ꓟꓶꓽ ꓛꓵꓽ ꓟ ꓤ ꓔꓲꓸ ꓔꓯ ꓢꓯꓸ ꓬꓲꓼ ꓡ ꓝꓲˍ ꓟ

 ꓟꓶꓽ ꓛꓵꓽ ꓟ ꓤ ꓔꓲꓸ ꓔꓯ ꓢꓯꓸ ꓬꓲꓼ ꓡ ꓝꓲˍ ꓟ

ꓖꓳ ꓗ ꓠꓯꓸ ꓟꓶ ꓤ ꓟꓽ ꓗꓷ ꓡꓰ ꓕꓯ ꓬꓰ-ꓢꓴ ꓠꓬ ꓠ-ꓬꓰ ꓟꓬꓱ ꓔ ꓟ ꓡꓳ ꓒꓱ ꓗꓪꓙꓰˍ ꓡꓳ= ꓬꓲ ꓛꓳꓽ ꓒꓯꓹ ꓐꓴˍ ꓐꓰ ꓞꓳ ꓜꓴ ꓓꓽ ꓟˍ ꓟꓲ ꓬꓲ ꓔꓯ ꓛꓳ ꓙꓰˍ ꓡꓳ= ꓬꓲ ꓪ ꓠꓬ ꓡꓳ ꓒꓱ ꓗ ꓘꓶ ꓗꓪ ꓓꓵꓽ ꓙꓰˍ ꓐꓰ ꓬꓰˍ ꓕꓯ꓾ ꓢꓴ ꓡꓰ ꓟꓶꓽ ꓛꓵꓽ ꓟ ꓬꓲ ꓤ ꓔꓲꓸ ꓫꓵꓻ ꓟꓳꓻ ꓑꓱꓸ ꓓꓳ ꓡˍ ꓟ ꓬꓲ ꓪ ꓟꓳˍ ꓡꓳ= ꓟꓶꓽ ꓛꓵꓽ ꓟ ꓖꓳ ꓟ ꓔꓯ ꓡꓳ ꓒꓱ ꓗꓪ ꓐꓰ ꓛꓳ ꓡ ꓢꓴˍ ꓟꓲ ꓮꓽ ꓟꓬꓹ ꓙꓳˍ ꓡꓳ= ꓢꓲ ꓒ ꓡꓰ ꓟꓶꓽ ꓛꓵꓽ ꓟ ꓔꓯ ꓟꓳ ꓗꓷ ꓠꓬ ꓬꓲ ꓔꓯ ꓫꓱꓸ ꓤ ꓢꓲ꓾ ꓕꓽ ꓥꓴ꓾ ꓐꓯ ꓖꓶˍ ꓡꓳ=

ꓬꓰ-ꓢꓴ ꓠꓬ ꓒ ꓕꓲ ꓗꓪ ꓡ ꓢꓲ ꓖꓴꓽ ꓔꓯ ꓫꓱꓹ ꓗꓷ ꓠꓬ ꓫꓵꓻ ꓟꓳꓻ ꓑꓱꓸ ꓢꓴ ꓐꓴ ꓦꓰꓼ ꓡꓰˍ ꓡꓳ= ꓖꓳ ꓕꓯ ꓬꓲ ꓡꓰ꓾ ꓤ ꓖꓴ ꓡꓯꓸꓳ꓾ ꓠꓴ ꓔꓯ ꓥꓪ ꓐꓯ ꓖꓶˍ ꓠꓬꓲ꓾ ꓔꓴ ꓡꓯ꓾ ꓐꓯˍ ꓡꓳ= ꓖꓳ ꓡꓱ ꓠꓬ ꓞꓳ ꓫꓵꓻ ꓖꓳ ꓟ ꓠꓬꓲꓸ ꓠꓸ ꓡ ꓢꓲ ꓫꓸ ꓕꓱ ꓡꓺꓳ= ꓖꓳ ꓕꓯ ꓬꓰ-ꓢꓴ ꓡꓰ ꓬꓲ ꓟꓹ ꓟ ꓔꓯ ꓡꓯꓼ ꓙꓱ ꓖꓶˍ ꓡꓳ= ꓮ ꓙꓵ ꓢꓴ ꓠꓬ ꓓꓵꓽ ꓙ ꓟꓶ ꓠꓬꓲ ꓙꓳꓺ ꓠꓬꓲ ꓗꓷ ꓡꓰ ꓢꓲ꓾ ꓪꓴ-ꓢ ꓔꓯ ꓟꓬꓱ ꓓꓳꓽ ꓖꓶ ꓢꓲ ꓠꓬꓲ꓾ ꓟꓷꓽ ꓠꓷꓹ ꓝꓸ ꓢꓴ ꓓꓽ ꓟ ꓕꓲ ꓣꓳ ꓣꓳꓽ ꓗꓳ ꓡꓳ ꓗꓪ ꓓꓳ ꓡꓺꓳ= ꓪꓴ-ꓢ ꓠꓽ ꓬꓲ ꓑ ꓫꓬꓼ ꓐꓴ ꓔꓯ ꓬꓰ ꓙ ꓠꓹ ꓟ ꓡ ꓐꓷ꓾ ꓐꓯˍ ꓡꓳ= ꓓꓳꓽ ꓕꓱ ꓟ ꓠꓬ ꓬꓴ-ꓔ ꓟꓵꓽ ꓮ ꓙꓵꓽˍ ꓐꓰ ꓚꓳ ꓡꓳ ꓟ ꓟꓵꓽ ꓗꓪ ꓐꓯ ꓒꓬꓱ ꓙꓰˍ ꓡꓳ=

ꓠꓬꓲꓸ ꓠꓬꓲ ꓟ ꓢꓲꓽ ꓫꓬ ꓕꓳ ꓶ ꓗꓪ ꓐꓰ ꓣꓳ ꓔꓯ ꓐꓯ ꓖꓶ ꓡ ꓔꓬ ꓟ ꓠꓬ ꓪꓴ-ꓢ ꓠꓬ ꓢꓯꓸ ꓔꓬ ꓢꓴ ꓐꓴ ꓪꓴ-ꓢˍ ꓡꓰꓽ ꓟꓽ ꓥ꓾ ꓫꓵꓻ ꓢꓴ ꓐꓴ ꓪꓴ-ꓢˍ ꓟꓲ ꓥ ꓡꓳ꓾ ꓐꓰ ꓐꓯ ꓖꓶ ꓡ ꓔꓬ ꓡꓳ= ꓤ ꓫꓵꓻ ꓡꓰ ꓟ ꓟꓶꓽ ꓛꓵꓽ ꓟ ꓔꓯ ꓬꓰ-ꓢꓴ ꓠꓬ ꓮ ꓘꓶꓸ ꓫꓱꓸ ꓤˍ ꓡꓳ= ꓖꓳ ꓡꓱ ꓠꓬꓲ ꓬꓲ ꓐꓯ ꓘꓶꓽ ꓢꓯꓼ ꓪꓽ ꓠꓬꓲˍ ꓟ ꓗꓪ ꓐꓰ ꓬꓲ ꓠꓬ ꓫꓵꓻ ꓢꓴ ꓔꓯ ꓢꓯꓸ ꓬꓲꓼ ꓡ ꓝꓲ ꓢꓲ ꓝꓴꓲꓸ ꓗꓪ ꓐꓰˍ ꓟꓲ ꓢꓲꓽ ꓫꓬ ꓡꓰ ꓝꓲ ꓗꓷꓳ= ꓖꓳ ꓟ ꓪꓴꓸ ꓠꓬꓲ ꓬꓲ ꓦ ꓠꓬ ꓝꓴꓲꓸ ꓗꓪ ꓐꓰ ꓡꓲꓹ ꓩꓴ ꓟꓶ ꓡꓰꓳ= ꓚꓵ ꓚꓵ ꓣꓳ ꓐꓴ ꓬꓰ-ꓢꓴ ꓔꓯ ꓙꓵˍ ꓕꓯ ꓠꓽ ꓬꓲ ꓠꓯꓸꓼ ꓗꓪ ꓒꓬꓱꓼ ꓡ ꓟꓽ ꓓ ꓟ ꓕꓲ ꓫꓵꓽˍ ꓟꓲ ꓟꓽ ꓙꓳ= ꓬꓰ-ꓢꓴ ꓙꓲ-ꓢꓴ ꓔꓯ ꓙꓵꓻ ꓢꓴ ꓮ ꓙꓵꓽ ꓠꓬ ꓤꓶꓻ ꓙꓳ ꓟꓯꓹ ꓙꓳ ꓝꓲ=