꓠꓲꓽ ꓒ ꓔꓯ ꓠꓲꓽ ꓖꓴ ꓝꓲˍ ꓡꓳ= ꓣꓳ ꓠꓬ ꓠꓲꓽ ꓔꓯ ꓙꓳꓺˍ ꓟ ꓑꓶꓸ ꓓꓴ ꓠꓲꓽ ꓒ ꓔꓬ ꓗꓪ ꓙꓰ ꓢꓲ ꓖꓳ ꓫꓵꓽ ꓕꓱ ꓫꓵꓽ ꓓꓰꓽˍ ꓕꓯ ꓠꓲꓽ ꓒ ꓠꓬ ꓣꓳ ꓔꓯ ꓠꓲꓽ ꓟꓽ ꓠꓷꓼ ꓡ ꓠꓹ ꓟ ꓞꓲꓻ ꓤ ꓖꓶꓽ ꓠꓬꓲ꓾ ꓥ ꓠꓬ ꓕꓴꓽ ꓘꓴꓼ ꓡꓯꓽ ꓫꓵꓽ ꓖꓶ ꓠꓬꓲ꓾ ꓕꓱ ꓡꓱ ꓫꓵꓽ ꓣꓳ ꓔꓯ ꓖꓶ ꓡˍ ꓟ ꓔꓯ ꓚꓲꓸ ꓟꓶˍ ꓟ ꓥ ꓡꓳ= ꓮ ꓫꓵꓽ ꓑꓶ ꓓꓴ ꓥ ꓡ? ꓣꓳ ꓠꓬ ꓠꓲꓽ ꓔꓯ ꓙꓳꓺˍ ꓟ ꓑꓶꓸ ꓓꓴ ꓠꓲꓽ ꓡꓰ ꓣꓳ ꓔꓯ ꓟꓽ ꓖꓼ ꓡ ꓠꓹ ꓟ꓾ ꓣꓳ ꓔꓯ ꓟꓽ ꓠꓷꓼ ꓡ ꓠꓹ ꓟ ꓣꓳ ꓠꓬ ꓠꓲꓽ ꓒ ꓡꓰ ꓖꓶ ꓡˍ ꓟ ꓞꓲꓻ ꓤ ꓫꓵꓽ ꓫꓵꓽ ꓥ ꓠꓬ ꓠꓲꓽ ꓒ ꓡꓰ ꓖꓶ ꓡ ꓟ ꓐꓴ ꓔꓯ ꓮ ꓕꓯˍ ꓟꓲ ꓔꓯꓹ ꓔ ꓗꓴˍ ꓡꓳ=

ꓣꓳ ꓪꓴ-ꓢ ꓦ ꓡꓱ ꓢꓴ ꓒꓬꓱꓼ ꓡ ꓗꓸ ꓠꓯꓸ ꓠꓲꓽ ꓔꓯ ꓧꓪꓸ ꓘꓴˍ ꓟ ꓪꓴ-ꓢ ꓔꓯ ꓣꓳ ꓦ ꓡꓱ ꓗꓷꓳ= ꓠꓲꓽ ꓔꓯ ꓓꓶꓽ ꓧꓪꓸ ꓘꓴˍ ꓟ꓾ ꓠꓲꓽ ꓔꓯ ꓢꓰꓼ ꓢꓴ ꓪꓴ-ꓢ ꓔꓯ ꓣꓳ ꓦ ꓡꓱ ꓗꓷꓳ= ꓖꓳ ꓟ ꓪꓴꓸ ꓠꓬꓲ ꓣꓳ ꓠꓬ ꓙꓲ-ꓢꓴ ꓢꓲꓺ ꓤ ꓒꓬꓱꓼ ꓡꓺꓳ= ꓖꓳ ꓡꓱ ꓥˍ ꓟꓲ ꓣꓳ ꓙꓲ-ꓢꓴ ꓢꓲꓺ ꓤ ꓒꓬꓱꓼ ꓡ ꓥˍ ꓟꓲ ꓣꓳ ꓠꓬ ꓮ ꓠꓱ ꓮ ꓒꓵꓽ ꓮ ꓑ ꓦꓬꓼ ꓠꓬꓲ ꓕꓯ ꓠꓲꓽ ꓦ ꓡꓱˍ ꓟ ꓡꓰ ꓐꓰ ꓢꓲꓺ ꓒ ꓬꓰ-ꓢꓴ ꓔꓯ ꓦ ꓡꓱˍ ꓟ ꓕꓲ ꓖ ꓕꓲ ꓧꓪꓹ ꓙꓳ ꓗꓴˍ ꓡꓳ= ꓣꓳ ꓮ ꓒꓵꓽ ꓮ ꓑ ꓐꓴ ꓠꓲꓽ ꓒ ꓔꓬ ꓗꓪ ꓙꓰ ꓢꓲ ꓢꓰꓼ ꓔꓲꓺ ꓓꓴ ꓬꓰˍ ꓟ ꓡꓰ ꓐꓰ ꓣꓳ ꓥˍ ꓟꓲ ꓮ ꓟꓶ ꓟ ꓦꓬꓼ ꓠꓬꓲ ꓗꓪ ꓠꓲꓽ ꓔꓯ ꓮ ꓘꓶ ꓟꓽ ꓙꓳꓺ ꓥˍ ꓟꓲ ꓫ ꓙꓵ ꓟꓶ ꓙꓵ ꓓꓴ ꓔꓯ ꓙꓳꓺˍ ꓠꓬꓲ꓾ ꓥ ꓠꓬ꓾ ꓟꓲ ꓠꓯ ꓕꓱ ꓟ ꓗꓪ ꓒꓴꓻ ꓫꓵꓺ ꓙꓳ ꓠꓲꓹ ꓫꓵˍ ꓟ ꓑꓶꓸ ꓓꓴ꓾ ꓥ ꓠꓬ ꓠꓲꓹ ꓫ ꓟꓬ ꓫ ꓓꓴ ꓔꓳꓹ ꓜꓳꓽˍ ꓟ ꓑꓶꓸ ꓓꓴ ꓡꓰꓽ ꓢꓲꓺ ꓒ ꓬꓰ-ꓢꓴ ꓔꓬ ꓗꓪ ꓙꓰ ꓔꓬ ꓟ ꓦꓬꓼ ꓠꓬꓲˍ ꓟꓲ ꓙꓳ ꓗꓴˍ ꓡꓳ= ꓣꓳ ꓙꓳ ꓢ ꓔꓬꓹ ꓢ ꓕꓯ꓾ ꓗꓳꓸ ꓢˍ ꓟ ꓦꓬꓼ ꓠꓬꓲ ꓗꓪ ꓪꓴ-ꓢ ꓔꓯ ꓓꓵꓽ ꓙ ꓟꓽ ꓟꓶ ꓢꓲ꓾ ꓫ ꓡ ꓕꓯ ꓪꓴ-ꓢ ꓔꓯ ꓦ ꓡꓱ ꓗꓴˍ ꓟ ꓦꓬꓼ ꓠꓬꓲ ꓙꓳ ꓗꓴˍ ꓡꓳ= ꓕꓱ ꓟ ꓠꓬ ꓟꓽ ꓜꓳꓽ=

ꓕꓱ ꓟ ꓠꓬ ꓪꓴ-ꓢ ꓠꓬ꓾ ꓢꓲꓺ ꓒ ꓬꓰ-ꓢꓴ ꓠꓬ ꓣꓳ ꓔꓯ ꓠꓲꓽ ꓔꓯ ꓗꓽ ꓔ ꓖꓶˍ ꓟ꓾ ꓥ ꓠꓬ ꓟꓲ ꓠꓯ ꓫ ꓙꓵ ꓓꓴ ꓔꓯ ꓗꓽ ꓔ ꓖꓶ ꓢꓴ ꓕꓲ ꓣꓳˍ ꓡꓰ ꓐꓰ ꓓꓵꓽ ꓙ ꓔꓬ ꓡꓳ= ꓕꓱ ꓟ ꓠꓬ ꓟꓽ ꓜꓳꓽ= ꓮ ꓫꓵꓽ ꓑꓶꓸ ꓓꓴ ꓥ ꓡ? ꓢꓲꓽ ꓫꓬ ꓕꓳ ꓶ ꓗꓪ ꓙꓲꓻ ꓫꓬ ꓢꓴ ꓒꓳ-ꓡꓳ ꓡꓰ ꓕꓱ ꓡꓱ ꓐꓯ ꓔ ꓡꓳ= ꓣꓳ ꓠꓬ ꓢꓲꓺ ꓒ ꓬꓰ-ꓢꓴ ꓔꓯ ꓓꓰꓽˍ ꓟ ꓠꓬ ꓟꓲ ꓠꓯ ꓐꓳ ꓶ ꓡꓰꓽ ꓓꓰꓽˍ ꓕꓯ ꓠꓽ ꓟꓲ ꓠꓯ ꓕꓱ ꓟ ꓗꓪ ꓣꓳ ꓡꓰ ꓛꓲꓺ ꓫꓱꓸ ꓤ ꓓꓴ ꓧˍ ꓟ ꓟꓽ ꓙꓳ꓾ ꓐꓰ ꓐꓯ ꓔ ꓡꓳ= ꓣꓳ ꓢꓲꓺ ꓒ ꓬꓰ-ꓢꓴ ꓔꓯ ꓙꓵˍ ꓟ ꓠꓬ ꓣꓳ ꓠꓲꓹ ꓟ ꓗꓹ ꓛꓲꓽ ꓠꓹ ꓟ꓾ ꓣꓳ ꓪ ꓜꓽ ꓪ ꓓꓳꓻ ꓠꓹ ꓟ꓾ ꓣꓳ ꓐꓱ ꓶ ꓠꓲꓽ ꓔꓯ ꓗꓽ ꓔ ꓖꓶ ꓠꓹ ꓟ ꓡꓰꓽ ꓓꓵꓽ ꓙ ꓢꓲ ꓬꓰ ꓔꓬ ꓠꓬ ꓣꓳ ꓟꓬ ꓛꓲꓺ ꓫꓱꓸ ꓤ ꓠꓯꓹ ꓟ ꓟꓲ ꓠꓯ ꓞꓳ ꓤ ꓟꓽ ꓙꓳ꓾ ꓐꓰ ꓐꓯ ꓔ ꓟ ꓥ ꓡꓳ= ꓮ ꓫꓵꓽ ꓪꓴꓸ ꓠꓬꓲ ꓥ ꓡ?

ꓣꓳ ꓠꓬ ꓟꓲ ꓠꓯ ꓕꓱ ꓟ ꓗꓪ ꓢꓲꓺ ꓒ ꓬꓰ-ꓢꓴ ꓔꓯ ꓦ ꓡꓱˍ ꓟ ꓠꓬ ꓟꓲ ꓠꓯ ꓐꓱ ꓶ ꓡꓰꓽ ꓟꓽ ꓥ= ꓬꓲ ꓡꓰ ꓖꓶ ꓙ ꓟꓳˍ ꓟ ꓕꓲ ꓞꓲꓼ ꓕꓲ ꓑ ꓢꓲꓺ ꓡꓲ ꓟ ꓢꓯꓼ ꓟꓬ ꓐꓱ ꓶ ꓥ ꓡꓳ꓾ ꓐꓰ ꓠꓬꓲꓸ ꓠꓬꓲ ꓢꓲꓽ ꓫꓬ ꓕꓳ ꓶ ꓥ ꓟ ꓟ-ꓘꓳ ꓕꓳ ꓶ 10ꓽ28-31 ꓗꓪ “ꓒꓲ-ꓕꓱ ꓡꓰ ꓥꓪ ꓠꓴꓽ ꓠꓬ ꓥꓪ ꓠꓴ ꓦꓲꓻ ꓔꓯ ꓡꓳ ꓒꓰꓹ ꓗꓷꓳ= ꓥꓪ ꓠꓴꓽ ꓠꓬ ꓙꓳˍ ꓟ ꓮ ꓙꓵꓽ ꓡꓳ ꓗꓷ ꓢꓲ ꓢꓲꓺ ꓒ ꓠꓴ ꓔꓯ ꓖꓼ ꓛꓳ ꓗꓷꓳ꓾ ꓥꓪ ꓠꓴꓽ ꓠꓬ ꓮ ꓫꓵꓽ ꓟꓶˍ ꓡ? ꓐꓰ ꓐꓯ ꓕꓯ ꓢꓲꓺ ꓒ ꓬꓰ-ꓢꓴ ꓡꓰ ꓬꓲ ꓔꓯ ꓟꓲ ꓠꓯ ꓕꓱ ꓟ ꓗꓪ ꓠꓬ ꓕꓲ ꓦꓬ ꓝꓸ꓾ ꓡ ꓠꓹ ꓟ ꓗꓪ ꓠꓬ ꓕꓲ ꓞꓲꓼ ꓕꓲ ꓑ ꓢꓲꓺ ꓡꓲ ꓟ ꓢꓯꓼ ꓟꓬ ꓟꓶˍ ꓥꓳ꓾ ꓐꓰ ꓪꓵꓼ ꓘꓶꓽ ꓖꓶ ꓔ ꓡꓳ= ꓖꓳ ꓡꓱ ꓠꓬꓲ ꓣꓳ ꓗꓹ ꓛꓲ ꓓꓴ ꓥ ꓡꓳ= ꓠꓲꓹ ꓘꓪꓽ ꓫꓵ ꓓꓴ ꓥ ꓡꓳ=

ꓮ ꓫꓵꓽ ꓪꓴꓸ ꓠꓬꓲ ꓥ ꓡ? ꓢꓲꓺ ꓒ ꓬꓰ-ꓢꓴ ꓬꓲ ꓪꓵꓼ ꓘꓶꓽ ꓖꓶ ꓔ ꓟ ꓐꓯ ꓘꓶꓽ ꓣꓳ ꓑ ꓙˍ ꓡꓳ= ꓬꓲ ꓔꓯ ꓛꓳꓻ ꓢꓴ꓾ ꓬꓲ ꓠꓲꓹ ꓡꓶꓽ ꓛꓳꓻ ꓢꓴ ꓠꓬ ꓟꓲ ꓠꓯ ꓗꓪ ꓕꓲ ꓦꓬ ꓝꓸ꓾ ꓡ ꓠꓹ ꓟ ꓤꓶꓻ ꓗꓪ ꓕꓲ ꓞꓲꓼ ꓕꓲ ꓑ ꓢꓲꓺ ꓡꓲ ꓟ ꓢꓯꓼ ꓟꓬ ꓟꓶˍ ꓥꓳ꓾ ꓐꓰ ꓐꓯ ꓔ ꓡꓳ= ꓖꓳ ꓡꓱ ꓠꓬꓲ ꓠꓬꓲꓸ ꓠꓬꓲ ꓣꓳ ꓓꓵꓽ ꓙ ꓠꓬꓲ ꓡꓯ= ꓣꓳ ꓠꓬ ꓢꓲꓺ ꓒ ꓬꓰ-ꓢꓴ ꓔꓯ ꓦ ꓡꓱ ꓔꓬ ꓟ ꓟꓲ ꓠꓯ ꓖꓴ ꓙꓴꓽ ꓟꓶ ꓠꓹ ꓟ ꓐꓱ ꓶ ꓡꓰꓽ ꓦ ꓡꓱ ꓔꓬ ꓡ? ꓟꓲ ꓠꓯ ꓕꓱ ꓟ ꓗꓪ ꓙꓳꓺ ꓛꓱꓽ ꓓꓴ ꓐꓱ ꓶ ꓫ ꓑꓬ ꓖꓴˍ ꓡꓰ ꓐꓰ ꓦ ꓡꓱ ꓔꓬ ꓡ? ꓟꓽ ꓥ ꓠꓬ ꓡ ꓠꓹ ꓟ ꓕꓲ ꓞꓲꓼ ꓕꓲ ꓑ ꓐꓱ ꓶ ꓦ ꓡꓱ ꓔꓬ ꓡ? ꓕꓲ ꓞꓲꓼ ꓕꓲ ꓑ ꓫꓵꓻ ꓟꓽ ꓓ ꓟ ꓦ ꓐꓱ ꓶ ꓓꓵꓽ ꓙ ꓔꓬ ꓡ? ꓐꓯ ꓟ ꓔꓯ ꓓꓵꓽ ꓙ ꓠꓬꓲ ꓡꓯ=