ꓔꓲꓺ ꓒ ꓪ ꓔꓲ ꓬꓳ‐ꓦ ꓒꓳ‐ꓡꓳ (2) ꓐꓰ Muslim ꓘꓴ ꓜꓲꓼ ꓞꓳ ꓚꓱ, (Church history)

ꓔꓲꓺ ꓒ ꓪ ꓔꓲ ꓬꓳ‐ꓦ ꓒꓳ‐ꓡꓳ (2) ꓗ‐ꓕꓳ‐ꓡꓲꓗ ꓘꓴ ꓜꓲꓼ ꓞꓳ ꓔꓯ ꓧꓳꓽ ꓪꓴ. ꓟꓴ ꓔꓬ ꓟ ꓙꓵ, ꓗꓪ ꓠꓬ Muslim ꓘꓴ ꓜꓲꓼ ꓞꓳ ꓐꓴ ꓐꓰ ꓪꓽ ꓡꓯ ꓘꓳ ꓓꓴ ꓮ ꓟꓬ, ꓙꓳ ꓡꓰꓳ꓿ ꓔꓲꓺ ꓒ ꓪ ꓔꓲ ꓬꓳ‐ꓦ ꓒꓳ‐ꓡꓳ (2) ꓠꓬ 2001 ꓘꓳꓼ 5 ꓦ 6 ꓠꓬꓲ ꓕꓯ Muslim ꓐꓴ ꓪꓽ ꓘꓴ ꓦꓲꓻ ꓗꓪ ꓙꓰ ꓗꓷꓳ꓿

Islam ꓙꓵꓻ ꓠꓲ, ꓔꓯ ꓘꓳ, ꓣꓴ ꓢꓴ ꓐꓴ ꓮ ꓟꓬ, ꓔꓬ ꓟ ꓗꓴꓷꓼ ꓕꓲ ꓗꓴꓷꓼ ꓥ ꓟ Syria ꓗꓴꓷꓼ Damascus ꓡꓳ ꓒꓱ ꓗꓪ ꓫꓬ, ꓦ ꓟ Umayyad Mosques ꓪꓽ ꓘꓴ ꓦꓲꓻ ꓗꓪ ꓔꓲꓺ ꓒ ꓪ ꓔꓲ ꓬꓳ‐ꓦ ꓒꓳ‐ꓡꓳ (2) ꓚꓳ ꓙꓰ ꓗꓷꓳ꓿

ꓔꓲꓺ ꓒ ꓪ ꓔꓲ ꓡꓰ Muslim ꓪꓽ ꓘꓴ ꓦꓲꓻ ꓘꓴꓽ ꓗꓪ ꓫ. ꓕꓱ ꓗꓷ ꓟ ꓠꓬ Muslim ꓕꓲ ꓣꓳ ꓐꓰ ꓢꓲꓺ ꓒ ꓬꓰ‐ꓢꓴ ꓔꓯ ꓘꓳ ꓣꓴ ꓢꓴ ꓙꓲ‐ꓢꓴ ꓢꓲꓺ ꓤ ꓕꓲ ꓣꓳ ꓠꓬ ꓮ ꓕꓯ ꓥ ꓟꓲ ꓢꓰꓼ ꓡꓯ ꓘꓳ ꓓꓶꓽ ꓡꓯ ꓘꓳ ꓓꓴ ꓙꓳˍ ꓡꓳ ꓐꓰ ꓐꓯ ꓖꓶˍ ꓡꓳ꓿

 

ꓔꓲꓺ ꓒ ꓪ ꓔꓲ ꓡꓰ ꓥꓪ ꓠꓬ ꓪꓴ‐ꓢ ꓔꓯ ꓪꓽ ꓘꓴˍ ꓟ ꓠꓬ ꓣꓳ ꓬꓰ ꓥꓳꓽ ꓡꓰ ꓟ ꓝꓴꓲ ꓐꓰ ꓛꓬꓻ ꓡꓰ ꓟ ꓝꓴꓲ ꓔꓯ ꓪꓴ‐ꓢ ꓡꓰ ꓖꓼ ꓖꓶ ꓠ, ꓟ ꓐꓰ ꓣꓳ ꓕꓲ ꓣꓳ ꓛꓳ ꓕꓲ ꓣꓳ ꓝꓴꓲ ꓖꓽ ꓖꓶ ꓠ, ꓟ ꓠꓲ, ꓒꓴˍ ꓡꓳ꓾ ꓐꓰ ꓐꓯ ꓖꓶ ꓟ ꓥ ꓡꓳ꓿ ꓔꓲꓺ ꓒ ꓪ ꓔꓲ ꓠꓬ Muslim ꓐꓴ ꓣꓱꓽˍ ꓟ ꓢꓲꓽ ꓫꓬ ꓕꓳ ꓶ ꓔꓯ ꓞꓳ ꓒꓵˍ ꓟ ꓥ ꓡꓳ꓿

ꓔꓲꓺ ꓒ ꓪ ꓔꓲ ꓠꓬ ꓗ‐ꓕꓳ‐ꓡꓲꓗ ꓙꓵꓻ ꓠꓲ, ꓚꓱ, ꓕꓳ ꓶ ꓗꓪ Muslim ꓐꓴ ꓠꓬ ꓚꓰꓼ ꓢꓴ ꓪꓴ‐ꓢ ꓔꓯ ꓦꓻ ꓡꓱ ꓢꓴ ꓐꓴ ꓥ ꓡꓳ꓾ ꓐꓰ ꓐꓳ ꓔ ꓟ ꓥ ꓡꓳ꓿ ꓬꓲ ꓪ ꓠꓬ ꓮꓽ ꓠꓱ ꓮ‐ꓐ‐ꓡ‐ꓦ ꓙꓵꓻ ꓠꓲ, ꓔꓯ ꓙꓵꓻ ꓢꓴ ꓐꓴ ꓥ ꓡꓳ꓾ ꓐꓰ ꓐꓳ ꓔ ꓡꓳ꓿ ꓔꓲꓺ ꓒ ꓪ ꓔꓲ ꓬꓳ‐ꓦ ꓒꓳ‐ꓡꓳ (2) ꓠꓬ ꓣꓳ ꓙꓲ‐ꓢꓴ ꓢꓲꓺ ꓤ ꓐꓴ ꓠꓬ ꓐ, ꓐ꓾ ꓤ ꓔꓲ.꓾ ꓢꓲ‐ꓫꓬ‐ꓟ‐ꓦ ꓢ ꓣꓳ ꓕꓲ ꓖꓳꓽ ꓓꓱ ꓪꓴ‐ꓢ ꓔꓯ ꓦꓻ ꓡꓱ ꓔꓬ ꓢꓴ ꓐꓴ ꓥ ꓡꓳ꓾ ꓐꓰ ꓐꓳ ꓔ ꓡꓳ꓿