ꓬꓰ-ꓢꓴ ꓡꓰ ꓬꓳ-ꓦ ꓔꓯ ꓫꓱꓸ ꓖꓶˍ ꓟ

ꓡꓴ-ꓘ = 7ꓽ24-30

ꓤ ꓟꓶ ꓤ ꓐꓴ ꓗꓪ ꓐꓰ ꓦꓵꓻ ꓔ ꓟꓶ ꓢꓴ ꓐꓴ ꓗꓳ ꓡꓳ ꓗꓪ ꓬꓳ-ꓦ ꓕꓯꓽ ꓢꓲ ꓪꓴꓽˍ ꓟ ꓕꓲ ꓣꓳˍ ꓟꓲ ꓟꓽ ꓙꓳ= ꓖꓳ ꓡꓱ ꓥˍ ꓟꓲ ꓪꓴ-ꓢ ꓗꓴꓷꓼ ꓠꓯꓸꓼ ꓗꓪ ꓣꓳꓺ ꓓꓰ ꓡꓰ ꓢꓴ ꓠꓬ꓾ ꓬꓲ ꓕꓯꓽ ꓢꓲ ꓪꓴꓽˍ ꓢꓰꓽ ꓡꓳ꓾ ꓐꓰ ꓢꓲ ꓒ ꓬꓰ-ꓢꓴ ꓡꓰ ꓐꓯˍ ꓡꓳ= ꓖꓳ ꓡꓱ ꓥˍ ꓟꓲ ꓪꓴ-ꓢ ꓬꓲ ꓠꓯꓸˍ ꓟ ꓠꓵꓻ ꓠꓲꓹ ꓔꓯ ꓟꓸ ꓖꓶˍ ꓟ ꓢꓷꓸ ꓡꓰ ꓓꓴ ꓥ ꓟ ꓡꓯꓼ ꓐꓳ ꓔꓶꓸ ꓓꓴ ꓕꓯꓽ ꓢꓲ ꓗꓪ ꓟ ꓢꓲꓺ ꓒ ꓬꓰ-ꓢꓴ ꓔꓯ ꓠꓬ ꓬꓲ ꓟꓽ ꓪ ꓟꓳꓻ ꓡꓰ=

ꓣꓳ ꓐꓴ ꓠꓬ ꓪꓴ-ꓢ ꓬꓲ ꓠꓯꓸˍ ꓟ ꓠꓵꓻ ꓠꓲꓹ ꓔꓯ ꓢꓷꓸ ꓪˍ ꓟ ꓪꓴꓸ ꓠꓬꓲ ꓣꓳꓽ ꓠꓬ ꓞꓳ ꓒꓵꓽ ꓒꓵꓽˍ ꓡꓳ꓾ ꓐꓰ ꓐꓯ ꓓꓹ ꓡꓳ= ꓣꓳ ꓐꓴ ꓠꓬ ꓝꓴꓲꓸ ꓐꓰ ꓫꓵꓻˍ ꓟ ꓔꓯ ꓧꓪꓸ ꓡꓰ ꓗꓷ ꓟ ꓢꓲꓺ ꓒ ꓐꓰ ꓕꓲ ꓪꓽ ꓙ ꓫꓱꓽˍ ꓟ ꓙꓵꓽ ꓪ ꓘꓳꓹ ꓣꓴ ꓟꓶ ꓡꓰꓳ= ꓬꓲ ꓘꓴ ꓜꓲꓼ ꓞꓳ ꓠꓯꓸꓼ ꓗꓪ ꓣꓳ ꓕꓲ ꓣꓳ ꓡꓰꓽ ꓕꓲ ꓣꓳ ꓠꓬ ꓪꓴ-ꓢ ꓬꓲ ꓕꓲ ꓦꓲꓻ ꓢꓴ ꓒꓬꓱꓼ ꓡ ꓗꓷ ꓟ ꓥ ꓡꓳ=

ꓪꓴ-ꓢ ꓔꓬ ꓗꓪ ꓔꓷꓼ ꓛꓲꓺ ꓬꓰ ꓠꓹ ꓟ ꓾ ꓗꓼ ꓛꓲꓺ ꓬꓰˍ ꓠꓹ ꓟ ꓐꓱ ꓶ ꓬꓲ ꓗꓶ ꓔꓲꓸ ꓬꓰ ꓟ ꓢꓲꓽ ꓫꓬ ꓕꓳꓽ ꓶ ꓥˍ ꓟꓲ ꓣꓳ ꓡꓯꓼ ꓛꓲꓺ ꓗꓪ ꓓꓹ ꓟ ꓥ ꓡꓳ= ꓬꓲ ꓡꓰ ꓫꓬꓹ ꓔꓶ ꓔ ꓟ ꓢ-ꓗ-ꓣ-ꓟꓯꓹ-ꓔꓴ ꓐꓴ ꓔꓯ ꓥˍ ꓟꓲ ꓘꓳꓹ ꓣꓴ ꓟꓶ ꓔꓬꓹ ꓟ ꓥ ꓡꓳ= ꓕꓲ ꓚꓱꓹ ꓐꓯ ꓠꓬ ꓣꓳ ꓐꓴ ꓔꓯ ꓣꓳ ꓙꓰ ꓛꓲꓺ ꓬꓰ ꓠꓹ ꓟˍ ꓟꓲ ꓙꓳ꓾ ꓣꓳ ꓐꓴ ꓠꓬ ꓡꓳꓹ ꓬꓰˍ ꓕꓯ ꓮ ꓡꓰ ꓗꓪ ꓑꓰ ꓬꓰˍ ꓥꓳ꓾ ꓡꓳꓹ ꓬꓰˍ ꓕꓲ ꓠꓬꓲ ꓗꓪ ꓮ ꓡꓰ ꓗꓪ ꓛꓲ ꓬꓰˍ ꓥꓳ ꓐꓯ ꓟ ꓔꓯ ꓥˍ ꓟꓲ ꓢꓷꓸ ꓢꓴ ꓐꓴ ꓥ ꓡꓳ=

ꓔꓱꓹ ꓚꓵˍ ꓟ ꓪꓴ-ꓢ ꓔꓯ ꓙꓵꓻ ꓔꓬ ꓪˍ ꓟ ꓦ ꓡꓱ ꓔꓬ ꓪˍ ꓟ ꓙꓵꓽ ꓪ ꓐꓰ ꓕꓲ ꓪꓽ꓾ ꓔꓱꓹ ꓚꓵˍ ꓟ ꓙ ꓖꓴ ꓕꓯꓽ ꓢꓲ ꓗꓪ ꓫꓱꓽ ꓔꓬ ꓢꓴ ꓐꓴ ꓥ ꓡꓳ= ꓕꓱ ꓟ ꓐꓱ ꓶ ꓣꓳ ꓮ ꓕꓯ ꓟꓲ ꓚꓲꓸ ꓔ ꓢꓲ ꓫꓸ ꓟꓳ ꓔꓬ ꓪˍ ꓟ ꓥ ꓡꓳ= ꓫꓸ ꓟꓳ꓾ ꓐꓯ ꓟ ꓫꓸ ꓪ ꓘꓶꓽ ꓐꓱ ꓶ꓾ ꓫꓸ ꓟꓳ ꓐꓯ ꓟ ꓐꓯ ꓘꓶꓽ ꓐꓱ ꓶ ꓬꓲ ꓒꓵꓽ ꓐꓶꓻ ꓟꓽ ꓛꓵ ꓟ ꓥ ꓡꓳ=

“ꓪꓴ-ꓢ ꓠꓬ ꓙꓲˍ ꓟ ꓥ ꓢꓲ꓾ ꓬꓲ ꓫꓱꓸ ꓤ ꓠꓲꓹ ꓠꓬ ꓮ ꓕꓯˍ ꓟꓲ ꓕꓶꓺ ꓞꓹ ꓟ ꓪꓴꓸ ꓠꓬꓲ ꓬꓲ ꓣꓱꓽ ꓛꓰꓽ ꓔꓯ ꓓꓳ ꓟꓴꓹ ꓡꓯ=”