ꓙꓵꓻ ꓢꓴ ꓠꓬ ꓬꓰ-ꓢꓴ ꓬꓲ ꓫꓵꓽ ꓬꓲ ꓧꓪ ꓥ ꓟ (ꓡꓴ-ꓘ 8ꓽ19-21)

ꓠꓲꓹ ꓠꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓪꓴ-ꓢ ꓟꓬꓱꓽ ꓟꓯꓻ ꓢꓴ꓾ ꓪꓴ-ꓢ ꓟꓬꓱꓽ ꓬꓰ ꓢꓴ ꓠꓬ ꓚꓲꓸ ꓛꓬ ꓦꓲꓻ ꓐꓰ ꓮꓼ ꓐ ꓮ ꓟ꓾ ꓚꓲꓸ ꓛꓬ ꓤ ꓠꓱ ꓔꓯ ꓟꓳꓻ ꓠꓹ ꓟ ꓬꓲ ꓙꓵꓹ ꓟꓽ ꓙꓳ ꓙꓳ ꓐꓰ ꓗꓹ ꓟ ꓦꓬꓼ ꓠꓬꓲ ꓟꓲ ꓙꓳˍ ꓡꓳ= ꓠꓬꓲꓸ ꓠꓬꓲ ꓟ ꓢꓲꓽ ꓫꓬ ꓕꓳ ꓶ (ꓴ-ꓘ 8ꓽ19-21)ꓗꓪ ꓢꓲꓺ ꓒ ꓬꓰ-ꓢꓴ ꓬꓲ ꓟꓹ ꓟ ꓐꓰ ꓬꓲ ꓬꓲꓼ ꓬꓲ ꓠꓬꓲ ꓐꓴ ꓠꓬ ꓬꓲ ꓔꓯ ꓧꓪ ꓟꓳꓻ ꓡˍ ꓟ ꓔꓯ ꓣꓳ ꓵ ꓪˍ ꓟ ꓥ ꓡꓳ= ꓬꓲ ꓮꓽ ꓐ ꓮ ꓟ꓾ ꓬꓲ ꓬꓲꓼ ꓠꓬꓲ ꓐꓴ ꓠꓬ ꓢꓲꓺ ꓒ ꓬꓰ-ꓢꓴ ꓔꓯ ꓟꓳꓻ ꓠꓲꓹ ꓫꓵˍ ꓡꓳ= ꓖꓳ ꓡꓱ ꓥˍ ꓟꓲ ꓟꓳꓻ ꓠꓹ ꓟ ꓬꓲ ꓙꓵꓹ ꓟꓽ ꓙꓳ꓾ ꓢꓲꓺ ꓒ ꓬꓰ-ꓢꓴ ꓠꓬ ꓪꓴ-ꓢ ꓟꓬꓱꓽ ꓬꓰˍ ꓟ ꓗꓪ ꓬꓲ ꓙꓵꓹ ꓔꓯ ꓖꓶꓽ ꓔ ꓡꓳ=

ꓖꓳ ꓡꓱ ꓠꓬꓲ ꓣꓳ ꓓꓵꓽ ꓙ ꓠꓬꓲ ꓓꓴ ꓠꓬ ꓪꓴ-ꓢ ꓟꓬꓱꓽ ꓔꓯ ꓬꓰ ꓢꓴ꓾ ꓥ ꓠꓬ꓾ ꓙꓲˍ ꓟ ꓬꓰ ꓢꓴ꓾ ꓔꓱꓹ ꓟ ꓬꓰ ꓢꓴ ꓮ ꓙꓵꓽ ꓠꓬ ꓕꓲ ꓖ ꓕꓲ ꓧꓪꓹ ꓠꓬ ꓣꓳ ꓠꓲꓹ ꓠꓵˍ ꓟ ꓮꓽ ꓐ ꓮ ꓟ꓾ ꓣꓳ ꓦꓲꓻ꓾ ꓣꓳ ꓤ ꓠꓱ ꓮ ꓙꓵꓽ ꓔꓯ ꓟꓽ ꓟꓳꓻ ꓟ ꓬꓲ ꓙꓵꓹ꓾ ꓡꓳꓸ ꓟꓽ ꓪ ꓟ ꓬꓲ ꓙꓵꓹ ꓦꓬꓼ ꓠꓬꓲ ꓙꓳ ꓡ ꓗꓴꓸˍ ꓡꓳ= ꓕꓱ ꓡꓰ ꓓꓳ ꓡˍ ꓕꓯ ꓠꓬꓲꓸ ꓠꓬꓲ ꓢꓲꓺ ꓒ ꓬꓰ-ꓢꓴ ꓡꓰ ꓘꓳ ꓗꓳꓸ ꓙꓰ ꓟ ꓔꓯ ꓣꓳ ꓓꓵꓽ ꓙ ꓠꓬꓲ ꓓꓴ ꓥ ꓡꓳ=

ꓞꓳ ꓤ ꓐꓯ ꓟ ꓠꓬ ꓢꓲꓼ ꓙꓬ ꓗꓴˍ ꓡꓳ= ꓠꓲꓹ ꓠꓵ ꓗꓴꓸˍ ꓡꓳ= ꓖꓳ ꓡꓱ ꓥˍ ꓟꓲ ꓪꓴ-ꓢ ꓟꓬꓱꓽ ꓬꓰˍ ꓕꓯ ꓠꓬ꓾ ꓪꓴ-ꓢ ꓠꓲꓹ ꓡꓶꓽ ꓔꓯ ꓛꓳˍ ꓕꓯ ꓠꓬ ꓪꓴ-ꓢ ꓓꓳꓽ ꓚ ꓟꓸ ꓖꓶ ꓙꓰˍ ꓕꓯ ꓠꓬ ꓚꓲꓸ ꓛꓬ ꓦꓲꓻ ꓚꓲꓸ ꓛꓬ ꓮꓽ ꓐ ꓮ ꓟ ꓔꓯ ꓣꓳ ꓟꓽ ꓗꓶꓹ ꓟꓽ ꓶꓽ ꓪ ꓟꓳꓻ ꓟꓽ ꓓ ꓟ ꓦꓬꓼ ꓠꓬꓲ ꓣꓳꓹ ꓜꓳꓽ ꓪˍ ꓥꓳ= ꓖꓳ ꓡꓱ ꓥˍ ꓟꓲ ꓠꓲꓹ ꓟ ꓕꓽ ꓙꓬꓻ= ꓕꓱ ꓟ ꓠꓬ ꓡꓳꓹ ꓬꓰˍ ꓠꓬ꓾ ꓥ ꓠꓬ꓾ ꓣꓳ ꓕꓱ ꓡꓰ ꓪꓴ-ꓢ ꓟꓬꓱꓽ ꓬꓰˍ ꓟ ꓗꓪ ꓐꓰ ꓣꓳ ꓦꓲꓻ ꓢꓴ꓾ ꓣꓳ ꓮꓽ ꓐ ꓮ ꓟ ꓐꓴ꓾ ꓥ ꓠꓬ ꓣꓳ ꓫꓵꓽ ꓣꓳ ꓧꓪ ꓐꓴ꓾ ꓣꓳ ꓢꓷꓸ ꓢꓴ ꓮ ꓙꓵꓽ ꓠꓬ ꓬꓲ ꓪ ꓣꓱꓽ ꓛꓰꓽ ꓑꓯꓹ ꓟꓶˍ ꓟ ꓔꓯ ꓢꓷꓸ ꓠ ꓗꓹ ꓡꓳ=

ꓣꓳ ꓙꓲˍ ꓟ ꓬꓰˍ ꓕꓯ꓾ ꓔꓱꓹ ꓟ ꓬꓰˍ ꓕꓯ꓾ ꓪꓴ-ꓢ ꓟꓬꓱꓽ ꓟꓯꓻˍ ꓕꓯ ꓣꓳ ꓐꓱ ꓶꓽˍ ꓡꓰꓽ ꓟꓽ ꓞꓲꓺ ꓣꓳ ꓮꓽ ꓐ ꓮ ꓟ꓾ ꓣꓳ ꓫꓵꓽ ꓣꓳ ꓧꓪ ꓐꓴ ꓮ ꓙꓵꓽ ꓥ ꓟꓲ ꓣꓱꓽ ꓛꓰꓽ ꓕꓱ ꓟ ꓘꓳꓹ ꓣꓴ ꓟꓶ ꓥꓳ= ꓖꓳ ꓡꓱ ꓠꓬꓲ ꓪꓴ-ꓢ ꓟꓬꓱꓽ ꓔꓯ ꓬꓲ ꓐꓶꓹ ꓢꓯꓼ ꓕꓵꓼ ꓠꓹ ꓟ ꓣꓳ ꓬꓰ ꓡꓯ= ꓪꓴ-ꓢ ꓟꓬꓱꓽ ꓔꓯ ꓬꓲ ꓙꓲ ꓢꓯꓼ ꓕꓵꓼ ꓠꓹ ꓟ ꓣꓳ ꓬꓰ ꓡꓯ=

ꓪꓴ-ꓢ ꓠꓬ ꓣꓳ ꓔꓯ ꓠꓲꓹ ꓠꓵ ꓢꓲ ꓪꓴ-ꓢ ꓠꓬ ꓣꓳ ꓐꓰ ꓔꓬ ꓡꓳ= ꓣꓳ ꓪꓴ-ꓢ ꓟꓬꓱꓽ ꓬꓰ ꓔꓬ ꓗꓪ ꓮ ꓡꓰ ꓗꓪ ꓥˍ ꓟꓲ ꓣꓳ ꓮꓽ ꓐ ꓮ ꓟ ꓥꓳ꓾ ꓣꓳ ꓮ ꓬꓲꓼ ꓠꓬꓲ ꓤ ꓥꓳ= ꓠꓬꓲꓸ ꓠꓬꓲ ꓢꓲꓺ ꓒ ꓬꓰ-ꓢꓴ ꓐꓯ ꓟ ꓡꓰ ꓪꓴ-ꓢ ꓐꓯ ꓘꓶꓽ ꓛꓳ ꓢꓴ ꓥ ꓕ ꓑꓳꓸꓼ ꓠꓬ ꓥꓪ ꓬꓲꓼ ꓥꓪ ꓠꓬꓲ ꓥꓳ꓾ ꓥꓪ ꓮ ꓟ ꓥꓳ꓾ ꓐꓰ ꓐꓯ ꓟ ꓡꓰ ꓐꓰ ꓣꓳ ꓥ ꓟꓲ ꓪꓴ-ꓢ ꓡꓰ ꓙꓰ ꓝꓲˍ ꓗꓪ ꓙꓰ ꓢꓲ ꓠꓬꓲ꓾ ꓕꓱ ꓟ ꓠꓬ ꓣꓳ ꓮ ꓬꓲꓼ ꓮ ꓠꓬꓲ ꓥꓳ꓾ ꓣꓳꓽ ꓮ ꓐ ꓥꓳ꓾ ꓮ ꓟ ꓥꓳ ꓐꓰ ꓐꓯ ꓐ ꓡˍ ꓟ ꓣꓱꓽ ꓛꓰꓽ ꓓꓰꓽ ꓙꓰ ꓡꓯ ꓐꓰ ꓮ ꓙꓵꓽ ꓢꓴ ꓔꓯ ꓬꓲꓼ ꓠꓬꓲꓸ ꓖꓶ ꓠꓲꓹ ꓫꓵˍ ꓡꓳ=