ꓟꓬꓱˍ ꓡꓰ ꓟꓯ ꓢꓴ ꓔꓯ ꓙꓳ ꓗꓽ ꓖꓶˍ ꓟ

ꓟꓴ ꓗꓪ ꓗꓴꓷꓼ ꓗꓪ ꓓꓵꓽ ꓪ ꓠꓹ ꓟ ꓠꓬ ꓙꓲ-ꓢꓴ ꓢꓲꓺ ꓤ ꓮ ꓙꓵꓽ ꓠꓲꓹ ꓫꓵˍ ꓟ ꓠꓲꓹ ꓡꓶꓽ ꓕꓲ ꓟ ꓥ ꓡꓳ= ꓮ ꓟˍ ꓟꓲ ꓫꓵꓻ ꓘꓪ ꓡꓰ ꓗ ꓠꓯꓸ ꓠꓬ ꓟꓴ ꓗꓪ ꓗꓴꓷꓼ ꓗꓪ ꓓꓵꓽ ꓙꓰ ꓠꓲꓹ ꓫꓵ ꓢꓴ ꓡꓰꓽ ꓥ ꓡꓳ= ꓖꓳ ꓡꓱ ꓥ ꓟꓲ ꓢꓲꓺ ꓒ ꓬꓰ-ꓢꓴ ꓠꓬ “ꓥꓪ ꓔꓯ ꓢꓲꓺ ꓒꓽꓳ ꓢꓲꓺ ꓒꓽꓳ꓾ ꓘꓴ ꓢꓴ ꓮ ꓙꓵꓽ ꓟꓴ ꓗꓪ ꓗꓴꓷꓼ ꓗꓪ ꓓꓵꓽ ꓪ ꓟꓽ ꓓ=” ꓐꓰ ꓐꓯ ꓔ ꓟ ꓔꓯ ꓟꓳ ꓪˍ ꓟ ꓥ ꓡꓳ= ꓖꓳ ꓡꓱ ꓠꓬꓲ ꓟꓴꓽ ꓗꓪ ꓗꓴꓷꓼ ꓗꓪ ꓙꓲ-ꓢꓴ ꓢꓲꓺ ꓤ ꓮ ꓙꓵꓽ ꓓꓵꓽ ꓪ ꓟꓽ ꓓ꓾ ꓐꓰ ꓐꓯˍ ꓟ ꓥ ꓡ ꓐꓯ ꓟ ꓠ ꓓꓵꓽ ꓙ ꓠꓬꓲ ꓓꓴ ꓥꓳ= ꓞꓳ ꓤ ꓮ ꓟꓬꓹ ꓠꓬ ꓬꓰ-ꓢꓴ ꓙꓲ-ꓢꓴ ꓟꓬꓱꓺ ꓗꓪ ꓐꓰ ꓢꓲꓺ ꓒ ꓬꓰ-ꓢꓴ ꓓꓳꓽ ꓚˍ ꓕꓯ ꓠꓬ꓾ ꓬꓰ-ꓢꓴ ꓟꓬꓱꓺ ꓗꓪ ꓐꓰ ꓟꓬꓱꓽ ꓬꓰˍ ꓠꓬ ꓟꓴꓽ ꓗꓪ ꓗꓴꓷꓼ ꓗꓪ ꓙꓰ ꓪ ꓠꓹ ꓟ ꓠꓬ ꓠꓶꓽ ꓡꓰꓳ꓾ ꓡꓳꓼ ꓡꓰꓳ꓾ ꓐꓰ ꓓꓵꓽ ꓙ ꓟꓶ ꓔꓬ ꓡꓳ=

ꓖꓳ ꓡꓱ ꓥˍ ꓟꓲ ꓢꓲꓽ ꓫꓬ ꓕꓳ ꓶ ꓝꓲ ꓔꓯ ꓬꓲ ꓙꓲꓻ ꓵꓻ ꓠꓬꓲˍ ꓕꓯ “ꓟꓴꓽ ꓗꓪ ꓗꓪ ꓔꓬ ꓟ ꓥꓪ ꓐꓹ ꓐꓽ ꓠꓲꓹ ꓡꓶꓽ ꓛꓳ ꓢꓴˍ ꓡꓰꓽ ꓓꓵꓽ ꓡꓰˍ ꓥꓳ” ꓐꓰ ꓐꓯ ꓔ ꓡꓳ= ꓖꓳ ꓡꓱ ꓠꓬꓲ ꓣꓳ ꓐꓱ ꓶ ꓝꓮꓲ ꓕꓲ ꓧꓪꓹ ꓓꓵꓽ ꓙ ꓠꓬꓲ ꓪˍ ꓟ ꓠꓬ ꓢꓲꓺ ꓒ ꓬꓰ-ꓢꓴ ꓟꓬꓱꓺ ꓗꓪ ꓐꓰ ꓣꓳ ꓬꓰˍ ꓟ ꓮ ꓙꓵꓽ ꓠꓬ ꓪꓴ-ꓢ ꓠꓲꓹ ꓡꓶꓽ ꓙꓳˍ ꓟ ꓡꓰ ꓐꓰ ꓥ ꓡ= ꓟꓽ ꓥ ꓠꓬ ꓚꓲꓸ ꓛꓬ ꓠꓲꓹ ꓡꓶꓽ ꓙꓳˍ ꓟ ꓡꓰ ꓐꓰ ꓚꓲ ꓛꓬ ꓐꓱ ꓶ ꓙꓲꓻ ꓖꓴ ꓧꓪ ꓔꓬ ꓡ= ꓢꓲꓽ ꓫꓬ ꓕꓳꓽ ꓶ ꓔꓯ ꓙꓲꓻ ꓙꓲꓻ ꓟꓵ ꓟꓵ ꓢꓷꓸ ꓔ ꓟ ꓙꓵꓽ ꓗ ꓟꓸ ꓒ ꓐꓴ꓾ ꓡ ꓞꓳ ꓐꓴ ꓔꓯ ꓢꓲꓽ ꓫꓬ ꓦꓲ ꓥ ꓕ ꓑꓳꓸꓼ ꓗꓪ ꓟꓸ ꓖꓶ ꓔꓬ ꓟ ꓒ-ꓡꓲ-ꓢꓷ ꓐꓴ ꓾ ꓝꓮꓲ ꓠꓬ ꓮ ꓟꓶ ꓟ ꓦꓬꓼ ꓠꓬꓲ ꓗꓪ ꓬꓰ-ꓢꓴ ꓟꓬꓱꓺ ꓣꓱꓽ ꓢꓲ ꓟꓸ ꓟꓲꓽ ꓚ ꓑꓮꓲꓽ ꓓ ꓟ ꓬꓰ ꓔꓬ ꓢꓴ ꓐꓴ꓾ ꓬꓰ-ꓢꓴ ꓟꓬꓱꓺ ꓗꓪ ꓐꓰ ꓦꓻ ꓢꓯꓼ ꓖꓶ ꓔꓬ ꓟ ꓘꓴ ꓜꓲꓼ ꓞꓳ ꓟꓸ ꓒ ꓐꓴ꓾ ꓘꓴ ꓜꓲꓼ ꓞꓳ ꓕꓲ ꓟ ꓑꓶꓸ ꓝ ꓕꓲ ꓟ ꓫꓬꓹ ꓔꓶ ꓔꓬ ꓢꓴ ꓐꓴ ꓠꓬ ꓕꓱ ꓟ ꓔꓯ ꓮ ꓟꓬꓹ ꓓꓵꓽ ꓙ ꓠꓬꓲ ꓠ ꓗꓹ ꓡꓳ=

ꓟꓬꓱꓽ ꓕꓱ ꓟ ꓬꓰ ꓔꓬ ꓢꓴ ꓐꓴ ꓠꓬ ꓕꓯꓽ ꓢꓲꓺ ꓗꓪ ꓡꓰꓽ ꓬꓰ-ꓢꓴ ꓔꓯ ꓘꓳꓹ ꓣꓴ ꓔ ꓢꓲ ꓠꓲꓹ ꓟ ꓘꓴꓽ ꓗꓪ ꓠꓬ ꓪꓴ-ꓢ ꓔꓯ ꓡꓳꓺ ꓒꓰ ꓔ ꓡꓳ= ꓢꓲꓺ ꓒ ꓬꓰ-ꓢꓴ ꓬꓲꓸ ꓟꓬꓱꓺ ꓣꓱꓽ ꓢꓲ ꓬꓰ ꓔꓬ ꓥ ꓟꓲ ꓚꓲꓸ ꓛꓬ ꓐꓱ ꓶ ꓙꓲꓻ ꓓꓴ ꓙꓳ ꓡ ꓠ ꓬꓰ ꓔꓬ ꓗꓴꓸˍ ꓡꓳ= ꓖꓳ ꓡꓱ ꓠꓬꓲ ꓠꓲꓹ ꓟ ꓘꓴꓽ ꓠꓯꓸꓼ ꓗꓪ ꓢꓲꓺ ꓒ ꓬꓰ-ꓢꓴ ꓔꓯ ꓘꓳꓹ ꓣꓴ ꓔ ꓢꓲ ꓬꓰ-ꓢꓴ ꓬꓲ ꓠꓲꓹ ꓡꓶꓽ ꓙꓳˍ ꓟ ꓡꓰ ꓞꓳ ꓙꓳ ꓔꓬ ꓡ ꓐꓯ ꓟ ꓔꓯ ꓣꓳꓽ ꓕꓲ ꓣꓳ ꓘꓴˍ ꓡꓰ ꓓꓵꓽ ꓙ ꓠꓬꓲ ꓠꓹ ꓟ ꓥ ꓡꓳ= “ꓥꓪ ꓐꓯ ꓘꓶꓽ ꓕꓱ ꓟꓬ ꓟ ꓑ ꓙ ꓢꓲ ꓛꓳ ꓬꓰ ꓢꓴ ꓠꓽ꓾ ꓡꓳ ꓓꓰ ꓕꓯꓽ ꓢꓲ ꓗꓪ ꓦꓲꓻ ꓫꓬꓹˍ ꓟ ꓢꓷꓸ ꓠꓲꓹ ꓙꓳ ꓢꓴ ꓕꓲ ꓣꓳˍ ꓡꓰ ꓐꓰ ꓗꓹ ꓡꓳ=”