ꓪꓴꓽ ꓓꓰˍ ꓟ꓾ ꓪꓽ ꓠꓬꓲˍ ꓟ ꓬꓲ ꓝꓳꓹ ꓟꓶ

ꓪꓴꓽ ꓓꓰˍ ꓟ ꓬꓲ ꓝꓳ ꓟꓶ

ꓮ ꓘꓶꓸ ꓪꓴꓽˍ ꓟ ꓡꓳ ꓒꓱ ꓐꓴ ꓠꓬ ꓣꓳˍ ꓟ ꓭꓸ ꓛꓲ ꓐꓴ ꓐꓰ ꓫꓬꓹ ꓔ ꓟ ꓥ ꓡꓳ= ꓮ ꓘꓶꓸ ꓫꓵˍ ꓟ ꓓꓴ ꓓꓳ ꓙꓰˍ ꓟˍ ꓟꓲ ꓵꓻ ꓐ ꓡꓹ ꓟ ꓛꓲ ꓦꓽ ꓕꓲ ꓦꓽ ꓗꓪ ꓐꓰ ꓪꓴꓸ ꓔꓴˍ ꓟ ꓥꓳ= ꓮ ꓘꓶꓸ ꓠꓯꓸˍ ꓟ ꓢꓲꓹ ꓠꓯ ꓐꓴ ꓥˍ ꓟꓲ ꓣꓳˍ ꓟ ꓬꓲ ꓫꓵꓸ ꓗꓪ ꓐꓰ ꓡꓰꓽ ꓪꓴꓸ ꓔꓴ ꓪˍ ꓟ ꓥꓳ= ꓪꓽ ꓠꓬꓲˍ ꓟ ꓲ-ꓬ-ꓪ-ꓔꓲ ꓬꓲꓻ ꓙꓬ ꓥˍ ꓟꓲ ꓟꓰ-ꓘ꓾ ꓟ-ꓡꓲ-ꓘ ꓐꓰ ꓟꓬꓱꓺ ꓔ ꓟ ꓬꓲꓻ ꓙꓬ ꓡꓳ ꓤ ꓠꓬꓲꓽ ꓟ ꓡꓳꓽ ꓡ ꓟ ꓗꓪ ꓐꓰ ꓒꓬꓱꓼ ꓡ ꓟ ꓥ ꓡꓳ= ꓟꓲ ꓠꓯ ꓞꓳ ꓤ ꓐꓴ ꓔꓯ ꓚꓬꓴꓸ ꓙˍ ꓟ ꓪꓴ-ꓢ ꓬꓲ ꓪꓴꓽ ꓓꓰˍ ꓟ ꓟꓬꓱꓽ ꓐꓬꓱꓽ ꓘꓶꓽ ꓐꓱ ꓶ ꓚꓬꓴꓸ ꓢꓲꓺ ꓒ ꓠꓬ ꓮ ꓠꓬꓲꓽ ꓡꓴ ꓕꓴ ꓗꓪ ꓐꓰ ꓪꓴꓸ ꓔꓴ ꓗꓷ ꓟ ꓥ ꓡꓳ=

ꓐꓹ ꓐ ꓪꓴ-ꓢ ꓬꓲ ꓚꓲꓸ ꓛꓬ ꓡꓰ ꓚꓬꓴꓸ ꓙˍ ꓟ ꓚꓺ ꓟꓲꓽ ꓔꓯ ꓤ ꓠꓱ ꓤ ꓕꓲ ꓣꓳ ꓗꓪ ꓐꓰ ꓪꓴꓸ ꓔꓴ ꓗꓷ ꓟ ꓥ ꓡꓳ= ꓝꓴꓲꓸ ꓟꓽ ꓙꓳ ꓢꓲꓽ ꓫꓬꓹ ꓟ ꓤ ꓠꓱ ꓤ ꓔꓯ ꓦꓰꓽ ꓛꓲꓽ ꓗꓪ ꓟꓯꓻ ꓠꓹ ꓟ ꓐꓱ ꓶ ꓐꓹ ꓐ ꓪꓴ-ꓢ ꓠꓬ ꓤ ꓟꓶ ꓤ ꓕꓲ ꓣꓳ ꓬꓲ ꓝꓴꓲꓸ ꓟꓽ ꓙꓳ ꓙꓳ ꓦꓵꓻ ꓡˍ ꓟ ꓗꓪ ꓐꓰ ꓪꓴꓸ ꓔꓴ ꓗꓷꓳ=

ꓖꓳ ꓟ ꓑꓶꓸ ꓓꓴ ꓟꓹ ꓟ ꓮꓠꓠ ꓐꓰ ꓟꓬꓱꓺ ꓔ ꓟ ꓟꓹ ꓟ ꓦꓰꓽ ꓛꓲꓽ ꓘꓴꓽ ꓗꓪ ꓟ-ꓡꓲ-ꓬ ꓟꓬꓱ ꓔ ꓟ ꓤ ꓟꓶ ꓤ ꓬꓲ ꓝꓴꓲꓸ ꓟꓽ ꓙꓳ ꓙꓳ ꓤ ꓶꓻ ꓡꓰˍ ꓟ ꓠꓬ ꓚꓬꓴꓸ ꓙˍ ꓟ ꓚ ꓟꓲꓽ ꓥ ꓟ ꓘꓶꓽ ꓫꓵꓽ ꓫꓵꓼ ꓦꓬꓼ ꓠꓬꓲ ꓬꓲ ꓪꓽ ꓠꓬꓲˍ ꓟ ꓬꓲ ꓪꓴꓸ ꓔꓴ ꓓꓴ ꓒꓬꓱꓼ ꓡ ꓗꓷꓳ=

ꓟ-ꓡꓲ-ꓬ ꓠꓬ ꓝꓴꓲꓸ ꓟꓽ ꓙꓳ ꓙꓳ ꓟꓽ ꓦꓵꓻ ꓡ ꓕꓯ ꓠꓽ꓾ ꓗ ꓠꓯꓸ ꓕꓯ ꓪꓴ-ꓢ ꓬꓲ ꓟꓬꓱꓽ ꓔꓯ ꓬꓲ ꓡꓰ ꓛꓳ ꓫꓱꓽ ꓠꓹ ꓟ ꓠꓲꓹ ꓡꓶꓽ ꓟꓽ ꓙꓳ ꓕꓯ ꓠꓽ ꓚꓬꓴꓸ ꓙˍ ꓟ ꓟꓬꓱꓽ ꓠꓬ ꓝꓮꓲ ꓕꓲ ꓚꓱꓹ ꓗꓷ ꓡꓰˍ ꓥ ꓟꓽ ꓢꓷꓸ= ꓖꓳ ꓟ ꓪꓴꓸ ꓠꓬꓲ ꓟ-ꓡꓲ-ꓬ ꓬꓲ ꓟꓲ ꓠꓯ ꓗꓪ ꓝꓴꓲꓸ ꓟꓽ ꓙꓳ ꓙꓳ ꓦꓵꓻ ꓡˍ ꓟ ꓠꓬ ꓪ ꓜꓲ ꓙꓲˍ ꓟ ꓟꓲ ꓠꓯ ꓬꓲ ꓪꓴꓸ ꓔꓴˍ ꓟˍ ꓟꓲ ꓒꓬꓱꓼ ꓡ ꓗꓷꓳ=

ꓖꓳ ꓡꓱ ꓠꓬꓲ ꓪꓴ-ꓢ ꓬꓲ ꓪꓽ ꓠꓬꓲˍ ꓟ ꓠꓬ ꓬꓲ ꓪꓴꓸ ꓕꓯ ꓡꓰꓽ ꓙꓳˍ ꓟ ꓥ ꓡ? ꓔꓱꓹ ꓫꓵ ꓗꓪ ꓠꓬ ꓟꓽ ꓙꓳ ꓡ? ꓐꓯ ꓕꓯ ꓠꓽ ꓙꓳˍ ꓡꓳ= ꓡꓴ-ꓘ 11ꓽ27-28 ꓗꓪ “ꓬꓰ-ꓢꓴ ꓕꓱ ꓟꓬ ꓫꓵꓽ ꓔꓯ ꓐꓯ ꓔꓬ ꓕꓯ꓾ ꓞꓳ ꓜꓴ ꓗꓪ ꓟ ꓤ ꓟꓶ ꓤ ꓕꓲ ꓣꓳ ꓠꓬ ꓢꓯꓼ ꓓꓽ ꓟ ꓡꓰ ꓬꓲ ꓔꓯ꓾ ꓠꓴ ꓔꓯ ꓦꓵꓻ ꓗꓷ ꓢꓴˍ ꓐꓰ ꓮꓽ ꓚꓵꓹ ꓖꓶ ꓛꓵꓼ ꓗꓷ ꓢꓴ ꓖꓳ ꓕꓲ ꓣꓳ ꓠꓽ ꓶꓼ ꓙꓳ ꓫꓱꓹ ꓙꓳˍ ꓡꓳ꓾ ꓐꓯ ꓡꓳ” ꓢꓲꓺ ꓒ ꓬꓰ-ꓢꓴ ꓡꓰ ꓫꓸ ꓕꓱ ꓔꓬ ꓕꓯ ꓞꓳ ꓜꓴ ꓐꓴ ꓗꓳ ꓡꓳ ꓗꓪ ꓐꓰ ꓘꓴ ꓔꓴ ꓡˍ ꓟ ꓤ ꓟꓶ ꓤ= ꓕꓱ ꓟ ꓠꓬ ꓞꓳ ꓘꓹ ꓘꓴꓽ ꓗꓪ ꓟ ꓗ ꓧꓳꓸ ꓪꓴꓽ ꓢꓴ ꓐꓴ꓾ ꓳꓠꓡꓲꓠꓰ ꓗꓪ ꓚꓲꓸ ꓛꓬ ꓪꓴꓽ ꓫꓵꓽ ꓔꓯ ꓪꓴꓽ ꓞꓰ ꓡꓰ ꓠ ꓛꓲꓺ ꓕꓳꓽ ꓶ ꓐꓳ ꓢꓲ ꓪꓴꓽ ꓔꓬ ꓟ ꓟꓽ ꓥ ꓟ ꓔꓯ ꓥ ꓡꓳ꓾ ꓟꓽ ꓒꓵꓽ ꓟ ꓔꓯ ꓒꓵꓽˍ ꓡꓳ ꓐꓯ ꓢꓲ ꓪꓴꓽ ꓔꓬ ꓢꓴ ꓐꓴˍ ꓡꓰ ꓐꓰ ꓟꓽ ꓥ= ꓔꓱꓹ ꓚꓵˍ ꓟ ꓔꓯ ꓐꓯ ꓓꓳ ꓡˍ ꓟ ꓫꓸ ꓕꓱ ꓘꓶꓽ ꓥ ꓡꓳ=

ꓞꓳ ꓜꓴ ꓐꓴ ꓘꓴꓽ ꓗꓪ ꓐꓰ ꓬꓲ ꓟꓹ ꓟ ꓔꓯ ꓓꓳ ꓟꓴꓹ ꓟ ꓤ ꓟꓶ ꓤ ꓗꓪ ꓐꓰ ꓪꓴꓸ ꓔꓴ ꓢꓲ꓾ ꓶꓼ ꓘꓶꓽ ꓫꓱꓸ ꓘꓶꓽ ꓚꓺ ꓔꓬ ꓟ ꓢꓲ ꓒ ꓬꓰ-ꓢꓴ ꓠꓬ ꓶꓼ ꓘꓶꓽ ꓫꓱꓸ ꓘꓶꓽ ꓝꓮꓲ ꓕꓲ ꓟ ꓔꓯ ꓝꓸ ꓢꓲ ꓚꓺ ꓙꓰˍ ꓡꓳ= ꓕꓱ ꓟ ꓠꓬ “ꓪꓴ-ꓢ ꓐꓯ ꓘꓶꓽ ꓑ ꓙꓽ ꓢꓲ ꓒꓵꓽ ꓛꓳ ꓢꓴ ꓠꓽ ꓟꓬꓽ ꓠꓬꓲ ꓶꓼ ꓙꓳ ꓫꓱꓹ ꓙꓳˍ ꓡꓳ=”

ꓪꓴ-ꓢ ꓠꓲꓹ ꓡꓶꓽ ꓔꓯ ꓠꓲꓹ ꓒꓵꓽ ꓠꓲꓹ ꓡꓱ ꓘꓳꓹ ꓣꓴ ꓗꓷ ꓢꓲ ꓤ ꓟꓶ ꓡꓯꓸ ꓚꓵ ꓤꓶꓻ ꓗꓪ ꓤ ꓠꓱ ꓶꓻ ꓡꓰ ꓟ꓾ ꓤ ꓠꓱ ꓦꓵˍ ꓕꓯ ꓫꓸ ꓙꓵ ꓢꓲ ꓐꓶꓽ ꓗꓴꓷꓼ ꓗꓪ ꓦꓵꓻ ꓪ ꓡꓰ ꓟ꓾ 2 ꓘꓳꓼ ꓡꓰꓸ ꓟꓽ ꓐꓲ ꓟ ꓮ ꓐꓲ ꓤ ꓐꓰ ꓗꓴꓷꓼ ꓗꓪ ꓐꓰ ꓛꓰꓹ ꓙꓰ ꓪ ꓡꓰ ꓟ꓾ ꓤ ꓠꓱ ꓒꓲꓼ ꓡꓰ ꓟ ꓟꓹ ꓟ ꓒꓬꓱꓼ ꓡꓰ ꓟ꓾ ꓮ ꓘꓶꓸ ꓫꓸˍ ꓟ ꓢꓲꓹ ꓬꓰ ꓒ ꓬꓲ ꓤ ꓟꓶ ꓒꓬꓱꓼ ꓗꓷ ꓟ꓾ ꓠꓴ ꓤ ꓪꓴꓸ ꓡꓰ ꓫꓵꓽ ꓥ ꓡ? ꓐꓰ ꓢꓴ ꓡꓰ ꓐꓯ ꓟ ꓟꓶ ꓗꓷ ꓟ꓾ ꓝꓴꓲꓸ ꓙꓳ ꓢꓴ ꓕꓲ ꓣꓳˍ ꓡꓰ ꓐꓰ ꓕꓲ ꓣꓳˍ ꓟ ꓬꓲ ꓤ ꓔꓲꓸ ꓔꓯ ꓢꓰꓼˍ ꓟ ꓔꓯ ꓟꓳꓻ ꓪ ꓟ ꓥꓪ ꓟꓹ ꓟ ꓠꓬ꓾ ꓥ ꓡꓳ꓾ ꓶꓼ ꓙꓳ ꓫꓱꓹ ꓙꓳˍ ꓡꓳ꓾ ꓐꓰ ꓐꓯ ꓗꓷ ꓟ ꓥ ꓡꓳ=

ꓟ-ꓡꓲ-ꓬ ꓬꓲ ꓝꓴꓲꓸ ꓟꓽ ꓙꓳ ꓙꓳ ꓖꓳ ꓓꓱꓽ ꓠꓬꓲꓽ ꓔꓱꓹ ꓐꓲ ꓡꓰ ꓟ ꓠꓬ ꓟꓲ ꓠꓯ ꓬꓲ ꓚꓬꓴꓸ ꓢꓲ ꓒ ꓬꓲ ꓟꓹ ꓟ ꓕꓲ ꓣꓳˍ ꓡꓰꓽ ꓟꓽ ꓞꓲ꓾ ꓟꓲ ꓠꓯ ꓞꓳ ꓤ ꓐꓴ ꓦꓻ ꓔꓯ ꓟꓳꓸ ꓟꓹ ꓟ ꓕꓲ ꓣꓳ꓾ ꓐꓹ ꓐ ꓪꓴ-ꓢ ꓡꓰ ꓚꓰꓼ ꓔ ꓟ ꓮ ꓙꓵꓽ ꓘꓴꓽ ꓠꓯꓸꓼ ꓗꓪ ꓢꓲꓽ ꓫꓬꓹ ꓓꓰ ꓡꓰˍ ꓟ ꓞꓳ ꓤ ꓕꓲ ꓣꓳˍ ꓡꓰ ꓐꓰ ꓒꓬꓱꓽ ꓟꓳꓻ ꓡ ꓗꓷ꓾ ꓦꓵꓻ ꓓꓳ ꓡ ꓗꓷ ꓟ ꓥ ꓡꓳ= ꓢꓲ ꓒ ꓬꓲ ꓚꓲꓸ ꓛꓬ ꓡꓰ ꓖꓶꓽ ꓗꓷ ꓟ ꓕꓱ ꓟꓹ ꓟ ꓠꓬ꓾ ꓥꓪ ꓔꓯ ꓠꓲꓹ ꓠꓵꓻˍ ꓡ꓾ ꓐꓰ ꓠꓺ ꓠꓬꓲ ꓟꓽ ꓛꓵ= ꓟꓲ ꓠꓯ ꓟꓹ ꓟ ꓐꓴ ꓡꓰ ꓚꓲꓸ ꓛꓬ ꓤ ꓐꓱ ꓐꓴ ꓐꓱ ꓶ ꓕꓲ ꓘꓳꓼ ꓡꓱꓸꓼ ꓕꓲ ꓤꓶꓻ ꓡꓱꓸꓼ ꓣꓳ ꓔꓯ ꓠꓲꓹ ꓠꓵꓻˍ ꓕꓯ ꓠꓽ ꓪꓴ-ꓢ ꓬꓲ ꓟꓹ ꓟ ꓠꓬ ꓣꓳ ꓔꓯ ꓟꓬꓽ ꓠꓬꓲ ꓠꓲꓹ ꓠꓵˍ ꓟ ꓔꓯ ꓠꓲꓹ ꓪꓴꓽ ꓪꓴꓽ ꓙꓵꓻ ꓓꓹ ꓡꓳ=