ꓢꓲ-ꓟꓰ ꓠꓬ ꓬꓰ-ꓢꓴ ꓔꓯ ꓟꓳꓻ ꓪˍ ꓟ

ꓡꓴ-ꓘ 2ꓽ22-35

ꓠꓬꓲꓸ ꓠꓬꓲ ꓟ ꓢꓲꓽ ꓫꓬ ꓕꓳ ꓶ ꓥ ꓟ ꓡꓴ-ꓘ 2ꓽ22-35 ꓗꓪ ꓬꓲ-ꓢꓷ-ꓡꓰ ꓐꓴ ꓔꓯ ꓠꓲꓹ ꓗꓴ ꓖꓶ ꓡ ꓢꓴ ꓔꓯ ꓮ ꓟꓬꓹ ꓘꓳꓼ ꓦꓴꓻ ꓠꓬꓹ ꓗꓷ ꓟ ꓢꓲ-ꓟꓰ ꓠꓬ꓾ ꓟ-ꓡꓲ ꓐꓰ ꓬꓳ-ꓢꓷ ꓐꓴ ꓬꓲ ꓪ ꓤ ꓪꓴꓽ ꓥ ꓟ ꓬꓰ-ꓢꓴ ꓔꓯ ꓪꓴ-ꓢ ꓔꓯ ꓔꓲ ꓚꓰꓸ ꓠꓹ ꓟ ꓐꓱ ꓶ ꓪꓽ ꓘꓴ ꓦꓲꓻ ꓗꓪ ꓔꓯꓹ ꓓꓵꓽ ꓡ ꓔꓬ ꓕꓯ ꓢꓲ-ꓟꓰ ꓠꓬ ꓬꓰ-ꓢꓴ ꓔꓯ ꓟꓳꓻ ꓪˍ ꓟ ꓟꓸ ꓟꓲꓽ ꓥ ꓡꓳ=

ꓢꓲꓽ ꓫꓬ ꓕꓳ ꓶ ꓕꓱ ꓟ ꓠꓬ ꓣꓳ ꓐꓴ ꓐꓱ ꓶ ꓕꓲ ꓠꓬꓲ ꓙꓳˍ ꓠꓬ ꓥꓳ ꓡꓳꓸ ꓓꓴ ꓣꓳ ꓔꓯ ꓡˍ ꓥꓳ ꓐꓰ ꓐꓯ ꓟꓸ ꓖꓶ ꓔꓬ ꓡꓳ= ꓕꓱ ꓟ ꓔꓯ ꓣꓳ ꓠꓲꓹ ꓟ ꓫꓵꓺ ꓢꓲ ꓡꓳꓸ ꓠꓬꓹ ꓔꓬꓹ ꓠꓹ ꓟ ꓡꓰꓽ ꓥ ꓡꓳ= ꓣꓳ ꓠꓲꓹ ꓫꓵˍ ꓟ ꓣꓳ ꓓꓵꓽ ꓙ ꓔ ꓟ ꓐꓴ ꓠꓬ ꓣꓳ ꓠꓲꓹ ꓡꓶꓽ ꓙꓳˍ ꓟ ꓡꓰ ꓒꓬꓱꓼ ꓡˍ ꓥꓳ ꓐꓰ ꓠꓽ ꓕꓽ ꓥꓳ ꓡꓳꓸ ꓔ= ꓪꓴ-ꓢ ꓠꓬ ꓬꓲ ꓡꓰ ꓙ ꓖꓶ ꓔ ꓟ ꓬꓲ ꓙꓵꓹ ꓐꓰ ꓬꓲ ꓡꓰ ꓙ ꓖꓶ ꓔ ꓖꓴ ꓗꓪ ꓣꓳ ꓐꓴ ꓐꓱ ꓶ ꓮ ꓡꓰ ꓕꓲ ꓫꓵꓽ ꓠꓬ ꓟꓬꓽ ꓠꓬꓲ ꓙꓲˍ ꓟ ꓔꓯ ꓢꓷꓸˍ ꓟ ꓪꓴꓸ ꓠꓬꓲ ꓣꓳ ꓠꓲꓹ ꓫꓵˍ ꓟ ꓠꓲꓹ ꓡꓶꓽ ꓐꓰ ꓪꓴ-ꓢ ꓡꓰ ꓙꓽ ꓖꓶ ꓔ ꓟ ꓠꓬ ꓮ ꓔꓲꓸ ꓤ ꓟꓽ ꓫꓱꓸ ꓡꓯ ꓘꓳ ꓟꓽ ꓪꓽ ꓡꓯ ꓘꓳ ꓓꓴ ꓙꓳˍ ꓥꓳ=

ꓞꓳ ꓤ ꓤꓶꓻ ꓠꓬ ꓫꓸ ꓘꓶꓻ ꓓꓴ ꓐꓰ ꓫꓸ ꓓꓴ ꓡꓰꓽ ꓐꓲꓻ ꓓꓹ ꓡꓳ= ꓣꓳ ꓣꓱꓽ ꓬꓰˍ ꓟ ꓠꓬ ꓣꓳ ꓔꓯ ꓐꓬ ꓡꓰ ꓝꓲˍ ꓡ꓾ ꓥ ꓠꓬ꓾ ꓣꓳ ꓔꓯ ꓪꓴꓽ ꓟꓴ ꓡ ꓝꓲˍ ꓡ ꓐꓯ ꓟ ꓔꓯ ꓔꓲꓺ ꓢꓲꓽ ꓢꓲꓽ ꓡꓰꓽ ꓙꓽ ꓜꓲꓼ ꓢꓷꓸ ꓡꓰ ꓢꓲ ꓣꓳ ꓤꓶꓻ ꓗꓪ ꓔꓳꓹ ꓜꓳꓽ ꓡˍ ꓟ ꓫꓸ ꓘꓶꓻ ꓓꓴ ꓐꓰ ꓫꓸꓓꓴ ꓐꓴ ꓔꓯ ꓘꓳꓹ ꓣꓴ ꓠ ꓔ ꓡꓳ=

ꓣꓳ ꓟꓲ ꓙꓬꓼ ꓢꓲ ꓟ ꓦꓬꓼ ꓠꓬꓲ ꓗꓪ ꓮ ꓡꓰ ꓓꓹ ꓟ ꓣꓳꓽ ꓟꓽ ꓢꓷꓸ ꓟˍ ꓡꓰ ꓐꓰ ꓮ ꓡꓰ ꓫꓵꓽ ꓫꓵꓽ ꓪꓴ ꓔꓯ ꓮ ꓡꓰ ꓐꓰ ꓚꓴꓽ ꓬꓲꓹ ꓓꓶꓽ ꓠꓯꓹ ꓟ ꓣꓳꓽ ꓟꓽ ꓢꓷꓸ ꓟ ꓥꓳ= ꓣꓳ ꓫꓬꓹ ꓔꓱꓹ ꓟꓽ ꓐ ꓡˍ ꓟ꓾ ꓣꓳ ꓧꓪꓸ ꓡꓰ ꓟꓽ ꓐ ꓡ ꓟ ꓫꓵꓽ ꓪꓴ ꓣꓳꓽ ꓔꓯ ꓪꓴ-ꓢ ꓡꓰ ꓟꓽ ꓖꓶ ꓡ ꓟ ꓪꓴꓸ ꓠꓬꓲ ꓣꓳ ꓠꓬ ꓪꓴ-ꓢ ꓔꓯ ꓙꓵꓻ ꓠꓯꓹ ꓟ ꓥ ꓡꓳ=

ꓕꓱ ꓟ ꓮ ꓙꓵꓽ ꓠꓬ ꓠꓬꓲꓸ ꓠꓬꓲ ꓟ ꓢꓲꓽ ꓫꓬ ꓕꓳꓽ ꓶ ꓗꓪ ꓐꓰ ꓣꓳꓽ ꓢꓳ ꓣꓴ ꓠꓹ ꓟ ꓐꓰ ꓚꓵꓺ ꓚꓵꓺ ꓣꓳ ꓮꓽ ꓟ ꓥ ꓟ ꓔꓯ ꓢꓷꓸ ꓠꓹ ꓟ ꓥ ꓡꓳ= ꓪꓴ-ꓢ ꓔꓬ ꓗꓪ ꓮ ꓕꓯꓽ ꓟꓲ ꓪꓽ ꓘꓴ ꓢꓲ꓾ ꓬꓲ ꓠꓬ ꓣꓳ ꓔꓯ ꓛꓳ ꓫꓱꓽ ꓠꓹ ꓟ ꓙꓻ ꓖꓴ ꓟꓸ ꓖꓶ ꓡˍ ꓥꓳ=